Cit atir i jami ma tye

Cit atir ka ma nyuto lok ma tye iye

Tika Tira me Baibul Pud Konyowa i Kare-ni?

Tika Tira me Baibul Pud Konyowa i Kare-ni?

JO MOGO GIWACCI PE KONYOWA. Daktar mo acel owacci tic ki Baibul i kare-ni bedo calo tic ki buk me cayan ma kicoyo i mwaka 1920 ki wiye me pwonyo litino kwan i kare-ni. Jo ma pe giye i kom Baibul gitwero penyi ka iye tic ki buk ma nyuto kit me tic ki kompiuta macon me tic kwede i kom kompiuta manyen. Jo mukene gineno Baibul calo obedo buk ma otii ma dong pe twero konyogi.

Pingo ngat moni twero tic ki buk macon-ni i kare man me tet manyen-ni? Tye kabedo mapol me intanet ma gicwalo woko tam ki pwony manyen kare ki kare. Telebijon mapol ginyuto jami me pwony ma a ki bot jo maryek, jo ma miyo tam i kom kwo ki dok gilwongo luco buke mapol. Lucat buke gicato buke mapol ma miyo tam ki dano, man oweko gitye ka tiyo cente bilion dolla mapol adada.

Ki lwak lok angeya manyen ma kati kare ki kare i kare-ni, tika pud dok mitte ni wakwan Baibul​—buk ma kicoyo mwaki 2,000 angec? Tika nongo pe tye lok ada ka jo ma pe giye i kom Baibul giwacci tic ki Baibul tye calo tic ki buk me cayan nyo buk ma nyuto kit me tic ki kompiuta ma karene dong okato woko? Ki lok ada, tam ma kit meno pe tye atir. Tet ki ngec me cayan lokke kare ki kare, ento tika jami ma mitte me kwo pa dano lokke? Dano gimito ngeyo pingo gitye kwo, gimito nongo yomcwiny, bedo labongo lworo, ki dong bedo ki wat maber ki jo me otgi kacel ki luremgi.

Kadi bed ni Baibul otii, pud miyo tam ki pwony i kom jami magi ki mapol. Baibul bene nyuto ni Lacwecwa kikome aye ma oweko kicoyo lok ma iye. Nyuto ni watwero nongo tira ma gudo yo me kwowa ducu ki dok konyowa me lweny ki peko mapatpat i kwowa. (2 Temceo 3:16, 17) Dok bene nyuto ni twero miniwa tam i kare ma mitte kikome​—tamme pe lokke! Baibul bene wacci: “Lok pa Lubanga obedo gin makwo.”​—Jo Ibru 4:12.

Lok magi ma Baibul waco-ni tika tye ada? Tika karene dong okato woko kece pud tam ma iye tiyo dok konyowa i kare-ni​—ma oweko tye buk makwo? Man obedo Wi Lubele mukwongo i kin mukene ma kitgi dok pat ma kiyubo me konyi nongo lagam i kom lapeny magi.