Cit atir i jami ma tye

Cit atir ka ma nyuto lok ma tye iye

Pwony me Baibul​—Konyowa Kare Ducu

Pwony me Baibul​—Konyowa Kare Ducu

GO KONG MAN: Icito i limo piny ka ma kigwoko iye jami mogo me kare macon. Pol jami magi dong guyec, gutyer dok guballe woko. Mukene i kingi butgi mogo dong pe. Ento acel i kingi pud tye maber, tye kit ma kiyubo kwede con dok gin mo keken ki i kome pe oballe. Ipenyo ngat ma tye ka nyutti jami magi ni: “Man aye gin manyen loyo?” Ci en ogamo ni: “Ku, meno aye gin ma dong otii loyo, dok pe kiroco ka mo keken.” Ento dok ipenye ni: “Onongo kigwoko ka mo maber?” En ogamo ni: “Ku, en aye dong gin ma obedo ka marac loyo, i wi kot ki yamo magwar. Jo mapol bene gutemme me balone woko.” Iromo bedo ki ur adada, kun ipenyo ni, ‘kiyubo ki gin ango?’

I yo acel-li, Baibul bene rom ki gin meno ma kite dok pat tutwalle. Obedo buk mo macon adada​—dok otii loyo buke mapol. Ki lok ada, buke macon mogo gire pud tye. Ento calo jami macon ma kigwokogi-ni, cocgi dong guballe woko ka kare woto ki kato. Lok ma giloko me labolle, madok i kom ngec me cayan, dong pe girwatte ki ngec manyen ma dano giye iye i kare-ni. Tam ma gimiyo ma lubbe ki yotkom dok keto kwo pa dano ka ma ding ma ka miyo kony. Dok coc macon mapol dong gudong bute keken, dulgi mukene orwenyo nyo oballe woko.

Ento Baibul dok pat adada. Kicako coyone cencwari 35 angec, ento lokke pud tye maber dok pe olokke. Dok kadi bed dano gutemme kare ki kare pi cencwari mapol​—me wangone, gengone ni dano mogo pe gubed kwede ki dok nyuto cac i kome​—lok ma kicoyo iye pud tye kit macon. Lok ma iye pe tii dok karene pe kato kadi bed ngec manyen obin, ma ka meno, Baibul dok tito jami mapol ma bitimme i anyim i yo me aura adada.​—Nen bok ma wiye tye ni  “Tika Karene Dong Okato Woko Kece Tito Jami ma Onongo pe Gingeyo Con?

CIK MA WAMITOGI I KARE-NI

Itwero penye ni, ‘Tika pwony me Baibul pud konyowa wa i kare-ni.’ Me gamo lapeny man, penye kekeni ni: ‘Peko mene ma dong rac loyo ma dano gitye ka denone i kare-ni? Mene ma dong kelo lworo loyo?’ Gwok iromo tam i kom lweny, balo kabedo murumowa, turo cik, nyo camucana. Kong dong wanen cik ma igi lac mogo ma Baibul pwonyo. Ka itye ka timo meno, penye kekeni ni, ‘Ka onongo dano gilubo cik magi, onongo kono lobo pe tye kabedo maber makato?’

BEDO KI KUC

“Gitye ki gum [yomcwiny] jo ma kelo kuc, pien gin aye gibilwongogi ni litino pa lubanga.” (Matayo 5:9) “Ka ce twerre ki tung botwu, myero wubed ki kuc ki dano ducu.”​—Jo Roma 12:18.

TIMO KICA

“Gitye ki gum [yomcwiny] lukica, pien gin bene gibitimo kica botgi.” (Matayo 5:7) “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot [Jehovah] * bene ceng otimowu kica.”​—Jo Kolocai 3:13.

BEDO LABONGO APOKAPOKA ME RANGI DEL KOM

Lubanga “ocweyo rok ducu nia ki i kom dano acel wek gubed i wi lobo.” (Tic pa Lukwena 17:26) “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”​—Tic pa Lukwena 10:34, 35.

GWOKO KABEDO MURUMOWA

“Rwot [Jehovah] Lubanga otero dano, oketo i Eden wek opur, dok ogwok bene.” (Acakki 2:15) Lubanga ‘bijwero jo ma tye ka balo lobo woko.’​—Niyabo 11:18.

KWERO CWINY ME WORO KI TIM CAROCARO

“Wugwokke i paro lim; pien kwo pa dano pe cung i wel lim mapol ma en tye kwede.” (Luka 12:15) “Tim kwele ki tim carocaro ducu, ki woro me lim pe myero gilwong nyinggi i kinwu; meno aye gin ma myero bot jo pa Lubanga.”​—Jo Epeco 5:3.

NGAT MA GENNE DOK MA TIYO MATEK

“Wamito ni wati gin maber i kare ducu.” (Jo Ibru 13:18) “Dano ma yam bedo ka kwalo jami pa jo mukene myero dong owek kwo obedi; myero en ocak tiyo tic maber ki cinge.”​—Jo Epeco 4:28.

ADWOGI MABER MA BINO KA WAKONYO LUPEKO

“Wucuk cwiny jo ma cwinygi odoko nyap, wukony jo ma goro, wudi cwinywu bene i kom dano ducu.” (1 Jo Tecalonika 5:14) ‘Kony litino kic ki mon ma coggi oto i kom can ma gitye kwede.’​—Yakobo 1:27.

Baibul pe gik ki miniwa cik meno keken. Ento pwonyowa me maro cik meno ki me ketogi i tic i kwowa me nino ducu. Ka onongo dano mapol gilubo cik meno, onongo mono kono pe okonyo me  jwiko peko ma dano gitye ka denone i kare-ni? Ki loko ada, cik me Baibul konyo adada i kare-ni dok bene rwatte ki karewa-ni adada! Ento gin ango ma pwony me Baibul twero timone piri i kare-ni?

KIT MA PWONY ME BAIBUL TWERO KONYI I KARE-NI

Laco mo maryek loyo yam owaco ni: ‘ryeko nen ki i ticce.’ (Matayo 11:19) In bene pe iye i lok meno? Ryeko ma watye kwede nen i kwowa ka waketo i ticwa. Pi meno, iromo tamo ni: ‘Ka ada Baibul konyo, ci myero pe alokaloka onen i kwona? Twero konya nining me lweny ki peko ma atye ka wok iye i kare-ni?’ Nen kong labol man.

Delphine * onongo dwong ki tic me atiya, dok kwone onongo tye maber. Cutcut jamine olokke, ci en ocako kato ki i kwo matek. Nyare ma tye ki mwaka apar ki wiye oto woko. Kenygi oket woko. Can cente ocako diye. En owaco ni: “Pe onongo dong angeyo anga ma abedo kulu​—nyara pe, cwara bene oweka woko dok ota oballe woko. Onongo awinyo calo konya pe dok ape ki tyen lok mo keken me medde ki kwo.

Delphine ocako neno maber ada pa lok man, ma waco ni: “Kare me kwowa romo mwaka pyerabiro, nyo pyeraboro ka komwa yot; ento gin ducu kelo  can ki ayelayela keken, pien gikato oyot,wan bene warwenyo woko.”​—Jabuli 90:10.

Delphine onongo kony ki i Baibul i kare man ma kwo tek tutwal-li. Baibul okonye adada. Kit ma wabineno kwede i pwony adek ma lubu, jo mapol bene gunongo ni Baibul otimo jami me aura i kwogi macalo adwogi me keto tirane i tic. Dong guniang ni meno Baibul tye calo gin mo me kare macon ma waloko iye i acakki me pwony man. Pe rom ki buke mogo ma gitii woko ci doko gin ma konye pe-ni. Tika tye kumeno pien Baibul dok kiyubo ki gin mo mapat? Tika twero bedo ni Baibul tye ki tam pa Lubanga ento pe tam pa dano?​—1 Jo Tecalonika 2:13.

Gwok in bene inongo ni kwo cek dok opong ki peko. Ka kwene ma inongo iye kwecwiny ki tam ma genne ka peko obwoyi woko?

Kong dong wanen yo adek kit ma Baibul twero konyowa kwede. Twero pwonyi ki kit me

  1. gwokke ki peko.

  2. cobo peko ma twero bino.

  3. ciro peko ma pe itwero kwanyone.

Pwony ma lubo man binyamo jami adek magi.

^ para. 10 Jehovah aye nying Lubanga kit ma kinyuto kwede i Baibul.​—Jabuli 83:18, NW.

^ para. 24 Kiloko nying mogo woko i pwony man kacel ki adek mukene ma lubu.