Cit atir i jami ma tye

Cit atir ka ma nyuto lok ma tye iye

Nong Adwogi Maber ma Bino pi Miyo Mot

Nong Adwogi Maber ma Bino pi Miyo Mot

“BAC twero wot, ento Chinese-si myero odong!” Man aye gin ma lamego mo ma nyinge Alexandra owinyo i kare ma obedo i bac me ngolo wang lobo ma tye i kin lobe aryo ma i South America. En okatti woko me neno gin ma tye ka timme ci onongo laco Chinese mo ma tye ka codo leb Spanish kun temme me tito pekone bot askari ma gwoko wang lobo. Kit macalo Alexandra onongo cito i kacokke pa Lucaden pa Jehovah ma kiloko iye leb Chinese, en ojalle me gonyo leb.

Laco-ni owacci en ebedo i lobo meno ento kikwalo karatac ki centene ducu. I acakkine, askari-ni pe oye lokke dok otamo ni Alexandra tye ka tero laco-ni me tic macalo opii. Lacen, en oye lok pa laco-ni, ento kingolo i wiye wel cente ma myero ocul pi bedo labongo karatac me wot. Kit macalo en onongo pe ki cente mo, Alexandra ojalle me denne dolla 20. Laco-ni opwoye matek adada dok owaco ni ebicule cente ma kato dolla 20. Alexandra otito ni pe emito ni kicule cente makato; cwinye obedo yom me miyo kony bot laco-ni pien otamo ni meno obedo gin matir. En omiyo ki laco-ni buke mogo ma jenge i Baibul dok ocuko cwinye me kwano Baibul ki Lucaden pa Jehovah.

Tye me yomcwiny adada me winyo pi kony ma ngat moni omiyo bot dano ma en pe ngeyo, dok labongo akalakala mo, dano me dini ducu ki lukamfiri bene gikonyo dano i yo acel-li. In tika onongo ibijalle me miyo kony ki cwinyi ducu kit meno? Lapeny meno tugo miti pien Yecu owacci: “Miyo mot kelo gum [yomcwiny] makato gamo agama.” (Tic 20:35) Lucayan bene gitye ki miti madit i lok man pien ni lukwed lok gunongo ni miyo mic kelo adwogi maber. Kong wanenu kit ma man twere kwede.

“NGAT MA MIYO JAMINE KI YOMCWINY”

Jami mutimme nyuto ni miyo mic pol kare kelo yomcwiny. Lakwena Paulo ocoyo ni “Lubanga maro ngat ma miyo jamine ki yomcwiny.” En onongo tye ka lok i kom Lukricitayo ma gumiyo mot me konyo can pa luye luwotgi. (2 Jo Korint 8:4; 9:7) Paulo onongo pe tye ka wacci gumiyo mot pien cwinygi yom. Ma ka meno, cwinygi obedo yom pien gumiyo mot.

Adada, ma lubbe ki kwed mo acel, miyo mot “tugo but adamwa ma kubbe ki yomcwiny, ribbe ki dano, ki gen, dok weko wawinyo maber.” Kwed mukene ma kitimo onongo ni “miyo cente bot ngat mukene omedo yomcwiny pa dano ma kato tic ki cente meno pigi kengi.”

Tika i nino mo itamo ni pe iromo miyo mot pi peko mo ma odiyi? Lok ada tye ni ngat acel acel twero nongo yomcwiny ma bino ki i “miyo jamine.” Ka  kimiyo ki cwiny matir, pe mitte ni welle myero obed dit. Lacaden pa Jehovah mo ocwalo waraga kacel ki cente mo bot jo ma goyo magajin man, kun wacci: “Pi mwaki mapol dong, abedo ka bolo cente manok keken i Ot me Ker.” Ento, en omedde ni: “Lubanga Jehovah odwoko bota mot mapol makato gin ma amiyo-ni. . . . Apwoyowu pi yabo yo botwa me miyo mot man—pien kweyo cwinya mada.”

Ngene kene ni miyo mot pe kwako miyo cente keken. Tye yo mukene mapol me miyo mot.

MIYO MOT BER PI YOTKOMI

Miyo mot kelo adwogi maber boti ki bot jo mukene

Baibul otito ni: “Dano ma lakica limo kony pire kene, ento dano mager keto ret i kome kene.” (Carolok 11:17) Jo ma lukica cinggi yot, dok gitye atera me jalle kengi—kun gimiyo cawagi, kerogi, ki jami mukene. Yo me kwo man kelo botgi adwogi mabeco mapol, ma i kine tye iye yotkom.

Kwed nyuto ni jo ma dyere me konyo jo mukene pol kare pe giwinyo arem madwong i komgi dok cwinygi pe tur tutwal. Ka kiporogi ki jo mukene, komgi yot loyo. Miyo mot ki yomcwiny yubo yotkom pa jo mogo ma giyelle ki two ma pe cang, calo multiple sclerosis nyo two jonyo. Kinongo bene ni lumero ma gitye ka yelle me weko kongo pol kare pe gibedo ki cwercwiny madwong dok pe gidok cen i mero ka gikonyo jo mukene.

Jo mogo tamo ni tyen lok mumiyo meno timme aye ni ngat ma tye ki “cwiny me kica dok tero dano i yo matir pe bedo ki kare me dongo kit maraco.” Miyo mic romo weko wi pye mot dok dwoko preca piny. Dok jo ma luotgi oto woko arem cwinygi kwe oyot ka gimine me konyo jo mukene.

Dong pe tye akalakala mo ni miyo mot ber piri.

MIYO MOT WEKO JO MUKENE BENE GIDONGO CWINY MENO

Yecu ocuko cwiny lulub kore ni: “Wumi, ci gibimiyowu. Gibimiyowu gin ma gipimo maber i korwu, ma gidilo, ma giyengo, ma o. Pien kit gin ma wupimo kwede jami, en aye bene gibipimo kwede jami botwu.” (Luka 6:38) Ka imaro miyo mot, dano mukene gibidok iye ki pwoc dok bitugo cwinygi bene me miyo jamigi. Pi meno, miyo mot kelo note dok jingo lirem.

Miyo mot kelo note dok jingo lirem

Lucayan ma gukwedo kit ma dano tero kwede luwotgi gutyeko niang ni “jo ma maro nyuto cwiny me kica pol kare gicuko cwiny jo mukene me nyuto kica bene.” Ki lok ada, “kadi kwano lok i kom kit ma dano gunyuto kwede kica bene tugo cwiny jo mukene me timo gin meno.” Dong, ma lubbe ki kwed mo, “dano acel keken romo tugo cwiny dano miya mapol me bedo lukica, kadi wa jo ma en peya orwatte kwedgi dok pe ngeyogi.” In mono pe imito bedo i kabedo ma kit meno? Ada, mot mapol onongo  bibedo tye kono onongo pol pa dano ginyuto yot cing.

Gin acel mutimme i Florida, U.S.A. nyuto adwogi maber ma bino pi miyo mot. Gurup mo pa Lucaden pa Jehovah gudyere me miyo kony i kare ma kot ma ocwer ki yamo magwar ci obalo odi pa dano. I kare ma gitye ka kuro jami ticgi i ot ma omyero guyub-bi, guneno ni cel pa jirani oballe woko, ci gudyere me yubone. Jirani meno lacen ocoyo waraga bot gang kal pa Lucaden pa Jehovah kun waco ni, “Abibedo ki pwoc botwu nakanaka. Anongo ni jo magi aye jo ma kitgi beco loyo ma dong arwatte kwedgi.” Pwoc madit ma en obedo kwede otere me miyo mot madit me cwako tic pa Lucaden pa Jehovah.

LUB LANEN MABER LOYO ME MIYO MOT

Kwed mo acel ma lucayan gutimo nyuto ni “nen calo tye i remowa me konyo jo mukene.” Kwed man onongo ni lutino matino “cako bedo ki miti me konyo dano ma peya gupwonyo lok.” Pingo? Baibul omiyo lagam i kare ma owacci “Lubanga ocweyo dano i kit calle kikome,” ma te lokke ni gitye ki kit pa Lubanga.—Acakki 1:27.

Yot cing tye i kin kit mabeco pa Lacwecwa Jehovah. En omiyowa kwo ki jami ducu ma mitte wek wabed ki yomcwiny. (Tic 14:17; 17:26-28) Watwero ngeyo Wonwa me polo ki yubbe piwa ka wakwano Baibul. Buk meno bene nyuto ni Lubanga otyeko keto yub pi anyim ma bikeliwa yomcwiny. * (1 Jon 4:9, 10) Kit macalo Lubanga Jehovah aye lami mic ma cinge yot loyo dok kicweyo in i calle-ni, pe omyero ibed ki ur ni miyo jamini kun ilubo lanen pa Lubanga ber piri dok yomo cwinye.—Jo Ibru 13:16.

Wi pud po i kom Alexandra, ma kiloko i kome i acakki me pwony man? Lokke otum nining? Kadi bed lawot mukene i bac owacce ni obalo centene nono, laco ma en okonyo-ni okubbe ki luwote i boma ma bac ocung iye i nge ngolo boda, ci oculo banya me dolla 20 cutcut. Medo i kom meno, laco-ni olubo tam pa Alexandra ci ocako kwano Baibul. Cwiny Alexandra obedo yom mada me rwatte ki laco-ni doki i nge dwe adek i gure madit pa Lucaden pa Jehovah ma obedo i leb Chinese i lobo Peru. Me nyuto pwocce pi jami ducu ma Alexandra otimo pire, laco-ni olwonge kacel ki jo ma owoto kwede i gure madit man me bino ka cam i otel ma mege.

Miyo mic ki konyo jo mukene kelo yomcwiny madwong. Ber dong loyo ka itwero bene konyo dano me ngeyo Lubanga Jehovah, ma en aye Lami mot mabeco ducu! (Yakobo 1:17) In tika itye ka nongo adwogi maber ma bino pi miyo mot?

^ para. 21 Pi ngec mukene, nen buk me Baibul Twero Pwonyowa Gin Ango? ma Lucaden pa Jehovah aye gucoyo dok nonge i www.jw.org/ach. Yeny i te BUKKE > BUKKE KI BROCUWA.