Cit atir i jami ma tye

Cit atir ka ma nyuto lok ma tye iye

Twere me Bedo ki Yomcwiny i Kwo Kadi i Kare-ni

Twere me Bedo ki Yomcwiny i Kwo Kadi i Kare-ni

KARE bibino ma pe tye ngat mo ma kome bibedo lit, nyo ma biti nyo to. In bene itwero bedo ki kwo ma kit man! Kadi bed kit meno, kwo i kare-ni opong ki pekki ki ayelayela mapol. Ngo ma twero konyi me bedo ki yomcwiny i kwoni kadi wa i kare-ni? Baibul mini tira ma twero konyi me nongo yomcwiny ki yengo i kwo. Nen kong pekki mogo ma wakato ki iye i kare-ni ki kit ma Baibul twero konyi kwede.

KIT ME BEDO MA IYENG KI JAMI MA ITYE KWEDE

Baibul miyo tam ni: “Pe wubed jo ma maro lim; jami ma wutye kwede myero oromwu.”​Jo Ibru 13:5.

I kare-ni, tye jami mapol ma dano giwacciwa ni omyero wabed kwedgi. Ento, Baibul waco ni watwero bedo ma wayeng ki ‘jami ma watye kwede.’ I yo ma nining?

Gwokke ki “maro lim.” Dano gitimo gin mo keken kadi bed balo yotkomgi, kitgi, otgi, wat i kingi ki jo mukene, nyo woro ma myero gunong​—weng pi “maro lim.” (1 Temceo 6:10) Man pud dong obedo wel madit ma giculo ya! I agikkine, “ngat ma maro lim, lim pe twero romone wacel.”​—Latitlok 5:10.

Dano pigi tek loyo jami. Tye ada gire ni jami me kom konygi tye. Ento jami pe twero marowa nyo pwoyowa; dano keken aye gitwero timo meno. Bedo ki ‘larem me ada’ bikonyowa me bedo ma wayeng ki kwowa.​—Carolok 17:17.

WATWERO BEDO KI YOMCWINY I KARE-NI KA WALUBO TIRA ME BAIBUL

KIT ME KANYO TWO

Baibul miyo tira ni: “Yomcuny obedo twon yat aber meicel, me cango two.”​Carolok 17:22, Lango Baibul.

Calo ‘yat maber,’ yomcwiny twero konyowa me kanyo two. Ento cwinywa twero bedo yom nining ka komwa lit?

Nyut pwoc. Ka wabedo ka keto cwinywa i kom pekowa keken kare ducu, ci ‘nino me kwowa ducu’ bedo marac. (Carolok 15:15) Me ka meno, Baibul wacci, “wubed jo ma miyo pwoc kare ducu.” (Jo Kolocai 3:15) Bed ki pwoc kadi pi jami matinotino ma timme i kwo. Jami calo kit ma ceng ma tye ka poto nen mwonya kwede, yamo ma tye ka kodo mamit, nyo neno bwunyo pa jo ma imarogi​—jami magi gitwero weko kwowa bedo mamwonya adada.

Tim jami pi jo mukene. Kadi bed yotkomwa pe tye maber, “miyo mot kelo gum [yomcwiny] makato gamo agama.” (Tic pa Lukwena 20:35) Ka jo mukene ginyuto pwoc pi yellewa, wawinyo maber i cwinywa, dok man kwanyo tamwa woko ki i kom pekowa. Watwero weko kwowa bedo maber ka wakonyo jo mukene wek kwogi bene obed maber.

KIT ME JINGO WAT I KIN JO MUNYOMME

Baibul miyo tira ni: “Ket pi jami ma pigi tego obed mukwongo.”​—Jo Pilipi 1:10, NW.

Jo munyomme ma pe gikwanyo kare me bedo kacel pol kare gikelo peko i nyomgi. Laco ki dako omyero gunen nyomgi cal gin ma pire tek adada i kwogi.

Wutim jami kacel. Me ka bedo ka timo jami ma imaro keni, pingo pe wuket yub me timo jami kacel? Baibul wacci: “Bedo jo aryo ber kato ma dano acel obedo kene.” (Latitlok 4:9) Wutwero tedo kacel, ryeyo ler kacel, cito ka namo kacel, nyo timo gin mukene ma wumaro.

Nyut ni imaro luotwu. Baibul cuko cwiny laco ki dakone ni omyero gumarre dok guwore i kingi. (Jo Epeco 5:28, 33) Bwunyo ki lawoti, kwako kore ki mar, nyo mine mic mogo matinotino twero jingo wat i kinwu. Ngene kene ni tim oree mogo me nyuto miti myero ogik i kin jo munyomme keken, pe kitimo bot jo ma woko.​—Jo Ibru 13:4.