Cit atir i jami ma tye

Cit atir ka ma nyuto lok ma tye iye

Mic pa Lubanga me ginkok, ma weko watwero nongo kwo ma pe tum, aye mic ma pire tek loyo ducu

 LOK MA I POK NGEYE | MIC MENE MA PIRE TEK LOYO DUCU?

Mic Mene ma Pire Tek Loyo Ducu?

Mic Mene ma Pire Tek Loyo Ducu?

“Kit gin mo ducu maber, ki mot ducu mabeco twatwal ma gimiyowa, a ki malo, a ki bot Lubanga Won bino piny, ma en aye won gin ducu ma ryeny i polo.” (Yakobo 1:17) Wang ginacoya man loko i kom kit ma Lubanga Jehovah, Wonwa me polo cinge yot kwede. Ento, ki i kin mic ducu ma Lubanga omiyo bot dano, tye mic acel ma pire tek loyo ducu. Man obedo ngo? Lok pa Yecu ma ngene tutwal ma kicoyo i Jon 3:16 wacciwa ni: “Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”

Mic me kwo pa Wod pa Lubanga acel keken—ma obibedo mic madit loyo ma ngat mo twero nongone, pien oweko kibigonyowa ki ibedo opii me bal, tiyo, ki to. (Jabuli 51:5; Jon 8:34) Kadi dong watemme nining, pe tye gin mo ma watwero timone piwa kenwa ma twero gonyowa ki i bedo opii man. Ento, pi mar madit ma Lubanga tye kwede piwa, en ominiwa gin ma onongo mitte me gonyowa. Lubanga Jehovah omiyo kwo pa Wode acel keken, Yecu Kricito, macalo ginkok dok man oyabo yo bot jo ducu ma luwiny me nongo kwo ma pe tum. Ento ginkok mono obedo ngo? Pingo onongo mitte? Dok watwero nongo adwogi maber ki iye nining?

Ginkok obedo cul ma kiculo pi gin mo murweny, nyo wek kigony ngat mo nyo gin mo ma kimako. Baibul tito ni onongo kicweyo lunyodowa mukwongo, Adam ki Kawa labongo roc mo, dok onongo gitye ki gen me kwo ki yomcwiny pi naka i lobo paradic kacel ki likwayogi ma gibinywalogi. (Acakki 1:26-28) Ki cwercwiny, gurwenyo jami magi ducu pien guyero pe me winyo Lubanga​—pi meno, gudoko lubalo. Adwogine obedo nining? Baibul gamo ni: “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.” (Jo Roma 5:12) Ma ka miyo kwo ma pe ki roc bot likwayone, Adam ominigi bal ki mucarane, to.

Pi ginkok, wel ma kiculo myero obed rom ki wel gin murweny. I kare ma Adam okwero lubo cik pa Lubanga akaka, en otimo bal dok man orwenyo kwo ma pe ki roc​—kwo pa Adam. Ma lubbe ki lok ma kicoyo i Baibul, man oweko likwayi pa Adam gudoko opii me bal ki to. Pi meno, ngat mukene ma pe ki roc ojalo kwone​—kwo pa Yecu—​macalo gityer me gonyowa ki i opii. (Jo Roma 5:19; Jo Epeco 1:7) Watye ki gen me nongo kwo ma Adam gin ki Kawa gurwenyo-ni​—kwo ma pe tum i lobo paradic, pien ki mar madit Lubanga oculo ginkok piwa.​—Niyabo 21:3-5.

Ma lubbe ki adwogi mabeco ma bino pi ginkok, pe tye akalakala mo ni mic me ginkok ma Lubanga omiyo, ma weko twere botwa me nongo kwo ma pe tum aye obedo mic madit loyo ducu. Wek wabed ki pwoc pi ‘mot man maber tutwal-li,’ kong dong wanenu i yo matut kit ma mic man rwatte kwede ki jami ma wanenogi i pwony mukato-ni.

Cobo mitiwa. Wan dano watye ki miti matek me bedo kwo labongo to. (Latitlok 3:11) Kadi bed ni pe watwero cobo mitiwa meno kekenwa, ginkok weko meno twere botwa. Baibul waco ni: “Pien  mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.”​—Jo Roma 6:23.

Cobo pekowa. Dano onongo pe gitwero culo pi ginkok. Baibul waco ni: “Pe tye dano mo ma twero kokke kekene, nyo ma twero miyo wel mo bot Lubanga pi wilo kwone. Pien gin kok me kwo pa dano welle dit mada, dok pe twero romo.” (Jabuli 49:7, 8) Pi meno, onongo wamito kony pa Lubanga adada wek kigonywa ki i opii me bal ki to. Ento ‘pi kicane pi kit ma Yecu okokowa kwede,’ Lubanga ominiwa gin ma onongo wamito-ni kikome.​—Jo Roma 3:23, 24.

I kare ma mitte kikome. Baibul wacciwa ni: “Kricito yam oto piwa i kare ma pud wan lubalo.” (Jo Roma 5:8) Pien kiminiwa “i kare ma pud wan lubalo,” ginkok weko wabedo ki gen pi mar matut ma Lubanga tye kwede piwa kadi bed ni watye ki roc. Weko wabedo ki gen pi anyim, kadi bed mitte ni walweny ki adwogi maraco ma bal okelo.

Nyuto cwiny mupore labongo geno gin mo. Baibul nyutiwa tyen lok muweko Lubanga odyeriwa kwo pa Wode macalo ginkok: “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire. Man en aye mar, pe ni wan wamaro Lubanga, ento en aye omarowa.”​—1 Jon 4:9, 10.

Itwero nyutone nining ni itye ki pwoc pi mic man madit loyo ducu? Wi opo ni lok pa Yecu ma tye i Jon 3:16 nyuto ni jo ma “ye en” keken aye gibinongo larre. Ma lubbe ki kit ma kicoyo kwede i Baibul, niye “aye ma moko gin ma dano geno.” (Jo Ibru 11:1) Wek wabed ki gen meno, mitte ni wabed ki ngec matir. Pi tyen lok meno, wacuko cwinyi me kwanyo kare me pwonyo lok mapol i kom Lubanga Jehovah, Lami ‘mot man maber-ri,’ kacel ki gin ma myero itim wek inong kwo ma pe tum ma ginkok pa Yecu weko twere boti.

Itwero pwonyo jami magi ducu ka ikwano ngec madok i kom Ginacoya ki i kabedowa me intanet me www.jw.org/ach. Lucaden pa Jehovah gibibedo ki yomcwiny me konyi. Watye ki gen ni ka itye ka pwonyo ki dok nongo adwogi mabeco ma bino pi mic man madit loyo ducu-ni, ci bicuko cwinyi me wacone ni: “Apwoyo Lubanga pi Yecu Kricito Rwotwa!”​—Jo Roma 7:25.