Cit atir i jami ma tye

Cit atir ka ma nyuto lok ma tye iye

Ada, Kwo Konye Tye!

Ada, Kwo Konye Tye!

Faizal Mwaka acel i nge to pa dakone, Faizal onongo mito ayango matek i kom adunune. En owacci: “Ka akwano buk pa Yubu, aniang ni Jehovah tye ki tyen lok ma omiyo kicoyo buk man. Ka wanongo labol mo me Baibul ma rwatte ki kwowa, man obedo yo ma Jehovah kweyo kwede cwinywa.” En omedde ni: “Kwo pud konye tye.”

Tarsha onongo pud anyaka matidi i kare ma minne oto. En owaco ni: “Ngeyo Lacwecwa oweko kwona tye ki tyen lok, dok atye ki gen kacel ki yomcwiny kadi bed atye ki pekki mapol. Jehovah twero gwokowa dok miniwa kony ma wamito nino ducu.”

PWONY mukato-ni onyuto kit ma jami mogo maraco ma timme i kwo twero weko kwo doko tek ma pe kanye. Ka itye ka kanyo peko mo, itwero bedo ka pennye kekeni ka kwo konye tye nyo ka ngat mo paro piri. Bed ki gen ni Lubanga paro pi canni. Piri tek bote.

Ngat ma ocoyo Jabuli 86 otito pi genne i kom Lubanga ni: “I kare ma atye i can akok boti, pien igamo doga.” (Jabuli 86:7) Ento iromo bedo ka penye ni, ‘Lubanga bigamo legana nining “i kare ma atye i can”?’

Kadi bed ni Lubanga twero weko kare kato ma peya ocobo pekoni, ento Lokke, Baibul cuko cwinyi ni en twero mini wic ma opye mot wek ikany peko meno: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu.” (Jo Pilipi 4:6, 7) Kong wanenu kit ma tyeng magi me Baibul cuko cwinywa ni Lubanga ada paro piwa.

Lubanga Paro Piri

“Pe tye [ojwinyojwiny] mo acel i kingi ma wi Lubanga twero wil iye. . . . piwu tek twatwal makato pi ojwinyojwiny mapol.”​Luka 12:6, 7.

TAM KONG: Kadiwa winyo matinotino ma dano pe giketo cwinygi i komgi bene pigi tek bot Lubanga. Lubanga neno ojwinyojwiny matino ducu, gin ducu gubedo cwecce ma pigi tek. Dano dok pire tek bot Lubanga ma loyo pi ojwiny. Dano aye obedo cwec pa Lubanga ma pire tek loyo i wi lobo, pien kicweyogi i “calle” dok gitwero dongo ki nyuto kite.​—Acakki 1:26, 27.

“Ai Rwot [Jehovah], in dong ingiyo kwona ci ingeya woko. . . . Iniang tamma woko.  . . kong itema, wek ingi ka ma tamma tye iye.”​Jabuli 139:1, 2, 23.

TAM KONG: Lubanga ngeyi maber adada. En ngeyo mung ma tye i cwinyi ki par ma itye kwede. Kadi bed jo mukene pe guromo niang pekoni, Lubanga paro piri dok mito konyi. Meno weko kwo pire bedo tek.

 Kwoni Tye ki Tyen Lok

“Ai Rwot [Jehovah], winy legana; wek kokona owinnye boti!  . . Cik iti iwiny lokka, gam doga oyotoyot i nino ma akok iye boti-ni! . . . En biwinyo lega pa jo ma piny dong obwoyogi woko adada.”​Jabuli 102:1, 2, 17.

TAM KONG: Nicakke i kare ma peko obino i lobo, bedo calo Jehovah tye ka gwoko rekod me pig wang dano ducu. (Jabuli 56:8) Pig wangi bene tye iye. Lubanga wiye po i kom pekoni ki pig wangi ducu pien piri tek bote.

“Cwinyi pe opoti, pien an Lubangani; abimiyi tek, dok abikonyi . . . an a Rwot Lubangawu, . . . an atye ka waco botwu ni, ‘Pe wulwor, abikonyowu.’”​Icaya 41:10, 13.

TAM KONG: Lubanga tye atera me konyi. Ka ipoto piny, en bimako cingi ci ili malo.

Watye ki Gen pi Anyim Maber

“Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”​Jon 3:16.

TAM KONG: Piri tek mada bot Lubanga ma oweko en omiyo Wode Yecu macalo gityer piri. Gityer man mini gen me bedo ki kwo me yomcwiny nakanaka. *

Kadi bed itye ki par dok kwoni nen calo konye pe, kwan lok pa Lubanga i yo matut wek idong niye i kom cikke pa Lubanga. Man biweko ibedo ki yomcwiny kacel ki gen ni kwo konye tye.

^ para. 19 Me pwonyo kit ma itwero nongo kwede adwogi maber pi ginkok pa Yecu, nen vidio ma wiye tye ni Po pi To pa Yecu ma tye i www.jw.org/ach. Yeny i te BUKKE > VIDIO > COKKEWA KI TICWA ME PWONY