Cit atir i jami ma tye

Cit atir ka ma nyuto lok ma tye iye

Lok Ada i kom Lubanga ki Kricito

Lok Ada i kom Lubanga ki Kricito

Kadi bed dano giworo lubange mapol mapatpat, ento Lubanga me ada tye acel keken. (Jon 17:3) En obedo “Ngat Mamalo Twal,” Lacwe jami ducu dok Wang It me kwo ducu. En keken aye opore me nongo worowa.​—Daniel 7:18; Niyabo 4:11.

Lubanga En Anga?

Nying Lubanga tye i ginacoya macon TYEN MA ROMO 7,000

JEHOVAH Obedo nying Lubanga

RWOT, LUBANGA, WON​—Nying mogo me dog tic pa Jehovah

Lubanga Nyinge Anga? Lubanga kikome aye owaco ni: “An a Jehovah. Meno aye nyinga.” (Icaya 42:8, NW.) Nying Lubanga nonge tyen ma romo 7,000 i Baibul. Kadi bed kit meno, lugony Baibul mapol gutimo bal me leyo nyinge ki nying me dog tic calo “Rwot.” Lubanga mito ni ibed lareme, pi meno en legi ni ‘ilwong nyinge.’​—Jabuli 105:1.

Nying me Dog Tic pa Jehovah. Baibul tiyo ki nying me dog tic magi me lwongo Jehovah: “Lubanga,” “Won Twer Ducu,” “Lacwec,” “Won,” ki “Rwot.” I lega mapol ma kicoyogi i Baibul, dano ma gulego-ni gulwongo Jehovah ki nying me dog tic ma nyuto woro.​—Daniel 9:4.

 Kom Lubanga. Lubanga obedo cwiny ma pe nen. (Jon 4:24) Baibul moko ada ni “pe tye ngat mo ma yam oneno Lubanga.” (Jon 1:18) Baibul nyuto kit ma Lubanga winyo kwede. Dano twero cwero cwinye, nyo bene ‘gitwero yomo cwinye.’​—Carolok 11:20; Jabuli 78:40, 41.

Kit pa Lubanga. Lubanga pe poko kin dano ma gia ki i tekwaro kacel ki rok mapatpat. (Tic pa Lukwena 10:34, 35) En bene “lakica dok maro dano, kiniga pe make oyot, marre ma pe lokke dwong, en lagen mada.” (Nia 34:6, 7) Ento, kit pa Lubanga angwen aye ma gicung woko ka maleng.

Teko. Kit ma en “Lubanga Matwero-ducu,” tekone pe gik dok twero cobo cikkene ducu.​—Acakki 17:1.

Ryeko. Ryeko pa Lubanga tye lamal loyo pa ngat mo keken. Pi meno, Baibul wacciwa ni “en keken aye won ryeko.”​—Jo Roma 16:27.

Ngolo kop atir. Lubanga timo jami ma tye atir kare ducu. Ticce ducu “cobbe kakare” dok bene “pe ki bal mo.”​—Nwoyo Cik 32:4.

Mar. Baibul wacciwa ni “Lubanga aye mar.” (1 Jon 4:8) Lubanga pe nyuto mar keken​—ento en aye lanen maber loyo me mar. Marre ma rwomme lamal loyo ducu gudo jami ducu ma en timo, dok meno konyowa i yo mapol.

Lubanga Twero Mako Larem ki Dano. Lubanga aye Wonwa me polo ma lamar. (Matayo 6:9) Ka waketo niyewa i kome ci watwero doko lureme. (Jabuli 25:14) Ki lok ada, Lubanga lwongi me nyiko cok kwede i lega ki me ‘keto parri ducu i kome, pien en paro piri.’​—1 Petero 5:7; Yakobo 4:8.

Apokapoka Ango ma Tye i kin Lubanga ki Kricito?

Yecu Pe Obedo Lubanga. Yecu pat adada​—en keken aye ma Lubanga ocweye en kikome. Man aye tyen lok ma oweko Baibul lwonge ni Wod pa Lubanga. (Jon 1:14) I nge cweyo Yecu, Jehovah otiyo ki latin kayone man macalo “ladiro tic” me cweyo jami kacel ki dano mukene ducu.​—Carolok 8:30, 31; Jo Kolocai 1:15, 16.

 Yecu Kricito pe owaco ni en aye Lubanga. Me ka meno, en otito ni: “An angeye [Lubanga], pien aa ki bote, en aye oora.” (Jon 7:29) I kare ma Yecu tye ka lok ki lapwonnyene mo acel, Yecu olwongo Jehovah ni “Wora ki Wonwu” dok ‘Lubangana ki Lubangawu.’ (Jon 20:17) I nge to pa Yecu, Jehovah ocere me kwo i polo, omine twero madwong dok okete me bedo i Cinge tung lacuc.​—Matayo 28:18; Tic pa Lukwena 2:32, 33.

Yecu Kricito Twero Konyi me Nyikke Cok ki Lubanga

Yecu obino i lobo me pwonyowa lok i kom Wonne. Jehovah kikome oloko kit man i kom Yecu: “Man aye Woda ma amaro; wuwinye.” (Marako 9:7) Yecu ngeyo Lubanga maber makato ngat mo keken. En owaco ni: “Ngat mo pe ma ngeyo ni Won en anga, kono Wod keken, ki ngat ma Wod oyero me nyuto Won bote.”​—Luka 10:22.

Yecu onyutiwa kit pa Lubanga kikome. Yecu olubo kit pa Jehovah macok adada ma oweko en owaco ni: “Ngat ma oneno an dong oneno Won.” (Jon 14:9) Yecu oywayo dano bot Lubanga ki nyuto mar pa Wonne i lokke ki ticce. En otito ni: “An a yo, ki ada, ki kwo: pe tye ngat mo ma bino bot Won, kono ki i an keken.” (Jon 14:6) En bene owaco ni: “Jo ma woro i ada gibiworo Won i cwiny ki ada, pien Won yenyo jo macalo meno pi wore.” (Jon 4:23) Tam kong! Jehovah tye ka yenyo dano calo in ma gimito ngeyo lok ada i kome.