Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 43

Mi ki Jehovah Woro ma Iye Pe Opokke

Mi ki Jehovah Woro ma Iye Pe Opokke

“Jehovah obedo Lubanga ma mito woro ma iye pe opokke.”​—NAK. 1:2, NW.

WER 51 Wadyere Bot Lubanga!

GIN MA WABINYAMO *

1. Pingo Jehovah oporre me nongo woro ma iye pe opokke?

JEHOVAH oporre me nongo woro ma iye pe opokke pien en aye Lacwecwa dok ominiwa kwo. (Yabo 4:11) Ento, watye ki ariya mo. Kadi bed wamaro dok waworo Jehovah, jami mukene pigi twero doko tek i kwowa ma gengowa ki miyo bot Jehovah woro ma en opore me nongone. Mitte ni waniang kit ma meno twero timme kwede. Ento mukwongo, kong wacaku ki nyamo gin ma miyo woro ma iye pe opokke kwako.

2. Ma lubbe ki Nia 34:14, gin ango ma wabitimo ka watye ki mar matut pi Jehovah?

2 I Baibul, bedo ki mar matut pi Jehovah kubbe ki woro en keken. Pe wabiweko ngat mo nyo gin mo keken pire bedo tek loyo Jehovah i kwowa.​—Kwan Nia 34:14. *

3. Pingo watye ki tyen lok matir me maro Jehovah?

3 Watye ki tyen lok matir me maro Jehovah. Pingo? Pien worowa jenge i kom jami ma wapwonyo i kome. Wacako ki maro kite mamwonya. Wangeyo gin ma en maro ki ma en dagi, dok wan bene wawinyo kit meno i kom jami magi. Waniang dok wacwako yubbe pi dano. Watye ki awaka ni en miyo botwa kare me bedo lureme. (Jab. 25:14) Jami ducu ma wapwonyo i kom Lacwecwa nyikowa cok bote.​—Yak. 4:8.

4. (a) Ngo ma Catan tiyo kwede me bitowa wek pe wamar Jehovah ki cwinywa ducu? (b) Ngo ma wabinyamo i pwony man?

 4 Larac-ci aye tye ka doro lobo-ni, dok en tiyo kwede me bitowa wek waket cwinywa i kom jami ma dano maro kacel ki miti ma pe oporre me komwa. (Ep. 2:1-3; 1 Jon 5:19) En mito ni wamar jami mukene bene me ka maro Jehovah keken. Wabinyamo yo aryo ma Larac-ci timo kwede meno. Mukwongo, en bitowa me keto cwinywa i yenyo lim, ki me aryo, en tute me doro tamwa wek wayer galowang ma pe oporre.

GWOKKE KI MARO CENTE

5. Pingo omyero wagwokke ki dongo cwiny me maro cente?

5 Wan ducu wamito ni wabed ki cam muromo, bongi ma oporre me aruka, ki ot maber ma watwero bedo iye. Kadi bed kit meno, myero wagwokke ki dongo cwiny me maro cente. Pol pa dano me lobo pa Catan-ni gubedo “lumar lim” dok gimaro bene jami ma cente twero wilone. (2 Tem. 3:2) Yecu ongeyo ni lulub kore bene gibikato ki i atematema me dongo kodi cwiny man. Yecu owaco ni: “Pe tye dano mo ma twero tic ki rwodi aryo; pien bikwero ngat acel ci maro mukene-ni, nyo bimoko i kom ngat acel, ci cayo ngat mukene-ni. Pe wutwero tic pi Lubanga ka dok wutiyo pi lim bene.” (Mat. 6:24) Ngat ma woro Jehovah kun ki tungcel tiyo ki kero kacel ki cawa mukato kare i tute me doko lalonyo, nongo tye ka tic pi rwodi aryo. En nongo pe tye ka miyo bot Jehovah woro ma iye pe opokke.

Kit ma jo mogo me Laodikia onongo ginene kwede . . . ki kit ma Jehovah gin ki Yecu onongo nenogi kwede (Nen paragraf 6)

6. Pwony ango ma watwero nongo ki i lok pa Yecu bot kacokke me Laodikia?

6 Cokcok i agikki me cencwari me acel, jo me kacokke me Laodikia gubedo ka wakke ni: “An alony, dong atye ki gin  ducu ma miyo abedo ki kwo maber, gin mo pe ma doki amito.” Ento ki i wang Jehovah ki Yecu, gin onongo gitye calo ‘ngat ma piny dong oloyo atika, ma miyo kica mako dano i kome twatwal, lacan, ma wange oto woko, dok bene tye munero.’ Yecu ominigi tira, pe ni pien gitye lulonyo, ento pien gin guweko maro lim obedo ka balo watgi ki Jehovah. (Yabo 3:14-17) Ka waniang ni watye ka dongo mar pi cente i cwinywa, ci omyero watim gin mo oyotoyot me tiro tamwa. (1 Tem. 6:7, 8) Ka pe watimo meno, ci cwinywa bedo ma opokke aryo dok Jehovah pe bijolo worowa. En “Lubanga ma lanyeko.” (Nwo. 4:24) Watwero cako bedo ki neno ma pe atir nining ka odok i lok kom cente?

7-9. Ngo ma wapwonyo ki i gin mutimme i kom laelda mo ma nyinge David?

7 Tam kong i kom labol pa David, laelda mo ma latic matek ma bedo i lobo Amerika. En owaco ni onongo yam etiyo matek i dog ticce. Meno oweko kimedo rwomme i kampuni ma en tiyo iye dok en onongo yweka i lobogi macalo latic maber adada i dog tic meno. David owaco ni, “I kare meno, atamo ni mot magi gubedo lanyut ni Jehovah tye ka goyo laane i koma.” Tika meno obedo lok ada?

8 David ocako neno lanyut ma moko ni dog ticce tye ka balo watte ki Jehovah. En owaco ni: “Anongo ni ka atye i cokke nyo i tic me tito kwena, abedo ka tam i kom pekki ma tye i dog ticca. Onongo atye ka tiyo cente madwong, ento abedo ki par mapol dok nyoma bene onongo tye ka balle woko.”

9 David oniang ni omyero emok tam i kom gin ma pire tek loyo i kwone. En otito ni: “Amoko tamma me loko kit ma  kwona tye kwede.” David onongo mito dwoko piny cawa ma en tero i dog ticce, dok en otito tamme meno bot ladit ticce. Adwogine obedo nining? En orwenyo ticce woko! David odok iye nining? En owaco ni: “Orwone cut, apongo fom me tic macalo painia pi tutunu ma pe agik.” Me nongo cente ma romo gwokogi, David gin ki dakone gucako tiyo tic me dunyo odi pa dano. I nge kare mo, David ocako tic macalo painia marii, dok lacen dakone bene odonyo i tic man. Luot man guyero me timo tic ma jo mukene cayo, ento tic ma gitye ka timone aye pe obedo gin ma pire tek loyo botgi. Kadi bed cente ma ginongo kombeddi tye acel me apar me cente ma onongo yam ginongo, dwe ki dwe pud gitye ki cente muromo me culo pi jami ma mitte. Gimito ni giket Jehovah obed mukwongo i kwogi, dok guneno ki wanggi kit ma en gwoko kwede jo ma giketo pi Ker-ri bedo mukwongo.​—Mat. 6:31-33.

10. Watwero gwoko cwinywa nining?

10 Kadi bed watye ki cente madwong nyo manok, mitte ni wagwok cwinywa. I yo ma nining? Pe idong mar pi cente. Dok pe iwek dog ticci pire obed tek boti loyo ticci pi Jehovah. Itwero ngeyo nining ni meno tye ka timme i komi? Itwero pennye kekeni ni: ‘Tika an pol kare abedo ka tam i kom dog ticca ka atye i cokke nyo i tic me pwony? Tika kare ducu abedo ka paro ka ce abibedo ki cente muromo i anyim? Mono lok me cente ki jami me kom tye ka kelo peko i nyoma? Tika atye atera me tiyo tic ma jo mukene cayo ka mina kare me tic pi Jehovah?’ (1 Tem. 6:9-12) Ka watye ka lwodo lapeny magi, myero wiwa opo ni Jehovah marowa dok omiyo cikke man bot jo ma gudyere bote ni: “Pe abiboli, pe abibwoti ata.” Meno aye oweko lakwena Paulo ocoyo ni: “Pe wubed jo ma maro lim.”​—Ibru 13:5, 6.

YER JAMI MA IGALO KI WANGI KI DIRO

11. Kodi galowang ma ngat moni yero twero gudo kwone nining?

11 Jehovah mito ni wanong mit pa kwo, dok galowang konyowa me timo meno. Ki lok ada, lok pa Lubanga waco ni “gin maber makato ma dano myero otim en aye ni en myero ocam cam dok omat mat, wek onong yomcwiny i tic ma en tiyo.” (Latit. 2:24) Ento, pol pa jami me galowang ma i lobo-ni twero kelo adwogi marac i  komwa. Balo kit pa dano, dok cuko cwinygi me cwako​—nyo bene maro—​jami ma Lok pa Lubanga okwero woko.

Anga ma tye ka yubo jami ma igalo ki wangi? (Nen paragraf 11-14) *

12. Ma lubbe ki 1 Jo Korint 10:21, 22, pingo omyero wayer jami ma wagalo ki wangwa ki diro?

12 Wamito ni wami bot Jehovah woro ma iye pe opokke, pi meno pe watwero cam i “meja pa Rwot [Jehovah] ki dok i meja pa jogi.” (Kwan 1 Jo Korint 10:21, 22.) Cam kacel ki ngat moni pol kare nyuto ni wutye lurem. Ka wayero galowang ma cwako tim gero, tim jokjok, tim tarwang, nyo miti ki tam mukene ma pe oporre, ci nongo bedo calo watye ka camo dek ma lumone pa Lubanga aye gutedo. Macalo adwogine, pe wabalo yotkomwa keken ento bene wabalo watwa ki Jehovah.

13-14. Ma lubbe ki Yakobo 1:14, 15, pingo omyero wagwokke ki galowang ma weko wadongo miti maraco? Mi labol.

13 Nen kong yo mogo ma galowang rom aroma ki dek ma wacamo. Ka watye ka cam, watwero yero gin ma wabiketo i dogwa. Ento ka dong wamwonyo dek meno, komwa cako tic iye i yo ma pe watwero dorone ci moce doko but komwa. Cam maber twero weko komwa bedo yot; cam marac balo yotkomwa. Adwogine pe twero nen cutcut, ento i nge kare mo wang ma onen ka maleng.

14 I yo acel-lu, ka watye ka yero galowangwa, ci nongo pud watye ki twero me yero gin ma bidonyo i tamwa. Ento i nge meno, galowang ma wayero-ni bigudo tamwa ki cwinywa i yo ma pe watwero dorone. Galowang maber twero weko wayweyo wiwa; galowang ma pe oporre bikelo adwogi marac i komwa. (Kwan Yakobo 1:14, 15.) Adwogi ma galowang marac kelo pe twero nen cutcut, ento i nge kare mo wang ma onen ka maleng. Meno aye tyen lok ma oweko Baibul cikowa ni: “Pe wuwek gibwolwu; Lubanga pe gituko kwede. Gin ma dano ocoyo, en aye bene en bikayo. Ngat ma ocoyo kodi i poto me kit pa dano gin ma en bikayo ki iye en aye to.” (Gal. 6:7, 8) Pud dong pire tek piwa me kwero galowang mo keken ma cwako jami ma Jehovah dagi!​—Jab. 97:10.

15. Mot ango ma Jehovah omiyo botwa wek wanong mitte?

15 Pol pa jo pa Jehovah gimaro neno JW Broadcasting®, citecenwa me telebijon ma i Intanet. Laminwa mo ma nyinge Marilyn owaco ni: “JW Broadcasting okonya me bedo ki neno matir, dok atwero neno nyo winyo jami ducu ma tye iye labongo lworo mo ni gin mo marac bikatti. Ka cwinya otur nyo awinyo ni atye kena, aneno pwony mo nyo vidio ma kinyamo iye Ginacoya me Nino Ducu. Man weko awinyo ni atye cok adada ki Jehovah kacel ki dulle. JW Broadcasting oloko kwona adada.” Tika itye ka nongo adwogi maber ki i mot pa Jehovah-ni? Mapat ki purogram ma katti dwe ki dwe-ni, JW Broadcasting tye ki jami awinya ki me anena kacel ki wer mamit adada, ma itwero neno nyo winyone i cawa mo keken.

16-17. Pingo omyero watute me dwoko piny cawa ma wacwalo i galo wangwa, dok watwero timone nining?

16 Myero pe wayer ki diro jami ma wagalo ki wangwa keken ento bene wagwokke ka odok i kom cawa ma watero iye. Ka pe watimo meno, waromo nongo ni watiyo ki cawa malac i galo wangwa makato cawa ma wacwalo i tic pi Jehovah. Dano mapol ginongo ni pe yot me dwoko piny cawa ma gitero i galo wanggi. Laminwa mo ma nyinge Abigail ma tye ki mwaka 18 owaco  kit man ni: “Neno telebijon konya me yweyo wiya i nge tic matek. Ento ka pe agwokke ci atwero tero cawa malac adada i nyim telebijon.” Omego mo matidi ma nyinge Samuel owaco ni: “Abedo ka aneno vidio mogo macego cego pi cawa malac ki i Intanet. Pol kare acako ki neno vidio acel, ento apo ni dong atero cawa makato adek nyo angwen woko.”

17 Itwero dwoko piny cawa ma itiyo kwede i galo wangi nining? Gin mukwongo ma iromo timone aye me niang cawa ma rom mene ma in itiyo kwede i galo wangi. Pingo pe igwok rekod ma lubbe ki cawa meno pi cabit acel? Co piny i kalenda ma megi wel cawa ma itiyo kwede i neno telebijon, ngiyo jami i Intanet, ki tuko tuko i cimmi. Ka iwinyo calo itye ka cwalo cawa mukato kare woko i galo wangi, ci tem goyo pulan. Ket cawa me timo jami ma pigi tego obed mukwongo, ci i ngeye ket cawa pi galowang. I nge meno, peny Jehovah wek okonyi me moko i kom yub ma iketo. Ka itimo kit meno ci ibibedo ki cawa kacel ki kero ma mitte me kwan piri keni, bedo ki woro pi jo me ot, cito i cokke ki dong tic me pwony. Itwero bene bedo ma cwinyi pe pidi pi cawa ma icwalo i galowang.

MEDDE KI MIYO BOT JEHOVAH WORO MA IYE PE OPOKKE

18-19. Watwero nyuto nining ni watye ka miyo bot Jehovah woro ma iye pe opokke?

18 I nge coyo lok i kom agikki me lobo pa Catan ki lobo manyen ma bibino-ni, lakwena Petero otito ni: “Lurema, ka wutye ka kuro man, wuket tek wek Lubanga pe onong roc mo nyo bal mo i komwu, ento onong wutye ki kuc.” (2 Pet. 3:14) Ka walubo tira meno dok watute matek me kwo kwo maleng kun bene waworo Jehovah i yo ma en mito, ci wanyuto ni watye ka miyo bot Jehovah woro ma iye pe opokke.

19 Catan ki lobone gibimedde ki bitowa wek waket pi jami mukene obed mukwongo i kwowa me ka keto pi Jehovah. (Luka 4:13) Ento kadi bed wakat ki i ariya ma nining, pe wabiye ni ngat mo nyo gin mo keken pire obed tek botwa ma loyo Jehovah. Wamoko tamwa me miyo bot Jehovah gin ma en keken aye oporre me nongone​—worowa ma iye pe opokke!

WER 30 Wora, Lubangana, ki Larema

^ para. 5 Wamaro tic pi Jehovah. Ento tika watye ka miyo bote woro ma iye pe opokke? Lagam me lapeny meno nen woko ka maleng i tam ma wamoko. Kong dong wanyamu jami aryo i kwowa ma twero konyowa me niang ka ada watye ka miyo ki Jehovah woro ma iye pe opokke.

^ para. 2 Ka Baibul owaco ni Jehovah lanyeko, meno te lokke ni en mito ni wawor en keken.

^ para. 54 LOK I KOM CAL: Pe watwero ye camo cam ma oballe ma kitedo i jokon macilo. Ci pingo omyero waye galo wangwa ki jami ma opong ki tim gero, tim jokjok nyo tim tarwang?