Cit atir i jami ma tye

Cit atir ka ma nyuto lok ma tye iye

Tika Itye ka ‘Gwoko Ryekoni’?

Tika Itye ka ‘Gwoko Ryekoni’?

KIT MA kitito kwede i ododo acel mo macon, tye awobi mo ma lacan ma onongo bedo i caro mo. Dano me caro meno onongo ginyero awobi-ni adada pien gitamo ni laming adada. Ka welo obino, dano onongo gutuku ki wiye i nyim welogi. Onongo ginyutte cente ma nyige gin aryo, maditte me ryal, ki matidine me jabu ma onongo welle dodo me ryal-li kiryo. I ngeye onongo kiwacce ni: “Yer acel ma imito ki i kine.” Awobi-ni onongo kwanyo cente me ryal-li ci ngweco gire cen.

I nino mo, welo mo acel openyo awobi-ni ni, “In mono pe ingeyo ni cente me jabu-ni welle dodo me ryal-li kiryo?” Awobi-ni obunyo ci owacce ni, “Eh, angeyo do.” Ci welo-ni openye ni, “Ci pingo iyero cente me ryal-li? Ka ikwanyo me jabu-ni, ci ibedo ki wel cente ma dodo me ryal-li kiryo kulu!” Awobi-ni owacci, “ka akwanyo cente me jabu-ni ci dano gibijuko tuko ki wiya woko. Tika ingeyo wel cente adi me ryal ma dong ajogo?” Latin awobi man onyuto kit acel ma jo muteggi gitwero nongo adwogi maber ki iye​—en aye ryeko.

Baibul wacci: “Gwok ryekoni kacel ki niang matut ma itye kwede. Dong ibiwoto i yoni ma cwinyi tek ma pe iparo gin mo, tyeni bene pe bigwangnge atata.” (Car. 3:21, 23) Dong ngeyo tyen lok me ‘ryeko’ ki kit me ketone i tic bigwoko kwowa. Konyowa me gwokke wek pe wapot piny i yo me cwiny, dok ‘tyenwa’ bene cung matek.

OBEDO GIN ANGO?

Ryeko pat ki ngec kacel ki niango. Ngat ma tye ki ngec nongo tye ki lok mapol i wiye. Ngat ma tye ki niango twero neno kit ma lok moni kubbe kwede ki mukene. Ngat ma tye ki ryeko twero ribo ngec ki niango ci tiyo kwede i yo ma konyo.

Me labolle, ngat mo twero kwano buk me Baibul Mono Ada Pwonyo Gin Ango? i cawa manok keken kun bene niang lok ma iye maber. I kare ma en tye ka kwanone, en bene twero nongo lagam matir pi lapeny ducu. En twero cako wot i cokke pa Lucaden pa Jehovah kun miyo lagam mabeco. Man ducu twero nyuto ni en tye ka dongo i yo me cwiny, ento tika nyuto ni en dong tye ki ryeko? Romo bedo ni pe. Gwok en obedo ngat ma niang i kom gin moni oyot. Ento ka en keto lok ada ma en okwano-ni i tic, man rom ma nongo tye ka tic ki ngec kacel ki niango i yo matir, ci en bidoko ngat maryek. Ka tam ma en moko kele adwogi maber, ma nyuto ni en kong otamo matut i kom lok meno, ci dano gibinenone woko ka maleng ni en tye ki ryeko.

Matayo 7:24-27 tye ki lapor ma Yecu omiyo i kom co aryo ma gugero ot. Kilwongo ngat acel ni dano “maryek.” En kong otamo matut i kom gin ma twero timme, ci man oweko en ogero ode i kom pata got. Man nyuto ni en oneno gin ma twero timme i anyim ci oniang i kom ngo ma myero etim. En pe otamo ni gero ot i kom kweyo welle lapiny dok tum oyot. En otamo ki ryeko i kom adwogi maber ma ebinongo i anyim ka egero ode ki ryeko. Dong, i kare ma kot ocwer matek, ode pe opoto. Lapeny ma watwero penye kwede aye ni, watwero nongo ryeko ki dok wagwoko nining?

 ATWERO NONGONE NINING?

Mukwongo, Mika 6:9 wacciwa ni: “Bedo me ryeko mada me lworo nyinge [Lubanga].” Lworo nying Jehovah nyuto ni nongo wawore. Man dong te lokke ni bedo ki woro madit pi gin ma nying Lubanga cung pire, ma kwako bene gin ma nen atir bote. Wek iwor ngat moni, myero kong inge tam pa ngat meno. Ci dong itwero keto genni i kome kun inongo pwony ki bote dok ilubo lanenne mabeco. Ka watamo i kom kit ma ticwa twero gudo kwede watwa ki Jehovah i anyim, ki dok ka wamoko tam ma lubbe ki cikke, ci man nyuto ni watye ka nongo ryeko.

Me aryo, Carolok 18:1 wacci: “Ngat ma pe ribbe ki jo mukene yenyo tyen lok mogo, kun kwero lubo tam pa jo ma ticgi nyuto ryekogi.” Ka pe wagwokke, watwero pokke woko ki bot Jehovah ki jone. Wek pe watim meno, myero wabed kacel ki jo ma gilworo nying Lubanga dok gilubo cikke. Omyero wawot i Ot me Ker ka twere, kun wabedo kacel ki Lukricitayo me kacokke kare ki kare. Ka watye i cokke, omyero wayab tamwa ki cwinywa wek pwony ma kimiyo odony i cwinywa.

Medo i kom meno, ka walego bot Jehovah ki cwinywa ducu, ci wabinyikke cok bote. (Car. 3:5, 6) Ka wayabo tamwa ki cwinywa ka watye ka kwano Baibul ki bukke ma dul pa Jehovah miniwa, ci watwero niang i kom kit ma gin ma watimo  gudowa kwede dok man weko watimo jami mupore. Omyero bene wayab cwinywa me winyo tira ma jo muteggi gimiyo. (Car. 19:20) Ka watimo meno, ci wabimedo ryekowa ma kaka ‘kwerone.’

MAN BIKONYO JO ME OTTA NINING?

Ryeko twero gwoko jo me ot maber. Me labolle, Baibul cuko cwiny dako me ‘woro cware.’ (Ep. 5:33) Wek laco onong woro ki bot dakone, en myero otim ngo? Ka odiyo dakone tektek nyo ki gero, ci adwogine bibedo pi kare manok keken. Pi lworo cware, dako twero nyuto woro mo manok ka cware tye. Ento, tika en bimedde ki wore ka pe gitye kacel? Pe twere wacel. Pi meno, laco myero otam i kom gin ma twero weko dakone wore kare ducu, pe ka en tye keken. Ka en nyuto nyig ma nyak pi cwiny maleng, calo mar ki kica, ci en binongo woro pa dakone. Ngene kene ni, dako ma Lakricitayo myero onyut woro bot cware kadi bed laco opore me nongone nyo pe.​—Gal. 5:22, 23.

Baibul bene waco ni laco omyero omar dakone. (Ep. 5:28, 33) I yenyo mar pa cware, dako twero tamone ni myero ekan jami mogo ki bot cware wek pe onge kadi bed ni cware tye ki twero me ngeyone. Ento, i ada, meno tika nyuto ryeko? Lacen ka cware oniang lok meno kono, adwogine bibedo nining? Tika mare i kom dakone bimedo ameda? Pe twero timme kit meno. Ma kaka meno, ka dako tito mot bot cware i cawa mupore jami ducu kadiwa jami ma pe ber tutwal, ci cware bipwoye pi loko lok ada. Dong mare i kome bimedde.

Kit ma wapwonyo kwede lutino i kare-ni bigudo kit ma wabilok kwedgi i anyim

Lutino myero guwiny lunyodogi kun bene gilubo tira pa Jehovah. (Ep. 6:1, 4) Man tika te lokke ni lunyodo myero gurye bot lutinogi cik mapol ata me aluba? Lunyodo myero pe gutit atita keken ngo ma myero lutino pe gutim ki dong pwod ma gibimiyo ka lutino pe gulubo cikgi. Lanyodo ma tye ki ryeko konyo latinne me niang pingo myero olub cik moni.

Me labolle, go kong ni latinni mo loko i yo ma pe nyuto woro bot lunyodone. Lok bote ki gero nyo pwodo latin meno cutcut twero kele lewic nyo weko en cako ling alinga. Dok bene en twero bedo ki cwiny me kiniga ma weko en dirre cen ki bot lunyodone.

Lunyodo ma gitye ki ryeko gitamo i kom kit ma yo ma gipwonyo kwede lutinogi twero gudo lutinogi i anyim. Ka latin otimo gin mo marac, lunyodo myero pe gumi pwod cutcut pi lewic. Ma ka meno, gitwero lok ki latin meno ki cwiny ma opye mot ma nongo jo mukene pe, dok gitito bot latin meno i yo me mar ni Jehovah mito ni lutino guwor lunyodogi wek gunong adwogi maber pi naka. Dong man weko latin niang ni ka eworo lunyodone, nongo rom ma etye ka woro Jehovah. (Ep. 6:2, 3) Tic ki yo man me pwonyo latinni twero gudo cwinye adada. Latin biniang ni lunyodone kara ada giparo pire, dok worone pigi bimedde. Man bene bikonyo latin me penyo pi kony mo keken i anyim kace gin mo keken tye ka nyweno wiye.

Lunyodo mogo gilworo cwero cwiny lutinogi, dok man weko pe giminigi tira. Ento, ngo ma bitimme ka latin odoko dit? Tika en bilworo Jehovah kun niang pingo pire tek me lubo cikke? Tika en biyabo cwinye ki tamme bot Jehovah, nyo bidirre cen ki bot Jehovah?​—Car. 13:1; 29:21.

Lapa cal ma ladiro kong goyo pulan pi gin ma en biyubone. En pe cako mere payo bao kun geno ni bikatti maber. Lunyodo ma gitye ki ryeko gicwalo cawa malac me pwonyo ki keto cik pa Jehovah i tic, man nyuto ni nongo gilworo nyinge. Ka gibedo cok ki Jehovah kacel ki dulle, gibinongo ryeko dok gibitic kwede me dongo odigi.

Nino ducu, mitte ni wamok tam ma twero gudo kwowa i anyim. Ma ka moko tam cutcut labongo tam, pingo kong pe ikwany kare me tam ma peya imoko tammi? Tam bene kong maber i kom adwogi ma tammi-ni twero kelo. Yeny tira pa Jehovah, dok iti ki ryekone. Ka watimo meno, nongo watye ka gwoko ryeko, dok man biminiwa kwo.​—Car. 3:21, 22.