Cit atir i jami ma tye

Cit atir ka ma nyuto lok ma tye iye

 GIN MUTIMME I KWO

Watute me Nyuto Lanen Maber

Watute me Nyuto Lanen Maber

Apenyo ni: “Tika ingeyo mwakana?” Ci Izak Marais, omego mo ma ogona cim ki i Patterson, New York i kare ma atye i Colorado ogamo ni “Angeyo mwakani maber.” Wek kong atit gin ango ma okelo lok meno.

KINYWALA ki i Wichita, Kansas, i lobo U.S.A., i Decemba 10, 1936, dok an latin kayo ki i kin lutino angwen. Lunyodona, William gin ki Jean, onongo giworo Jehovah ki cwinygi ducu. Babana onongo tye company servant, man aye kit ma onongo kilwongo kwede lakub kin luelda i kacokke. Min mamana ma nyinge Emma Wagner aye opwonyo mamana ki Lok ada me Baibul. Emma opwonyo dano mapol ki lok ada kadi wa Gertrude Steele, lamego mo ma otiyo macalo lamiconari i Puerto Rico. * Pi meno, onongo atye ki lanen pa jo mapol ma atwero lubugi.

PO I KOM LANEN MABECO

Babana ocung i teng gudo kun poko magajin bot luwot

I kare ma atye mwaka abic, i otyeno mo me ceng abicel, onongo watye wan ki babana ka poko Watchtower ki Consolation (i kare-ni dong Awake!) bot jo ma gitye ka wot i gudo. I kare meno, lobowa onongo orwako wiye i Lweny me  II me Wi Lobo. Daktar mo ma onongo omer woko obino ci ocako yeto Babana pien ni pe cwako tung ka mo keken i lok me wibye, kun bene waco ni Babana obedo lalworo mo ata ki dok ni tye ka weyo donyo i mony. Daktar-ni ocung cok adada ki babana kun neno wange atir ci owacci, “Pingo pe idonga, in lalworo-ni!” Abedo ki twon lworo adada ento amaro kit ma Babana odok kwede iye. En omedde ameda ki poko magajin bot lwak ma onongo gugurre. I ngeye, lamony mo obino, ci daktar-ni odange ni, “Tim gin mo i kom lalworo-ni!” Lamony-nyi oneno ni laco-ni omer woko, ci owacce ni, “Cit gang kong iywe!” Ci gin aryo-ni ducu gua woko. Atye ki pwoc madit pi tekcwiny ma Jehovah omiyo ki babana. En onongo tye ki odi aryo me lyelo wic i Wichita, dok daktar-ni onongo bene bino ka lyelo wiye bote!

An kacel ki lunyodona, watye ka cito i gure madit i Wichita i mwaka 1940 ki wiye

I kare ma atye mwaka aboro, lunyodona gucato otgi ki odi me lyelo ye wic woko, guwilo ot matidi ma kiwoto kwede awota, ci gudak i Colorado ka tic ka ma can lutit kwena tye iye. Wacako bedo cok ki Grand Junction, ka ma lunyodona gubedo ka tic macalo lupainia kun bene gitiyo i fam. Pi kony pa  Jehovah ki arimagi pi tic, kicako kacokke i kabedo meno. I Juni 20, 1948, Babana obatija an, kacel ki jo mukene ma guye Lok ada me Baibul kadi wa Billie Nichols kacel ki dakone i pii mo ma mol ki i kin godi. Lacen, Billie Nichols gin ki dakone kacel ki wodgi ki dakone bene gucako tic macalo luneno ma giwoto awoto.

Wabedo ki wat macok kun wanywako lok i kom jami me cwiny kacel ki jo ma onongo gumine i tic me Ker-ri, tutwalle jo me ot pa Steele​—Don gin ki Earlene, Dave gin ki Julia, ki dong Si gin ki Martha​—dok gugudo kwona adada. Guweko aniang kit ma keto pi Ker-ri bedo mukwongo twero weko kwo pa ngat moni bedo ki tyen lok kun bene bedo ki yomcwiny.

MEDDE ANYIM

Ma mwakana oromo 19, laremwa mo ma nyinge Bud Hasty, okwaya me tic kacel kwede macalo painia i kupiny me lobo Amerika. Laneno me adwol openyowa me dak i Ruston , Louisiana, ka ma Lucaden mapol onongo ticgi okwe woko iye. Kiwacciwa ni myero wabed ki cokke ducu kadi bed dano pol nyo ginok. Wanongo kabedo mupore pi cokke ci wayubo maber. Wabedo ki cokke ducu, ento i kare mogo nongo watye wan aryo-ni keken. Onongo waleyo miyo pwony aleya, kun ngat acel miyo lagam pi lapeny ducu. Ka pwony-nye tye ki lapor, wan aryo-ni ducu wabedo i wii abam kun nongo ngat mo mukene pe piny! I nge kare mo, lamego mo mutegi ocako bino i cokke. Ci lacen, lutino kwan mogo me Baibul, kacel ki jo ma ticgi onongo okwe woko gucako bino i cokke, dok pe otero kare malac, kacokke onongo dong opong woko.

I nino mo acel, an kacel ki Bud wanongo latela dini me Gang lega mo, dok obedo ka lok i kom ginacoya mogo ma onongo pe angeyogi maber. Man oweko abedo ki ur dok acako tam matut i kom gin ma aye iye. Pi cabit acel kulu, abedo ka kwan i dyerwor lung wek anong lagam pi lapeny ma openyo. Man okonya adada me loko ada wek odok yo me kwona, dok abedo ki miti matek me rwatte ki latit kwena lawota.

I nge kare manok, laneno me adwol openya me dak i El Dorado, Arkansas, me konyo kacokke meno. I kare ma atye kunu, abedo ka dok cen i Colorado kare ki kare. I nino mo acel, an kacel ki lupainia mogo onongo watye ka ngwec ki mutokana me cito kunu, ci wanongo awano me gudu i Texas dok man oweko mutokana orwange kwicikwici ma dong pe twero ngwec. Walwongo omego mo ci obino oterowa gange ki bene i cokkegi. Ki i cokke meno, kimiyo lok angeya ni wanongo peko mo manok, ci omege  guminiwa kony. Omego-ni bene ocato mutokana i wel ma romo $200.

Man okonyowa me nongo giwot ma romo cwalowa i Wichita, ka ma laremwa mo ma nyinge E. F. “Doc” McCartney, onongo tye ka tic iye macalo painia. Lutino rudine, Frank kacel ki Francis, onongo gubedo lurema dok bene pud gitye lurema macok adada wa i kare-ni. Onongo gitye ki mutoka mo macon ci gucato bota i wel ma romo $200, en i wel ma kiwilo kwede ki mega muballe-ni. Man aye tyen mukwongo ma aneno ka maleng ni Jehovah omiya gin ma onongo mitte pien aketo pi Ker-re mukwongo i kwona. I kare meno bene jo me ot pa McCartneys gunyuta lamego mo ma mwonya adada ma nyinge Bethel Crane. Minne, Ruth, onongo obedo Lacaden mo ma kome mit adada i Wellington, Kansas, dok bene omedde ki tic macalo painia nio wa i kare ma tye ki mwaka 90 ki wiye. Ma pud pe otero mwaka acel, an kacel ki Bethel wanyomme i 1958, ci wacako tic kacel macalo painia i El Dorado.

LWONGO PI TIC MA KELO YOMCWINY ADADA

I nge neno lanen mabeco pa jo ma wadongo kacel kwedgi, wamoko tamwa me bedo atera me ye tic mo keken ma dul pa Jehovah biminiwa ni watim. Kicwalowa me tic macalo painia keken i Walnut Ridge, Arkansas. Lacen i 1962, wabedo ki yomcwiny madit adada i kare kilwongowa me cito i cukul me 37 me Gilead. Ki yomcwiny madit, Don Steele bene obedo i kilaci meno. I nge tyeko kwan meno, kicwalo an kacel ki Bethel i Nairobi, Kenya. Wawinyo arem malit adada i kare ma watye ka weko New York, ento arem cwiny meno olokke odoko yomcwiny i kare ma warwatte ki omege i bardege me Nairobi!

Wan kacel ki Mary ka Chris Kanaiya i kare ma watye i ticwa me pwony i Nairobi

Marwa pi Kenya kacel ki ticwa me tito kwena odongo oyotoyot adada. Lutino kwanwa ma gukwongo dongo aye Chris ki Mary Kanaiya. Pud gitye ka tic ki gen i tic pi kare malac i Kenya. I nge mwaka acel, kicwalowa me cito Kampala, i Uganda, macalo lumiconari me acel i lobo meno. Meno obedo kare me yomcwiny adada pien jo mapol onongo gitye ki miti me pwonyo lok ada me Baibul, dok bene gudoko Lucaden luwotwa. Kadi bed kumeno, i nge mwaki adek ki nucu i Afrika, dakona ogamo ic ci dong onongo mitte ni wamok tamwa ka ce wabigwoko lupacowa i Afrika nyo i lobo Amerika? Lacen wanongo ni myero wadok cen i i Lobo Amerika. I nino ma waweko Africa, cwercwinywa obedo dit loyo ma wabedo kwede i nino ma waweko New York. Onongo dong wamaro dano me Africa adada, dok bene wabedo ki miti me dok cen i nino mo.

TIC MANYEN

Wacako bedo i lung mo i tung kupoto ceng me Colorado, ka ma lunyodona bene gubedo iye. Dwe 17 i nge nywalo latin kayowa, anyaka ma nyinge Kimberly, dok wanywalo Stephany. Wamako ticwa manyen macalo lunyodo calo tic ma pire tek adada, dok waketo tek me pito ada i cwiny anyirawa aryo-ni. Onongo wamito nyutigi lanen kit ma jo mukene gunyuto botwa-ni. Onongo tek adada me tamone ni kadi bed ni lanen maber twero tic adada i pwonyo lutino, man pe dong nyuto ni gibitic pi Jehovah ka gudongo. Omera ki lamero ma gulubo ngeya gua woko ki i ada. Watye ki gen ni gibilubo lanen maber ma wanyutigi.

Wabedo ki yomcwiny adada me gwoko anyirawa dok kare ducu watemme me timo jami kacel. Kit ma onongo wabedo cok ki Aspen i Colorado, boma mo ma danone gimaro tuku me ngwec i pee adada, wan  ducu wapwonyo tuku meno wek kicel kicel watuku kacel macalo jo me ot. Man omiyowa kare me nywako lok ki anyirawa ka nongo watye ka tuku kacel. I kare mukene wacito ka limo piny kacel dok wabedo ki yomcwiny me boko lok ka watye ka oyo mac. Kadi bed onongo pud gitino, onongo gipenyo lapeny calo “Gin ango ma abitimo ka adongo?” ki “Kit dano ango ma amito ni anyom?” Watute me dongo miti pi jami me cwiny ki kit matir i cwiny anyirawa. Waweko guketo yub me donyo i tic pi Jehovah pi kare malac ki dok waweko gungeyo pingo ber me nyomme ki ngat ma tye ki yub acel-li. Watemme me konyogi wek guniang ni pe ber me nyomme ka nongo pud gitino tutwal. Onongo wawaccigi ni “Bed keni ma pe inyomme nio ka io mwaka 23.”

Kit ma lunyodowa gutimo piwa, wan bene watute matek me cito i cokke ducu ki dok me nywako i ticwa me pwony kare ki kare macalo jo me ot. Waketo yub wek jo ma gitiyo pi Jehovah pi kare malac gubed i gangwa. Ki bene onongo waboko lok ki yomcwiny madit pi kare ma wabedo ka tic macalo lumiconari. Wabedo ki gen ni nino mo wan angwen-ni ducu waromo cito i Afrika kacel. Anyirawa onongo gimito timo meno adada.

Kare ki kare onongo wabedo ki yub me kwano Baibul macalo jo me ot, i kare meno onongo watuku jami ma twero timme i gang kwan. Onongo waweko anyirawa gibedo calo Lacaden ma tye ka gamo lapeny. Onongo ginongo pwony i yo man mit adada, dok oweko gubedo ki tekcwiny. Ka giwoto ki dongo, i kare mogo onongo gingur pi kwano Baibul macalo jo me ot. I nino mo, ki cwer cwiny, awaccigi ni gucit i ot butogi ki dok ni pe dong wabibedo ki kwan meno. Gubedo ki ur ci gucako kok dok guwaco ni gimito kwan. Man oweko wacako niang ni kare ada watye ka dongo mar ki pwoc pi jami me cwiny i cwinygi kadi bed ni pud gitino. Gudongo mar matut pi kwano Baibul, dok bene waweko gubedo agonya me tito kit ma giwinyo kwede. Onongo tek adada botwa ka wawinyogi i kare mogo giwaco ni pe giye i kom pwony mogo. Ento man okonyowa me niang gin ma tye i cwinygi. I nge leyo tam kacel kwedgi, onongo giyeng ki gin ma guniang ma lubbe ki tam pa Jehovah i kom gin meno.

WALOKO KIT ME KWOWA

Ticwa me gwoko anyirawa otum oyotoyot adada loyo kit ma onongo watamo kwede. Ki kony kacel ki tira ma dul pa Jehovah miyo, watimo gin ducu ma watwero me gwoko lutino wek gumar Jehovah. Wabedo ki yomcwiny adada i kare ma anyirawa gucako tic macalo lupainia i nge tyeko kwangi, dok gupwonyo diro me tic cing ma romigi nongo yo me kwo. Gudak i Cleveland, Tennessee, kacel ki lumege aryo mukene me tic ka ma can lutit kwena tye iye. Waparogi adada, ento cwinywa onongo yom ni gitye ka tic ki kwogi i tic pi Jehovah pi kare malac. An kacel ki Bethel bene dok wacako tic macalo lupainia, dok man oyabo yo piwa me nongo mot mukene mapol. Watiyo macalo lakony kor laneno me adwol ki bene i gurre madit.

Ma pud peya gudak i Tennessee, anyirawa gucito i London, England, ci gulimo jang gang kal. Ki kunu, Stephany, ma en onongo tye mwaka 19, orwatte ki Paul Norton, omego mo matidi ma tiyo i Betel. I limgi mukene, Kimberly bene orwatte ki Brian Llewellyn, omego ma onongo tiyo kacel ki Paul Norton. Paul gin ki Stephany gunyomme​—ento ma onongo Stephany dong tye mwaka 23. Brian gin ki Kimberly bene gunyomme i nge mwaka acel​—ma onongo Kimberly tye mwaka 25. Gin ducu gubedo kengi ma pe gunyomme nio ka guo mwaka 23. Wan ducu wacwako ki cwinywa ducu kit jo ma guyero me bedo luotgi.

Paul gin ki Stephany kacel ki Kimberly gin ki Brian i jang gang kal me Malawi i 2002

Lutino anyirawa guwacciwa ni lanenwa ki pa lunyodogi madit aye okonyogi me lubo tira pa Yecu ma waco ni myero ‘wakwong keto cwinywa i kom kerre,’ kadi bed ni gitye ka kemme ki can lim. (Mat. 6:33) I April 1998, kilwongo Paul kacel ki Stephany me cito i cukul me 105 me Gilead, ci i ngeye kicwalogi i Malawi, Africa. I kare meno bene kilwongo Brian kacel ki Kimberly i Betel me London ci lacen kikobogi i Betel me Malawi. Cwinywa obedo yom adada, pien pe tye gin mo maber loyo pi jo matino me tic ki kwogi pi Jehovah.

LWONGO PI TIC MUKENE MA KELO YOMCWINY ADADA

I Januari 2001, kigona cim kit ma atito kwede i acakki me loka. Omego Marais, laneno ma loyo lok kom gonyo leb, otito ni omege gitye ka keto yub me  pwonyo lugony leb ki diro i kit me gonyo leb, dok kadi bed ni onongo dong atye ki mwaka 64, kipenyowa ka waromo cito pi pwonye wek abed i kin lupwonye pa lugony leb. An kacel ki Bethel waketo lok meno i lega dok wanyamo kacel ki megiwa ma onongo dong guti woko-ni pi nongo tam. Gin aryo ducu onongo gimito ni waciti, kadi bed ni onongo gibidong labongo konywa. Agoyo cim ci awaco ni cwinywa bibedo yom adada me ye mot meno maber tutwal-li.

I kare meno bene, kinongo ni mamana tye ki two kanca. Awacce ni wabibedo gang wek wakony lamera Linda me gwokke. Mamana ogamo ni: “Pe wubitimo gin ma kit meno wacel. Abiwinyo marac loyo ka pe wucito.” Linda bene onongo winyo kit meno. Wabedo ki pwoc madit adada pi cwiny me jalle ken ma gunyutu kacel ki kony pa lurem mogo ma gicok kwedgi! I nge nino acel ma waweko gang me cito i Watchtower Educational Center i Patterson, Linda ogoyo cim me wacciwa ni Mama oto woko. Waketo cwinywa i ticwa manyen-ni kit ma en onongo bene bicuko cwinywa me timone ka onongo pud kwo.

Ki yomcwiny madit, ka ma kikwongo cwalowa iye obedo i jang gang kal me Malawi, ka ma anyirawa aryo-ni kacel ki coggi onongo gitye ka tic iye. Pud dong waribbe i yo me aura ya! I ngeye, wacito ka pwonyo omege ma i Zimbabwe ki dok lacen i Zambia. I nge pwony pi mwaka adek ki nucu, kicwalowa me dok cen i Malawi me coyo pi gin mutimme i kwo pa Lucaden ma kibedo ka unogi pi cung ma pe gicwako tung ka mo i lok me wibye. *

Wan kacel ki likwayiwa i ticwa me pwony

Pud aye ki cwercwiny madit, i 2005, wadok cen gang i Basalt, Colorado, ci an kacel ki Bethel wamedde ki tic macalo lupainia. I 2006, Brian kacel ki Kimberly gudak i ot ma i ngetwa ka gwoko lutino anyiragi aryo, Mackenzie kacel ki Elizabeth. Paul gin ki Stephany pud gitye i Malawi, dok Paul tye ka tic macalo lamemba me komitti me jang gang kal. Man ma dong acok o mwaka 80-ni, pud dong tye me yomcwiny ya me neno jo matino ma atiyo kwedgi i kare mukato gitye ka medde ki timo tic ma abedo ka timone. Yomcwiny ma watye kwede tutwalle obedo pi lanen mabeco ma ginyutiwa ki dok kit ma watute me nyutune bot lutinowa ki likwayiwa wek gunong adwogi maber ki iye.

^ para. 5 Nen Watchtower me Mai 1, 1956, pot. 269 me o i 272, ki me Marci 15, 1971, pot 186 me o i 190, pi ngec mapol i kom tic pa jo me ot pa Steele macalo lumiconari.

^ para. 30 Me labolle, nen gin mutimme i kwo pa Trophim Nsomba i The Watchtower, pot 14-18 me April 15, 2015