Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 35

Lutic pa Jehovah ma Gimwol Pigi Tek Bote

Lutic pa Jehovah ma Gimwol Pigi Tek Bote

“[Jehovah] . . . neno jo mamwol.”​—JAB. 138:6.

WER 48 Wot ki Jehovah Nino ki Nino

GIN MA WABINYAMO *

1. Jehovah winyo nining i kom jo mamwol? Tit kong.

JEHOVAH maro jo mamwol. Jo mamwol keken aye ma gitwero bedo ki wat macok kwede. Ki tungcel, ‘jo ma wakke en ngeyogi woko ki ka mabor.’ (Jab. 138:6) Wan ducu wamito yomo cwiny Jehovah wek wanong marre, pi meno, watye ki tyen lok ma atir me dongo cwiny me mwolo.

2. Wabinyamo gin ango i pwony man?

2 I pwony man wabinyamo lagam pi lapeny adek magi: (1) Ngat mamwol obedo dano ma nining? (2) Pingo omyero wadong kit man? (3) Alokaloka ma timme i kwowa twero temo mwolowa nining? Kit ma wabineno kwede, ka wadongo cwiny me mwolo, wayomo cwiny Jehovah dok wanongo adwogi maber.​—Car. 27:11; Ic. 48:17.

NGAT MAMWOL OBEDO DANO MA NINING?

3. Ngat mamwol obedo dano ma nining?

3 Ngat mamwol pe tamo ni en pire tek loyo jo mukene. En pe wakke. Baibul nyuto ni ngat mamwol niang ni Jehovah dit kate dok woro rwom pa jo mukene. En bene niang ni jo mukene olo gitye ki diro mo makato en.​—Pil. 2:3, 4.

4-5. Pingo ngat ma nen calo mwol pe twero bedo ngat mamwol?

4 Tye jo mogo ma ginen calo jo mamwol ento nongo pe gimwol. Twero bedo ni gubedo jo ma giling alinga nyo lulewic. Nyo twero bedo ni ginyuto woro bot jo mukene  pien kitimo kumeno i tekwarogi nyo pi kit ma gudongo kwede. Ento ki i cwinygi, nongo gin luwakke adada. I nge kare mo, kitgi kikome twero nen woko ka maleng.​—Luka 6:45.

5 Ki tungcel, jo mukene wanggi tek nyo giloko tamgi atyer ka maleng, ento meno pe te lokke ni gin luwakke. (Jon 1:46, 47) Kadi bed kit meno, jo ma giloko tamgi atyer omyero gugwokke pe me jenge i kom dirogi. Dong, kadi bed waloko atyer nyo wan lulewic, omyero watute matek me dongo cwiny me mwolo.

Lakwena Paulo obedo ngat mamwol dok pe otamo ni pire tek loyo jo mukene (Nen paragraf 6) *

6. Kit ma kinyuto kwede i 1 Jo Korint 15:10, gin ango ma wapwonyo ki i lanen pa lakwena Paulo?

6 Nen kong labol pa lakwena Paulo. Jehovah otiyo kwede matek adada me cako kacokke manyen i boma mapatpat. Twero bedo ni en ocobo tic mapol i tito kwena makato lakwena mo keken pa Yecu Kricito. Kadi bed kit meno, Paulo pe okette malo makato utmegine. Ki mwolo en oye ni: “An atidi twatwal i kin lukwena ducu, ma onongo pe porre me lwonga ni an lakwena, pien yam aketo can i kom jo pa Lubanga muye Kricito.” (1 Kor. 15:9) I nge meno, Paulo owaco kakare ni etye ki wat maber ki Jehovah, pe pi tic matek ma etiyo, ento pi kica pa Lubanga ma pe epore pire. (Kwan 1 Jo Korint 15:10.) Paulo obedo lanen maber adada pa ngat mamwol. I kare ma ocoyo waraga bot Lukricitayo ma i Korint, en pe ocoyo lok ma nyuto wakke kadi bed jo mogo me kacokke man gubedo ka caye.​—2 Kor. 10:10.

Karl F. Klein, omego mamwol adada ma yam obedo lamemba me Lukiko Madit (Nen paragraf 7)

7. I yo ma nining ma omego mo ma ngene i kare-ni onyuto ni emwol?

7 Lutic pa Jehovah mapol gunongo cuko cwiny ki i kwano gin mutimme i  kwo pa Omego Karl F. Klein, ma otiyo calo lamemba me Lukiko Madit. I kare ma en tye ka tito gin mutimme i kwone, Omego Klein oye ki mwolo ni, eyelle ki goro mapatpat pi mwaki mapol. Me labolle, i mwaka 1922, ma en ocito ka tito kwena i ot ki ot pi tyen me acel, onongo ni tic man tek adada mumiyo en pe odok ka tito kwena pi mwaki aryo kulu. Lacen, i kare ma en tye ka tic i Betel, en omako akemo i cwinye i kom omego mo ma omine tira. Medo i kom meno, en obedo ki two turcwiny macalo adwogi me par ki olo, ento lacen two man ocang. Kadi bed kit meno, en obedo ki mot me tic mapol. Tam kong kit mwolo ma onongo mitte pi omego ma ngene kit man me ye gorone! Omege ki lumege mapol wigi pud po i kom Omego Klein pi kit ma en otito gin mutimme i kwone i yo mamit labongo kano gorone. *

PINGO OMYERO WADONG CWINY ME MWOLO?

8. Lok ma i 1 Petero 5:6 konyowa nining me neno ni mwolo yomo cwiny Jehovah?

8 Tyen lok ma pire tek loyo ma omiyo wadongo cwiny me mwolo aye pien man yomo cwiny Jehovah. Lakwena Petero otito man ka maleng. (Kwan 1 Petero 5:6.) Buk me “Come Be My Follower” otito kit man i kom lok pa Petero meno, ni: “Awaka tye macalo kwir marac. Dok adwogine twero bedo rac adada. Obedo cwiny ma weko kadi wa dano ma tye ki diro konye bedo pe bot Lubanga. Ki tungcel, mwolo weko ngat ma rwomme lapiny pire bedo tek bot Jehovah. . . . En bibedo . . . ki yomcwiny me mini mot pi mwoloni.” * Ada, gin maber loyo ma watwero timone aye me yomo cwiny Jehovah!​—Car. 23:15.

9. Pingo jo mukene gibedo ki miti me bedo luremwa ka wamwol?

9 Medo i kom yomo cwiny Jehovah, wanongo bene mot mapol ka wadongo cwiny me mwolo. Ka wamwol, jo mukene gibibedo ki miti me bedo luremwa. Pingo tye kit meno? Tam kong kit dano ango ma in imaro bedo kwede. (Mat. 7:12) Pol kare pe wamaro bedo ki ngat ma kare ducu mito ni kitim jami i yo ma en mito keken dok pe winyo tam pa jo mukene. Ki tungcel, wanongo mit pa bedo ki luye luwotwa ka ginyuto ‘cwiny acel, mar me  omego, kica, ki dong cwiny me mwolo.’ (1 Pet. 3:8) Man aye kit ma wawinyo kwede i kom jo mamwol dok gin bene gibinongo mit pa bedo kwedwa ka wamwol.

10. Mwolo weko kwowa bedo yot nining?

10 Mwolo bene weko kwowa bedo yot. Ki lok ada, watwero neno calo jami mogo ma timme i kwo pe tye atir. Kabaka Solomon, laco maryek adada owaco ni: “Aneno opii aye gitye ka ngwec ki aguragura, kun rwodi giwoto awota ki tyengi calo gin opii.” (Latit. 10:7) I kine mukene jo ma gitye ki diro pe ginongo pwoc nyo deyo. Ento jo ma dirogi nok i kine mukene ginongo deyo madit loyo. Kadi bed kit meno, Solomon oniang ni bedo me ryeko me ye ni kwo tye kit meno, me ka bedo ki kiniga pien jami pe owoto maber i kwowa. (Latit. 6:9) Ka wamwol, wabinongo ni yot me ye kwo kit ma tye kwede​—pe kit ma watamo ni omyero obed kwede.

GIN ANGO MA TWERO TEMO MWOLOWA?

Pingo tek me nyuto cwiny me mwolo i cawa ma kit man? (Nen paragraf 11-12) *

11. Gin ango ma omyero watim ka kiminiwa tira?

11 Nino ducu, watye ki kare me nyuto ni wamwol. Tam kong i kom jami magi. Ka kiminiwa tira. Omyero wiwa opo ni ka ngat mo okwanyo karene me miniwa tira, ci nongo nen calo watimo bal mo ma peya waniang iye. I kare ma kit man, tamwa mukwongo twero bedo me kwero tira meno. Watwero cayo ngat ma omiyo tira meno nyo kit ma en omiyo kwede. Ento ka wamwol, wabitute me nyuto cwiny ma atir.

12. Ma lubbe ki Carolok 27:5, 6, pingo omyero wanyut pwoc bot ngat ma ominiwa tira? Mi labol.

12 Ngat mamwol pwoyo tira ma kimine. Me labolle: Go kong ni itye i cokke pa Lukricitayo. I nge boko lok ki jo mapol, ngat acel i kingi oteri cen ci owacci ni pot dek omoko i laki. Ngene kene ni lewic wang ma omaki. Ento mono pe ibibedo ki pwoc pi ngat ma otitti ni pot dek tye i laki-ni? Ki lok ada, ibiparo ni kono onongo ngat mo otitti con! I yo acel-lu, omyero wabed ki mwolo dok wapwo omego nyo lamego mo ma obedo ki tekcwiny me miniwa tira i kare ma mitte. Wanenu ngat meno calo laremwa ento pe lakworwa.​—Kwan Carolok 27:5, 6; Gal. 4:16.

Pingo mwolo mitte ka jo mukene gunongo mot me tic? (Nen paragraf 13-14) *

13. Watwero nyuto cwiny me mwolo nining ka jo mukene gunongo mot me tic i kacokke?

13 Ka jo mukene gunongo mot me tic i kacokke. Laelda mo ma nyinge Jason owaco ni: “Ka aneno jo mukene ginongo mot me tic, i kine mukene apennye  kekena pingo pe kiyera.” Tika in bene dong iwinyo kit meno? Obedo gin maber ka dano mo ‘mito medo ticce’ pi Jehovah. (1 Tem. 3:1) Ento omyero wagwok tamwa. Ka pe wagwokke, ci watwero weko awaka dongo i cwinywa. Me labolle, laco ma Lakricitayo twero cako tamo ni en aye ngat ma opore loyo me timo tic moni i kacokke. Nyo dako ma Lakricitayo twero tamo ni, ‘Cwara aye opore pi tic-ci loyo ngadi!’ Ento ka ada wan jo mamwol, wabigwokke ki cwiny me awaka meno.

14. Gin ango ma watwero pwonyone ki i kit ma Moses odok iye i kare ma jo mukene gunongo mot me tic?

14 Watwero nongo pwony ki i kit ma Moses odok iye i kare ma jo mukene gunongo mot me tic. Moses onongo tero ticce me telo jo Icrael calo gin ma pire tek. I kare ma Jehovah omiyo teko bot jo mukene me tic kacel ki Moses, en odok iye nining? En pe obedo ki nyeko. (Wel 11:24-29) En onongo obedo ngat mamwol dok oye ni jo mukene gukonye ki tic me ngolo kop. (Nia 18:13-24) Man oweko Luicrael gubedo ki jo mapol ma gitwero tic pigi, pi meno onongo pe mitte ni gukur pi kare malac wek kingol kopgi. I yo meno, Moses onyuto ni eneno ber bedo pa jo mukene ni pire tek loyo bedo ki mot me tic. Man pud dong lanen maber adada piwa! Omyero wiwa opo ni ka wamito ni Jehovah oti kwedwa, ci mwolowa myero okat diro ma watye kwede. “Kadi bed Rwot [Jehovah] bedo malo ka mabor tutwal, pud neno jo mamwol.”​—Jab. 138:6.

15. Alokaloka ango ma jo mukene gukato ki iye?

15 Ka alokaloka otimme i kwowa. I mwaki mogo manok angec, omege ki lumege mapol ma gutiyo pi Jehovah pi kare malac, alokaloka otimme i ticgi. Me labolle,  i mwaka 2014, luneno me distrik kacel ki mongi kiminigi mot me tic pi kare malac mukene. Nicakke i mwaka meno bene, luneno me adwol kijuko ticgi woko ka guo mwaka 70. Dok omego ma tye ki mwaka 80 nyo makato dong pe twero tic macalo lakub kin luelda i kacokke. Medo i kom meno, i mwaki mogo macok cok-ki, kijuko tic pa Lubetel mapol. Jo mogo gujuko tic pi kare malac pi peko me yot kom, gwoko lupacogi, nyo pi tyen lok mukene.

16. I yo ma nining ma omege ki lumegiwa gunyuto kwede mwolo me jolo alokaloka ma otimme i kwogi?

16 Timo alokaloka ma kit meno pe obedo yot pi omege ki lumege magi. Ngene kene ni onongo gimaro ticgi macon, ma gubedo ka timone pi mwaki mapol. Mogo i kingi gubedo ka “kumu” i kare me alokaloka manyen-ni. I nge kare mo, gubedo ki kero me jolo alokaloka meno. Pingo? Gin ma pire tek loyo ma okonyogi aye margi pi Jehovah. Guniang ni gin gidyere bot Lubanga ento pe pi mot me tic nyo rwom mo. (Kol. 3:23) Gitye ki yomcwiny me medde ki timo tic mo keken pi Jehovah. Gin ‘gibolo pargi ducu i kome,’ pien gingeyo ni en paro pigi.​—1 Pet. 5:6, 7.

17. Pingo watye ki pwoc ni Lok pa Lubanga cuko cwinywa me dongo kit me mwolo?

17 Watye ki pwoc ni Baibul cuko cwinywa me bedo jo mamwol, pe kumeno? Ka wadongo kit man, wakelo adwogi maber i kwowa ki i kwo pa jo mukene bene. Wabedo ki kero me kanyo peko ma tye i kwowa. Ma dong pire tek loyo, wanyikke cok bot Wonwa me polo. Pud dong yomo cwinywa ya, me ngeyo ni kadi bed “en Ngat Mamalo Twal,” en maro luticce mamwol dok pigi tek bote!​—Ic. 57:15.

WER 45 Tam ma Alwodo i Cwinya

^ para. 5 Mwolo obedo kit ma pire tek adada ma omyero wadong. Mwolo obedo gin ango? Pingo omyero wadong kit man? Dok alokaloka ma timme i kwowa twero temo mwolowa nining? Pwony man bigamo lapeny magi ma pigi tego-ni

^ para. 7 Nen pwony ma wiye tye ni “Jehovah Otima Maber Atika” i Wi Lubele me Oktoba 1, 1984.

^ para. 8 Nen dul me 3, para. 23.

^ para. 53 LOK I KOM CAL: I kare ma lakwena Paulo tye i gang pa omego mo, en tye ka boko lok ki jo mukene, kadi wa lutino matino.

^ para. 57 LOK I KOM CAL: Omego mo mutegi tye ka jolo tira me Baibul ki bot mego mo matidi.

^ para. 59 LOK I KOM CAL: Omego mutegi-ni pe tye ki nyeko i kom omego matidi-ni pi mot me tic ma en tye kwede i kacokke.