Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 13

Nyut Kica i Ticci me Pwony

Nyut Kica i Ticci me Pwony

“Kica ocako make i komgi . . . ci opwonyogi ki lok mapol.”​—MAR. 6:34.

WER 70 Wuyeny Jo ma Myero

GIN MA WABINYAMO *

1. Kit pa Yecu mene ma yomo cwinywa adada? Tit kong.

KIT pa Yecu acel ma yomo cwinywa adada aye ni en niang pekki ma wawok ki iye macalo jo ma gitye ki roc. I kare ma Yecu onongo tye i lobo, en ‘obedo ki yomcwiny kacel ki jo ma tye ki yomcwiny, dok okok bene kacel ki jo ma kok.’ (Rom. 12:15) Me labolle, i kare ma lupwonnyene 70 gudwogo ki i tito kwena ma cwinygi yom, “Yecu obedo ki yomcwiny.” (Luka 10:17-21) Ki tungcel, i kare ma Yecu oneno arem ma to pa Lajaro okelo bot jo ma gimare, “cwinye opoto, iye owang matek.”​—Jon 11:33.

2. Gin ango ma okonyo Yecu me nyuto kica pi dano?

2 Kadi bed Yecu onongo pe ki roc, ngo ma okonye me nyuto kica bot dano ma gitye ki roc? Mukwongo, Yecu onongo maro dano. Kit ma kitito kwede i pwony mukato-ni, ‘cwinye onongo maro litino pa dano.’ (Car. 8:31) Mar meno otugo mitine me niang maber kit ma dano tamo kwede. Lakwena Jon otito ni: “En kikome ngeyo gin ma tye i cwiny dano.” (Jon 2:25) Yecu onongo kica make matek i kom dano. Dano guniang mare pigi dok meno oweko gujolo lok me kwena maber me Ker-ri. Ka wadongo cwiny me kica calo Yecu, ci wabibedo ki kare me konyo jo mapol i ticwa me pwony.​—2 Tem. 4:5.

3-4. (a) Ka waparo pi jo mukene, ci wabitero ticwa me pwony nining? (b) Ngo ma wabinyamo i pwony man?

3 Lakwena Paulo oniang ni etye ki tic me tito kwena, wan bene watye ki tic meno. (1 Kor. 9:16) Ento, ka watye ki kica, pe wabineno ticwa me pwony macalo tic ma kidiyowa adiya iye. Wabibedo ki miti me nyuto ni waparo pi dano dok watye atera me konyogi. Wangeyo ni “miyo mot kelo gum [yomcwiny] makato gamo agama.” (Tic 20:35)  Ka watito kwena pien wamito konyo dano, wabinongo ni tito kwena doko mit adada.

4 I pwony man, wabinyamo kit me nyuto kica i ticwa me pwony. Me acel, wabineno gin ma watwero pwonyo ki i kit ma Yecu onongo paro kwede pi dano. I nge meno, wabineno yo angwen ma watwero lubo kwede lanene.​—1 Pet. 2:21.

YECU ONYUTO NI EPARO PI DANO I TIC ME PWONY

Cwiny me kica oweko Yecu otito kwena ma kweyo cwiny dano (Nen paragraf 5-6)

5-6. (a) Angagi ma Yecu onyuto kica botgi? (b) Kit ma kitito con i Icaya 61:1, 2, pingo kica omako Yecu i kom jo ma en otito kwena botgi?

5 Nen kong labol acel ma nyuto kit ma Yecu onyuto kwede ni eparo pi jo mukene. I nino mo acel, Yecu ki lupwonnyene onongo guol adada pien gubedo ka tito kwena labongo yweyo. Onongo “pe gubedo ki kare mo me cam.” Pi meno Yecu otero lupwonnyene “i kabedo ma dano pe iye” wek ‘guywe manok.’ Ento, lwak dano mapol guringo ka ma Yecu ki lupwonnyene onongo gubicito iye dok gin aye gukwongo o kunnu. I kare ma Yecu oo kunnu ci oneno lwak dano-ni, odok iye nining? “Kica * ocako make i komgi, pien gitye macalo romi ma gipe ki lakwat; ci opwonyogi ki lok mapol.”​—Mar. 6:30-34.

6 Pingo kica omako Yecu i kom jo magi? En oneno ni dano magi onongo “gitye macalo romi ma gipe ki lakwat.” Yecu gwok oneno ni jo mukene i kingi onongo gilucan ma gitiyo pi cawa malac me pito jo me odigi. Romo bedo ni jo mukene onongo gitye ka kumo pi to pa danogi me amara. Ka tye kit meno, ci Yecu oniang maber kit ma giwinyo kwede. Kit ma waneno kwede i pwony mukato-ni, nen calo Yecu kikome bene owok ki i pekki magi. Yecu onongo paro pi dano, dok man otugo cwinye me tito  botgi kwena ma kweyo cwinygi.​—Kwan Icaya 61:1, 2.

7. Watwero lubo lanen pa Yecu nining?

7 Gin ango ma wapwonyo ki i lanen pa Yecu? Calo Yecu, wan i kare-ni bene dano ma gurumowa “gitye macalo romi ma gipe ki lakwat.” Giyelle ki pekki mapol. Watye ki gin ma gimito kikome​—kwena maber me Ker-ri. (Yabo 14:6) Dong, walubo lanen pa Laditwa, dok watito kwena maber pien ‘kica makowa i kom jo magoro ki ma piny obwoyogi.’ (Jab. 72:13) Kica makowa i kom dano, dok wamito ni watim gin mo me konyogi.

KIT MA WATWERO NYUTO KWEDE NI WAPARO PI DANO

Tam i kom miti pa ngat acel acel (Nen paragraf 8-9)

8. Yo acel mene ma wanyuto kwede ni waparo pi jo mukene i ticwa me pwony? Mi labol.

8 Ngo ma romo konyowa me nyuto kica bot jo ma watito kwena botgi? Omyero watem niang kit ma dano ma warwatte kwedgi gitamo dok giwinyo kwede, ci wabiterogi kit ma wamito ni guterwa kwede. * (Mat. 7:12) Kong dong wanenu yo angwen mapatpat ma watwero timo meno kwede. Me acel, tam kong i kom gin ma ngat acel acel mito. Waromo poro ticwa me tito kwena ki tic pa ludaktari. Daktar maber kong tamo i kom peko pa latwo acel acel. En penyo lapeny dok tero ite me winyo ka latwo tito twone ki kit ma en winyo kwede. Me ka rune me miyo latwo yat mukwongo ma en otamo pire, daktar kong i kine mukene weko kare kato kun woto ki ngiyo kit twone wek emi yat ma rwatte. Marom aroma, wan bene omyero pe wati ki yo acel keken me cako lok ki dano ducu ma warwatte kwedgi. Me ka meno, myero watem niang kwo mapatpat ma dano tye iye, ki dong tamgi.

9. Gin ango ma omyero wagwokke kwede? Tit kong.

9 Ka irwatte ki ngat mo i tic me pwony, gwokke ki tamo ni ingeyo kit ma kwone tye kwede, niyene, ki pingo en ye kit meno. (Car. 18:13) Me ka meno, penye lapeny ki diro wek iniang gin ma tye i cwinye. (Car. 20:5) Ka man rwatte i tekwarowu, penye i kom dog ticce, jo me ode, kwone macon ki dong tamme. Ka wapenyo lapeny, bedo calo watye ka miyogi kare me tittiwa pingo gimito kwena maber-ri. Ka watyeko ngeyo meno, ci watwero nyuto botgi kica kun wamiyogi kony ma gimito kikome, kit ma Yecu otimo kwede.​—Por ki 1 Jo Korint 9:19-23.

Go kong kit ma kwo pa ngat ma imiyo caden bote tye kwede (Nen paragraf 10-11)

10-11. Ma lubbe ki 2 Jo Korint 4:7, 8, yo me aryone ma wanyuto ni waparo pi dano obedo ngo? Mi labol.

10 Me aryo, tem goyo kit ma kwogi  romo bedo kwede. I yo mogo, watwero niang kwogi. Man tye ada pien wan bene watye ki roc dok wakato ki i pekki marom ki dano ducu. (1 Kor. 10:13) Wangeyo ni kwo i lobo man twero bedo tek adada. Watwero kanyone pi kony pa Jehovah keken. (Kwan 2 Jo Korint 4:7, 8.) Ento tam kong i kom dano ma giyelle ki kwo i lobo-ni labongo wat mo macok ki Jehovah. Calo Yecu, wan bene kica makowa i komgi, dok man tugo cwinywa me tittigi “lok maber me gin maber.”​—Ic. 52:7.

11 Tam kong i kom lanen pa omego ma nyinge Sergey. I kare ma Sergey peya opwonyo ada, en onongo lalewic ma ling alinga. Onongo tek bote adada me tito gin ma i cwinye. I nge kare mo, en oye kwano Baibul. Sergey owaco ni: “I kare ma abedo ka kwano Baibul, apwonyo ni Lukricitayo gitye ki tic me nywako niyegi ki jo mukene. Ki lok ada, onongo atamo ni pe atwero timo meno matwal.” Ento, en obedo ka tamo pi jo ma peya guwinyo lok ada, dok oniang ni kwogi nen calo tek adada pien pe gingeyo Jehovah. En owaco ni: “Jami manyen ma apwonyo okela twon yomcwiny madit kacel ki kuc i cwinya. Aniang ni jo mukene bene myero guwiny lok ada man.” Ma Sergey omedde ki dongo cwiny me kica pi jo mukene, cwinye bene odoko tek me tito kwena. Sergey owaco ni: “Ki twon ur madit, tito ki jo mukene lok me Baibul odongo genna i koma kekena. Dok ojingo niyena manyen-ni matek i cwinya.” *

Twero tero kare pi jo mukene me dongo i yo me cwiny (Nen paragraf 12-13)

12-13. Pingo omyero wadi cwinywa i kom jo ma wapwonyogi i ticwa me pwony? Mi labol.

12 Me adek, di cwinyi i kom jo ma ipwonyogi. Wi opo ni, romo bedo ni ma naka peya gutamo i kom lok ada mogo me Baibul ma wan wangeyo maber. Dok pol pa dano magi gumoko matek i niyegi. Gineno dinigi calo gin ma ribogi ki  lupacogi, jo me kakagi ki jo ma kwo i ka ngetgi. Watwero konyogi nining?

13 Tam kong i kom labol man: Ngo ma kitimo ka pem moni orii ma dong ocako balle dok kimito gero manyene? Pol kare kigero pem manyen ma nongo dano pud gimedde ki tic ki macon. Ka dong tic i kom pem manyen-ni otum, ci dong kireto macon-ni. I kit yo acel-lu, ma peya wawaco ki dano me weko niyegi “macon,” myero kong wakonygi me ngeyo ki maro lok ada ma gupwonyo “nyen”​—ma onongo pe gingeyo i acakki me kwangi. Ka guniang ada, ci dong giromo weko niyegi macon-ni. Twero tero kare malac me konyo dano me kelo alokaloka magi i kwogi.​—Rom. 12:2.

14-15. I yo ango ma watwero konyo kwede jo ma gitye ki ngec manok nyo gipe ki ngec mo i kom gen me kwo pi naka i paradic i lobo? Mi labol.

14 Ka wadiyo cwinywa i kom dano i ticwa me pwony, ci pe wabitamo ni omyero guniang nyo gujol lok ada me Baibul tyen mukwongo ma guwinyo kwede. Me ka meno, kica bitugo cwinywa me konyogi wek gutam i kom gin ma Baibul pwonyo motmot. Me labolle, tam kong kit ma watwero konyo ngat mo me niang gen me kwo pi naka i paradic i lobo. Pol pa dano gitye ki ngec manok nyo pe gingeyo gin mo kulu i kom pwony man. Romo bedo ni giye ni to aye dong agikki me jami ducu. Nyo gitamo ni jo mabeco ducu cito i polo. Watwero konyogi nining?

15 Omego mo acel otito yo ma en tiyo kwede me konyo dano wek guniang lok man. Me acel, en kwano Acakki 1:28. Ka dong penyo rwod ot ka kwene ma onongo Lubanga mito ni dano gubed iye dok ki kwo ango. Pol pa dano gigamo ni, “I wi lobo, kun gibedo ki yomcwiny.” I nge meno omego-ni kwano Icaya 55:11 ci penyo rwod ot ka ce yub pa Lubanga olokke. Pol kare, rwod ot gamo ni pe. Me agikkine, omego-ni kwano Jabuli 37:10, 11 ci dok penyo kit ma anyim pa dano bibedo kwede. Omego-ni otiyo ki yo me nyamo lok man me konyo jo mapol me niang ni Lubanga pud mito ni jo mabeco gubed i Paradic i lobo pi naka.

Gin mo matidi ma nyuto cwiny me kica, calo cwalo waraga ma cuko cwiny dano twero kelo adwogi maber adada (Nen paragraf 16-17)

16-17. Ma lubbe ki Carolok 3:27, yo mene ma watwero nyuto kwede ni waparo pi dano? Mi labol.

16 Me angwen, tam i kom jami ma itwero timo me nyuto ki dano ni iparo pigi. Me labolle, tika walimo rwod ot i cawa ma pe rwatte pire? Watwero kwayo kica dok wacikke me dwogo i cawa ma opore pire. Ka rwod ot mito kony me timo tic mo manok kono? Nyo ket ni rwod ot ma pe a ki gang pi goro nyo tiyo mito ni ikonye ki tiyo tic mo kono? Ka tye kit meno, ci waromo konyogi.​—Kwan Carolok 3:27.

17 Laminwa mo onongo adwogi maber i kare ma onyuto kica ki timo gin mo ma  nen tidi. Paro pi dano otugo cwinye me coyo waraga bot jo gang mo ma onongo latingi oto woko. Waraga man onongo tye ki tyeng mogo me Baibul ma cuko cwiny. Waraga-ni ogudo jo me ot man nining? Dako ma latinne oto-ni ocoyo ni, “Laworo onongo atye ki cwercwiny madit adada. Dok abyeko ni pe ingeyo kit ma waragani okonyowa kwede. Pwoca dit ma pe wacce dok pe atwero titone ducu kit ma pire obedo tek kwede botwa. Nen calo akwano waraga-ni tyen makato 20 kulu lawor. Abedo ki ur ni waragani okweyo cwinya dok omiyo aneno cwiny me kica ma itye kwede. Apwoyi matek ki cwinya ducu.” Labongo akalakala mo, watwero nongo adwogi maber ka watemme me niang kwo matek ma dano gitye ka wok ki iye, dok watimo gin mo me konyogi.

NEN TICCI ME PWONY I YO MUPORE

18. Ma lubbe ki 1 Jo Korint 3:6, 7, neno mupore ango ma omyero wabed kwede?

18 Ngene kene ni omyero wanen ticwa me pwony i yo mupore. Watwero konyo jo mukene me pwonyo lok i kom Lubanga, ento pe wan aye watimo but tic ma pire tek loyo. (Kwan 1 Jo Korint 3:6, 7.) Jehovah aye nyiko dano cok bote. (Jon 6:44) I agikkine, ngat acel acel dok i kom ada ma en opwonyo ma lubbe ki kit ma cwinye tye kwede. (Mat. 13:4-8) Wi opo ni jo mapol pe gujolo kwena pa Yecu​—kadi bed en aye obedo Lapwony maber loyo ma okwo i lobo-ni! Pi meno, omyero cwinywa pe otur ka jo mapol ma watute me konyogi pe gijolo kwena maber-ri.

19. Adwogi maber ango ma bino ka waparo pi jo mukene i ticwa me pwony?

19 Wabinongo adwogi maber ka waparo pi dano i ticwa me pwony. Dok wabinongo mit pa ticwa man. Wabibedo ki yomcwiny madit ma bino macalo adwogi me miyo mic. Dok wabiweko bedo yot pi ‘jo ma myero me nongo kwo ma pe tum’ me jolo kwena maber-ri. (Tic 13:48) Dong “kit macalo pud watye ki kare-ni, myero watiyu gin maber bot dano ducu.” (Gal. 6:10) Ka watimo kit meno, ci wabibedo ki yomcwiny pien nongo wakelo deyo bot Wonwa me polo.​—Mat. 5:16.

WER 64 Nywako i Tic me Kac ki Yomcwiny

^ para. 5 Ka wanyuto kica, watwero medo yomcwinywa​—dok wanongo adwogi maber​—i tic me pwony. Pingo tye kit meno? I pwony man, wabinyamo gin ma watwero pwonyo ki i lanen pa Yecu, ki yo angwen mapat pat ma watwero nyuto kwede kica bot jo ma warwatte kwedgi i tic me pwony.

^ para. 5 LOK MA KITITO TERE: Kit ma kitiyo kwede i Baibul, kica tyen lokke ni paro pi dano ma nongo tye ka deno can nyo kitere marac. Ka wawinyo kit man ci romo tugo cwinywa me timo gin mo keken ma watwero me konyogi.

^ para. 8 Nen pwony ma wiye tye ni “Ter Jo Mukene i Yo me Kica i Ticci me Pwony” i Wi Lubele me Mai 1, 2014.

^ para. 11 Nen Wi Lubele me Agucito 1, 2011, pot 21-22.