Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 18

Mar ki Ngolo Kop Atir i Kacokke pa Lukricitayo

Mar ki Ngolo Kop Atir i Kacokke pa Lukricitayo

“Wuting peko pa luwotwu, meno aye bimiyo wucobo cik pa Kricito.”​—GAL. 6:2.

WER 12 Jehovah Lubanga Won Twer

GIN MA WABINYAMO *

1. Jami aryo mene ma watwero bedo ki gen iye?

LUBANGA JEHOVAH maro jo ma giwore. En omarogi wacon dok bene pud bimedde ki marogi. En bene maro ngolo kop atir. (Jab. 33:5) Pi meno, watwero bedo ki gen i kom jami aryo magi: (1) Cwiny Jehovah cwer ka kitero luticce i yo marac. (2) Jehovah ocikke ni pe kibibedo ka tero jone marac pi naka, dok ebimiyo pwod i kom jo ma ngolo kom alenga. I pwony mukwongo i kin pwony ma lubbe aluba-ni, * wapwonyo ni Cik ma Jehovah omiyo bot jo Icrael kun wok ki bot Moses onongo gutine obedo mar. Cik man onongo cuko cwiny dano me ngolo kop pa jo ducu atir​—kadi wa lucan. (Nwo. 10:18) Cik meno nyutiwa kit ma Jehovah paro kwede pi jo ma giwore.

2. Wabigamo lapeny mene i pwony man?

2 Cik pa Moses ogiko tic i mwaka 33 K.M. i kare ma kacokke pa Lukricitayo ocakke. Tika onongo dong Lukricitayo gibibedo labongo cik ma gwokogi, ma gutine jenge i kom mar dok cwako ngolo kop atir? Pe kumeno! Lukricitayo onongo gitye i te cik manyen. I pwony man, wabicako ki nyamo gin ma cik manyen-ni obedo. Ci dong lacen wabigamo lapeny magi: Pingo watwero waco ni cik man ocung i kom mar? Pingo watwero waco ni cwako ngolo kop atir? I te cik man, jo ma gitye ki twero omyero guter jo mukene nining?

 “CIK PA KRICITO” OBEDO GIN ANGO?

3. “Cik pa Kricito” ma kiloko pire i Jo Galatia 6:2 kwako gin ango?

3 Kwan Jo Galatia 6:2. Lukricitayo gitye i te “cik pa Kricito.” Yecu pe ocoyo piny cik ma omyero lulub kore gulubi, ento en omiyogi tira, cik, ki dong cik ma igi lac ma omyero gukwo ma lubbe kwede. “Cik pa Kricito” kwako jami ducu ma Yecu opwonyo. I paragraf ma lubo-ni, wabipwonyo gin ma cik man obedo.

4-5. Yecu opwonyo i yo ma nining dok en opwonyo awene?

4 Yecu opwonyo i yo ma nining? Mukwongo, en opwonyo dano ki lokke. Lokke onongo tye ki teko pien en oloko lok ada i kom Lubanga, opwonyo tyen lok me kwo, dok onyuto ni Ker pa Lubanga keken aye bicobo peko pa dano ducu. (Luka 24:19) Yecu bene opwonyo dano ki lanenne. Kit ma en okwo kwede onyuto ki lulub kore kit ma omyero gin bene gukwo kwede.​—Jon 13:15.

5 Yecu opwonyo dano i kare mene? En opwonyo i kare ma tye i ticce me pwony i lobo kany. (Mat. 4:23) En bene opwonyo lulub kore i nge cerre. Me labolle, en onyutte bot lupwonnyene ma welgi romo 500 kulu​—ci ominigi cik man ni “wucilok jo.” (Mat. 28:19, 20; 1 Kor. 15:6) Macalo lawi kacokke, Yecu omedde ki miyo tira bot lupwonnyene kadi wa i kare ma en odok i polo. Me labolle, i kine ka mwaka 96 K.M., Kricito otiro lakwena Jon wek omi cuko cwiny kacel ki tira bot Lukricitayo ma kiwirogi.​—Kol. 1:18; Yabo 1:1.

6-7. (a) Pwony pa Yecu tye kicoyo kwene? (b) Walubo cik pa Kricito nining?

6 Pwony pa Yecu tye kicoyo kwene? Jiri angwen-ni tito jami mapol ma Yecu owaco dok otimo i kare ma en tye i lobo. Bukke mukene-ni me leb Grik nyo Cik Manyen konyowa me niang maber kit ma Yecu tamo kwede, pien cwiny maleng aye obedo ka tiro jo ma gucoyo dok onongo gitye ki “tam pa Kricito.”​—1 Kor. 2:16.

7 Pwony: Pwony pa Yecu konyo i yo  me kwowa ducu. Pi meno, cik pa Kricito gudo jami ducu ma watimo ki gang, i dog tic nyo i cukul, ki bene i kacokke. Wapwonyo cik man ki kwano Ginacoya me leb Grik kun walwodo lok iye. Walubo cik pa Kricito ka wakwo ma lubbe ki tira, cik, kacel ki cik ma igi lac ma kicoyo i bukke magi me Baibul. Ka walubo cik pa Kricito, nongo watye ka winyo Lubanga Jehovah ma lamar dok obedo Wang It me jami ducu ma Yecu opwonyo.​—Jon 8:28.

CIK MA GUTINE OBEDO MAR

8. Guti me cik pa Kricito obedo ngo?

8 Ot ma kigero i kom guti matek weko jo ma gibedo iye gibedo ma wigi opye mot dok labongo lworo. I yo acel-lu, cik maber ma cung i kom guti matek weko jo ma gilubo cik meno gibedo ma wigi opye mot. Cik pa Kricito cung i kom guti maber loyo​—mar. Pingo watwero waco kit man?

Ka watero jo mukene ki mar, ci nongo watye ka lubo “cik pa Kricito” (Nen paragraf 9-14) *

9-10. Labol mene ma nyuto ni mar aye otugo cwiny Yecu me tito kwena, dok watwero lubo lanene nining?

9 Mukwongo, mar aye otugo cwiny Yecu me timo jami ducu ma en otimo. Kica, nyo winyo arem pa jo mukene obedo yo me nyuto mar. Kica otugo cwiny Yecu me pwonyo lwak jo mapol, cango lutwo, pito jo ma kec nekogi, kacel ki cero jo muto. (Mat. 14:14; 15:32-38; Mar. 6:34; Luka 7:11-15) Kadi bed ni timo jami magi onongo tero cawane ki kerone, Yecu oketo pi miti pa jo mukene obedo mukwongo me ka mege. Ma dong pire tek loyo, en onyuto mar madit loyo i kare en omiyo kwone piwa.​—Jon 15:13.

10 Pwony: Watwero lubo lanen pa Yecu ka waketo pi miti pa jo mukene bedo mukwongo me ka mewa. Watwero bene lubo lanene ka wadongo cwiny me kica pi jo ma gitye i wang ticwa. Ka kica ma kit man tugo cwinywa me tito kwena maber-ri ki pwonyo dano ci nongo watye ka lubo cik pa Kricito.

11-12. (a) Gin ango ma nyuto ni Jehovah paro piwa adada? (b) Watwero lubo lanen me mar pa Jehovah nining?

11 Me aryo, Yecu onyuto mar pa Wonne. I kare me ticce me pwony, Yecu onyuto ni Jehovah paro pi luticce adada. I kin jami mukene, Yecu bene opwonyo jami magi: Ni wan ducu piwa tek dok Wonwa marowa adada. (Mat. 10:31) Jehovah tye atera me jolo romone ma orweny ka ongut dok mito dwogo cen i kacokke. (Luka 15:7, 10) Jehovah onyuto marre piwa i kare ma omiyo Wode macalo ginkok piwa.​—Jon 3:16.

12 Pwony: Watwero lubo lanen me mar pa Jehovah nining? (Ep. 5:1, 2) Waneno omege ki lumegiwa ducu calo jo ma pigi tek dok cwinywa bedo yom me jolo “romo murwenyo” ma odwogo cen bot Jehovah. (Jab. 119:176) Wanyuto ni wamaro omegiwa ki lumegiwa ka wajalo cawa ki kerowa me konyogi ka gimito kony ki botwa. (1 Jon 3:17) Ka watero jo mukene ki mar, ci nongo watye ka lubo cik pa Kricito.

13-14. (a) Kit ma kicoyo kwede i Jon 13:34, 35, kit ango ma Yecu owaco ni lulub kore omyero gunyutti, dok pingo man kilwongo ni cik manyen? (b) Watwero lubo cik manyen man nining?

13 Me adek, Yecu ociko lulub kore me nyuto mar ma pe paro pire kene. (Kwan Jon 13:34, 35.) Cik pa Yecu-ni nyen pien mito ni wanyut mar i yo mapat ki kit ma Cik pa Moses onongo mito: Omyero wamar luye luwotwa kit ma Yecu omarowa  kwede. Kit mar man pe paro pire kene. * Omyero wamar omegiwa ki lumegiwa makato kit ma wamaro komwa kekenwa woko. Omyero wamargi ma watwero wa to pigi, kit ma Yecu otimo piwa.

14 Pwony: Watwero lubu cik manyen-ni nining? Me ketone i yo macek, ka wajalle pi konyo omegiwa ki lumegiwa. Watye atera pe me jalo jami madongo calo miyo kwowa pi larogi keken ento bene ki jalo jami mogo matino tino. Me labolle, ka wayelle me gamo omego nyo lamego mo ma oteggi pi cokke, nyo ka watye atera me jalo gin ma wamito wek wayom cwiny ngat ma wamaro, nyo wakwanyo kare ki i dog ticwa me miyo kony ka ma can ma poto atura otimme iye, ci nongo watye ka lubo cik pa Kricito. Nongo bene watye ka konyo kacokkewa wek dano ducu ma iye obed agonya.

CIK MA WEKO KINGOLO KOP ATIR

15-17. (a) Jami ma Yecu otimo onyuto nining ni en maro ngolo kop atir? (b) Watwero lubo lanen pa Yecu nining?

15 “Ngolo kop atir” kit ma kitiyo kwede i Baibul kwako timo gin ma Lubanga neno ni tye atir, kun itimo labongo apokapoka mo. Pingo waromo wacci cik pa Kricito weko kingolo kop atir?

Yecu onyuto woro ki kica bot mon, kadi wa mon ma jo mukene onongo gicayo (Nen paragraf 16) *

16 Mukwongo, tam kong i kom kit ma jami ma Yecu otimo onyuto ni en maro ngolo kop atir. I kare ca, onongo lupwonye dini pa Lujudaya gidag lurok, pe giworo mon, dok gicayo Lujudaya luwotgi ma pe gukwano. Ento Yecu onongo tero dano ducu marom labongo apokapoka mo. En ojolo lurok ma gunyuto niye i kome. (Mat. 8:5-10, 13) Otito kwena bot lulonyo ki lucan ducu labongo apokapoka. (Mat. 11:5; Luka 19:2, 9) En pe obedo ger nyo otiyo ki leb marac i kom mon. Ma ka meno, en onyuto woro ki kica bot mon, kadi wa mon ma jo mukene onongo gicayo.​—Luka 7:37-39, 44-50.

17 Pwony: Watwero lubo lanen pa Yecu ka watero dano labongo apokapoka kun watito kwena bot jo ducu ma giye winyo lokwa​—labongo paro pi rwom me kwogi nyo dinigi. Co ma Lukricitayo gilubo lanen pa Yecu ki tero mon ducu ki woro. Ka watimo jami magi, nongo watye ka lubo cik pa Kricito.

18-19. Gin ango ma Yecu opwonyo i kom ngolo kop atir, dok pwony ango ma watwero nongone ki iye?

18 Me aryo, tam kong i kom jami ma Yecu opwonyo i kom ngolo kop atir. En opwonyo cik ma igi lac ma okonyo lulub kore me tero jo mukene labongo apokapoka mo. Me labolle, Yecu opwonyo ni ka imito ni kiteri maber in bene myero iter luwoti maber. Ka watimo kit meno, ci man romo tugo cwinygi me terowa maber. (Mat. 7:12) Ento ka kiterowa marac kono? Yecu bene opwonyo lulub kore me bedo ki gen ni Jehovah “biculo kwor pa jo ma en oyero, ma gikok bote dyeceng ki dyewor.” (Luka 18:6, 7) Lok meno obedo cikke: Lubanga ngeyo atematema ma watye ka kato ki iye i kare man me agikki-ni dok en bikelo ngolo kop atir i karene kikome.​—2 Tec. 1:6.

19 Pwony: Ka walubo cik ma igi lac ma Yecu opwonyo, wabitero jo mukene labongo apokapoka. Dok ka kiterowa marac i lobo pa Catan-ni, pud watwero nongo kwe cwiny i ngeyo ni Jehovah biweko kingolo kopwa atir.

 JO MA GITYE KI TWERO OMYERO GUTER JO MUKENE NINING?

20-21. (a) Jo ma tye ki twero myero guter jo mukene nining? (b) Laco twero nyuto mar ma pe paro pire kene nining, dok wego myero oter lutinone nining?

20 I te cik pa Kricito, jo ma tye ki twero myero guter jo mukene nining? Kit macalo mar obedo te guti me cik meno, jo ma gitye ki twero omyero gunyut woro pi jo ma tye i te twerogi dok gutergi i yo me mar. Myero wigi opo ni Kricito mito ni wanyut mar i jami ducu ma watimo.

21 I ot. Laco myero omar dakone “kit macalo Kricito omaro kwede lwak muye en.” (Ep. 5:25, 28, 29) Laco myero olub lanen me mar pa Kricito ki keto miti pa dakone bedo mukwongo. Co mukene ginongo tek me nyuto mar, gwok nyo pien i tekwarogi nyuto mar pe kitero calo gin ma pire tek. Twero bedo tek botgi me loko kit maraco magi, ento omyero gulok yo me kwogi wek gulub cik pa Kricito. Laco ma nyuto mar ma pe paro pire kene nongo woro ki bot dakone. Wego ma maro lutinone pe biloko nyo timo gin mo ma kelo awano i komgi. (Ep. 4:31) Ma ka meno, en nyuto marre ki cwakke pigi i yo ma weko gibedo labongo lworo. Wego macalo meno nongo mar pa lutinone dok gibedo ki gen i kome.

22. Kit ma kinyuto kwede i 1 Petero 5:1-3, “romi” gubedo pa anga, dok omyero kitergi nining?

22 I kacokke. Luelda omyero wigi opo ni “romi” ma i kacokke pe obedo meggi. (Jon 10:16; kwan 1 Petero 5:1-3.) Lok calo “romi pa Lubanga,” “kit ma Lubanga mito” ki “dano ma giketo i cingwu” poyo wi luelda ni romi gubedo pa Jehovah. En mito ni kiter romine ki mar dok ki kica. (1 Tec. 2:7, 8) Luelda ma gitimo ticgi me gwoko romi ki mar ginongo cwak pa Jehovah.  Luelda magi bene ginongo mar ki woro ma a ki bot omege ki lumege.

23-24. (a) Luelda gitye ki tic ango ka odok i kom cobo lok ma mako bal madit ma ngat mo me kacokke otimo? (b) Ngo ma myero wi luelda opo iye ka gitye ka cobo bal ma kit man?

23 Tic ango ma luelda gitye kwede ka odok i kom bal madongo? Ticgi pat ki tic ma onongo lungolkop ki luelda gitimo i te Cik ma Lubanga omiyo bot jo Icrael. I te Cik meno, luelda onongo pe gicobo lok ma kubbe ki worogi pi Jehovah keken, ento bene giwinyo pido pi bal madongo ma ngat moni otimo i kom lawote. Ento i te cik pa Kricito, tic pa luelda tye me cobo bal ma kubbe ki worowa bot Jehovah. Gin gingeyo ni Lubanga omiyo twero bot luloc me lobo me cobo lok ma lubbe ki turo cik kacel ki jami ma pe tye atir i lobo. Man kwako twero ma luloc gitye kwede me miyo pwod ki tweyo dano i buc nyo ngolo cul i wigi.​—Rom. 13:1-4.

24 Tic ango ma luelda tye kwede ka ngat mo me kacokke otimo bal madit? Gingiyo lok meno kun gitiyo ki Ginacoya ma peya gumoko tam. Wigi pe wil ni guti me cik pa Kricito obedo mar. Mar tugo cwiny luelda me moko: Ngo ma myero gitim me konyo ngat mo me kacokke ma kitimo gin mo marac i kome? Madok i kom latim bal, mar weko luelda gibedo piny gineno lok magi: Tika ada en tye ki cwiny me ngut? Tika watwero konye me yubo watte ki Jehovah?

25. Pwony ma lubo man bigamo lapeny mene?

25 Pud dong watye ki pwoc madit ya me bedo i te cik pa Kricito! Ka wan ducu watute matek me lubone, ci wakonyo jo ducu ma i kacokkewa me winyo ni kimarogi, pigi tek dok gibedo agonya. Kadi bed kit meno, watye ka kwo i lobo ka ma “jo maraco” gitye ka ‘doko rac gimedde ameda.’ (2 Tem. 3:13) Pi meno, myero wabed ma wangwa twolo. I yo ma nining ma kacokke pa Lukricitayo twero lubo lanen pa Lubanga me ngolo kop atir ka gitye ka cobo lok me pyedo lutino? Pwony ma lubo man bigamo lapeny meno.

WER 15 Pak Latin Kayo pa Jehovah!

^ para. 5 Pwony man ki aryo ma lubo-ni, gitye i kin pwony angwen ma lubbe aluba ma binyamo tyen lok ma oweko wabedo labongo akalakala mo ni Jehovah obedo Lubanga ma lamar dok ngolo kop atir. En mito ni kingol kop pa jone atir, dok en kweyo cwiny jo ma kiterogi marac i lobo man marac-ci.

^ para. 1 Nen pwony ma wiye tye ni “Mar ki Ngolo Kop Atir i Lobo Icrael Macon” ma okatti i Wi Lubele me Febuari 2019.

^ para. 13 LOK MA KITITO TERE: Mar ma pe paro pire kene tugo cwinywa me keto miti pa jo mukene me bedo mukwongo me ka mewa. Wabedo atera me jalo gin mo wek wakony jo mukene.

^ para. 61 LOK I KOM CAL: Yecu tye ka neno dato mo ma wode acel keken oto woko. Kica omako Yecu ci ocero awobi man.

^ para. 63 LOK I KOM CAL: Yecu tye ka cam i gang pa Laparicayo ma nyinge Cimon. Dako mo, ma nen calo obedo malaya, oa ka dyako tyen Yecu ki pig wange, kun dunyo ki yer wiye, dok oonyo bene moo iye. Gin ma dako-ni otimo owango i Cimon matek ento Yecu opwoyo dako-ni.