Cit atir i jami ma tye

Cit atir ka ma nyuto lok ma tye iye

“Wuciti Wucilok Jo me Rok Ducu Gudok Jo ma Luba”

“Wuciti Wucilok Jo me Rok Ducu Gudok Jo ma Luba”

“Wuciti wucilok jo me rok ducu gudok jo ma luba, kun wubatijagi, . . . wupwonygi me gwoko gin ducu ma dong atyeko cikowu kwede.”​—MAT. 28:19, 20.

WER: 141, 97

1, 2. Lapeny ango ma twero bino ma lubbe ki lok pa Yecu ma tye i Matayo 24:14?

KADI bed dano giwinyo lokwa nyo pe, jo manok keken aye gikwero ni Lucaden pa Jehovah pe gingene pi ticgi me tito kwena. Twero bedo bene ni irwatte ki jo mogo i kare ma itye i ticci me tito kwena ma guwacci ni, kadi bedi ni pe giye i kom niyewa, ento giworowa pi tic ma watimo. Kit ma wangeyo kwede, Yecu owaco wacon ni, kwena maber me Ker-ri kibitito i wi lobo ducu. (Mat. 24:14) Ento wangeyo nining ni tic ma watye ka timone-ni tye ka cobo lok ma Yecu owaco-ni? Mono nongo pe watye ka ngwete kace watamo ni wan aye ma watye ka timo tic man?

2 Dini mapol gitamo ni gin aye gitye ka tito Jiri nyo kwena maber. Ento kadi bed kit meno, inongo ni tutegi pol kare gik ki tito kwo ma guwok ki iye, tic ma kanicagi timo, nyo bene yub ma giloko i ot me poko lok angeya​—i telebijon nyo intanet. Mogo gitute me miyo kony me yot kom ki kwan. Jami ma gitimo-ni rwatte nining ki gin ma Yecu ociko ni lupwonnyene myero gutim?

3. Ma lubbe ki Matayo 28:19, 20, jami angwen mene ma myero lulub kor Yecu gutim?

 3 Tika onongo lupwonye pa Yecu myero gubed mot, kun gikuro ni dano aye gubin botgi? Pe kumeno! I nge cerre, Yecu oloko ki lupwonnyene miya mapol kun waco botgi ni: ‘Wuciti wucilok jo me rok ducu gudok jo ma luba, kun wubatijagi . . . , wupwonygi me gwoko gin ducu ma dong atyeko cikowu kwede.’ (Mat. 28:19, 20) Pi meno, tye jami angwen ma mitte ni watim. Myero walok dano, wabatijagi, ki dong wapwonygi, ento gin ango ma myero wacak kwede? Yecu owaco ni: “Wuciti”! Ma lubbe ki cik meno, lacoc mo ma okwano matut owacci: “Lok man ni ‘wuciti’ obedo tic pa laye acel acel, kadi bed i teng gudu nyo i dog nam.”​—Mat. 10:7; Luka 10:3.

4. Tic ango ma bedo “lumak dano” kwako?

4 Gin ango ma onongo Yecu mito ki bot lulub kore? Tika en onongo mito ni ngat acel acel opwony pire kene, nyo kece macalo gurup ma guyubbe maber? Kit macalo ngat acel pe twero tito kwena bot “rok ducu-[ni],” tic man onongo mito note pa dano mapol. Meno aye gin ma Yecu onongo tye ka lok i iye i kare ma owaco bot lupwonnyene ni “abimiyo wudoko lumak dano.” (Kwan Matayo 4:18-22.) Kodi mako rec ma onongo en tye ka lok iye-ni pe obedo tic ki goli, ma lamak rec bedo nibet, ci kuro ka rec otongo goli ci jako. Ma ka meno, man kwako tic ki obwo​—mito tic matek dok tero kare kun bene mito kony pa jo mapol.​—Luka 5:1-11.

5. Lapeny angwen mene ma myero wagam, ki dok pingo?

5 Me ngeyo angagi ma gitye ka tito kwena maber ma lubbe ki cik ma Yecu omiyo-ni, omyero wagam lapeny angwen magi:

  • Kwena ango ma myero kitit?

  • Tyen lok ango ma myero wabed kwede pi tic man?

  • Yo ango ma myero wati kwede me titone?

  • Tic me tito kwena-ni myero orom kabedo ma rom mene ki dok oter kare ma rom mene?

Lagam pi lapeny magi pe bikonyowa me ngeyo angagi ma gitye ka tito kwena keken ento bene bicuko cwinywa me tute matek i tic man.​—1 Tem. 4:16.

KWENA MENE MA MYERO WATIT?

6. Pingo itwero bedo labongo akalakala ni meno Lucaden pa Jehovah aye gitye ka tito kwena ma Yecu ociko ni myero kitit-ti?

6 Kwan Luka 4:43. Yecu otito “lok me kwena maber me ker pa Lubanga,” dok en onongo mito ni lupwonnyene bene myero gutim kit meno. Gurup pa Lukricitayo mene ma gitye ka tito kwena maber man bot “rok ducu”? Lagamme tye ka maleng​—Lucaden pa Jehovah keken. Wa jo ma gidagwa bene giye ni meno tye ada. Me labolle, padi mo owaco ki Lacaden mo acel ni ebedo i lobe mapol mapatpat dok epenyo Lucaden pa Jehovah ducu ma erwatte kwedgi i lobe magi ducu i kom kwena ango ma gin gitito. Lagam ango ma gin ducu gumine? Padi ni owacci: “Gin ducu ki mingogi-ni guwaco lok acel-li: ‘Kwena maber me Ker.’” Lok pa padi-ni ki lok ada pe nyuto ni wan luming ento nyuto ni wan macalo Lukricitayo me ada watye ma wanote kacel. (1 Kor. 1:10) Gin gubedo ka lok i kom kwena ma tye i Wi Lubele [ma] Tito pi Ker pa Jehovah. Magajin man tye nonge i leb 254 dok  bene kigoyo i wel ma romo milion 59 kulu, man oweko odoko magajin ma pud dong kipoko loyo i wi lobo lung.

7. Wangeyo nining ni lutela dini pa Lukricitayo ata-ni pe gitye ka tito kwena ma onongo myero gutit?

7 Lutela dini pa Lukricitayo ata-ni pe gitye ka tito kwena me Ker pa Lubanga. Ka gitye ka lok i kom Ker-ri, mogo giwacci obedo kit ma giwinyo kwede nyo ni tye i cwiny Lakricitayo acel acel. (Luka 17:21) Pe gipwonyo dano wek guniang ni Ker pa Lubanga obedo gamente ma tye i polo ma Yecu Kricito aye tye macalo Lalocce, dok ni Ker meno aye ma bicobo peko pa dano ducu kun bene cokcok-ki bijwayo tim maraco woko ducu ki i lobo. (Yabo 19:11-21) Ma ka meno, wigi po i kom Yecu i kare me Karama ki Easter keken. Nen calo gipe ki ngec i kom gin ma Yecu bitimone macalo Laloc manyen me lobo man. Kit macalo dong pe gingeyo kwena ma myero gitit-ti, tika tye me ur ni pe bene gingeyo gin mumiyo gitito kwena man?

TYEN LOK ANGO MA MYERO WABED KWEDE I TIMO TIC MAN?

8. Tyen lok marac ango ma jo mukene gitye kwede pi tic me tito kwena?

8 Tyen lok ango ma myero wabed kwede me tito kwena? Pe myero obedo me rayo cente ki dok me gero odi madongo. Yecu owaco ki lupwonnyene ni: “Wun wugamo nono labongo cul mo, wumi bene nono labongo cul.” (Mat. 10:8) Lok pa Lubanga pe myero kicat acata. (2 Kor. 2:17) Jo ma gitye ka tito kwena pe myero gutim tic man pi cobo mitigi keken. (Kwan Tic pa Lukwena 20:33-35.) Kadi bed ni tira man tye ka maleng, ento pud inongo ni kanica mogo guloko odoko ticgi me rayo cente nyo tute me yenyo lonyo. Myero gujog cente pi padi ma nongo mucara, nyo bene lutic mukene ma nongo kiculogi. Macalo adwogine lutela dini pa Lukricitayo ata-ni gulony adada.​—Yabo 17:4, 5.

9. Lucaden pa Jehovah gunyuto nining ni tutegi me tito kwena-ni tye pi tyen lok matir?

9 Tika Lucaden pa Jehovah bene gijogo cente i kacokkegi nyo i gure madito? Pe! Mot ma ngat acel miyo kun a ki cwinye aye kitiyo kwede me konyo kor ticgi. (2 Kor. 9:7) Pe tye cente mo ma kijogo i Otwa me Ker nyo i gurewa. Ento, inongo ni i mwaka mukato-ni keken, Lucaden pa Jehovah gucwalo cawa bilion 1.93 i tito kwena maber ki dok bene dwe ki dwe kikwano Baibul ki dano milion abongwen labongo cul mo. Ma dong weko wabedo ki ur madit adada aye ni, kadi bed pe kiculogi ento dok gitiyo ki centegi i timo tic man. Lakwed lok mo acel, i kare ma tye ka lok i kom Lucaden pa Jehovah owaco ni: “Mitigi ma pire tek aye me tito kwena ki dok pwonyo dano. . . . Pe tye padi mo ma ye timo man labongo cul.” Tyen lok ango mumiyo gitimo tic man? Ket i yo macek ni, watimo tic man pi marwa i kom Jehovah ki pi luwotwa. Kodi cwiny me jalle ken-ni tye ka cobo lok pa lunebi ma tye i Jabuli 110:3. (Kwan.)

KIT YO ANGO MA MYERO KITI KWEDE?

Watito kwena ka ma dano tye iye (Nen paragraf 10)

10. Kit yo ango ma Yecu kacel ki lupwonnyene gutiyo kwede me tito kwena?

10 Kit yo ango ma Yecu kacel ki lupwonnyene gubedo ka tic kwede i tito kwena maber? Gucito ka ma gitwero nongo iye dano​—i dye lwak ki dok i gangi pa dano. Tic me tito kwena man onongo kwako wot i ot ki ot me yenyo jo ma gitye ki miti. (Mat. 10:11; Luka 8:1; Tic  5:42; 20:20) Yo man weko pe wakoyo ngat mo keken.

11, 12. Ka odok i lok me tito kwena maber-ri, watwero poro Lukricitayo ata-ni ki Lucaden pa Jehovah nining?

11 Dini pa Lukricitayo ata-ni gitye ka timo tic man nining? Pol kare jo me kanica mukene-ni, giweko tic me tito kwena mo keken i wi lutela dini pien nongo kiculogi. Ento ma ka bedo “lumak dano,” lutela dini pa Lukricitayo ata-ni nen calo giketo tamgi keken i gwoko “rec” ma dong gumako. Ki lok ada, lutela dini mogo gitute me tugo miti pa romigi i tito kwena mogo. Me labolle, i acakki me mwaka 2001, Papa John Paul II owaco i waragane ni: “I mwaki mukato angec abedo ka nwoyo lok ma onongo dong atito con. Dok pud abinwoyo kombeddi ni . . . Myero watito jiri dok wamedde wunu ki dongo kodi cwiny pa Paulo, ma owaco ni: ‘Ka pe atito lok me kwena maber, ci abineno can.’” Papa omedde ki lokke kun waco ni, “tic man pe kitwero weko ki jo mo manok keken ento myero Jo pa Lubanga ducu gutim tic man.” Ento dong, jo adi ma gitye ka lubo lok man?

12 Rekod pa Lucaden pa Jehovah kono tye nining? Gin keken aye ma gitito ni Yecu obedo ka loc macalo Kabaka nicakke i 1914. Kit ma Yecu ociko kwede, giketo tic me tito kwena bedo mukwongo i kwogi. (Mar. 13:10) Buk me Pillars of Faith—American Congregations and Their Partners waco ni: “Lucaden pa Jehovah gitero tic me tito kwena calo tic ma pire tek loyo gin mo keken ma gitimo.” Kun tito gin ma Lacaden acel owacce, laco buk man omedde ni: “Ka ngat mo keken tye ki peko me kec, bedo kic kic, ki dong two, gitute me miyo kony ma mitte, . . . ento wigi pe wil i kom ticgi ma pire tek ma en aye tic me tito kwena ni agikki me lobo man tye cok ki dok gin ma myero watim wek wabwot.” Lucaden pa Jehovah gitye ka medde ki tito kwena ma lubbe ki kit yo ma Yecu kacel ki lupwonnyene gutimo kwede.

TIC MAN MYERO OO WA KWENE DOK OTER KARE MA ROM MENE?

13. Tic me tito kwena onongo bio wa kwene?

13 Yecu otito ni lok me kwena maber-ri kibitito ‘i wi lobo ducu.’ (Mat. 24:14) Myero kilok ‘jo me rok ducu’ wek gudok lupwonnye. (Mat. 28:19, 20) Tic man onongo biromo wi lobo ducu.

14, 15. Gin ango ma nyuto ni Lucaden pa Jehovah gitye ka cobo lok ma Yecu owaco con madok i kom tic me tito kwena? (Nen cal ma tye i pot karatac 13.)

14 Me niang kit ma Lucaden pa Jehovah gitye ka cobo kwede ki lok ma Yecu owaco con madok i kom tic me tito kwena, kong dong wanen jami mogo. I lobo Amerika, tye lutela dini ma romo 600,000, ka ma Lucaden pa Jehovah bene gitye ma romo 1,200,000. I wi lobo lung Dini pa Katoli tye ki padi ma romo 400,000. Ento kong dong wapor  wel Lucaden pa Jehovah ma gitye ka tito kwena ki wel magi. I wi lobo lung Lucaden pa Jehovah gitye ma romo milion aboro ma gitye ka tito kwena bot dano i lobe makato 240. Pud dong gitye ka timo tic mamwonya ya, ma miyo pak ki deyo bot Jehovah!​—Jab. 34:1; 51:15.

15 Macalo Lucaden pa Jehovah watye ki miti me o bot dano ducu ki kwena maber ma peya agikki piny oo. Pi tyen lok man, wagoyo dok wagonyo bukke, magajin, trak, ki dok karatac me gure ki me lwongo i kwer me Nipo ma kipoko bot dano me nono. Wagonyo jami magi i leb makato 700 kulu. Kigoyo Baibul me New World Translation of the Holy Scriptures i wel makato milion 200 kulu ki dok i leb makato 130 kulu. Mwaka mukato-ni keken, wagoyo bukke ma jenge i Baibul cokcok i wel ma romo bilion 4.5 kulu. Kabedowa me intanet tye i leb makato 750. Gurup mene pa lutit kwena ma gitye ka timo ticci i rwom man?

16. Wangeyo nining ni Lucaden pa Jehovah gitye ki cwiny pa Lubanga?

16 Tic man me tito kwena-ni bimedde pi kare ma rom mene? Yecu otito ni tic man bimedde wa i kare me agikki, “ka dong lacen agikki piny bibino.” Gurup mene pa Lukricitayo ma gitye ka tute me tito kwena maber i kare man me agikki-ni? Jo mogo ma warwatte kwedgi i ticwa me pwony gitwero wacone ni: “Watye ki cwiny maleng, ento wun aye ma wutye ka timo tic ma Yecu ociko-ni.” Ento mono kit ma watye ka diyo cwinywa me timo tic man-ni pe nyuto ni watye ki cwiny pa Lubanga? (Tic 1:8; 1 Pet. 4:14) Kare ki kare, tye dini mogo ma bene gutemo tito kwena kit ma Lucaden pa Jehovah gitimo kwede-ni, ento tutegi-ni pe nyako nyige. Mogo gimine me timone olo pi kare mo manok ci gidok i kit me kwogi macon. Mukene bene gutemme me wot i ot ki ot, ento kit kodi kwena ango ma nongo gitito? Lagam pi lapeny man nyuto ka maleng ni pe gitye ka timo gin ma Yecu ociko ni omyero kitim.

ANGAGI MA GITYE KA TITO KWENA MABER I KARENI?

17, 18. (a) Pingo waye labongo akalakala mo ni meno Lucaden pa Jehovah keken aye gitye ka tito kwena maber me Ker i kareni? (b) Twere nining ni wan aye watye ka medde ki timo tic man?

17 Pi meno, angagi me gitye ka tito kwena maber me Ker pa Lubanga i kareni? Labongo lworo, watwero wacone ni: “Lucaden pa Jehovah!” Pingo waloko ki tekcwiny kit meno? Pien wan aye ma watye ka tito kwena matir, kwena maber me Ker. Kun bene watiyo ki yo matir me cito bot dano. Watito kwena pi tyen lok matir​—mar, ento pe pi nongo lonyo. Ticwa tye ma oromo wi lobo lung, dok bene tye ka o bot rok ki leb mapat pat ducu. Pud wabimedde ki timo tic man labongo ilo cingwa, mwaka ki mwaka nio ka dong agikki piny obino.

18 Pud dong watye ki yomcwiny madit ya i kom kit ma jo pa Lubanga gitye ka cobo kwede ki tic man i kareni. Ento jami magi ducu gitwero cobbe nining? Lakwena Paulo omiyo lagamme i waragane ma ocoyo bot Lukricitayo me Pilipo kun waco ni: “Lubanga aye ma tye ka tic i cwinywu, kun miyowu miti ki teko me tic, wek wun wuyom cwinye.” (Pil. 2:13) Wakwayo ni Wonwa ma lamar-ri omedde ki miyo ki wan ducu teko wek wamedde ki tic pire ki cwinywa ducu i cobo ticwa me pwony-nyi.​—2 Tem. 4:5.