Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | KA NGAT MA IMARO OTO

Jo Muto Gibikwo Odoco!

Jo Muto Gibikwo Odoco!

Wi po ni meno lamego Gail ma kiloko i kome con-ni onongo tye ki akalakala ka wiye biwil i kom to pa cware, Rob. Ento en kombeddi-ni dong tye ka kuro me neno cware i lobo manyen ma Lubanga ociko pire-ni. En owaco ni, “wang ginacoya ma amaro adada en aye Niyabo 21:3, 4, ma waco ni: ‘Lubanga kikome aye bibedo kwedgi, kun bene bedo Lubangagi. En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.’”

Gail owaco ni: “Cikke man tito jami ducu maber. Pud dong atye ki kica ya i kom jo ma gurwenyo danogi me amara i to ento pe gingeyo pi gen man mamwonya me neno danogi ma guto-ni doki.” Gail tye ka tic ma lubbe ki niyene i tito kwena pi kare malac, kun nywako ki luwote cikke pa Lubanga ni “to bene dong bibedo pe” matwal i anyim.

Itwero waco ni ‘gin meno pe twero timme kulu!’ Ento, tam kong i kom labol pa Yubu. Kome obedo lit adada. (Yubu 2:7) Kadi bed ni Yubu onongo mito ni eto woko, ento en onongo pud tye ki niye i kom teko pa Lubanga me cere me kwo odoco i lobo. En owaco ki gen madit ni: “Kono do ikana i lyel . . . Ka lacen ibilwonga, ci abigamo dogi; pira bibedo mitti mada, pien in aye iketo an.” (Yubu 14:13, 15) Yubu onongo tye ki gen ni meno Lubanga biparo pire dok bibedo ki miti madit me cere.

Cokcok-ki, Lubanga bitimo kit meno kikome​—bot Yubu ki jo mukene mapol​—ka loboni odoko paradic. (Luka 23:42, 43) Baibul wacciwa i Tic pa Lukwena 24:15 ni, “dano gibicer woko.” Yecu bene ocuko cwinywa ni, “Pe wuur lok man; pien kare bibino ma jo ducu ma tye i lyel biwinyo iye dwane, ci gibikatti woko.” (Jon 5:28, 29) Yubu bineno cobbe pa cikke magi. “Tekone bidwogo macalo i kare me awobine” dok del kome “bidoko nyen macalo pa latin.” (Yubu 33:24, 25) Meno bene bitimme i kom dano ducu ma gitye ki pwoc pi kica pa Lubanga me cero dano ducu me kwo odoco i lobo.

Ka irwenyo dano ni mo me amara i to, lok ada man ma wanyamo kany pe bikwanyo cwercwiny ducu ma itye kwede. Ento ka ibedo ka lwodo lok i kom cikke pa Lubanga ma tye i Baibul, bimini gen me ada dok weko imedde ki cung matek.​—1 Jo Tecalonika 4:13.

Tika imito nongo ngec mukene i kom kit ma itwero ciro kwede ki cwercwiny ka irwenyo dano-ni i to? Nyo i kom lapeny mogo calo “Pingo Lubanga oweko ni tim maraco ki deno can obed tye?” Tim ber icit i kabedowa me intanet me jw.org, wek inong lagam ma Baibul miyo ma twero kweyo cwinyi.