Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 24

Tur Tam Ducu ma Pe Rwatte ki Ngec pa Lubanga!

Tur Tam Ducu ma Pe Rwatte ki Ngec pa Lubanga!

“Waturo kwede tam ma pe atir, ki kit wakke ducu ma tinge me pyem, ma gengo dano miyo pe gingeyo Lubanga.”​—2 KOR. 10:5.

WER 124 Wabed Lugen i Kare Ducu

GIN MA WABINYAMO *

1. Tira ango ma Paulo ocoyo bot Lukricitayo ma kiwirogi?

“PE WULUB tam me lobo man.” (Rom. 12:2) Paulo ocoyo lok man bot Lukricitayo me cencwari me acel. Pingo en omiyo tira man bot co ki mon ma gudyero kwogi bot Lubanga dok ma kiwirogi ki cwiny maleng?​—Rom. 1:7.

2-3. I yo ma nining ma Catan tute kwede me ywayowa woko ki bot Jehovah, ento watwero turo tam ma omoko matek calo “cel gogo” i wiwa nining?

2 Paulo obedo ki par pien Lukricitayo mogo onongo gitye ka lubo tam ki ryeko pa dano ma i lobo pa Catan. (Ep. 4:17-19) Man bene twero timme i komwa. Catan aye ma tye ka loyo lobo man dok en twero tic ki diro mapatpat me loko tamwa. Me labolle, ka watye ki miti me bedo jo muywek, en twero tic ki miti meno me ywayowa woko ki bot Jehovah. En bene twero tic ki jami mogo ma wapwonyo ki i pacowa, i cukul, nyo ki bot jo ma gurumowa me miyo tamwa bedo calo mege.

3 Tika twere ki wan me turo woko tam mogo ma omoko matek calo “cel gogo” i wiwa? (2 Kor. 10:4) Nen kong kit ma Paulo ogamo kwede lapeny man: ‘Waturo tam ma pe atir, ki kit wakke ducu ma tinge me pyem, ma gengo dano miyo pe gingeyo Lubanga, kun wamako tam acel acel macalo  opii, waketo i te loc pa Kricito.’ (2 Kor. 10:5) Ada, ki kony pa Jehovah, watwero turo tam ma pe tye kakare. Kit macalo yat twero turo teko pa kwir, Lok pa Lubanga twero konyowa me turo teko pa kwir me lobo pa Catan.

“WUWEK LUBANGA OLOK TAMWU ODOK NYEN”

4. Alokaloka ango ma onongo mitte ni watim i kare ma wapwonyo ada nyen?

4 Tam kong i kom alokaloka ma onongo mitte ni itim i kare ma pud ipwonyo ada nyen ci imoko tammi me tic pi Jehovah. Me tic pi Jehovah, onongo mitte ni pol pa wan wajuk tim mogo maraco. (1 Kor. 6:9-11) Pud dong watye ki pwoc madit ni Jehovah okonyowa me juko tim maraco magi!

5. Jami aryo mene ma Jo Roma 12:2 tittiwa ni watim?

5 Ento, pe omyero wakwe komwa woko. Kadi bed wajuko timo bal madongo ma onongo watimo i kare ma peya wanongo batija, pud omyero wamedde ki tic matek wek wagwokke ki i gin mo keken ma twero weko wadok cen. Watwero timo man nining? Lakwena Paulo ogamo ni: “Pe wulub tam me lobo man, ento wuwek Lubanga olok tamwu odok nyen.” (Rom. 12:2) Dong, omyero watim jami aryo magi. Me acel omyero ‘pe walub’ nyo wawek tam me lobo man odorwa. Me aryo, omyero ‘walok tamwa odok nyen.’

6. Pwony ango ma wanongo ki i lok pa Yecu ma kicoyo i Matayo 12:43-45?

6 Lokke ma Paulo oloko iye-ni pe kwako loko kit ma wanen kwede ki woko keken. Kwako yo me kwowa ducu. (Nen bok ma wiye tye ni “ Olokke nyo Okanne Akana?”) Omyero walok tamwa​—cwinywa, kit ma wawinyo kwede, kacel ki  mitiwa. Pi meno omyero wan ducu wapennye kekenwa ni, ‘Tika alokaloka ma atye ka timo me doko Lakricitayo gik ki woko keken nyo tika atye ka doko Lakricitayo ki i tamma ki cwinya bene?’ Apokapoka madit tye i kin alokaloka aryo magi. I lok pa Yecu ma kicoyo i Matayo 12:43-45, en onyuto gin ma myero watim. (Kwan.) Lokke meno miyowa pwony ma pire tek man: Jwayo tam maraco keken pe romo; omyero wale kakargi ki tam pa Lubanga.

“WUWEK . . . TAM ME CWINYWU ODOK MANYEN”

7. Watwero loko ngat ma wabedo ki i cwinywa nining?

7 Tika twere botwa me loko kit ma watamo kwede jwi nyo ngat ma wabedo ki i cwinywa? Lok pa Lubanga gamo ni: “Wuwek Lubanga dong oroc tam me cwinywu odok manyen, ka dong wuruk kit pa dano manyen ma giketo i cal pa Lubanga kikome i ada me kit ma atir ki maleng.” (Ep. 4:23, 24) Ada, watwero loko ngat ma wabedo ki i iwa ento pe yot. Pe omyero wadi miti ki tim maraco keken. Omyero ‘waroc tam me cwinywa odok manyen.’ Man kwako loko mitiwa, kitwa, ki dong gin ma tugo cwinywa. Meno mito tic matek kare ducu.

8-9. Gin mutimme i kom omego mo acel nyuto nining ni pire tek ni omyero walok ngat ma wabedo ki i iwa?

8 Kong wanenu labol pa omego mo ma onongo yam obedo dano mager. I kare ma en oweko mero ki lweny, en onongo batija, ci man omiyo caden magwar i caro ma en bedo iye. Ento otyeno mo, i kare ma en pud onongo batija nyen, orwatte ki atematema mo ma pe oyubbe pire. Laco mo ma omer obino i gange kun mito lweny kwede. I acakkine, ominwa-ni odiyo mitine me lweny. Ento i cawa ma lamero-ni oyeto Jehovah, ominwa onongo dong pe twero diyo kinigane. En okato woko ci ogoyo laco-ni matek. Peko onongo tye kakwene? Kadi bed kwanne me Baibul okonye me diyo mitine me lweny, ento en onongo peya oloko tam me cwinye. Nyo waromo waco ni onongo peya oloko ngat ma en obedo ki i iye.

9 Ento, ominwa-ni pe oilo cinge woko. (Car. 24:16) Ki kony pa luelda, en omedde ki dongo i yo me cwiny. Lacen en onongo mot me bedo laelda. Ci otyeno mo, ma gitye i dyekal me Ot me Ker, en orwatte ki atematema ma rom ki ma en okato ki iye mwaki mogo mukato angec ca. Laco mo ma omer onongo mito lweny i kom laelda mukene. Ngo ma ominwa-ni otimo? En oloko ki lamero-ni ki mwolo, oweko wi lamero-ni opye mot, ci okonye me dok gange. Pingo ominwa odok iye i yo mapat i wang-ngi? Ominwa-ni oloko ngat ma en obedo ki i iye. Ki i cwinye, en odoko ngat ma mwol dok maro kuc​—man okelo deyo madit bot Jehovah!

10. Ngo ma myero watim wek walok ngat ma wabedo ki i iwa?

10 Alokaloka magi pe timme oyotoyot, dok pe gitimme pigi kengi. Pi meno twero mitte ni ‘wacukke matek’ pi mwaki mapol. (2 Pet. 1:5) Alokaloka magi pe bitimme mere pien ni watiyo pi Jehovah pi kare malac. Mitte ni watute matek me loko ngat ma wabedo ki i iwa. Tye jami mogo ma pigi tego ma twero konyowa me timo alokaloka man. Kong dong wanyamu jami magi.

 KIT ME LOKO TAM ME CWINYWA

11. Lega konyowa nining me loko tam me cwinywa?

11 Lega obedo gin ma pire tek mukwongo ma omyero watim. Omyero waleg calo laco jabuli ma owaco ni: “Ai Lubanga ma Lacwec, miya abed ki cwiny mulony, ket cwiny manyen ma pe lokke obed i iya.” (Jab. 51:10) Omyero waye ni wamito kony me loko tamwa ki cwinywa dok wapeny Jehovah pi kony man. Pingo watwero bedo ki gen ni Jehovah bikonyowa me timo alokaloka man? Watwero nongo cuko cwiny ki i gin ma Jehovah ocikke me timo i kom Luicrael ma pe gin luwiny i kare pa Ejekiel: “Abimiyo cwiny acel dok abiketo cwiny manyen i igi . . . ci amiyogi cwiny pa dano,” ma man obedo cwiny ma tye atera me lubo tira pa Lubanga. (Ejek. 11:19) Jehovah onongo mito konyo Luicrael magi me lokke, dok en tye atera me konyowa bene.

12-13. (a) Ma lubbe ki Jabuli 119:59, gin ango ma omyero walwod lok iye? (b) Lapeny mene ma omyero wapennye kwede kekenwa?

12 Lwodo lok obedo gin me aryo ma pire tek ma omyero watim. Ka wawoto ki kwano Lok pa Lubanga nino ducu, omyero bene wakwany kare me lwodo nyo tamo matut i kom tam ki miti ma mitte ni walok woko. (Kwan Jabuli 119:59; Ibru 4:12; Yak. 1:25) Omyero wangi tam nyo miti mo keken ma watye kwede ma lubo ryeko me lobo man. Mitte ni waye ni watye ki goro dok wati matek me kwanyogi woko.

13 Me labolle, pennye kekeni ni: ‘Tika atye ki nyeko mo i cwinya?’ (1 Pet. 2:1) ‘Tika atye ki awaka i cwinya pi ka ma adongo iye, rwom me kwanna, nyo lim ma atye kwede?’ (Car. 16:5) ‘Tika acayo jo mukene pien pe gitye ki jami ma atye kwede nyo pien gia ki i kaka nyo lobo mapat?’ (Yak. 2:2-4) ‘Tika abedo ka gomo jami ma lobo pa Catan miyo?’ (1 Jon 2:15-17) ‘Tika amaro galo wanga ki jami macilo nyo ma opong ki tim gero?’ (Jab. 97:10; 101:3; Amoc 5:15) Lagammi i kom lapeny magi twero nyuto kabedo mogo ma mitte ni itim alokaloka iye. Ka watute matek me jwayo tam ma omoko matek calo “cel gogo,” ci wabiyomo cwiny Wonwa.​—Jab. 19:14.

14. Pingo pire tek adada ni wayer lurem mabeco?

14 Yero lurem mabeco obedo gin me adek ma pire tek ma myero watim. Kadi bed waye nyo pe, luremwa gigudo kwowa matek adada. (Car. 13:20) I ka ticwa nyo i cukul, romo bedo ni jo ma gurumowa gubedo jo ma pe gicuko cwinywa me lubo tam pa Lubanga. Ento watwero nongo lurem mabeco loyo i kacokkewa. Kacokke aye obedo ka ma kitugo iye mitiwa me nyuto ‘mar ki tiyo tic mabeco.’​—Ibru 10:24, 25.

“WUCUNG MATEK I NIYEWU”

15-16. Catan temme nining me loko tamwa?

15 Wi myero opo ni, yub pa Catan tye me loko tamwa. En tiyo ki pwony mapatpat me balo tam mabeco ma wapwonyo ki i Lok pa Lubanga.

16 Catan pud tye ka medde ki penyo lapeny ma openyo ki Kawa i poto me Eden ni: “Lubanga mono owacci . . . ?” (Acak. 3:1) I lobo man ma tye i te loc pa Catan-ni, pol kare wawinyo lapeny ma kelo akalakala calo: ‘Lubanga mono pe cwako tim me buto i kin co ki co nyo mon ki mon? Lubanga mono pe mito ni ikwer Karama ki nino me nywal? Lubanga  mono mito ni pe iye ni kimed remo i komi? Lubanga ma lamar mono mito ni ikwer ribbe ki joni me amara ma kiryemogi ki i kacokke?’

17. Ngo ma myero watim ka warwatte ki lapeny ma kelo akalakala i kom niyewa, dok ngo ma Jo Kolocai 2:6, 7 nyuto ni bibedo adwogine?

17 Omyero wamok tamwa kekenwa i kom ada pa jami ma waye. Ka pe wangeyo lagam me lapeny ma pigi tego ma kubbe ki niyewa, ci watwero cako bedo ki akalakala ka niyewa tye ada. Akalakala ma kit meno twero nyweno tamwa ci balo niyewa woko. Dong, ngo ma myero watim? Lok pa Lubanga tittiwa ni omyero walok tamwa wek waniang “gin ma Lubanga mito, gin maber, ma yomo cwinye, ma roc mo pe iye.” (Rom. 12:2) Ka wakwano i yo matut kare ki kare, ci wamoko piwa kenwa ni jami ma wapwonyo ki i Baibul tye ada. Dok wamoko ada ni rwom me kwo matir ma Jehovah mito aye ber. Dong calo yat matek ma lwite odonyo matut i ngom, wan bene ‘wabicung matek i niyewa.’​—Kwan Jo Kolocai 2:6, 7.

18. Gin ango ma bikonyowa me jwayo adwogi marac me lobo pa Catan?

18 Pe tye ngat mo mukene ma twero jingo niyeni piri. Pi meno, wek Lubanga omedde ki roco tam me cwinyi odok nyen. Leg kare ducu, kun ibako dogi bot Jehovah pi cwiny mere maleng. Lwod lok matut kun imedde ki ngiyo tammi ki miti ma i cwinyi. Yer lurem mabeco; mar bedo ki jo ma gibikonyi me loko tammi. Ka imedde ki timo jami magi, ibijwayo dok ibigwokke ki jami maraco me lobo pa Catan dok ibiloyo “tam ma pe atir, ki kit wakke ducu ma tinge me pyem, ma gengo dano miyo pe gingeyo Lubanga.”​—2 Kor. 10:5.

WER 50 Legana me Dyere

^ para. 5 Kadi wamito nyo pe wamito, ka ma wadongo iye, tekwarowa, ki rwom me kwanwa gudo tamwa. Watwero nongo ni kit mogo maraco dong odoko gin komwa ma wekone pe yot. Pwony man binyutiwa kit ma watwero jwayo woko tam ki miti maraco ma watye kwede.