Cit atir i jami ma tye

Cit atir ka ma nyuto lok ma tye iye

Wutit Kwena Maber me Kica pa Lubanga

Wutit Kwena Maber me Kica pa Lubanga

‘Tit lok me kwena maber me kica pa Lubanga.’​—TIC 20:24.

WER: 101, 84

1, 2. Paulo onyuto nining ni etye ki pwoc pi kica pa Lubanga?

LAKWENA Paulo owaco ki cwinye ducu ni: “Kicane [pa Lubanga] ma tye bota-ni yam pe obedo me nononono.” (Kwan 1 Jo Korint 15:9, 10.) Ki lok ada, Paulo onongo ngeyo ka maleng ni pe epore me nongo kica pa Lubanga pien onongo yam ebedo ka keto ayelayela i kom Lukricitayo i kare mukato angec.

2 I agikki me kwone, Paulo ocoyo waraga bot latic lawote Temceo kun wacce ni: “Apwoyo ngat ma omiya teko me tiyo tic man, en Kricito Yecu Rwotwa, pien dong okwana me bedo lagen, ka oketa bene i ticce.” (1 Tem. 1:12-14) Tic meno onongo kwako gin ango? Paulo otito bot luelda ma i kacokke me Epeco gin ma tic man kwako, kun waco ni: ‘Kwona dong pe obedo gin me wel ki tung bota, pe pire dong dit ki bota, ento myero an dong acob ngwecca keken ki dog tic ma alimo ki bot Rwotwa Yecu, me tito lok me  kwena maber me kica pa Lubanga.’​Tic 20:24.

3. Tic ango ma pire tek ma kimiyo bot Paulo? (Nen cal ma tye i pot karatac 25.)

3 “Kwena maber” ango ma Paulo obedo ka titone me nyuto kica pa Jehovah? En otito bot Lukricitayo me Epeco ni: “Wun dong wutyeko winyo kit ma Lubanga omiyo abedo lakan-lim me kicane ki tung botwu.” (Ep. 3:1, 2) Paulo onongo kimine tic me tito kwena bot Lurok wek gin bene gubed kacel ki Kricito i Ker pa Meciya i gamente pa Lubanga. (Kwan Jo Epeco 3:5-8.) I ticce me pwony ki arima, Paulo oweko lanen maber me aluba bot Lukricitayo me kare-ni dok onyuto ni kica pa Lubanga pe kinyuto bote me “nononono.”

TIKA KICA PA LUBANGA MA PE WAPORE PIRE-NI CUKO CWINYI?

4, 5. Pingo watwero wacone ni “kwena maber me Ker” rom aroma ki “lok me kwena maber me kica pa Lubanga”?

4 I kare man me agikki-ni, jo pa Jehovah gitye ki tic me tito “kwena maber me ker pa Lubanga . . . i wi lobo ducu, me bedo caden bot rok ducu.” (Mat. 24:14) Kwena maber ma watito-ni bene kwako “lok me kwena maber me kica pa Lubanga” pien mot ducu ma watye ki gen me nongone i te loc me Kerri bibino pi kica pa Jehovah ma onyuto kun tiyo ki Kricito. (Ep. 1:3) Tika wan ki acel acel walubo lanen pa Paulo me miyo pwoc pi kica pa Jehovah kun wanywako i ticwa me pwony ki arima?​—Kwan Jo Roma 1:14-16.

5 I pwony mukato-ni, wapwonyo kit ma wan ducu macalo lubalo watwero nongo kwede adwogi maber ki i kica pa Jehovah i yo mapol. Pi meno, watye ki banya bot dano ducu me tute ki tekwa ducu wek gunge kit ma Jehovah tye ka nyuto kwede ki marre ki dok kit ma gitwero nongo kwede adwogi maber ki iye. Lubanga onyuto kicane i yo mene ma myero wakony dano wek gubed ki pwoc iye?

TIT KWENA MABER ME GINKOK PA KRICITO

6, 7. Ka watye ka tito pi ginkok bot dano, nongo watye ka tito lok me kwena maber me kica pa Lubanga nining?

6 I kare-ni dano mapol cwinygi pe pidogi ka gutimo bal dok man weko pe giniang pingo ginkok mitte. Kitungcel bene, dano mapol gineno ni kit kwo ma gitye kwede pe kelo yomcwiny. Ka pe guloko ki Lucaden pa Jehovah, jo mapol pe giniang gin ma bal obedo, adwogi marac ma kelo, ki dok ngo ma myero watim me a ki i opii me bal. Jo ma gimwol cwinygi pye ka gupwonyo ni, pi mar madit kacel ki kica pa Jehovah, omiyo en ocwalo Wode i lobo me kwanyo bal kacel ki adwogine, to.​—1 Jon 4:9, 10.

7 I kare ma Paulo tye ka lok i kom Wod me amara pa Jehovah, en owaco ni: “Pi remo me to pa Wode ma ocwer piwa, dong gikokowa woko, giweko balwa, kit macalo lonyo me kicane dwong kwede.” (Ep. 1:7) Ginkok pa Kricito obedo lanyut me mar madit ma Lubanga tye kwede piwa ki dok nyuto Kicane madit ma pe wapore pire. Pud dong miniwa kwe cwiny ya me ngeyone ni ka waketo niyewa i kom ginkok pa Yecu, ci kibitimo kica pi balwa dok cwinywa pe bipidowa!

 KONY DANO ME DONGO WAT MABER KI LUBANGA

8. Pingo mitte ni kidwok dano ma gitye ki bal bot Lubanga?

8 Watye ki tic me tito bot jo mukene ni gitwero bedo ki wat macok ki Lacwecgi. Ma peya dano gucako keto niyegi i kom ginkok pa Yecu, Lubanga nenogi macalo lumonene. Lakwena Jon ocoyo ni: “Dano ma ye Wod tye ki kwo ma pe tum; ngat ma pe winyo dog Wod, pe bineno kwo, ento kiniga pa Lubanga bedo i kome.” (Jon 3:36) Ki yomcwiny madit, ginkok pa Kricito oweko watwero bedo lurem Lubanga. Paulo otito ka maleng ni: “Wun yam wupokke woko ki Lubanga; onongo wubedo lukworre i tamwu, kun wutimo gin maraco. Ento kombeddi dong pi to pa Wode ma con odoko dano, en odwokowu woko bote.”​—Kol. 1:21, 22.

9, 10. (a) Tic ango ma Kricito omiyo bot omegine ma kiwirogi? (b) ‘Romi mukene-ni’ gikonyo kor utmege ma kiwirogi nining?

9 Kricito omiyo ki omegine ma kiwirogi ma gitye i lobo kany gin ma Paulo olwongo ni “tic me dwoko dano” bot Lubanga. Me nyamo lok meno i yo matut, Paulo ocoyo waraga bot Lukricitayo ma kiwirogi i cencwari me acel kun tito botgi ni: “Meno ducu obedo tic ma Lubanga otiyo, ma yam odwokowa kwede bote, pi Kricito, dok bene omiyowa tic me dwoko dano bote; ni meno, i Kricito, Lubanga onongo yam tye ka dwoko dano ma i lobo bote, kun pe okwano balgi i komgi, dok bene omiyowa lok me kwena i kom kit ma en dong odwokogi kwede bote. En mumiyo wadoko lukwena, luwang Kricito; Lubanga legowu ki dwanwa, wan bene wabako dogwa ma ka Kricito ni, wuwek Lubanga odwokwu bote.”​—2 Kor. 5:18-20.

10 ‘Romi mukene-ni’ gineno ni obedo mot madit me konyo kor jo ma kiwirogi i tic man me pwony-nyi. (Jon 10:16) Macalo luwang Kricito, romi mukene-ni gitye ka tic matek kun gipwonyo dano ki lok ada ki dok gikonyogi me dongo wat macok ki Jehovah. Man obedo yo ma pire tek adada me miyo caden kore ki kore pi kwena maber me kica pa Lubanga.

WEK DANO GUNGE NI LUBANGA GAMO LEGA

11, 12. Pingo obedo kwena maber me ngeyone ni twere ki dano me lega bot Jehovah?

11 Dano mapol gilego pien gingeyo ni lega kweyo cwinygi, ento pe giye ni Lubanga winyo legagi. Mitte ni gunge ni Jehovah aye ‘lagam lega-gu ducu.’ Laco Jabuli Daudi owaco ni: “In aye ma igamo lega-gu ducu. Dano ducu gibibino boti pi balgi ma gutimo. I kare ma timwa marac dong obwoyowa, in itimowa kica iweko balwa.”​—Jab. 65:2, 3.

12 Yecu owaco bot lupwonnyene ni: “Ka wubilego gin mo i nyinga, abitiyo.” (Jon 14:14) Man nyuto ni watwero lega pi “gin mo” keken ma rwatte ki miti pa Jehovah. Jon bene ocuko cwinywa ni: “Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa.” (1 Jon 5:14) Pud dong obedo gin maber ya me pwonyo jo mukene wek gunge ni lega pe kweyo cwinywa keken ento obedo yo maber adada me nyikke cok i nyim “komker pa Lubanga . . . ka ma kica tye iye”! (Ibru 4:16) Ka wapwonyogi me lega i yo matir, bot  Ngat matir, ki dok pi tyen lok matir, ci watwero konyogi me nyikke cok bot Jehovah ki dok me nongo kwe cwiny i kare ma cwinygi otur.​—Jab. 4:1; 145:18.

KICA PA LUBANGA I LOBO MANYEN

13, 14. (a) Mot ango ma jo ma kiwirogi gibinongone i anyim? (b) Tic ango ma jo ma kiwirogi gibitimo pi dano mukene-ni ducu?

13 Kica pa Jehovah pe bigik i lobo man marac-ci keken. I kare ma tye ka lok i kom mot ma Lubanga omiyo bot jo 144,000 ma gibiloc kacel ki Kricito i polo, Paulo ocoyo ni: “Lubanga lalonyo i kicane, mar ma en marowa kwede dit twatwal; en mumiyo kadi bed onongo wadoko jo muto pi turo cikke, en omiyo wadoko kwo kacel ki Kricito. Lubanga olarowu pi kicane. Pi ribbewa ki Kricito Yecu en ocerowa woko kacel kwede, ka dong oketowa wabedo kacel kwede i polo. En otimo man ducu wek enyut i kare ducu ma pud tye anyim lonyone madwong ma pe pimme me kica, ma onen ki berre botwa i Kricito Yecu.”​—Ep. 2:4-7.

14 Tek tutwal me tam i kom jami mabeco ducu ma Jehovah oyubo pi Lukricitayo ma kiwirogi ka dong gubedo i wi komker ka loc kacel ki Kricito i polo. (Luka 22:28-30; Pil. 3:20, 21; 1 Jon 3:2) Bot jo ma kiwirogi, Jehovah ‘binyuto lonyone madwong ma pe pimme me kicane.’ Gibidoko “Jerucalem manyen” nyako ger pa Kricito. (Yabo 3:12; 17:14; 21:2, 9, 10) Gibinywako kacel ki Yecu i tic “me cango two pa jo me rok ducu,” kun ginyuto yo bot jo ma luwiny wek kikwany bal, to kacel ki roc woko matwal ki i komgi.​—Kwan Niyabo 22:1, 2, 17.

15, 16. Jehovah binyuto kicane nining bot ‘romi mukene-ni’ i anyim?

15 I Jo Epeco 2:7, wakwano ni Lubanga binyuto kicane ma pe lokke ‘i kare ma pud tye anyim.’ Labongo akalakala, lobo manyen pa Jehovah biweko wanongo mit pa ‘lonyo madwong ma pe pimme me kica pa Lubanga.’ (Luka 18:29, 30) Gin me ur madit ma wabineno i lobo manyen ma binyuto kica pa Jehovah bibedo cero dano ma guto ki “i lyel.” (Yubu 14:13-15; Jon 5:28, 29) Co kacel ki mon ma lugen ma guto ma peya Kricito odyero kwone macalo ginkok, ki bene “romi mukene” ma lugen ma guto i kare man me agikki-ni, kibicerogi wek gumedde ki tic pi Jehovah.

16 Dano milion mapol ma guto labongo ngeyo Lubanga bene kibicerogi. Gibiminigi kare me pwonyo lok i kom Jehovah ki me mine i te twero me locce. Jon ocoyo ni: “Ci aneno jo muto, jo madito ki jo matino, kun gucung i nyim komker, onongo bene tye kenyo buk mogo ma giyabo igi woko. Giyabo bene buk mo mukene ma en aye buk me kwo. Gingolo kop i kom jo muto kun gilubo gin ma yam gin gutiyo, kit macalo onongo gicoyo i buk magi. Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi; ci gingolo kop pa dano acel acel kun gilubo gin ma yam gin gutiyo.” (Yabo 20:12, 13) Ki lok ada, bimitte ni meno jo ma kicerogi gupwony kit me keto cik ma igi lac me Baibul i tic. Medo i kom meno, myero gulub cik manyen ma kibimiyone i “buk adola” ma binyuto jami ma Jehovah mito ki bot dano ducu ma gibikwo i lobo manyen. Jami ma tye i  buk adola man bene binyuto kica madit ma Jehovah tye kwede piwa.

MEDDE KI TITO KWENA MABER

17. Gin ango ma myero waket i wiwa ka watye ka nywako i ticwa me tito kwena?

17 Ticwa me tito kwena maber me Ker-ri i kare man me agikki-ni pire tek loyo i kare mo keken! (Mar. 13:10) Ki lok ada, kwena maber-ri nyuto kica ma Jehovah tye kwede. Lok man myero obed i wiwa ka watye ka nywako kwena maber ki dano. Ka watye ka tito kwena, mitiwa myero obed me keto deyo i kom Jehovah. Watwero timo man ka wanyuto bot dano ni jami ma Jehovah ocikke me timone i lobo manyen nyuto kica ma Jehovah tye kwede.

Ti ki mit kom “macalo lagwok-jami mabeco, ma tiyo ki mot me kica ma Lubanga omiyo.”​—1 Pet. 4:10 (Nen paragraf 17-19)

18, 19. Waketo deyo i kom Jehovah pi kicane nining?

18 Ka watye ka miyo caden bot jo mukene, watwero tito botgi ni i te loc me Ker pa Kricito, dano gibinongo ki pete tere ducu adwogi maber ma bino pi ginkok ki dok ni motmot kibikwanyo roc woko ki i komgi. Baibul waco ni: “Gibigonyo ginaketa woko ki i opii me bedo gin ma top, wek gunong kuc ki deyo ma gimiyo ki litino pa Lubanga.” (Rom. 8:21) Man bitwere pi kica ma Jehovah onyuto botwa i yo me aura-ni.

19 Watye ki mot me nywako ki jo ma gimito winyo cobbe pa lok ma kicoyo i Niyabo 21:4, 5 ni: “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.” Ci Jehovah ngat ma obedo i wi kom ker, owacci: “Nen, aketo jami ducu doko nyen.” Dok omedo ni: “Co lok man, pien lok magi lok ma genne dok me ada.” Ka watito kwena maber ki mit kom bot jo mukene, wabiketo deyo i kom Jehovah pi kicane ma pe wapore pire-ni!