Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | KIT MA BAIBUL​—OBWOT KWEDE

Lok ma Pire Tek

Lok ma Pire Tek

Pe tye buk mo me dini ma kitwero porone ki Baibul. Dok pe tye buk mo mapat ma oloko niye pa dano mapol dok pi kare malac calo Baibul. Kitungcel, pe tye buk mo mukene ma dano gungiyo i yo matut dok guloko i kome i yo marac.

Me labolle, jo mogo ma gukwano matut gikalakala ka lok ma i Baibul ma watye kwede i kare-ni tye kit ma onongo tye kwede i Baibul ma kikwongo coyone con. Ngat mo ma okwano lok i kom dini i yo matut owaco ni: “Pud watye ki akalakala ka ada kikobo coc macon kit ma onongo tye kwede.” En dok omedde ni: “Watye ki kopi me Baibul ma opong ki lok ma pe tye atir, dok bene Baibul magi kikobogi cencwari mapol ata i nge coyo Baibul me acel, dok gipat ki kopi macon-ni i yo mapol mapatpat.”

Jo mukene gitye ki akalakala i kom Baibul pi dini ma gudongo iye. Me labolle, lunyodo pa Faizal ma pe gubedo Lukricitayo, gupwonye ni Baibul obedo buk maleng ento ni lok ma iye kiloko woko. Faizal owaco ni: “Macalo adwogine, onongo abedo ki gung cwiny ka ngat mo mito lok bota i kom Baibul.” Dok omedde ni: “Pien gin nongo gipe ki Baibul macon-ni. Dok lok ma tye i Baibulgi kiloko woko!”

Mono pire tek botwa me niang ka lok ma i Baibul kiloko nyo tye kit macon? Tam kong i kom lapeny magi: Tika onongo ibiye i kom cikke me kweyo cwiny ma Baibul miyo pi gin ma bitimme i anyim ka onongo pe ingeyo ka cikke magi kicoyo i Baibul macon? (Jo Roma 15:4) Tika onongo itwero tic ki cik ma igi lac ma i Baibul me moko tam ma lubbe ki dog tic, kwo me oti, nyo kit me worowa ka onongo obedo lok goba ma dano adana aye gucoyo?

Kadi bed ni kopi macon me Baibul ma kikwongo coyogi dong gurweny woko, pud watwero nongo kony ki i kopi mogo ma kicoyo i kare macon​—man bene kwako ginacoya macon alip mapol ata ma kikobogi ki i kopi mukwongo. Kopi magi gubwot ki i cing lumone, pe guballe, dok pe kiloko kwena ma i igi nining? Kit ma gubwot kwede twero jingo cwinyi nining ni lok ma i Baibul ma itye kwede i kare-ni obedo lok ada? Kong dong inen lagam pi lapeny magi i pwony ma bitito kit ma Baibul obwot kwede.