Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 30

Kit me Gudo Cwiny Jo ma Gipe ki Dini

Kit me Gudo Cwiny Jo ma Gipe ki Dini

“Alubo kit ducu ma dano gitye kwede, wek omiya alar jo mogo i yo ducu.”​—1 KOR. 9:22.

WER 82 ‘Wek Deroni Omeny’

GIN MA WABINYAMO *

1. Alokaloka ango ma otimme i lobe mapol i mwaki mogo ma cokcok-ki?

PI MWAKI alip mapol, pol pa dano ma i wi lobo-ni onongo gitye lumemba me dini mo. Ento i mwaki mogo manok angec, alokaloka madit otimme. Wel dano ma gipe ki dini mo tye ka medde ameda. Ki lok ada, i lobe mogo pol pa dano giwaco ni pe gitye ki dini mo. *​—Mat. 24:12.

2. Tyen lok ango ma oweko jo mapol giwacci gipe ki dini?

2 Pingo wel dano ma giwacci gipe ki dini tye ka medde ameda? * Jo mogo gulungo wigi i yenyo yomcwiny nyo paro pekki ma gitye kwede. (Luka 8:14) Jo mogo ma onongo yam ludini dong pe giye i kom tye pa Lubanga. Mukene giye i kom Lubanga ento gitamo ni dini dong karene okato woko, konye pe, dok pe rwatte ki cayan kacel ki ryeko me kare-ni. Guromo winyo ka luremgi, lupwonyegi, nyo jo muywek giwaco ni kwo ocakke pire kene, ento pol kare pe kimiyogi tyen lok mucwiny me ye i kom Lubanga. Jo mukene gukwero dini pi tim me woro ki miti me cente pa lupwonye dini. I lobe mukene, gamente giketo cik ma gengo dano ki bedo agonya me woro Lubanga.

3. Pwony man kiyubo pi tyen lok ango?

3 Yecu ocikowa ni omyero ‘wacilok jo me rok ducu gudok jo ma lubbe.’ (Mat. 28:19) Watwero konyo jo ma pe gitye  lumemba me dini mo nining wek gumar Lubanga dok gudok lulub kor Kricito? Omyero waniang ni kit ma ngat moni dok kwede i kom kwenawa twero jenge i kom ka ma en odongo iye. Me labolle, jo ma gia ki i lobo Ulaya pe giromo dok i kwenawa marom ki jo ma gua ki i lobo Acia. Pingo? I lobo Ulaya, jo mapol olo gingeyo gin mo i kom Baibul dok guwinyo ni Lubanga ocweyo jami ducu. Ento i Acia, pol pa dano gitye ki ngec manok nyo pe gingeyo gin mo kulu i kom Baibul, dok twero bedo ni pe giye i kom Lacwec. Pwony man tye me konyowa wek wagud cwiny jo ducu ma warwatte kwedgi i tic me pwony, labongo paro ka ma gia ki iye nyo niyegi.

BED KI NENO MUPORE

4. Pingo omyero wabed ki neno mupore?

4 Bed ki Neno Mupore. Mwaka ki mwaka, jo mapol ma gipe ki dini mo gidoko Lucaden pa Jehovah. Polgi onongo yam gikwo kwo matir dok cwinygi cwer pi tim maraco pa lutela dini. Mukene onongo gikwo kwo macilo dok gitye ki kit maraco ma mitte ni guwek woko. Ki kony pa Jehovah, watwero bedo ki gen ni wabinongo ‘jo ma myero me nongo kwo ma pe tum.’​—Tic 13:48; 1 Tem. 2:3, 4.

Lok yo me pwonyi ka itye ka tito kwena bot jo ma pe giye i kom Baibul (Nen paragraf 5-6) *

5. Gin ango ma pol kare weko dano jolo lokwa?

5 Bed Lakica kun Iloko ki Diro. Pol kare, dano gijolo kwenawa, pe pi gin ma wawaco, ento pi kit ma waloko kwede. Gibedo ki pwoc ka wan lukica, waloko ki diro, dok wanyuto miti me ada i komgi. Pe wadiyogi me winyo lokwa. Me ka meno, watemme me niang tyen lok mumiyo gineno dini kit meno. Me labolle, waniang ni jo mogo pe gimito nyamo lok i kom dini ki ngat ma pe gingeyo. Jo mukene gineno ni pe nyuto woro ka ipenyo ngat moni gin ma en tamo i kom Lubanga. Jo mukene dok aye lewic makogi ka kinenogi ka kwano Baibul, tutwalle ki Lucaden pa Jehovah. Labongo paro pi tyen lok mumiyo gikwero dini, watemme me niang kit ma giwinyo kwede.​—2 Tem. 2:24.

6. Lakwena Paulo onyuto nining ni etye atera me loko yo me pwonye, dok watwero lubo lanene nining?

6 Ngo ma waromo timone ka waniang ni ngat moni pe bedo agonya ka watiyo ki nyig lok calo “Baibul,” “cwec,” “Lubanga,” nyo “dini”? Watwero lubo lanen pa lakwena Paulo kun waloko yo me pwonywa wek orwatte ki mitigi. I kare ma Paulo onongo tye ka lok ki Lujudaya, en obedo ka nyamo lok kwedgi kun tiyo ki Ginacoya. Ento, i kare ma en oloko ki luryeko ma Lugrik i Areopago, Paulo pe oloko atir i kom Baibul. (Tic 17:2, 3, 22-31) Watwero lubo lanen pa Paulo nining? Ka irwatte ki dano mo ma pe ye lok me Baibul, twero bedo ber ka pe iloko atir i kom Baibul. Ka iniang ni ngat moni lewic mako ka kinene ka kwano Baibul, tem nyutte ginacoya i yo ma pe ywayo tam pa dano, calo ki i cim nyo tabulet.

7. Ngo ma mitte ni watim wek walub lanen pa Paulo ma kitito i 1 Jo Korint 9:20-23?

7 Bed Ngat ma Niang dok Iwiny Lokgi. Omyero watem niang tyen lok mumiyo jo ma warwatte kwedgi gitamo kit meno. (Car. 20:5) Kong dok wanen lanen pa lakwena Paulo. En odongo i kin Lujudaya. Labongo akalakala mo onongo mitte ni en olok yo me pwonye ka tye ka tito lok bot Lurok, pien onongo gitye ki ngec manok nyo pe gingeyo gin mo kulu i kom Jehovah ki Ginacoya. Twero mitte ni watim kwed nyo wapeny jo ma gitye ki ngec i kacokke wek gukonywa me niang kit me  nyuto ni waparo pi dano me wang ticwa.​—Kwan 1 Jo Korint 9:20-23.

8. I yo ma nining ma itwero cako kwede nywako lok i kom Baibul?

8 Mitiwa tye me nongo jo “ma myero.” (Mat. 10:11) Me timo meno, omyero wapeny dano me miyo tamgi ci wacik itwa ka winyo lokgi. Omego mo i lobo Ulaya penyo tam pa dano i kom kit me nongo yomcwiny i nyom, kit me gwoko lutino, nyo kit me kanyo tim maraco. I nge winyo lagamgi, en waco ni, “Itamo ningo i kom tira man ma kicoyo cokcok mwaki 2,000 angec?” Ci, labongo tic ki nyig lok ni “Baibul,” en nyutigi wang ginacoya ma rwatte ma oyero ki i cimme.

GUD CWINY DANO

9. Watwero konyo jo ma pol kare gikwero lok i kom Lubanga nining?

9 Watwero gudo cwiny jo ma pol kare gikwero lok i kom Lubanga ka wanyamo gin mo ma gudogi. Me labolle, jo mapol gitye ki ur i kom cwec. Pi meno watwero waco botgi lok calo man: “Tika onongo ingeyo ni pol pa jami ma lucayan oyubogi kong guneno ki i kom cwec? Me labolle, lakub dwan kiyubo kun kingiyo it, ki dok kamera kiyubo kun kingiyo wang. Ngo ma bino i wi ka itamo i kom cwec? Tika itamo ni obino pire kene, dano mo ocweyo, nyo gin mukene?” I nge winyo lokke ki diro, watwero medde ni: “Ka ludiro tet ginongo ngec ki i kom jami calo it ki wang, watwero pennye ni anga ma gitye ka nongo ngec ki bote. Laco lwod mo ma okwo con otugu mitina ki lwode ma ocoyo ni: ‘En ngat muketo it mono pe winyo? En ngat mucweyo wang kono pe neno? . . . En aye ma pwonyo dano ki ryeko!’ Lucayan mukene bene giye lok meno.” (Jab. 94:9, 10) Ci dong waromo nyutu vidio ma tye i jw.org i te “Interviews and Experiences” i kin vidio ma lubbe aluba i bute me Viewpoints on the Origin of Life.” (Nen i te PUBLICATIONS > VIDEOS.) Nyo watwero miyo botgi brocuwa me Was Life Created? nyo The Origin of Life​—Five Questions Worth Asking.

10. I yo ma nining ma itwero cako kwede lok ki ngat mo ma pe mito lok i kom Lubanga?

10 Pol pa dano gimito anyim maber. Kadi bed kit meno, jo mapol gilworo ni lobo-ni kibibalone woko nyo kibiweko dong labongo dano. Laneno me adwol mo i lobo Norway owaco ni dano ma pe giye lok i kom Lubanga pol kare giye lok i kom  jami ma tye ka timme i lobo-ni. I nge moto dano, en wacci: “Itamo ningo i kom genwa pi kwo maber i anyim? Tika genwa jenge i kom lucungo i wibye, lucayan, nyo ngat mo mukene?” I nge winyo lagam pa dano meno, en kwano nyo tito ginacoya ma nyuto kwo mamwonya i anyim. Cikke pa Lubanga ma i Baibul ni lobo-ni bibedo matwal dok ni jo ma kitgi atir gibibedo iye matwal aye tugo miti pa jo mukene.​—Jab. 37:29; Latit. 1:4.

11. Pingo omyero watem yo me pwony mapatpat, dok watwero lubo lanen pa Paulo nining, kit ma kinyuto kwede i Jo Roma 1:14-16?

11 Bedo ber ka watiyo ki yo me pwony mapatpat ki dano ma warwatte kwedgi. Pingo? Pien ngat acel acel tye ki miti mapat ki lawote. Gin ma tugo miti pa ngat acel twero weko ngat mukene kwero winyo lokwa woko. Jo mogo giye lok i kom Lubanga nyo Baibul, ento jo mukene gimito ni kong icak ki lok i kom jami mukene. Kadi bed kit meno, omyero wakwany kare me lok ki dano ducu. (Kwan Jo Roma 1:14-16.) Ngene kene ni, wiwa myero opo ni Jehovah aye ngat ma weko ada dongo i cwiny dano ma gimaro gin ma atir.​—1 Kor. 3:6, 7.

KIT ME NYWAKO LOK ADA KI DANO MA GIA KI I ACIA

Lutit kwena mapol ginyuto miti i kom dano ma gia ki i lobe ma pol pa dano pe gubedo Lukricitayo dok ginywako kwedgi lok me ryeko ma nonge i Baibul (See paragraphs 12-13)

12. Ngo ma watwero timone me gudo cwiny jo ma gia ki i Acia ma peya gutamo matut ka Lacwec tye?

12 I wi lobo ducu, lutit kwena mapol gitye ka rwatte ki jo ma gia ki i Acia, ma i kine tye iye jo ma gia ki i lobe ma gamente oketo kigeng i kom dini. I lobe mapol ma i Acia, jo mapol gudongo ma pe gitamo matut ka ce Lacwec tye nyo pe. Mogo i kingi gitye ki miti dok giye kwano Baibul, ento mukene pe gibedo ki miti me jolo tam manyen i acakkine. Ngo ma watwero timone me konyogi? Lutit kwena mogo ma gitye ki diro gunongo ni yo ma tiyo maber aye me cako ki boko lok ki ngat-ti kun ginyuto ni giparo pire, ci dong ka karene opore, gitito kit ma keto pwony me Baibul i tic okonyogi kwede.

13. Ngo ma twero tugo miti pa dano i kom ada me Baibul? (Nen cal ma tye i pok ngeye.)

13 Gin ma ywayo jo mapol i ada aye ryeko ma tye i Baibul. (Latit. 7:12) I boma me New York, lamego mo ma maro limo jo ma giloko leb Mandarin me China owacci: “Atute me nyuto miti i kom jo magi kun awinyo lokgi. Ka aniang ni ngat mo pud obino nyen i lobo Amerika, atwero penye ni: ‘Itye ka yelle nining me jolo alokaloka? Tika dong inongo tic? Tika jo me kabedo man gitye ka teri maber?’” I kare mukene man yabo yo me nyamo lok mo me Baibul. Ka oneno ni opore, ci laminwa-ni romo medde ni: “Itamo ni gin ango ma pire tek ma myero itim wek ibed ki wat maber ki jo mukene? Aromo nyutti carolok mo ma i Baibul? Waco ni: ‘Lweny cakke matitidi ki lok me pyem macalo pii ma ka iyabo doge kong kwongo mol manoknok; pi meno myero ijukke woko ma pud peya daa ocakke.’ Tika itamo ni tira man twero konyowa me bedo ki wat maber ki jo mukene?” (Car. 17:14) Boko lok i yo man twero konyowa me niang jo mene ma omyero wadok cen ka limogi.

14. I yo ma nining ma omego mo ma a ki i Acia konyo kwede jo ma giwaco ni pe giye i kom Lubanga?

14 Ngo ma waromo wacone bot jo ma giwacciwa ni pe giye i kom Lubanga? Omego mo ma tye ki diro me tito kwena bot jo ma pe gubedo ludini i Acia otito ni: “Pol kare, ka dano ma kany owaco ni, ‘Pe aye i kom Lubanga,’ nongo en tye ka waco ni pe eye i kom tim me woro lubange me tekwaro. Pi meno, an aye lokke ci awaco ni pol lubange magi dano aye oyubogi  dok pe gubedo Lubanga me ada. Pol kare, akwano Jeremia 16:20 ma waco ni: ‘Dano twero tiyo lwak lubanga pire kene? Kit gin macalo meno pe lubanga wacel.’ Ci apenye ni: ‘Itwero poko lubanga me ada ki ma dano guyubo nining?’ Atero ita awinyo lokke, ci akwano Icaya 41:23 ma waco ni: ‘Wutittiwa gin ma bitimme i anyim, wek omi waye ni wun wubedo lubanga.’ Ci anyutte labol ma nyuto kit ma Jehovah otito kwede con jami ma bitimme i anyim.”

15. Gin ango ma watwero pwonyone ki i labol pa omego mo ma bedo Tung Kunyango me Acia?

15 Omego mo ma a ki Tung Kunyango me Acia pol kare tiyo ki diro man me lok ka odok cen ka lim. En owaco ni: “Anyutigi labol me ryeko ma nonge i Baibul, lok pa lunebi me Baibul ma ocobbe kakare, ki dong cik ma doro polo ki lobo. Ci anyutigi ni meno ducu nyuto ni Lacwec ma kwo dok maryek tye. Ka ngat moni oye ni Lubanga nen calo tye, acako nyute gin ma Baibul waco i kom Jehovah.”

16. Ma lubbe ki Jo Ibru 11:6, pingo lutino kwan myero gubed ki niye i kom Lubanga ki Baibul, dok watwero konyogi nining me dongo niye meno?

16 Ka watye ka kwano Baibul ki dano ma pe ludini, omyero kare ducu wabed ka konyogi me dongo niyegi i kom tye pa Lubanga. (Kwan Jo Ibru 11:6.) Dok omyero wakonygi me dongo niye i kom Baibul. Man twero mito ni wanwo pwony mogo tyen mapol. Kare ducu ka watye ka kwan, omyero wanyam gin ma nyuto ni Baibul obedo lok pa Lubanga. Watwero nyamo wiye wiye lok pa lunebi me Baibul ma ocobbe kakare, kit ma lok me Baibul rwatte ki cayan dok tito jami mutimme con kakare, nyo kit ma Baibul tye ki ryeko ma tiyo.

17. Mar ma wanyuto bot jo mukene twero gudogi nining?

17 Wakonyo dano me doko lulub kor Kricito ka wanyuto mar pigi, kadi bed gitye ki dinigi nyo pe. (1 Kor. 13:1) Ka wawoto ki pwonyogi, mitiwa myero obed me nyuto ni Lubanga marowa dok en mito ni wamarre. Mwaka ki mwaka, dano alip mapol ma yam gipe ki miti nyo gitye ki miti manok keken i kom dini ginongo batija pien gupwonye me maro Lubanga. Pi meno, bed ki neno mupore dok inyut mar bot dano ducu. Winy lokgi. Tem niang tyen lok mumiyo giwinyo kit meno. Pwonygi me doko lulub kor Kricito kun inyutigi labol maber.

WER 76 In Iwinyo Nining?

^ para. 5 I kare-ni, warwatte ki jo ma gipe ki dini mo makato yam con. Pwony man binyamo kit ma watwero nywako lok ada me Baibul kwedgi ki kit ma watwero konyogi me dongo gen i kom Baibul ki niye i kom Lubanga Jehovah.

^ para. 1 Ma lubbe ki kwed ma kitimo, lobe magi aye: Albania, Australia, Austria, Azerbaijan, Canada, China, Czech Republic, Denmark, France, Germany, Hong Kong, Ireland, Israel, Japan, Netherlands, Norway, South Korea, Spain, Sweden, Switzerland, United Kingdom, ki Vietnam.

^ para. 2 LOK MA KITITO TERE: Jo ma gipe ki dini ma kitye ka lok i komgi i pwony man tye iye bene jo ma pe giye i kom Lubanga.

^ para. 54 LOK I KOM CAL: Omego mo tye ka miyo caden bot latic lawote ma gitiyo kwede i ot yat, lacen lawote-ni tye ka neno kabedowa me Intanet me jw.org.