Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 1

“Wuciti Wucilok Jo me Rok Ducu Gudok Jo ma Luba”

“Wuciti Wucilok Jo me Rok Ducu Gudok Jo ma Luba”

GINACOYAWA ME MWAKA 2020: “Wuciti wucilok jo me rok ducu gudok jo ma luba, kun wubatijagi.”​—MAT. 28:19.

WER 79 Pwonygi Wek Gucung Matek

GIN MA WABINYAMO *

1-2. Gin ango ma lamalaika owaco ki mon ka ma kiyiko iye kom Yecu, dok tira ango ma Yecu kikome ominigi?

I ODIKO me Nican 16, mwaka 33 K.M., mon mogo ma gimaro Jehovah gucito ka neno lyel ka ma onongo kiyiko iye kom Rwot Yecu Kricito nino aryo angec. I kare ma guo ka ma kiyiko iye kom Yecu, ki miti me wiro kome ki moo ma ngwece kur, gubedo ki ur ni kom Yecu pe! Lamalaika owaco ki mon magi ni Yecu ocer woko, dok omedde ni: “En dong okwongo nyimwu me cito i Galilaya; wun wubinene ki kunnu.”​—Mat. 28:1-7; Luka 23:56; 24:10.

2 I kare ma mon magi gua woko ki ka ma kiyiko iye kom Yecu, Yecu kikome orwatte kwedgi ci ominigi tira man ni: “Wuciti wutit bot utmegina ni myero gucit i Galilaya, ci gibinena ki kunnu.” (Mat. 28:10) Yecu onongo tye ki lok mo ma pire tek adada me atita bot lulub kore, pien cokke man obedo gin ma en okwongo timone i nge cerre!

YECU OMIYO CIK MAN BOT ANGAGI?

I kare ma Yecu orwatte ki lukwenane ki jo mukene i Galilaya i nge cerre, en otito botgi ni “wuciti wucilok jo me rok ducu gudok jo ma luba” (Nen pwony me anyama me 1, paragraf 3-4)

3-4. Pingo watwero waco ni tic ma kimiyo i Matayo 28:19, 20 pe kimiyo bot lukwena keken? (Nen cal ma i pok ngeye.)

3 Kwan Matayo 28:16-20. I cokke ma Yecu oyubo-ni, en otito ki lulub kore tic ma pire tek ma gibicobone i cencwari me acel​—meno aye tic acel ma watye ka cobone i kare-ni. Yecu owaco ni: “Pi meno dong wuciti wucilok jo me rok ducu gudok jo ma luba, . . . wupwonygi me gwoko gin ducu ma dong atyeko cikowu kwede.”

4 Yecu mito ni lulub kore ducu gutit kwena. En pe omiyo cik man bot lukwenane 11 ma lugen keken. Wangeyo  man nining? Tam kong, tika lukwenane 11 keken aye onongo gitye i kare ma kimiyo cik man me loko dano ki i wi got meno i Galilaya? Wi opo ni lamalaika onongo owaco bot mon ca ni: ‘Wun wubinene ki kunnu [i Galilaya].’ Dong nen calo mon ma lugen-ni bene gubedo tye i cokke meno. Ento pe meno keken. Lakwena Paulo otito ni Yecu “onen bot utmego makato miya abic lawangacel.” (1 Kor. 15:6) Omege 500 magi onongo gitye kwene?

5. Gin ango ma wapwonyo ki i 1 Jo Korint 15:6?

5 Watye ki tyen lok ma atir me tamo ni i 1 Jo Korint 15:6 Paulo onongo tye ka lok i kom cokke ma kitito pire i Matayo cura 28. Tyen lok ango? Me acel, pol pa lupwonnye pa Yecu onongo gia ki i Galilaya. Pi meno, onongo yot me gure ki dano mapol i wi got me Galilaya loyo gure i gang pa dano mo i Jerucalem. Me aryone, i nge cerre Yecu onongo dong orwatte woko ki lukwenane i gang mo i Jerucalem. Ka onongo Yecu mito miyo tic man me tito kwena ki loko dano bot lukwenane keken, onongo kono otimo meno ki i Jerucalem me ka penyogi ki mon mukene me rwatte kwede i Galilaya.​—Luka 24:33, 36.

6. I yo ma nining ma Matayo 28:20 onyuto kwede ni cik man me loko dano-ni kwakowa i kare-ni, dok kitye ka lubo cik man nining?

6 Nen kong dok tyen lok me adek ma pire tek. Cik pa Yecu me tito kwena pe kwako lutit kwena ma gukwo i cencwari me acel keken. Wangeyo man nining? Yecu ogiko lokke bot lulub kore kit man ni: ‘Nen, atye kwedwu kare ducu, nio i agikki piny.’ (Mat. 28:20) Kit ma Yecu otito kwede, tic me tito kwena i kare-ni tye magwar. Tam kong iye! Cokcok dano ma romo 300,000 ginongo batija mwaka ki mwaka macalo Lucaden pa Jehovah dok gidoko lulub kor Kricito!

7. Gin ango ma wabinyamo, dok pingo?

7 Jo mapol ma gikwano Baibul gidongo i yo me cwiny dok ginongo batija. Ento, jo mogo ma gikwano Baibul kwedwa gilworo doko lulub kor Kricito. Gimaro kwangi ento pe gitye ka kwanyo yo ma terogi i nongo batija. Ka itye ka kwano Baibul ki ngat mo, wangeyo ni imito konyo latin kwanni me keto gin ma en pwonyo i tic ki me doko lalub kor Kricito. Pwony man binyamo kit ma watwero gudo kwede cwiny latin kwanwa ki kit ma watwero konye me dongo i yo me cwiny. Pingo mitte ni wanyam lok man? Pien i nge kare mo twero mitte ni wamok tamwa ka omyero wamedde ki kwan ki latin kwan meno nyo pe.

TUTE ME KONYO LATIN KWANNI ME MARO JEHOVAH

8. Pingo i kare mukene tek adada me konyo lutino kwanwa me maro Jehovah?

8 Jehovah mito ni dano guti pire pien gimare. Pi meno, yubwa tye me konyo lutino kwanwa me niang ni Jehovah paro pigi ki acel acel dok marogi matek. Wamito ni wakonygi me neno Jehovah calo ‘won jo ma wongi pe, dok lagwok mon to.’ (Jab. 68:5) Ka lutino kwanni giwoto ki neno mar pa Lubanga pigi, ci man bigudo cwinygi dok margi pire bene bidongo. Lutino kwan mukene ginongo ni tek me neno Jehovah calo wego ma lamar pien gudongo ma wegigi bene pe onyutigi mar. (2 Tem. 3:1, 3) Ka itye ka kwan ki dano ma kit man, ci wek en onge kit pa Jehovah ma pire tek. Kony lutino kwanni me niang ni Lubangawa ma lamar-ri  mito ni gunong kwo ma pe tum, dok en tye atera me konyogi. Gin ango mukene ma watwero timo?

9-10. Bukke mene ma omyero wati kwedgi ka watye ka kwan ki lutino kwanwa, dok pingo omyero wati ki bukke magi?

9 Ti ki buk me “Baibul Twero Pwonyowa Gin Ango?” ki “Kit me Bedo i Mar pa Lubanga.” Bukke magi kiyubogi me konyowa wek pwonywa ogud cwiny lutino kwanwa. Me labolle, dul me 1 i buk me Baibul Pwonyowa gamo lapeny magi: Lubanga tika paro piwa, ce nyo cwinye col?, Lubanga winyo nining ka dano deno can?, ki In mono itwero bedo larem Jehovah? Ento buk me Bed i Mar pa Lubanga kono? Buk meno bikonyo latin kwan me niang kit ma keto i tic cik ma igi lac me Baibul biloko kwede kwone dok binyikke cok ki Jehovah. Kadi bed ni dong ityeko kwano bukke magi ki jo mukene, omyero pud iyubbe maber pi kwan ki latin kwan acel acel, kun itamo i kom jami ma mitte pi latin kwan meno.

 10 Ento go kong ni latin kwanni tye ki miti i kom pwony mo ma kinyamo i buk ma pe tye i kin Jami Ticwa ma Pigi Tego me Pwony. Iromo cuko cwinye me kwano buk meno pire kene wek wumedde ki kwanwu i buk me Baibul Pwonyowa nyo Bed i Mar pa Lubanga.

Cak kwanwu ki lega (Nen paragraf 11)

11. Awene ma omyero wacak lega ka watye ka kwan ki lutino kwanwa me Baibul, dok watwero konyo latin kwan me niang ni man pire tek nining?

11 Cak kwanwu ki lega. Pol kare ber me cako kwanwa ki dolo tere ki lega cutcut i nge cako kwan ki ngat moni, gwok nyo i nge cabit acel nyo aryo ma wucako kwan. Omyero wakony latin kwan me niang ni watwero niang Lok pa Lubanga ki kony pa cwiny maleng keken. Lutit kwena mukene gitiyo ki Yakobo 1:5 me tito pingo omyero waleg i acakki me kwano Baibul ki dano: “Ka ce tye ngat mo i kinwu ma ryekone nok, myero en oleg Lubanga.” Ci latit kwena penyo latin kwan ni, “Watwero penyo pi ryeko pa Lubanga nining?” Latin kwan romo gamone ni myero ileg bot Lubanga.

12. Itwero tic ki Jabuli 139:2-4 nining me konyo latin kwanni wek olok agonya bot Jehovah?

12 Pwony latin kwanni kit me lega. Tite ni Jehovah mito winyo legane ma a ki i cwinye. Tite bene ni i legawa piwa kenwa, watwero yabo cwinywa bot Jehovah kun watite jami ma pe watwero tito bot jo mukene. Man tye ada pien Jehovah ngeyo tam ma i cwinywa. (Kwan Jabuli 139:2-4.) Waromo bene cuko cwiny latin kwanwa me penyo kony ki bot Lubanga wek ejuk tam ki tim maraco. Me labolle, go kong ni latin kwan ma dong okwano Baibul pi kare mo maro kwer mo ma kubbe ki dini goba. En ngeyo ni kwer man pe tye atir, ento en maro jami mogo ma kitimo i kare me kwer man. Cuk cwinye me tito bot Jehovah kit ma en winyo kwede kikome ki me lego Jehovah wek okonye me maro jami ma Lubanga maro keken.​—Jab. 97:10.

Lwong latin kwanni me bino i cokke (Nen paragraf 13)

13. (a) Pingo pire tek me lwongo lutino kwanwa me cako bino i cokke cutcut? (b) Watwero weko latin kwanwa bedo agonya i Ot me Ker nining?

13 Lwong latin kwanni me cako bino i cokke cutcut. Jami ma latin kwanni winyo dok neno i cokke twero gudo cwinye dok konye me dongo i yo me cwiny. Nyut vidio ma wiye tye ni Ngo ma Timme i Ot me Ker?, dok ilwonge me cito kwedi i cokke. Dyere me konye ki gin wot ka twere. Ber adada me wot ki lutit kwena mapatpat ka itye ka cito ka kwan ki latin kwanni. Ka itimo kit meno, latin kwanni bingeyo jo mukene me kacokke, dok man bikonye me bedo agonya ka obino i cokke.

KONY LATIN KWANNI ME DONGO I YO ME CWINY

14. I yo ma nining ma watwero tugo kwede cwiny latin kwanwa me dongo i yo me cwiny?

14 Yubwa tye me konyo lutino kwanwa me Baibul me dongo i yo me cwiny. (Ep. 4:13) Ka ngat mo oye kwano Baibul kwedwa, twero bedo ni en mito ngeyo kit ma Baibul bikonyo kwede kwone. Ento ka marre pi Jehovah woto ki dongo, ci en romo cako tamo kit ma etwero konyo kwede jo mukene, kadi wa jo me kacokke. (Mat. 22:37-39) I kare mupore, pe ilwor tite ni watye ki mot me miyo kony pi cwako ticwa me Ker-ri.

Pwony latin kwanni gin ma en myero otim ka okemme ki peko (Nen paragraf 15)

15. Watwero konyo latin kwan me Baibul me timo gin ma atir nining ka okemme ki peko?

15 Pwony latin kwanni gin ma en myero otim ka okemme ki peko. Go kong ni, latin kwanni ma dong odoko latit kwena  ma peya onongo batija, otitti ni ngat mo me kacokke ocwero cwinye. Me ka cwako en nyo ngat ma ocwero cwinye, pingo pe ikonye me ngeyo gin ma Ginacoya waco madok i lok meno? En twero timo kica ki omego meno dok jalo gin mutimme. Nyo ka en pe twero timo man, ci en twero lok ki ngat meno ki mwolo dok ki mar ki miti me ‘nongo omine.’ (Por Matayo 18:15.) Kony latin kwanni me yubo gin ma en biwaco bot ngat meno. Nyute kit me tic ki JW Library® app, ki Buk ma Konyo Lucaden pa Jehovah me Kwedo Lok, kacel ki jw.org® me kwedo yo mapatpat ma etwero cobo kwede peko meno. Ka en opwonyo kit me cobo kukukuku ki jo mukene ma peya en onongo batija, ci man bikonye me bedo ki wat maber ki jo me kacokke i nge batija.

16. Adwogi maber ango ma bino ka ilwongo lutit kwena mukene me bedo tye kwedi ka ikwano ki latin kwanni?

16 Lwong jo mukene me kacokke me bedo i kwanwu, kadi laneno me adwol bene ka en olimo kacokkewu. Pingo? Medo i kom tyen lok ma kitito con, lutit kwena mukene gitwero konyo latin kwanni i yo ma in pe itwero. Me labolle, go kong ni latin kwanni otemme me juko mato taa tyen mapol ento oloye woko. Lwong Lacaden mo ma ojuko mato taa, gwok nyo i nge yelle tyen mapol, wek en ocit kwedi i kwan man. Lacaden lawoti-ni twero miyo tam ma tiyo maber ma latin kwanni mito kikome. Ka itye ki lworo me kwan ki latin kwanni i nyim omego mo ma tye ki ngec madwong, ci wek omego-ni aye okwan ki latin kwanni i nino meno. Ka ilwongo jo mukene me cito kwedi, latin kwanni binongo adwogi maber ki i ngecgi. Wi myero opo ni, mitiwa tye me konyo latin kwanwa me dongo i yo me cwiny.

TIKA MYERO AJUK KWAN KWEDE WOKO?

17-18. Gin ango ma omyero itam iye ka itye ka moko ka omyero ijuk kwan ki latin kwan mo?

17 Ka latin kwanni pe tye ka dongo, i kare mo bimitte ni ipenye keken ni, ‘Tika omyero ajuk kwan kwede woko?’ Ma peya imoko tam meno, omyero kong itam i kom kerone me niang. Jo mukene gitero kare malac me dongo i yo me cwiny loyo luwotgi. Pennye kekeni ni: ‘Tika latin kwanna-ni tye ka dongo ma lubbe ki kerone?’ ‘Tika en tye ka “gwoko” nyo keto i tic, jami ma opwonyo?’ (Mat. 28:20) Latin kwan twero dongo motmot ento omyero alokaloka onen i kwone.

18 Ento ngo ma omyero watim ka ngat ma wakwano kwede pi kare mo pe nyuto ni kwan man pire tek bote? Tam kong ni: Latin kwanni otyeko kwano buk me Baibul Pwonyowa, gwok bene wucako kwano  wa Bed i Mar pa Lubanga, ento peya oo i cokke mo keken​—kadi wa Nipo! Dok kare ki kare ngolo kwanne woko pi tyen lok ma konye pe. Ka tye kit meno, ci bedo ber ka iloko ki latin kwanni atyer ka maleng. *

19. Ngo ma itwero wacone bot latin kwan me Baibul ma pe tero kwanne calo gin ma pire tek, dok ngo ma myero kong itam iye?

19 Itwero cako lok ki penye ni, ‘Ngo ma in itamo ni tye ariya madit loyo boti ma gengi doko Lacaden pa Jehovah?’ Latin kwanni twero gamo ni, ‘Amaro kwano Baibul, ento pe abidoko Lacaden pa Jehovah matwal!’ Ka en tye ki cwiny meno kun dong okwano pi kare mo, ci dok pud kony pa kwan kwede tye? Ki tungcel, latin kwanni romo titi pi tyen mukwongo gin ma tye ka genge ki dongo i yo me cwiny. Me labolle, en romo bedo ki lworo ni pe etwero tito kwena i ot ki ot. Dong ka iniang kit ma en winyo kwede, ci itwero bedo ki kero me konye.

Pe ibal kare ka kwan ki ngat ma pe tye ka dongo i yo me cwiny (Nen paragraf 20)

20. I yo ma nining ma Tic pa Lukwena 13:48 konyowa me moko ka myero wamedde ki kwano Baibul ki ngat moni nyo pe?

20 Tye me cwercwiny ni, lutino kwan mukene gitye calo Luicrael me kare pa Ejekiel. Jehovah oloko kit man i komgi bot Ejekiel: “Dong in inen botgi calo dano mo ma wero wer me mar ma nongo winyo dwane mit, kun bene goyo agoya ki nanga. Giwinyo lok ducu ma iwaco-gu, ento pe gilubo mo kadi ki acel.” (Ejek. 33:32) Watwero nongo ni tek me waco ki latin kwan ni wabijuko kwan kwede woko. Ento, ‘kare dong odic woko.’ (1 Kor. 7:29) Me ka balo cawa me kwano Baibul ki latin kwan ma pe tye ka dongo, bedo ber me nongo ngat mukene ma nyuto ni ebedo dano ma ‘myero me nongo kwo ma pe tum.’​—Kwan Tic pa Lukwena 13:48.

Twero bedo ni tye jo mukene i wang ticwu ma gitye ka lega pi kony (Nen paragraf 20)

21. Ginacoyawa me mwaka 2020 waco ningo, dok pingo man rwatte?

21 Ginacoyawa me mwaka 2020 bikonyowa me keto cwinywa i kom dongo dirowa me loko dano wek gudok lulub kor Kricito. Tye ki lok mogo ma Yecu oloko i kare ma gitye i cokke ma pire tek ma obedo i wi got mo me Galilaya: “Wuciti wucilok jo me rok ducu gudok jo ma luba, kun wubatijagi.”​Mat. 28:19.

Myero dong wamoku tamwa me dongo dirowa i tic me loko dano ki konyo lutino kwanwa wek gunong batija (Nen paragraf 21)

WER 70 Wuyeny Jo ma Myero

^ para. 5 Ginacoyawa me mwaka 2020 cuko cwinywa me ‘loko dano.’ Lutic pa Jehovah ducu omyero gulub cik meno. Watwero tugo cwiny lutino kwanwa me Baibul wek gudok lupwonnye pa Kricito nining? Pwony man binyutiwa kit ma watwero konyo kwede lutino kwanwa me Baibul me maro Jehovah. Wabineno bene gin ma twero konyowa me moko ka omyero wamedde ki kwano Baibul ki latin kwan mo nyo pe.

^ para. 18 Nen vidio ma wiye tye ni Juk Kwano Baibul ki Lutino Kwan ma Pe Gitye ka Dongo i JW Library®. Nyo me kwanyone ki i JW Library cit i OUR MEETING AND MINISTRY > IMPROVING OUR SKILLS.