Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 1

“Cwinyi pe Opoti, Pien An Lubangani”

“Cwinyi pe Opoti, Pien An Lubangani”

“Pe ilwor, an atye kwedi, cwinyi pe opoti, pien an Lubangani; abimiyi tek, dok abikonyi.”​—IC. 41:10.

WER 7 Jehovah Aye Tekowa

GIN MA WABINYAMO *

1-2. (a) Lok ma kicoyo i Icaya 41:10 ogudo laminwa mo ma nyinge Yoshiko nining? (b) Jehovah oweko kigwoko lok meno pi angagi?

LAMINWA mo ma lagen ma nyinge Yoshiko onongo kwena mo marac. Daktarne owacce ni odong ki dwe mogo manok keken me kwo. En odok iye nining? Wi Yoshiko opo i kom wang ginacoya ma en maro, Icaya 41:10. (Kwan.) Ci en owaco ki daktarne ma cwinye opye mot ni epe ki lworo, pien Jehovah tye ka mako cinge. * Lok me kwecwiny ma nonge i tyeng meno okonyo laminwa-ni me geno Jehovah ki cwinye ducu. Tyeng meno bene konyowa me bedo ma cwinywa opye mot ka watye ka wok ki i atematema. Me niang kit ma tyeng meno twero konyowa kwede, kong wanen tyen lok muweko Lubanga omiyo kwena meno bot Icaya.

2 I acakkine, Jehovah oweko Icaya ocoyo lok meno me jingo cwiny Lujudaya ma onongo kibiterogi i Babilon macalo opii. Kadi bed kit meno, Jehovah oweko kigwoko kwena meno pe pi Lujudaya meno keken, ento wa pi jo ducu nicakke i kare meno. (Ic. 40:8; Rom. 15:4) I kare-ni, watye ka kwo i kare “marac,” pi meno, wamito cukocwiny ma nonge i buk pa Icaya-ni ma loyo kare mo keken.​—2 Tem. 3:1.

3. (a) Cikke mene ma ginonge i Icaya 41:10, ma en aye ginacoyawa me mwaka 2019? (b) Pingo wamito cukocwiny ma nonge i cikke magi?

3 I pwony man, wabiketo tamwa i kom cikke pa  Jehovah ma jingo niyewa adada ma kicoyo i Icaya 41:10: (1) Jehovah bibedo kwedwa, (2) En Lubangawa, dok (3) En bikonyowa. Wamito cukocwiny * meno pien wan bene wakemme ki atematema calo Yoshiko. Wan bene wakemme ki pekki mapol pi jami maraco ma timme i lobo man. Jo mukene gitye ka kanyo aunauna ma a ki bot gamente. Kong dong wanyam cikke adek magi ki acel acel.

“AN ATYE KWEDI”

4. (a) Cikke mukwongo ango ma wabinyamone? (Nen lok ma tye piny.) (b) I yo ma nining ma Jehovah nyutiwa kit ma ewinyo kwede i komwa? (c) Lok pa Jehovah gudi nining?

4 Jehovah kong ocako ki cuko cwinywa ni: “Pe ilwor, an atye kwedi.” * Jehovah nyuto ni etye kwedwa kun keto cwinye i komwa dok bene nyutiwa mar. Nen kong kit ma en otito kwede kit ma emarowa dok eparo piwa. Jehovah owacci: ‘In ibedo gin me wel mada bota, piri dit, dok amari adada.’ (Ic. 43:4) Pe tye gin mo keken i polo ki lobo ma twero weko Jehovah juko maro jo ma tiyo pire, marre piwa pe lokke dok pe gik. (Ic. 54:10) Marre piwa weko wabedo ki tekcwiny. En bigwokowa i kare-ni kit ma ogwoko kwede lareme Abram (Abraim.) Jehovah owacce ni: “Pe ilwor, Abram, an a kwotti.”​—Acak. 15:1.

Ki kony pa Jehovah, watwero cung matek i kom atematema magwar calo kulu nyo mac (Nen paragraf 5-6) *

5-6. (a) Wangeyo nining ni Jehovah tye ki miti me konyowa ka watye ka wok ki i atematema? (b) Pwony ango ma watwero nongone ki i labol pa Yoshiko?

5 Wangeyo ni Jehovah tye ki miti me konyowa ki i pekki ma watye ka kato ki iye, pien en ocikke bot jone ni: ‘Ka ibiwok ki i dye nam matut, abibedo kwedi, abigwoki; pii ma i kulu bene pe bimwonyi; kadi ibiwot iwok ki i dye mac, pe ibiwang, leb mac pe bigudo komi.’ (Ic. 43:2) Lok meno niange ningo?

6 Jehovah pe ocikke me kwanyo pekki ma wawok ki iye, ento en pe biye ni “kulu” me pekki omwonywa nyo “mac” me atematema obal watwa kwede. En  ocikke ni ebibedo kacel kwedwa kun ekonyowa me ‘kato’ ki i pekki magi ducu. Gin ango ma Jehovah bitimone? En bikonyowa me bedo ma cwinywa opye mot labongo lworo wek wagwok gennewa bote, kadi bed wakemme ki to. (Ic. 41:13) Yoshiko, ma waloko i kome malo-ni, onongo ni meno lok ada. Nyare owacci: “cwinywa obedo yom me neno tekcwiny ma mamawa obedo kwede. Waneno ada ni Jehovah omine kuc ki cwiny ma opye mot. Kadi wa i nino ma mamawa oto, en onongo pud loko bot nac ki lutwo mukene-ni lok madok i kom Jehovah kacel ki cikkene.” Gin ango ma wapwonyo ki i labol pa Yoshiko? Ka wageno cikke pa Lubanga ma waco ni “abibedo kwedi,” ci wan bene wabibedo ki tekcwiny kun wamedde ki kanyo pekki.

“AN LUBANGANI”

7-8. (a) Cikke me aryo mene ma wabineno, dok cikke meno niange ningo? (b) Pingo Jehovah owaco bot Lujudaya ma onongo gitye i opii ni: ‘Cwinygi pe opoti’? (c) Lok mene ma tye i Icaya 46:3, 4 ma nen calo ocuko cwiny jo pa Lubanga?

7 Nen kong cikke me aryo ma Icaya ocoyo: “Cwinyi pe opoti, pien an Lubangani.” Lok man niange ningo? I tyeng man, nyig lok ma waco ni ‘poto cwiny’ bene niange ni “bedo ki lworo pi gin marac” nyo “ngiyo piny pi lworo.”

8 Pingo Jehovah owaco ki Lujudaya ma onongo kibiterogi i opii i Babilon ni ‘cwinygi pe opoti’? Pien en onongo ngeyo ni jo ma i Babilon gibibedo ki lworo. Ngo ma onongo bikeligi lworo? I agikki me mwaka 70 me kwo pa Lujudaya i Babilon macalo opii, lumony me Media ki Percia onongo gibituro Babilon woko. Jehovah onongo bitic ki lumony magi me gonyo jone ki i opii i Babilon. (Ic. 41:2-4) I kare ma Lubabilon kacel ki jo me rok mukene-ni guniang ni lumonegi tye ka bino, gutute me bedo ki tek cwiny kun ngat acel acel waco ki lawote ni: “Bed ki tekcwiny.” Gucweyo bene lubange me goba mapol, kun gigeno ni bikonyogi. (Ic. 41:5-7) Ki tungcel, Jehovah okweyo cwiny Lujudaya ma onongo gitye i opii ni: “Ento in laticca Icrael [ka kipori ki jo mukene-ni] . . . cwinyi pe opoti, pien an Lubangani.” (Ic. 41:8-10) Nen kong, Jehovah owaco ni: ‘An Lubangani.’ Ki lok man, Jehovah ocuko cwiny jo ma worre ni wiye pi owil i komgi​—en onongo pud tye Lubangagi, dok gin bene pud gitye jone. En owaccigi ni: ‘Abitingowu. Dok abilarowu.’ Lok man ojingo cwiny Lujudaya ma onongo gitye i opii adada.​—Kwan Icaya 46:3, 4.

9-10. Pingo pe myero wabed ki lworo? Mi lapor.

9 I kare-ni, jo ma gurumowa gitye ki par mapol makato kare mo keken pi kit ma lobo tye ka balle kwede. Ngene kene ni, pekki magi bene gudo wa wan. Ento pe myero wabed ki kworo. Jehovah wacciwa ni: “An Lubangani.” Pingo lok man miniwa tyen lok me bedo ma cwinywa opye mot?

10 Tam kong i kom lapor man: Luwot aryo, Jim gin ki Ben gitye i degge ma tye ka ngwec i dye yamo magwar adada. I kare ma yamo tye ka bayo degge tungi ki tungi, guwinyo ka ngat mo loko i lakub dwan ni: “Wubed ma wutwene maber ki del me kom. Wabikato ki i dye yam lapiro pi cawa mo manok.” Ci lworo ocako mako Jim matek adada. Ento ladwor degge dok owaco ni: “Pe wubed ki lworo. Man ladwor deggewu aye tye ka lok.” I cawa meno, Jim oyenge wiye, ci owaco  ni, “Meno kit cukocwiny ango?” Ento en oneno ni Ben pe ki lworo mo keken. Jim openyo Ben ni: “Pingo komi pe ka myel?” Ben obwunyo ci owacci: “Pien angeyo ladwor degge-ni maber. En babana!” Ben dok owaco ni: “Wek kong atitti gin mo i kom babana. Ageno ni ka onongo ingeyo en kacel ki dirone me dwoyo degge, onongo ibibedo ma cwiny opye.”

11. Gin ango ma wapwonyo ki i lapor pa luwot aryo-ni?

11 Pwony ango ma wanongo ki i lapor man? Calo Ben, wan bene wape ki lworo pien wangeyo wonwa me polo maber adada. Wangeyo ni en bitelowa wek wakat ki i pekki ma bedo calo yamo lapiro magwar ma wakemme kwede i kare man me agikki-ni. (Ic. 35:4) Wageno Jehovah, pi meno, watwero bedo ma komwa opye mot kadi bed jo me lobo gitye ki lworo matek adada. (Ic. 30:15) Wan bene wabedo calo Ben ka wanywako ki dano tyen lok ma oweko watye ki gen i kom Lubanga. Wek gin bene gubed ki gen ni kadi bed gitye ka kato ki i kwo matek ningo, Jehovah bikonyogi.

‘ABIMIYI TEKO, DOK ABIKONYI’

12. (a) Cikke me adek mene ma wabineno? (b) Lok man ni ‘bad’ Jehovah poyo wiwa i kom gin ango?

12 Tam kong i kom cikke me adek ma Icaya ocoyo: ‘Abimiyi teko, dok abikonyi.’ Icaya onongo kong otito kit ma Jehovah jingo kwede jone kun waco ni: “Rwot [Jehovah] Lubangawu tye ka bino ki tek, bade aye ma tye ka loc pire.” (Ic. 40:10) Baibul pol kare tiyo ki nyig lok ni ‘bad’ me nyuto teko. Pi meno, lok man ni ‘bad Jehovah aye ma tye ka loc pire’ poyo wiwa ni Jehovah Kabaka matek. En otiyo ki tekone ma pe pore ki gin  mo keken me jingo ki konyo luticce i kare macon, en bene pud jingo dok gwoko jo ma gigenne i kare-ni.​—Nwo. 1:30, 31; Ic. 43:10.

Pe tye jami lweny mo ma twero loyo lweny i kom jo pa Jehovarh (Nen paragraf 12-16) *

13. (a) I kare mene ma Jehovah tutwalle bigwoko cikkene me miniwa teko? (b) Cikke mene ma miniwa kero ki tekcwiny?

13 Jehovah gwoko cikkene ni: ‘Abimiyi teko’ tutwalle ka lumonewa giketo aunauna i komwa. I kabedo mukene i kare-ni, lumonewa gitye ka tute matek me juko ticwa me pwony nyo keto kigeng i ticwa. Kadi bed kumeno, pe wabedo ki par mukato kare woko i kom tutegi. Jehovah ominiwa cukocwiny ma miniwa kero ki tekcwiny. En ocikke botwa ni: “Pe tye jami lweny mo ma giteto pi lweny i komi ma bicobo ticce.” (Ic. 54:17) Lok meno poyo wiwa i kom jami adek ma pigi tego.

14. Pingo pe myero wabed ki ur ka lumone pa Lubanga gilwenyo i komwa?

14 Me acel, macalo lulub kor Kricito, wangeyo ni kibidagowa. (Mat. 10:22) Yecu owaco con ni lulub kore gibikemme ki aunauna matek adada i kare me agikki. (Mat 24:9; Jon 15:20) Me aryo, lanebi Icaya ocikowa con ni lumonewa pe gibidagowa adaga keken, ento bene gibitic ki jami mapatpat me lweny i komwa. Jami lweny magi kwako tic ki diro me bwolowa wek onen ni lok ada, waco lok goba i komwa, nyo kelo awano i komwa. (Mat. 5:11) Jehovah pe bijuko lumonewa me tic ki jami lweny magi i komwa. (Ep. 6:12; Yabo 12:17) Ento pe myero walwor. Pingo?

15, 16. (a) Gin me adek mene ma myero wiwa opo iye, dok Icaya 25:4, 5 cwako lok man nining? (b) Icaya 41:11, 12 otito adwogi marac ma bibino i kom jo ma gilwenyo i komwa nining?

15 Nen dok gin me adek ma myero wiwa opo iye. Jehovah owaco ni “pe tye jami lweny mo” ma kibitic kwede i komwa ma “bicobo ticce.” Kit macalo cel gogo matek gwokowa ki i yamo kot matek,  Jehovah bene gwokowa ki i ‘alur yweyo dog jo ma pe lukica.’ (Kwan Icaya 25:4, 5.) Lumonewa pe gibicobo mitigi me kelo awano marii pi naka i komwa.​—Ic. 65:17.

16 Jehovah bene jingo genwa i kome kun tito botwa i yo matut gin marac ma bitimme i kom ‘jo ducu ma kiniga makogi i komwa.’ (Kwan Icaya 41:11, 12.) Kadi bed lumonewa gulweny i komwa matek nining, wangeyo ni adwogine tye acel keken: Lumone pa jo pa Lubanga ducu “gibidoko calo gin ma konnye pe, ci gito woko.”

KIT MA WAJINGO KWEDE GENWA I KOM JEHOVAH

Watwero jingo genwa i kom Jehovah ka wakwano lok kome i Baibul kare ducu (Nen paragraf 17-18) *

17-18. (a) Kwano Baibul twero jingo genwa i kom Jehovah nining? Mi labol. (b) Lwodo lok i kom ginacoya ma kiyero pi mwaka 2019 bikonyowa nining?

17 Genwa i kom Jehovah jing matek ka wamedde ki ngeyo en maber. Dok yo acel keken ma watwero ngeyo kwede Lubanga maber aye ka wakwano Baibul maber kun walwodo gin ma wakwano. Baibul tye ki lok ma genne ma nyuto kit ma Jehovah ogwoko kwede jone i kare mukato. Lok meno miniwa gen ni en bene bigwokowa i kare-ni.

18 Nen kong lapor ma Icaya otiyo kwede ma nyuto kit ma Jehovah gwokowa kwede. En oporo Jehovah ki lakwa romi, dok oporo luticce ki lutino romi. Icaya oloko i kom Jehovah ni: “[En] bitingo litino romine i bade, en bitingogi i kore.” (Ic. 40:11) Ka waniang ni Jehovah okwakowa i kore, wawinyo ni watye i te gwokke dok wabedo ma cwinywa opye mot. Wek wabed ma cwinywa opye mot kadi bed ni watye ka kato ki i peko, lagwok ot ma lagen dok maryek oyero Icaya 41:10 me bedo ginacoyawa me mwaka 2019, ‘Cwinyi pe opoti, pien an Lubangani.’ Lwod lok me cukocwiny man. Bimini kero me lweny ki pekki ma twero bino i anyim.

WER 38 En Bimini Kero

^ para. 5 Ginacoya ma kiyero pi mwaka 2019 miniwa tyen lok adek ma weko wabedo ma cwinywa opye mot kadi bed jami maraco tye ka timme i lobo-ni nyo i kwowa. Pwony man binyamo tyen lok meno dok bikonyowa pe me bedo ki par mapol ki dok me geno Jehovah. Lwod lok i kom ginacoya me mwaka man. Dok imak i wi ka twere. Man bikonyi me kemme ki ariya i anyim.

^ para. 1 Nen The Watchtower, Julai 2016, pot 18.

^ para. 3 LOK MA KITITO TERE: Cikke obedo lok ada ma moko ni gin moni wang ma otimme. Cikke pa Jehovah weko pe wabedo ki par mapol pi pekki ma twero bino i kwowa.

^ para. 4 Kitiyo ki lok man ni “Pe ilwor” tyen aryo ki dok ni “Pe wulwor” tyen acel i Icaya 41:10, 13, 1414. Tyeng magi bene otiyo ki nyig lok ni “An” (ma en aye Jehovah) tyen mapol. Pingo Jehovah oweko Icaya otiyo ki nyig lok man ni “An” teretere? En otimo meno me nyuto gin mo ma pire tek—yo acel keken ma watwero bedo labongo lworo aye ka waketo genwa i kom Jehovah.

^ para. 52 LOK I KOM CAL: Jo me ot mo gitye ka kemme ki peko me two, atematema i gang tic, i tic me pwony, ki dong i gang kwan.

^ para. 54 LOK I KOM CAL: Abili gubino i cokke pa Lucaden ma tye ka timme i wi mung i gang pa ngat mo, ento omege ki lumege komgi pe ka myel.

^ para. 56 LOK I KOM CAL: Bedo ki yub me Woro pa Jo me Ot kare ki kare miniwa kero me diyo cwinywa.