Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 5

Gin ma Bedowa i Cokke Nyuto i Komwa

Gin ma Bedowa i Cokke Nyuto i Komwa

“[Wumedde ki] yweko lok me to pa Rwot, nio ka en bidwogo.”​—1 KOR. 11:26.

WER 18 Watye ki Pwoc pi Ginkok

GIN MA WABINYAMO *

1-2. (a) Gin ango ma Jehovah neno ka dano milion mapol gigure pi Cam me Otyeno pa Rwotwa? (Nen cal ma i pok ngeye.) (b) Gin ango ma wabinyamo i pwony man?

GO KONG gin ma Jehovah neno ka dano milion mapol ma i but lobo-ni ducu gigure kacel i Cam me Otyeno pa Rwotwa. En pe neno dano macalo gurup keken ento neno wa ngat acel-acel ma tye. Me labolle, en neno jo ma lugen ma gibino mwaka ki mwaka. I kingi twero bedo jo mogo ma gibino kadi bed nongo gitye ka kato ki i aunauna magwar. Jo mukene gibino kicel kicel i cokke mukene-ni, ento gineno Nipo ni pire tek adada dok myero pe gikeng. Jehovah bene neno wa jo ma gibino i Nipo pi tyen me acel pi miti me niang kit ma kikwero kwede.

2 Ngene kene ni Jehovah cwinye bedo yom adada ka neno jo mapol gibino i Nipo. (Luka 22:19) Ento, miti pa Jehovah pe tye i kom wel dano ma gibino keken. Jehovah paro pi tyen lok muweko gubino i Nipo; gin ma i cwinygi aye pire tek loyo bot Jehovah. I pwony man wabinyamo lapeny ma pire tek adada: Pingo wabedo tye pe i Nipo keken ento wa i cokke ma bedo tye cabit ki cabit ma Jehovah oketo pi jo ma gimare?

(Nen paragraf 1-2) *

MWOLO WEKO WABEDO I COKKE

3-4. (a) Pingo wabedo tye i cokke? (b) Bedowa tye i cokke tito gin ango i komwa? (c) Ma lubbe ki lok ma tye i 1 Jo Korint 11:23-26, pingo omyero pe wakeng Nipo?

3 Tyen lok ma pire tek ma weko wabino i cokke aye pien meno obedo but worowa. Wabino bene i cokke pien Jehovah tiyo ki cokke me pwonyowa. Jo ma luwaka gitamo ni pe gimito ni gipwonygi. (3 Jon 9) Ka iporo wan ki gin,  wan watye ki miti ni Jehovah opwonywa kun tiyo ki dulle.​—Ic. 48:17, 18; Jon 6:45.

4 Bedo tye i cokke nyuto ni wan wamwol dok watye atera ni Jehovah opwonywa. Wabedo tye i Nipo me to pa Yecu pe ni pien omyero wabed tye iye keken, ento pien ki cwiny me mwolo, walubo cik pa Yecu ma wacci: “Wutim kuman me po pira.” (Kwan 1 Jo Korint 11:23-26.) Cokke me Nipo jingo genwa pi anyim dok poyo wiwa i kom kit ma Jehovah marowa kwede. Kadi bed kit meno, Jehovah ngeyo ni wamito cukocwiny kare ducu ento pe kicel keken i mwaka acel. Pi meno, en ominiwa cokke ma bedo cabit ki cabit dok wacciwa ni omyero bed tye i iye ducu. Cwiny me mwolo weko wabedo tye i cokke magi. Watero cawa mapol me yubbe ki dok me bedo tye i cokke.

5. Pingo jo ma mwol gijolo lwongo pa Jehovah?

5 Mwaka ki mwaka, Jehovah lwongo jo mapol me winyo pwonye dok jo mapol ma gimwol gijolo lwongo man. (Ic. 50:4) Gibedo ki yomcwiny me bedo tye i Nipo, dok gicako bino i cokke mukene-ni. (Jek. 8:20-23) Wan ducu watye ki yomcwiny ni Jehovah pwonyowa dok miniwa tira pien en ‘aye lakony ki lalarwa.’ (Jab. 40:17) Ngo dok maber ma kato​—nyo ma pire tek loyo​—jolo lwongo me winyo pwony pa Jehovah ki Wode ma en maro adada, Yecu?​—Mat. 17:5; 18:20; 28:20.

6. Cwiny me mwolo okonyo laco mo nining me bino i Nipo?

6 Mwaka ducu waketo tek me lwongo jo mapol kit ma watwero wek gubed tye i Nipo me to pa Yecu. Jo mamwol mapol gunongo adwogi maber ki i jolo lwongowa. Tam kong i kom labol man. Mwaki mapol angec, kimiyo karatac me lwongo bot laco mo me bino i Nipo, ento en owaco ki omego ma omine-ni ni pe etwero bino. Kadi bed kit meno, omego-ni obedo ki ur me neno laco-ni otuc i ot me ker i nino me Nipo. Cwiny laco-ni obedo yom adada pi kit ma kijole kwede ci ocako bino i cokkewa cabit ki cabit. Ki lok ada, en okeng cokke tyen kidek keken i mwaka meno. Gin ango ma okonye me cako cito i cokke ducu? En onongo obedo ngat mamwol ma oweko en oloko tamme. Lacen omego ma olwonge-ni owaco ni, “En obedo ngat ma mwol adada.” Labongo akalakala Jehovah aye ma olwongo laco-ni me worre, i kare-ni en dong onongo batija.​—2 Cam. 22:28; Jon 6:44.

7. Jami ma wapwonyo ki i cokkewa ki ma wakwano ki i Baibul konyowa me bedo jo mamwol nining?

7 Gin ma wapwonyo ki i cokke kacel ki jami ma wakwano ki i Baibul konyowa me bedo jo mamwol. I cabit mogo ma nongo Nipo peya oromo, kibedo ka nyamo i cokkewa lanen pa Yecu kacel ki mwolo ma en onyuto i miyo kwone macalo ginkok. Dok nino mogo ma nok ma nongo Nipo peya oromo, kiwacciwa ni omyero wakwan ki i Baibul jami mogo ma otimme i kare me to pa Yecu ki cere. Jami ma wapwonyo ki i cokke ki jami ma wakwano ki i Baibul dongo pwocwa pi ginkok ma Yecu omiyo piwa. Man bene cuko cwinywa me lubo lanenne me mwolo ki me timo miti pa Jehovah kadi bed man pe yot.​—Luka 22:41, 42.

 TEKCWINY WEKO WABEDO I COKKE

8. Yecu onyuto tekcwiny nining?

8 Wan bene watute me nyuto tekcwiny calo Yecu. Tam kong i kom tekcwiny ma en onyuto i kare ma en dong cok to. En onongo ngeyo ni lumonene gibilanne, gibipwode dok gibineke woko. (Mat. 20:17-19) Kadi bedo kit meno, en oye to ki tekcwiny. Ma kare me tone oromo, en otito ki lukwenane ma lugen, ma onongo gitye kacel kwede i Gececemane ni: ‘Wua malo, wacitu; nen dano ma bimiya bot lumonena dong tye cok.’ (Mat. 26:36, 46) I kare ma lumony mapol gubino ka makke, en ocung anyim, onyute botgi, ci ocikogi ni omyero guwek lupwonyene guciti. (Jon 18:3-8) Man obedo twon tek cwiny madit atika! I kare-ni Lukricitayo ma kiwirogi kacel ki romi mukene-ni gitute me nyuto tekcwiny ma Yecu onyuto. Gitimo man nining?

Tek cwiny ma inyuto wek ibed tye i cokke cuko cwiny jo mukene bene (Nen paragraf 9) *

9. (a) Pingo i kine mukene wamito tekcwiny wek wabed i cokke kare ducu? (b) Lanenwa gudo utmege ma gitye i buc pi niyegi nining?

9 Wek wabed i cokke kare ducu, i kine mukene mitte ni wanyut tekcwiny i kare ma nongo kwo tek. Omege ki lumege mukene gibino i cokke kadi bed gitye ka kumo, cwinygi otur, nyo gitye ki peko me yot kom. Jo mukene ginyuto tekcwiny me bino i cokke kadi bed nongo gitye ka kato ki i dic ma a ki bot lupacogi nyo luloc pa gamente. Tam kong manok i kom kit ma lanenwa gudo kwede ki omegiwa ma kitweyogi i buc pi niyegi. (Ibru 13:3) Ka guwinyo ni watye ka medde ki tic pi Jehovah kadi bed watye ka kato ki i kwo matek, gin bene cwinygi bedo matek dok gimedde ki gwoko niyegi ki gennegi. Lakwena Paulo bene okato ki i kwo ma kit meno. I kare ma en tye i buc i Roma, cwinye obedo yom adada i kare ma owinyo ni utmege gitye ka tic pi Lubanga kun gigwoko gennegi. (Pil. 1:3-5, 12-14) Paulo ocoyo waraga bot Luibru ma peya kigonye nyo i nge gonye cutcut. I waraga meno, en otito ki Lukricitayo magi ni omyero ‘gumedde ki mar i kingi kekengi macalo omego’ dok pe guwek cokke kacel.​—Ibru 10:24, 25; 13:1.

10-11. (a) Angagi ma omyero walwonggi i Nipo, dok pingo? (b) Tyen lok ango ma Jo Epeco 1:7 miyo me timo meno?

10 Wanyuto tekcwiny ka walwongo wadiwa, jo me gang ticwa, ki jiraniwa me bino i Nipo. Pingo walwongo jo magi? Pien watye ki pwoc pi gin ma Jehovah gin ki Yecu gutimo piwa ma weko pe watwero ling alinga ma pe walwongo jo mukene me bino i Nipo. Wamito ni gin bene gupwony kit ma gitwero nongo adwogi maber ki i ‘kica’ pa Jehovah ma bino pi ginkok.​—Kwan Jo Epeco 1:7; Yabo 22:17.

11 Ka wanyuto tekcwiny kun wacito i cokke, wanyuto bene cwiny mukene ma pire tek ma Jehovah ki Yecu gunyuto.

 MAR WEKO WABEDO I COKKE

12. (a) Cokkewa dongo marwa pi Jehovah gin ki Yecu nining? (b) Gin ango ma 2 Jo Korint 5:14, 15 cuko cwinywa me timone wek walub lanen pa Yecu?

12 Marwa pi Jehovah ki Yecu tugo cwinywa me bedo tye i cokke. Dok jami ma wapwonyo ki i cokke dongo marwa pi Jehovah kacel ki Wode. Ki i cokke, kipoyo wiwa i kom jami mapol ma gutimo piwa. (Rom. 5:8) Nipo tutwalle poyo wiwa i kom mar matut ma Jehovah ki Yecu gitye kwede piwa kacel ki jo ma peya gungeyo ber pa ginkok. Mar ma watye kwede weko watute me lubo lanen pa Yecu i kwowa nino ducu. (Kwan 2 Jo Korint 5:14, 15.) Medo i kom meno, cwinywa tugge me pako Jehovah pi miniwa ginkok. Yo acel ma watwero timo man obedo me miyo lagam ki cwinywa ducu i cokke.

13. Watwero nyuto tut pa marwa pi Jehovah ki Wode nining? Tit kong.

13 Wanyuto kit ma marwa pi Jehovah gin ki Wode tut kwede ka watye atera me jalo gin mo keken pigi. Kare ducu mitte ni wajal jami mogo wek wabed tye i cokkewa. Kacokke mapol gibedo ki yub me cokke me dye cabit otyeno ma nongo gwok waol adada. Dok cokke mukene bedo i tum cabit ma nongo pol pa dano gitye ka yweyo. Tika Jehovah neno ka wabedo tye i cokke kadi bed waol? En neno! Ki lok ada, ka watye ka tute matek, ci Jehovah bene bedo ki pwoc pi mar ma wanyuto pire.​—Mar. 12:41-44.

14. Yecu owekkiwa lanen maber me bedo ki cwiny me jalle nining?

14 Yecu onyutiwa lanen maber me bedo ki cwiny me jalle. En onongo tye atera pe me to pi lupwonnyene keken ento bene me keto mitigi mukwongo me ka mege. Me labolle, en obedo ka rwatte ki lulub kore kadi bed en ool matek nyo cwinye otur. (Luka 22:39-46) Yecu bene oketo cwinye i kom gin ma myero etim pi jo mukene ento pe pi gin ma etwero nongone ki  botgi. (Mat. 20:28) Ka marwa pi Jehovah ki utmegiwa tye matek kit meno, ci wabitimo jami ducu ma watwero wek wabed tye i Cam me Otyeno pa Rwotwa kacel ki cokke mukene ducu.

15. Angagi ma watye ki miti madwong me konyogi?

15 Wan keken aye watye Lukricitayo me ada, dok cwinywa yom me lwongo jo mukene me ribbe kwedwa. Watye ki miti tutwalle me konyo “utmegiwa ma guye Kricito” ento ma ticgi pi Jehovah okwe woko. (Gal. 6:10) Wanyuto marwa pi jo magi ka wacuko cwinygi me bedo tye i cokkewa tutwalle i Nipo. Calo Jehovah gin ki Yecu, wan bene cwinywa bedo yom adada ka ngat mo ma ticce pi Jehovah okwe, odwogo cen bot Wonwa ma lamar.​—Mat. 18:14.

16. (a) Watwero cuko cwinywa kekenwa nining, dok cokkewa bitimo gin ango piwa? (b) Pingo man obedo kare maber me po i kom lok ma tye i Jon 3:16?

16 I cabit me lwongo dano, lwong jo mapol adada wek gubed tye i Nipo i Ceng Abic me nino dwe, 19 April, 2019. (Nen bok ma wiye tye ni “ Tika Ibilwongogi?”) Watute wunu me cuko cwiny dano kun wabedo tye i cokke ducu ma Jehovah oketo piwa. Ka nino me agikki woto ki nyiko cok, mitte ni wabed tye i cokke pien bikonyowa me bedo ki cwiny me mwolo, tekcwiny kacel ki mar. (1 Tec. 5:8-11) Ki cwinywa ducu, wanyuto bot Jehovah gin ki Wode marwa pigi pien gin bene gimarowa adada!​—Kwan Jon 3:16.

WER 126 Kiyu Piny, Cung Matek, Bed ki Teko

^ para. 5 Nipo me to pa Kricito ma tye otyeno i Ceng Abic me nino dwe 19 April, 2019, bibedo cokke ma dong pire tek loyo i mwaka man. Gin ango ma tugo cwinywa me bedo tye i cokke man? Ngene kene ni wamito yomo cwiny Jehovah. I pwony man wabinyamo gin ma bedowa i Nipo ki cokke mukene-ni nyuto i komwa.

^ para. 50 CAL MA I POK NGEYE: Kijolo dano milion mapol i twok lobo ducu pi kwero Cam pa Rwotwa me Otyeno

^ para. 52 LOK I KOM CAL: Jo me gang pa omego mo ma tye i buc pi niyene gucuko cwinye kun gucone waraga. En oniang ni wigi pe owil i kome dok cwinye bene yom me winyone ni jo me gange gitye ka gwoko gennegi kadi bed lweny ki jemo tye i kabedogi.