Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | ITWERO NONGO KWE CWINY KI KWENE?

Kit ma Lubanga Kweyo Kwede Cwinywa

Kit ma Lubanga Kweyo Kwede Cwinywa

Lakwena Paulo owaco ni Jehovah * aye “Lubanga ma kweyo cwiny dano ducu. En kweyo cwinywa i can ducu ma walimo.” (2 Jo Korint 1:3, 4) Pi meno, Baibul miniwa gen ni pe tye ngat mo keken ma Lubanga pe twero konyone dok pe tye peko mo keken madit kato ma Wonwa me polo pe twero kweyo cwinywa ki iye.

Ngene kene ni myero watim gin mo ka wamito nongo kwe cwiny ki bot Lubanga. Daktar twero konyowa nining ka pe wacito bote? Lanebi Amoc openyo ni: “Jo aryo giwoto kacel ka pe gucikke?” (Amoc 3:3) Pi meno, kicuko cwinywa ni: “Wunyik  cok bot Lubanga, ci en bene binyiko cok botwu.”​—Yakobo 4:8.

Watwero bedo labongo akalakala nining ni Lubanga binyikke cok kwedwa? Me acel, pien en kikome aye owaco tyen mapol ni emito konyowa. (Nen  bok ma piny-nyi.) Me aryo, pien watye ki caden ma moko ki bot jo mogo ma Lubanga okweyo cwinygi​—jo ma gukwo ada, i karewa-ni ki bene i kare mukato angec.

Calo jo mapol i kare-ni ma gitye ka yenyo kony ki bot Lubanga, Kabaka Daudi bene onongo tye ka kemme ki pekki mapol. En olego Jehovah ni: “Winy dwan me lega me bako doga boti, ka akok boti pi kony.” Tika Lubanga ogamo legane? Ogamo. Daudi omedde ni: “En okonya omiyo cwinya opong ki yomcwiny madwong.”​—Jabuli 28:2, 7.

TIC PA YECU I KWEYO CWINY JO MA KUMO

Lubanga onongo mito ni Yecu okwe cwiny dano. I kin tic ma Lubanga omiye, Yecu onongo bene myero ‘okwe cwiny jo ma cwercwiny onurogi’ ki ‘jo ma kumo.’ (Icaya 61:1, 2) Kit ma kitito kwede con, Yecu onyuto miti i kom jo ‘muol ki ma yec onurogi.’​—Matayo 11:28-30.

Yecu okweyo cwiny dano kun minigi tam me ryeko, terogi i yo me kica, ki dok i kare mogo onongo cango twogi. I nino mo acel ladobo mo olego Yecu ni: “Ka imito, itwero lonyo koma.” Kica omako Yecu adada ci ogamo ni: “Amito; komi olony.” (Marako 1:40, 41) Ci ladobo-ni ocang woko.

I kare-ni, Wod pa Lubanga dong pe i lobo wek okwe cwinywa. Ento Wonne Jehovah “Lubanga ma kweyo cwiny dano ducu,” pud tye ka medde ki konyo jo ma gimito kony i kare-ni. (2 Jo Korint 1:3) Nen kong yo angwen ma pire tek ma Jehovah tiyo kwede me konyowa.

  • Baibul. “Gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.”​—Jo Roma 15:4.

  • Cwiny Maleng pa Lubanga. I nge kare manok ma Yecu oto iye, kacokke pa Lukricitayo gubedo ki kuc pi kare mo. Pingo? Onongo “gilworo Rwot [Jehovah] i kwogi me nino ducu. [Dok] cwiny maleng obedo ka jingo cwinygi.” (Tic 9:31) Cwiny maleng ma en aye teko pa Lubanga tye ki teko adada. Lubanga twero tic kwede me kweyo cwinywa i peko mo keken ma watye iye.

  • Lega. Baibul miniwa tam ni: “Pe wubed ki par i kom gin mo.” Ento dok cuko cwinywa ni, “wumi Lubanga onge gin ma wumito. . . . Man bimiyo kuc pa Lubanga ma kato ngec pa jo ducu gwoko cwinywu ki tamwu maber.”​—Jo Pilipi 4:6, 7.

  • Lukricitayo luwotwa gitwero bedo lurem me ada ma watwero jenge i komgi i kare ma kwo tek. Lakwena Paulo otito ni luwote ‘gukweyo cwinye tutwal’ ‘i can ki i un ma giune kwede ducu.’​—Jo Kolocai 4:11; 1 Jo Tecalonika 3:7.

Ento iromo bedo ki ur kit ma jami magi ducu twero konyi kwede. Kong dong wanenu jami mutimme i kwo pa jo mukene ma guwok ki i peko ma kiloko i komgi i acakki me pwony man. Calo gin, in bene itwero niang ni Lubanga pud tye ka cobo cikkene ma waco ni: “Abikweyo cwinywu, calo latin ma minne kweyo cwinye​—Icaya 66:13.

^ para. 3 Jehovah aye nying Lubanga kit ma tye kwede i Baibul.