Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | ITWERO NONGO KWE CWINY KI KWENE?

Kwe Cwiny i Kare me Peko

Kwe Cwiny i Kare me Peko

Pekki ma bino i kwowa tye mapol mapatpat. Pe watwero lok i kom kit can ducu ki acel acel, ento kong wanenu labol angwen ma dong waloko i komgi i pwony mukato-ni. Nen kong kit ma dano ma gitye ka wok ki i pekki mapatpat gunongo kwede kwe cwiny ki bot Lubanga.

KA WAPE KI TIC

Seth * owacci, “An ki dakona warwenyo ticwa i kare marom. Pi mwaka aryo wabedo ka kwo ki kony ma a ki bot wadiwa kacel ki tic lejaleja mogo. Macalo adwogine, dakona Priscilla cwinye otur adada, dok onongo awinyo calo konya pe.”

“Waciro peko man nining? Kare ki kare wi Priscilla obedo ka po i kom lok pa Yecu ma i Matayo 6:34. En owacci pe omyero wabed ki par mapol pi nino ma lubo, pien nino acel acel tye ki par me nino meno. Dok legane ma onongo lego ki cwinye ducu-ni omine teko me medde anyim. Kitung bota, Jabuli 55:22 okweyo cwinya. Calo laco Jabuli, atito pekona ducu bot Jehovah, ci en aye okonya. Kadi bed ni kombeddi dong atye ki tic, wakwo kwo ma lapiny kit ma Yecu owaco i Matayo 6:20-22. Ma pire tek loyo, wan ducu wanyikke cok bot Lubanga dok wajingo wat i kinwa keken macalo luot.”

Jonathan owacci, “Onongo atye ki lworo pi gin ma bitimme i anyim i kare ma biacarawa otur. Pi peko me can lim, tic ma watiyo pi mwaki 20 kulu oran woko ata. An ki dakona wacako daa pi lok kom cente. Onongo pe watwero deno jami ki kad me wil, pien walworo ni kampuni ma omiyo-ni pe obiye.”

“Ento lok pa Lubanga ki cwiny maleng okonyowa me moko tam matir. Apwonye me ye tic mo keken ma anongo me atima, dok wajuko wilo jami ma pigi pe tek. Macalo Lucaden pa Jehovah, wanongo bene kony ki bot luye luwotwa. Gin gucuko cwinywa dok gumiyo kony i kare ma jami onongo dong tye magwar adada.”

KA NYOM OKET WOKO

Raquel otito ni, “I kare ma cwara oa oweka woko, cwinya ocwer mada dok kiniga omaka matek. Par onongo onura woko. Ento anyiko cok bot Lubanga, ci en okweyo cwinya. Kuc pa Lubanga okweyo cwinya ka alokke bote i lega nino ki nino. Onongo bedo calo en ocango cwinya ma otur-ni woko.”

“Pi kony ma anongo ki i Baibul, akwanyo keccwiny ki kiniga ma onongo atye kwede woko. Alubo lok pa lakwena Paulo ma tye i Jo Roma 12:21 ma waco ni: ‘Pe wuwek gin marac olowu, ento wun aye myero wulo gin marac ki timo gin maber.’”

“Larema mo acel macok okonya me neno tyen lok me medde ki kwo. Onyuta Latitlok 3:6 dok owacca ki dwan me kica ni tye kare ma myero ‘wajal iye jami calo gin murweny.’ En omiya tam magwar, ento meno aye gin ma onongo amito kikome. Kombeddi dong atye ki yub manyen ma amito cobone i kwona.”

Elizabeth owacci, “Ka nyomwu oket woko, ci mitte ni inong kony ki bot jo mukene. Abedo ki larema mo ma amaro adada ma onongo miya kony nino ducu. Onongo wakok kacel, kweyo cwinya, dok omiyo awinyo ni kara kimara ma ka winyo calo kidega. Angeyo labongo akalakala mo ni Jehovah otiyo kwede me cango bur ma i cwinya.”

KA TWO TYE NYO WATII WOKO

Luis, ngat ma kiloko i kome i acakki-ni, tye ki two me aduno marac adada, dok oloyo to tyen aryo kulu. Dong mitte ni kikete i macin me yamo pi cawa 16 nino ducu. En owacci, “Alego bot Jehovah kare ducu. Dok i nge lega bot Lubanga, cwiny  maleng miya teko. Lega mina kero me medde ki kwo pien ageno Lubanga dok angeyo ni en paro pira.”

Petra dako ma tye mwaka 80 ki wiye owacci, “Amito timo jami mapol, ento pe atwero. Lit adada me neno ka kerona tye ka dok piny. Awinyo aol dok myero akwo ki yat cawa ducu. Pol kare atamo i kom Yecu ma openyo Wonne ni okwany pekone woko ka onongo twere. Ento Jehovah omiyo Yecu kero, dok en bene miya teko. Lega obedo gin ma konya nino ki nino. Awinyo maber i nge lok ki Lubanga.”​—Matayo 26:39.

Julian, lamego ma dong olwenyo ki two ma kilwongo ni multiple sclerosis pi cokcok mwaka 30 bene winyo kit meno. En owaco ni, “I kare-ni, kwona ducu dong jenge i kom lela pa lugoro. Ento kwona pud pire tek pien atiyo kwede me konyo jo mukene. Miyo mot twero kweyo cwinywa, dok Jehovah miniwa kero i kare ma mitte. Calo lakwena Paulo, dong atwero wacone ni: ‘Atwero jami ducu liweng pi Kricito ma miya teko.’”​—Jo Pilipi 4:13.

KA IRWENYO NGAT MO I TO

Antonio otito ni, “Babana oto i can me gudo, dok onongo kong pe atwero ye ni ada. Onongo nen calo balle mo pe​—en onongo tye mere ka wot i teng gudo. Ento onongo pe tye gin mo ma atwero timone. En owille woko pi nino abic ka dong lacen oto. Atemme pe me kok i nyim mamana, ento ka atye kene akok matek. Abedo ka penye kekena ni, ‘Pingo? Pingo?’

“I kare me can meno, abedo ka kwayo Jehovah kare ki kare ni okonya me bedo ma cwinya opye mot, ki dok ni omiya kuc. Motmot cwinya ocako kwe. Wiya opo i kom ngo ma Baibul waco ni ‘jami ma timme atura’ twero gudo wan ducu. Kit ma Lubanga pe loko lok goba-ni, atye ki gen ni abineno babana doki i kare me nicer.”​—Latitlok 9:11; Jon 11:25; Tito 1:2.

“Kadi bed ni latinwa oto i can me dege, pud wiwa po i kom kare me yomcwiny ma wanywako kacel.”—Robert

Robert, ngat ma kiloko i kome i pwony mukwongo-ni tye ki tam acel-lu. En waco ni: “An kacel ki dakona wanongo kuc ma kiloko pire i Jo Pilipi 4:6, 7. Man otimme pien walego bot Jehovah. Kuc man okonyowa me lok bot lumi ngec pi genwa i kom nicer. Kadi bed ni latinwa oto i can me dege, pud wiwa po i kom kare me yomcwiny ma wanywako kacel. Watemme me keto tamwa i kom jami meno.”

“I kare ma Lucaden luwotwa guwacciwa ni ginenowa i telebijon ka lok ma cwinywa opye mot i kom niyewa, wawaccigi ni labongo akalakala mo meno ocobbe pi lega mapol ma gilego piwa. Ageno ki cwinya ducu ni Jehovah obedo ka cuko cwinywa kun tiyo ki kwena mapol me kwe cwiny ma dano gubedo ka cwalone botwa.”

Kit ma waneno i labol magi, Lubanga twero kweyo cwiny dano ma gitye ka wok ki i pekki kacel ki ariya mapatpat. In kono? Ka itye ka wok ki i peko mo keken, bed ki gen ni itwero nongo kwe cwiny. * Pingo pe ileg bot Jehovah pi kony? En aye “Lubanga ma kweyo cwiny dano ducu.”​—2 Jo Korint 1:3.

^ para. 5 Nying mogo ma tye i pwony man kilokogi woko.

^ para. 23 Ka imito kony me nyiko cok bot Lubanga kun inongo kwe cwiny ki bote, tim ber imi ngec bot Lucaden pa Jehovah i kabedowu nyo ico bot jang gang kal macok kwedi.