Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | GINANYUTA MA TITO LOK I KOM POLO

Ginanyuta ma Tito pi Angagi ma Gibedo i Polo

Ginanyuta ma Tito pi Angagi ma Gibedo i Polo

Baibul tye ki ginanyuta me aura mapol ma konyowa me goyo i wiwa kit ma polo tye kwede. Wakwayowu me ngiyo jami magi kore ki kore. Kadi bed ni pe myero kigony te jami ducu ma kiloko i komgi-ni atir atir, ginanyuta meno gitwero konyi pe me niang angagi ma gibedo i polo keken ento bene me niang kit ma gigudo kwede kwoni.

JEHOVAH AYE NGAT MAMALO TWAL

“Ci aneno komker ma gicibo i polo, ma dano mo onongo obedo i wiye. Ngat ma onongo obedo i wi komker ca onongo ryeny calo got me wel matarre ki makwarre, ki danyu ma nen calo emeradi orumo komker woko dyere.”​—Niyabo 4:2, 3.

“Mac bene onongo tye ka lyel orume woko dyere. Nen calo danyu ma nen i kom pol ka i nino me kot, mac ma yam obedo ka lyel ma orume dyere-ni bene obedo kit meno. Meno aye kit ma yam cal me deyo pa Rwot nen kwede.”​—Ejekiel 1:27, 28.

Ginanyuta magi ma kimiyo bot lakwena Jon kacel ki lanebi Ejekiel, nyuto lengo pa Jehovah, Lubanga Mamalo Twal, i yo ma watwero goyo calle maber​—gweng ma mil amila, danyu, ki dong komker. Gititiwa ni kabedo pa Jehovah tye mwonya ma lapore pe, ki yomcwiny, dok ki kuc.

Lok meno ma kitito i kom Lubanga rwatte ki lok pa laco Jabuli ni: “Rwot [Jehovah] aye dit, myero gipake tutwal, myero gilwore makato lubanga mukene-gu ducu. Pien lubanga pa lurok ducu gin cal jogi apaya, ento Rwot [Jehovah] aye oketo polo. Deyo ki dit tye bote, tek ki ber tye i kabedo mere maleng.”​—Jabuli 96:4-6.

Kadi bed ni Jehovah aye Ngat Mamalo Twal, en kwayowa me lega bote dok miniwa gen ni ebiwinyowa. (Jabuli 65:2) Lubanga marowa dok paro piwa adada ma oweko lakwena Jon ocoyo ni: “Lubanga aye mar.”​—1 Jon 4:8.

YECU TYE KACEL KI LUBANGA

“[Lapwonnye pa Yecu], Citefano onongo opong ki cwiny maleng, ci ociko wange i polo oneno deyo pa Lubanga, kun Yecu ocung i nget Lubanga yo tung acuc, ci owacci, ‘Nen, aneno polo oyabbe ki Wod pa dano ocung i nget Lubanga yo tung acuc.’”​—Tic pa Lukwena 7:55, 56.

I kare ma Citefano pud peya oneno ginanyuta meno, en onongo tye ka lok ki lutela pa Lujudaya ma guneko Yecu. Ginanyuta meno onyuto ka maleng ni Yecu tye makwo dok ni kityeko cere woko. Ma dok i kom lok man, lakwena Paulo ocoyo ni: “[Jehovah] ocero kwede Kricito ki i kin jo muto, ka okete obedo i kabedo me deyo ka ngete tung acuc i polo. En dong tye malo, loyo kit loc ducu ma tye i polo, ki nying mo ma oywek i lobo me kare man ki i lobo me kare ma bibino-ni bene.”​—Jo Epeco 1:20, 21.

Medo i kom twero ma lamal ma Yecu tye kwede, Ginacoya bene nyuto ni en paro pi dano adada calo Jehovah. I kare me ticce me pwony i lobo kany, en ocango two, dok ocero jo muto. Dok kit ma en odyero kwone me to calo ginkok-ki onyuto  mar matut ma en tye kwede pi Lubanga ki pi dano. (Jo Epeco 2:4, 5) Yecu dong ocung i nget Lubanga tung cinge ma lacuc, dok cokcok-ki en bitic ki twerone me kelo mot madit bot dano ducu ma luwiny i twok lobo ducu.

LUMALAIKA GITIYO BOT LUBANGA

Lanebi Daniel owaco ni: “I kare ma abedo ka nenone, ci aneno, gicibo komker mogo ci Ngat ma yam okwongo bedo kwo wa con obino obedo i wi komker acel. . . . Dano alip ki alip gitiyo bote; ki jo alip apar tyen alip apar gibedo ka cung i nyime.”​—Daniel 7:9, 10.

I ginanyuta man me polo-ni, Daniel pe oneno lamalaika acel keken, ento mapol. Ginanyuta meno pud dong obedo me ur ya! Lumalaika gitye cwec me cwiny, giryek dok gitek adada. Gitye ki rwom calo Lucerapi ki lukerubi. Baibul loko i kom lumalaika tyen makato 250 kulu.

Lumalaika pe gubedo dano ma kong gukwo i lobo kany. Lubanga ocweyo lumalaika wacon ma peya kicweyo dano. I kare ma kicweyo lobo, lumalaika onongo gitye ka nenone ki yomcwiny madit.​—Yubu 38:4-7.

Yo acel ma lumalaika ma lugen gitiyo kwede bot Lubanga aye me nywako i tic ma pire pud dong tek loyo ma kitye ka timone i lobo i kare-ni​—tito kwena maber me Ker pa Lubanga. (Matayo 24:14) Kitito pi kit ma gibinywako i tic man i ginanyuta ma lakwena Jon oneno. En owaco ni: “Aneno lamalaika mukene tye ka tuk wirre i dye polo; onongo tye ki lok me kwena maber me atita bot jo ma gibedo i wi lobo, bot rok ducu ki kaka ki leb-gu ki jo mapatpat ducu.” (Niyabo 14:6) Kadi bed lumalaika dong pe giloko ki dano kit macon-ni, gikonyo me telo wi jo ma gitye ka tito kwena bot jo ma cwinygi atir.

CATAN TYE KA BWOLO DANO MILION MAPOL

“Lweny ocakke i wi polo, Mikael kacel ki lumalaikane gulwenyo i kom min kulu madit-ti. Min kulu madit-ti kacel ki lumalaikane bene gulwenyo, ento giloyogi woko, mumiyo kabedo dong odoko pe pigi i wi polo. Ci gibolo min  kulu madit ca woko piny i ngom, ma yam obedo min kulu macon-ni, ma gilwongo ni Ladot, ki Catan, labwol dano ma i wi lobo ducu; gibole woko piny i ngom kacel ki lumalaikane.”​—Niyabo 12:7-9.

Pe tye ni kare ducu onongo polo tye ki kuc. I acakki me tekwaro pa dano, lamalaika mo acel obedo ki miti matek me nongo woro dok man oweko en ojemo i kom Jehovah, ci odoko Catan, ma te lokke ni “Lajemo.” Lumalaika mukene bene gudonyo i jemo meno ci kicako lwongogi ni jogi. Jo magi ma giraco adada-ni gidag Jehovah ki cwinygi ducu dok gubwolo pol pa dano me lubo yo mapat ki tira me mar pa Jehovah.

Catan ki jogine kitgi racu dok giger adada. Gitye lumone pa dano dok gin aye gitye ka buko mac pi can ma dano gitye ka denone i lobo-ni. Me labolle, Catan oneko lee ki lutic pa Yubu, laco ma onongo lagen. I ngeye, Catan oneko lutino pa Yubu gin apar kun tiyo ki “yamo madit” me reto ot ka ma onongo gugure iye. Lacen, Catan oketo i kom Yubu, “bur maraco muonyo cakke ki i dye tyene nio kwede wa i cwiny wiye.”​—Yubu 1:7-19; 2:7.

Ento cokcok-ki, kibityeko Catan woko kwicikwici. Cakke i kare ma kibolo Catan i lobo, en dong ngeyo ni “karene tye manok.” (Niyabo 12:12) Agikki pa Catan dong cok, dok man obedo kwena maber adada!

JO MA GUA KI I LOBO

“Ikoko dano pi Lubanga, ma gua i kaka mapol mapatpat, ki i leb ki rok mapatpat ducu, ilokogi gudoko lwak pa Lubanga ma en loyo, ma gin aye dong ajwagi [lulamdog] ma gitiyo bote, gin bene gibiloyo lobo.”​—Niyabo 5:9, 10.

Jo mukene bene kibicerogi ki i lobo me kwo i polo kit ma otimme kwede i kom Yecu-ni. Yecu owaco bot lukwenane ma lugen ni: “Ka acito, ayubo ki wun kabedo, dok abidwogo ka omowu bota, wek ka ma an abedo iye, wun bene wubed iye.”​—Jon 14:2, 3.

Jo ma gicito i polo gicito pi tyen lok. Gin kacel ki Yecu gibibedo macalo luloc me Ker ma biloyo lobo i anyim ci kelo mot mapol bot dano ma gitye i lobo. Man aye Ker ma Yecu owacci lulub kore guleg pire i lega ma en omiyo macalo lapor-ri ni: “Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.”​—Matayo 6:9, 10.

GIN MA JO MA I POLO GIBITIMONE

“Awinyo dwan mo malongo ma oa ki i komker kun wacci, ‘Nen, kabedo pa Lubanga dong tye bot dano. . . . En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.’”​—Niyabo 21:3, 4.

Ginanyuta man tito pi kare ma Ker pa Lubanga i te loc pa Yecu kacel ki jo ma kicerogi me kwo i polo, bikelo iye agikki pa loc pa Catan dok loko lobo doko paradic. Jami ma kelo arem ki cwercwiny malit i kom dano dong bibedo pe. Kadi wa to bene bibedo pe.

Ento dong, dano bilion mapol ata ma pe gibicerogi me kwo i polo-ni kono? I kare me anyim, gibicerogi ki gen me kwo pi naka i Paradic i lobo kany.​—Luka 23:43.

Ginanyuta magi miniwa gen ni Lubanga Jehovah ki Wode, Yecu Kricito, kacel ki lumalaikane ma lugen ki dong jo ma kikokogi ki i lobo me kwo i polo giparo piwa adada dok gitiyo pi ber bedowa. Me nongo ngec i kom jami ma gibitimone, wakwayi me nongo Lucaden pa Jehovah nyo cit i kabedowa me intanet me, www.jw.org, ci ikwany buk me Baibul Mono Ada Pwonyo Gin Ango?