Cit atir i jami ma tye

Cit atir ka ma nyuto lok ma tye iye

Tika Iye ni Lacwe Agulu Maber Loyo Oyubbi?

Tika Iye ni Lacwe Agulu Maber Loyo Oyubbi?

“Nen, wun jo Icrael bene wutye i cinga macalo lobo ma tye i cing lacwe agulu.”​—JER. 18:6.

WER: 60, 22

1, 2. Pingo Lubanga oneno Daniel calo “dano ma gimaro adada,” dok watwero bedo luwiny calo Daniel nining?

I KARE ma kitero Lujudaya i opii i lobo Babilon, gunongo boma meno opong ki cal jogi ki dano onongo gitye opii pa cen maraco. Kadi bed kit meno, Lujudaya ma lugen calo Daniel ki luwote adek, gukwero ni tekwaro pa Lubabilon odor kwogi. (Dan. 1:6, 8, 12; 3:16-18) Daniel ki luwote adek-ki gumoko tamgi me woro Jehovah ki cwinygi ducu macalo Lacwegi. Dok meno aye gin ma gutimo! Daniel nen calo obedo i Babilon pi kwone ducu; ento, Lamalaika pa Lubanga pud olwonge ni “dano ma gimaro adada.”​—Dan. 10:11, 19.

2 I kare me Baibul, lacwe agulu twero diyo lobo agulu i kom gin mo wek odok kit ma en mito kwede. Luworo me ada i kareni bene gingeyo ni Jehovah aye Laloc Mamalo Twal, dok bene tye ki twero me yubo dano me rok ducu. (Kwan Jeremia 18:6.) Lubanga bene tye ki twero me yubowa ki acel acel. Kadi bed kumeno, en oweko watye agonya me yero gin ma iwa mito dok en mito ni wabed luwiny kun nongo pe kidiyowa adiya me timo mitine. Kong dong waketu tamwa i kom kit ma watwero bedo kwede calo lobo agulu mayom i cing Lubanga, kun waneno jami adek magi:  (1) Watwero gwokke nining ki kit ma weko pe walubo tira pa Lubanga? (2) Watwero dongo kit ma weko wabedo calo lobo mayom kun wabedo luwiny nining? (3) Lunyodo ma Lukricitayo gitwero lubo tira pa Lubanga nining ka gitye ka pwonyo lutinogi?

GWOKKE KI KODI KIT MA WEKO CWINYI DOKO NWANG

3. Kodi kit ango ma twero weko cwinywa doko nwang? Tit kong.

3 Carolok 4:23 waco ni: “Gwokke i kom tam ma itamo ki i cwinyi ducu; pien kwoni ducu a ki i lok ma i cwinyi.” Kodi kit ango ma myero wagwokke kwede? Kit magi kwako awaka ma tere pe, timo bal, ki dong bedo labongo niye. Man twero weko wabedo lujemo nyo jo ma pe luwiny. (Dan. 5:1, 20; Ibru 3:13, 18, 19) Kabaka Ujia obedo ki cwiny me awaka. (Kwan 2 Tekwaro 26:3-5, 16-21.) I acakkine, Ujia obedo ka “tiyo gin ma nen atir i wang” Jehovah, dok “oketo cwinye ka yenyo Lubanga.” Ento cutcut ma ‘en odoko tek, ocako bedo ki cwiny me awaka,’ kadi bed ni tekone onongo oa ki bot Lubanga! En ongwette bene me wango gitum i ot pa Lubanga​—tic ma onongo tye pi likwayi pa Aron keken. I kare ma lulamdog gujuke, kiniga omako Ujia ma lawaka-ni ci okwero winyo lokgi lajwac! Adwogine obedo nining? En owok ki “i can” malit i cing Lubanga ka oto ki two dobo.​—Car. 16:18.

4, 5. Gin ango ma twero timme ka pe wagwokke ki cwiny me awaka? Mi labol.

4 Ka pe wagwokke ki cwiny me awaka, watwero cako ‘paro pi dito mukato kare’ woko, dok bene wacako cayo nyo kwero lubo tira ma a ki i Ginacoya. (Rom. 12:3; Car. 29:1) Tam kong i kom labol pa laelda mo ma nyinge Jim, ma winye manok obedo i kin en ki luelda luwote madok i kom lok mo ma mako kacokke. Jim owaco ni: “Awaco bot omege magi ni gipe ki cwiny me mar, ci aa woko ki i cokke meno.” I nge dwe abicel, Jim okobo i kacokke mo ma onongo pe bor ki macon-ni, ento ki kunu pe kicime me medde ki bedo laelda. En otito ni: “Cwinya ocwer adada. Cwiny me awaka oweko akete malo kekena, ci aa woko ki i ada.” Tic pa Jim macalo latit kwena okwe woko pi mwaki apar. En oye ni: “Cwinya ocwer adada, ci acako kok i kom Jehovah pi gin ma onongo tye ka timme. Pi mwaki mogo, omege gubedo ka lima kun gitute me leyo lok kweda, ento akwero niang woko.”

5 Gin ma otimme i kom Jim-ni nyuto kit ma cwiny me awaka twero bwolowa kwede, ma weko cwinywa doko nwang calo lobo agulu mutwo. (Jer. 17:9) Jim otito ni, “pe onongo atwero weko bedo ka tam ni jo mukene aye gutimo gin marac.” Tika inino mo dong Lakricitayo lawoti ocwero cwinyi nyo irwenyo mot me tic ma itye kwede? Ka meno otimme, idok iye nining? Tika ibedo ki cwiny me awaka? Nyo ke ce mitini madit obedo me yubo wat ki dwoko kuc i kin in ki omegini kun imedde ki bedo lagen bot Jehovah?​—Kwan Jabuli 119:165; Jo Kolocai 3:13.

6. Gin ango ma twero timme ka waweko timo bal odoko kitwa?

6 Ka waloko odoko kitwa me timo bal nyo bene i mung, ci twero weko cwinywa doko nwang ma pe waye tira. Timo bal twero doko gin mayot adada. Omego mo acel owaco ni i nge kare mo cwinye onongo dong pe pidde pi jami mogo maraco ma onongo etimo. (Latit. 8:11) Omego mukene, ma onongo dong oloko odoko kite me neno cal ki coc ma tugo miti me buto, lacen owaco ni: “Acako bedo ki cwiny marac i kom luelda.” Jami maraco ma en onongo timo obalo watte ki Jehovah woko. Lacen, giniang i kom timme-ni woko, ci onongo kony ma mitte. Ki lok ada, wan ducu watye ki roc. Ka wacako bedo ki cwiny marac nyo wacako gengo ngewa pi  balwa ma ka yenyo kony ki bot Lubanga, ci nongo cwinywa dong tye ka doko nwang.

7, 8. (a) Luicrael macon gunyuto nwang cwiny ki niye manok nining? (b) Pwony ango ma wanongo ki iye?

7 Labol pa Luicrael ma Jehovah olarogi ki i opii i lobo Ejipt weko waniang kit ma bedo ki niye manok twero weko cwinywa doko nwang kwede. Rok meno guneno kit ma Lubanga otimo kwede ki tango mapol me larogi i yo me aura adada! Ento, i kare ma dong gicok ki Lobo ma Kiciko pire, gucako bedo ki niye manok. Ma ka keto gengi i kom Jehovah, gucako bedo ki cwiny me lworo kun ginguru i kom Moses. Onongo gimito dok cen i Ejipt ka ma gubedo opii iye! Man ocwero cwiny Jehovah adada. Jehovah owaco ni: “Jo man gibicaya pi kare ma rom mene?” (Wel 14:1-4, 11; Jab. 78:40, 41) Yalwak meno guto i dye tim ata pi nwang cwinygi kacel ki niyegi manok.

8 I kareni, kit macalo dong wacok donyo i lobo manyen, gitye ka temo niyewa adada. Bedo ber ka wangiyo ka niyewa tye matek. Me labolle, watwero lwodo lok i kom gin ma Yecu owaco i Matayo 6:33. Penye kekeni ni: ‘Tika mitina kacel ki tam ma amoko nyuto ni atye ki niye i kom lok pa Yecu?’ Tika abimoko tam me keng cokke nyo cito i ticwa me pwony pienni amito nongo cente mabup? Gin ango ma abitimo ka mitte ni ajal cawa ki kero madwong i dog ticca? Tika abiye ni lobo odiya me lubo kit dano ma gitye iye​—nyo bene me giko tic pi Jehovah woko?’

9. Pingo myero wabed ka ‘ngine kekenwa’ ka niyewa pud tye matek, dok watwero timo man nining?

9 Nen kong dok labol mukene, tam kong i kom latic pa Jehovah mo ma pe keto cwinye me lubo tira me Baibul, madok i kom lurem, jo ma kiryemogi ki i kacokke, nyo galowang. Penye kekeni ni: ‘Tika twero bedo ni an bene atye ka timo gin ma kit man?’ Ka ce waneno ni gin ma kit meno tye ka donyo i kwowa, mitte oyotoyot adada ni wangi kit ma niyewa tye kwede! Tira me Baibul wacciwa ni: “Kong wungine kekenwu, wek wunen ka ce wucung matek i niyewu. Wutemme kekenwu.” (2 Kor. 13:5) Myero wabed ka ngine kekenwa kun watiyo ki lok pa Lubanga kare ki kare.

BED MAYOM CALO LOBO AGULU

10. Gin ango ma twero konyowa me bedo calo lobo mayom i cing Jehovah?

10 Lok pa Lubanga, kacokke pa Lukricitayo ki ticwa me tito kwena gitye i kin jami ma Jehovah tiyo kwede me yubowa wek wabed mayom calo lobo agulu. Kit macalo pii weko lobo bedo mayom, kwano Baibul kare ki kare ki lwodo lok konyowa me bedo calo lobo mayom i cing Jehovah. Jehovah onongo mito ni Kabaka ducu me Icrael myero guco ki cinggi Cik pa Lubanga dok gubed ka kwanone nino ducu. (Nwo. 17:18, 19) Lukwena guniang ni meno kwano ki lwodo lok i kom Ginacoya onongo pire tek adada i ticgi me tito kwena. Gubedo ka tic ki Ginacoya me Ibru tyen miya mapol ata i cocgi kun bene gicuku cwiny jo ma gitito kwena botgi me tic kwede. (Tic 17:11) I kareni, wan bene waneno kit ma pire tek kwede me kwano Lok pa Lubanga, lega ki dong lwodo lok iye nino ducu. (1 Tem. 4:15) Timo meno weko wabedo jo mamwol dok mayom calo lobo i cing Jehovah.

Ti ki jami ma Jehovah miyo wek i bed yom calo lobo agulu mayom (Nen paragraf 10-13)

11, 12. Jehovah twero tic ki kacokke pa Lukricitayo nining me yubowa ma lubbe ki kit ma ngat acel acel tye kwede? Tit kong.

11 Jehovah tiyo ki kacokke pa Lukricitayo me yubowa ma lubbe ki kit ma ngat acel acel tye kwede. Jim, omego ma waloko i kome malo-ni, ocako loko cwinye i kare ma laelda mo acel onyuto miti i kome. Jim owaco ni: “Pe tye nino mo ma laelda man owaco ni an aye atimo bal nyo ni pe icwako gin ma atimoni. Maka meno, en obedo ki neno matir dok onyuto ni etye ki cwiny me konya.” I  nge dwe adek, laelda-ni olwongo Jim i kacokke pa Lukricitayo. Jim owaco ni: “Jo me kacokke gujola ki yomcwiny madit adada, dok mar ma gunyuta en aye omiyo acako timo alokaloka i kwona. Acako nenone ni kit ma awinyo kwede aye pe gin ma pire tek loyo. Ki kony pa utmege kacel ki dakona me amara​—ma pe okwe i yo me cwiny​—motmot adwogi cen ka tic pi Jehovah. Anongo bene cuko cwiny madwong ki i pwony mo ma okati i Wi lubele me Novemba 15, 1992 ma wi lokke tye ni ‘Jehovah Is Not to Blame’ [Pe Myero Wakok i Kom Jehovah] ki ‘Serve Jehovah Loyally’ [Ti pi Jehovah ki Cwinyi Ducu].”

12 I nge kare mo manok, gicimo Jim doki me tic macalo laelda. Nicakke i kare meno, en obedo ka konyo omege mukene bene me lweny matek ki atematema macalo meno ki dok wek gudwog cen i woro Jehovah. En ogiko lokke ni: “Onongo abedo ki tam ni atye ki wat macok ki Jehovah, kun i ada onongo atye ka bwolle kena! Pud akoko ange pingo aye ni awaka oum wanga woko wek pe anen jami ma pire tek loyo ki dok me keto cwinya mukato kare woko i kom bal pa jo mukene.”​—1 Kor. 10:12.

13. Ticwa me pwony twero konyowa me dongo kit ango, dok man kelo adwogi maber ango?

13 Ticwa me tito kwena twero yubowa maber nining? Nywako lok me kwena maber ki jo mukene twero konyowa me dongo cwiny me mwolo kacel ki me nyako nyig ma nyak pi cwiny maleng. (Gal. 5:22, 23) Tam kong i kom kit mogo mabeco ma idongo ki i ticwa me tito kwena. Ma pire tek loyo, ka wadongo kit calo pa Kricito, ci wabiketo deyo i kom kwena ma watito, dok man twero gudo cwiny jo ma wanongogi i ticwa me pwony. Me labolle, i kare ma Lucaden aryo mo i lobo Australia gitye ka tito kwena, rwod ot  mo obedo ka lok kwedgi ki gero, ento gudok i lokke i yo ma nyuto woro madit adada. Lacen, en obedo ka tam i kom kit ma eloko kwede ki lucaden-ni ci ocoyo waraga i jang gang kal. But waraga meno onongo waco ni: “Akwayo kica bot jo aryo ma gubedo jo ma diyo cwiny dok lukica pi cwiny me awaka ma anyuto botgi. Pud dong atimo gin me mingo ya me cung i nyim jo aryo magi ma onongo gitye ka tito lok pa Lubanga kun atamo ni onongo atwero tittigi gin me atima.” Itamo ni rwod ot-ti onongo twero coyo lok meno ka onongo lutit kwena magi gudok i yo me gero? Pe twere wacel. Ada, ticwa me tito kwena pud dong konyowa kacel ki luwotwa ya!

BED LAWINY BOT JEHOVAH KA ITYE KA PWONYO LUTINONI

14. Gin ango ma lunyodo myero gutim wek tutegi me pwonyo lutinogi onyak nyige?

14 Pol lutino matino gibedo ki miti matek me pwonyo gin manyen, dok nongo gimwol adada. (Mat. 18:1-4) Pi meno, lunyodo maryek gitemme me pwonyo ki dok konyo litinogi wek gudong mar pi lok me ada i cwinygi. (2 Tem. 3:14, 15) Ki lok ada, wek lunyodo gutim meno, gin kikomgi bene myero guwek ada odony i cwinygi, kun giweko ada doko yo me kwogi. Ka lunyodo gutimo meno, ci lutinogi pe gibiwinyo lok ada keken ento bene gibineno kit ma lok me ada tiyo kwede i kwo pa dano. Lutino gibicako neno tira ma lunyodo miyo calo lanyut me mar pa Jehovah.

15, 16. Lunyodo myero gunyut gengi i kom Jehovah nining ka kiryemo latingi mo ki i kacokke?

15 Kadi bed ni lunyodo gupwony lutinogi ki lok me ada, lutino mukene giromo a woko ki i ada nyo kiryemogi woko ki i kacokke, dok man kelo cwercwiny malit bot jo me gang. Laminwa mo i lobo South Africa owaco ni: “I kare ma kiryemo omera ki i kacokke, obedo calo en oto woko. Cwinywa otur adada!” Lamego man kacel ki lunyodone gudok iye nining? Gin gulubo tira ma nonge i Lok pa Lubanga! (Kwan 1 Jo Korint 5:11, 13.) Lunyodone guwacci: “Wamoko tamwa me lubo tira me Baibul, kun wangeyo ni lubo cik pa Lubanga kelo adwogi maber loyo. Waneno yub man me ryemo ngat ma pe ongut ki i kacokke calo yo ma Jehovah miyo kwede ki tira kun waye ni Jehovah miniwa tira pi mar madit ma en tye kwede piwa dok i yo mupore. Pi meno pe waribbe ki latinwa nikwanyo ka pi lok mo me paco ma onongo pire tek adada.”

16 Latin-ni owinyo nining? Lacen en owaco ni: “Onongo angeyo ni jo gangwa pe gidega, ento gitye ka lubo cik pa Jehovah ki dulle.” En bene owaco ni: “Ka dong piny obwoyi ci ibibako doggi bot Jehovah pi kony ki kicane pien nongo dong iniang kit ma Jehovah pire tek kwede i kwoni.” Tam kong i kom yomcwiny ma jo me ot man gubedo kwede i kare ma kidwoko latingi i kacokke! Ada, ka walubo cik pa Jehovah i kit yo me kwowa ducu, ci wabinongo adwogi maber loyo.​—Car. 3:5, 6; 28:26.

17. Pingo myero wabed luwiny bot Jehovah i yo me kwowa ducu, dok man bikeliwa adwogi ango?

17 Lanebi Icaya oloko i kom kare ma Lujudaya ma gitye opii i Babilon gibingut ci giwaco ni: “Ai Rwot, in pud i Wonwa; wan lobo agulu, in aye lacwewa; wan ducu wabedo gin ma in aye itiyowa ki cingi.” Ci gibibako doggi ni: “Pe bene ibed ka po i kom balwa nakanaka, kong inen, dok ipar, wan ducu wabedo joni.” (Ic. 64:8, 9) Ka wan bene wabedo jo ma gimwol kun wabedo luwiny bot Jehovah i yo me kwowa ducu, ci en bimarowa, kit ma en onongo maro kwede lanebi Daniel. Ma dong pire tek loyo, Jehovah bimedde ki yubowa kun tiyo ki lokke, cwiny maleng, ki dong dulle wek i anyim wacung i nyime calo ‘litinone’ ma gipe ki roc mo.​—Rom. 8:21.