Cit atir i jami ma tye

Cit atir ka ma nyuto lok ma tye iye

Jehovah ‘Paro Piri’ Jehovah

Jehovah ‘Paro Piri’ Jehovah

PINGO iye ni Jehovah paro piri? Tyen lok me acel tye ni, pien kicoyo i Baibul kit meno. 1 Petero 5:7 waco ni: ‘Wuket parwu ducu i kome, pien en paro piwu.’ Gin ango ma weko imoko ni Jehovah tye ki miti i komi?

LUBANGA MIYO JAMI ME KOM BOT JONE

Jehovah onyutiwa lanen maber me aluba pien en lakica dok cinge yot

Gin acel ma pire tek ma wangeyo aye ni, Lubanga tye ki kit mabeco ma wamito ni luremwa macok loyo gubed kwede. Jo ma gitimo kica kun bene gimiyo gin ma mitte bot luwotgi pol kare gibedo lurem macok. Kit ma ineno kwede, Jehovah obedo ngat ma cinge yot dok lakica bot dano nino ducu. Nen kong labol acel: “En miyo cengnge tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene.” (Mat. 5:45) Gin ango ma kot ki ceng gitimo? Ki i kin jami mukene, Lubanga weko kot ki ceng cobo miti pa dano dok ‘miyo giyeng ki cam, cwinygi bene bedo yom.’ (Tic 14:17) Ada, Jehovah miyo lobo ceko cam mabup, dok bene kit ma wangeyo kwede, pe tye jami mapol tutwal ma keliwa yomcwiny calo camo dek mamit.

Pingo jo mapol gikoko kec? Pien lutela gamente pol kare giketo tamgi me nongo yweka ki yenyo lonyo madit ma ka cobo miti pa dano. Jehovah cokcok-ki bikwanyo cwiny me woro ma dano tye kwede kun leyo ka wang loc me lobo-ni ki Ker me polo, ma nongo Wode aye ma biloyo-ne macalo Kabaka. I kare meno, pe tye ngat mo ma bikoko kec. Kadi bed kumeno, Lubanga gwoko luticce  ma lugen i kareni. (Jab. 37:25) Tika meno pe nyuto ni en paro piwa?

JEHOVAH PE LAGINGI KI CAWANE

Jehovah onyutiwa lanen maber me aluba pien en pe lagingi pi cawane

Larem maber jalo cawane wek ibed kacel ki lawote. Kwanyo cawa malac me nywako lok kacel kwedi i kom jami ma yomo cwinywu ducu. Larem maber bene keto cwinye me winyi ka itye ka tite pekoni ki par ma itye kwede. Jehovah tika tye kit meno? Ada, en tye kumeno. En winyo legawa. Pi meno, Baibul cuko cwinywa me ‘mine kenwa i lego Lubanga dok ma pe wakeng.’​—Rom. 12:12; 1 Tec. 5:17.

Jehovah romo jalo cawane marom mene me winyo legawa? Labol mo me Baibul miniwa lagam. Ma Yecu peya oyero lukwenane, en “obedo ka lego Lubanga dyewor benebene.” (Luka 6:12) I legane, Yecu nen calo obedo ka lok i kom lupwonnyene ki acel acel, kun bene tamo i kom kitgi ki gorogi, ka dong openyo Wonne ni okonye me yerogi. I ruu piny me nino manyen, Yecu onongo dong ngeyo ni iyero jo ma gupore loyo me tic macalo lukwenane. Macalo ngat ma ‘gamo lega-gu ducu,’ Jehovah cwinye bedo yom me winyo lega ma walego bote ki cwinywa ducu. (Jab. 65:2) Kadi bed ni ngat moni oter cawa malac me lega pi gin mo ma pire tek adada, Jehovah pe ol kwede dok bene pe bedo ka tam ni ngat meno tye ka tero cawa malac tutwal.

LUBANGA TYE ATERA ME TIMO KICA

Jehovah onyutiwa lanen maber me aluba pien en tye atera me timo kica

Ka odok i kom timo kica, kadiwa lurem macok adada bene ginongo timone tek. I kine mukene, lirem balle woko pien ngat moni nongo tek tutwal me timo kica bot lawote. Jehovah pe tye kumeno. Baibul cuko cwinywa ki acel acel me kwayo kica kun waco ni, ‘en biweko balwa woko ducu.’ (Ic. 55:6, 7) Gin ango ma weko Lubanga timo kica ki cwinye ducu?

Lubanga timo man pien maro dano adada. En maro dano ma oweko en omiyo iye Wode, Yecu me laro dano ki i bal kacel ki adwogi  marac ma bal kelo. (Jon 3:16) Ki lok ada, ginkok cobo jami mapol makato. Lubanga otiyo ki ginkok me timo kica bot jo ma en marogi. Lakwena Jon ocoyo ni: “Ka watuco balwa, en genne dok kite atir, biweko balwa.” (1 Jon 1:9) Pi kica pa Jehovah oweko dano pud gimedde ki bedo lureme, dok man gudo cwinywa adada.

EN MINI KONY KA IMITO

Jehovah onyutiwa lanen maber me aluba pien en konyowa ka wamito kony

Lirem me ada konyo jo mukene ka gimito kony. Tika Jehovah bene timo kit meno? Lokke waco ni: “Kadi [latic pa Lubanga] oyokke, ci pe bipoto piny aryeba ic, pien Rwot [Jehovah] tye jole woko ki cinge.” (Jab. 37:24) Jehovah ‘konyo luticce’ i yo mapol mapatpat. Nen kong labol man ma otimme i cula nam me Caribbean i St. Croix. 

Lurem latin anyaka mo onongo gitye ka keto dic i kome i kare ma okwero woro bendera pien en onongo tye ka lubo cik me Baibul. I nge lega bot Jehovah pi kony, en omoko tamme me lok ki luwote ma lubbe ki niyene. En otito bot lutino kwan luwote lok i kom niyene ma lubbe ki woro bendera. Kun tiyo ki buk me Ododo me Baibul, en otito labol ma otimme i kom Cadrak, Mecak ki Abednego ki bene kit ma kubbe kwede ki tam ma emoko. En owaco ni, “Jehovah okonyo Luibru adek magi pien pe guworo cal ma kicweyo ki jabu meno.” Ci omiyo buk man bot ngat acel acel ma onongo tye i kilaci. Lutino kwan luwote apar acel mukene dok onongo gimito buk man. I kare ma latin anyaka man oniang ni Jehovah omiye teko ki ryeko me miyo caden iyo mucwiny i kom lok man, cwinye obedo yom adada.

Ka inino mo cwinyi otur pien itamo ni Jehovah pe paro piri, lwod lok i kom wang Baibul magi ma kikwanyo ki i Jabuli 34:17-19; 55:22; ki 145:18, 19. Peny jo ma dong gutiyo pi Jehovah pi kare malac i kit ma Jehovah okonyogi kwede. Ci dok ka imito ni Lubanga okonyi, tit bote gin ma tye i cwinyi. Ibineno kit ma Jehovah ‘paro piri’ kwede.