Cit atir i jami ma tye

Cit atir ka ma nyuto lok ma tye iye

‘Wupak Jehovah!’—Pingo?

‘Wupak Jehovah!’—Pingo?

‘Wupak Jehovah! Ber mada me wero wer me pak bote!’​—JABULI 147:1.

WER: 104, 152

1-3. (a) Awene me kibyeko ni kicoyo Jabuli 147? (b) Watwero pwonyo gin ango ka wakwano Jabuli 147?

POL kare wapako ngat mo ma otimo nyo owaco gin mo maber ma oyomo cwinywa. Ci dong myero wapak Lubanga Jehovah lakwene! Myero wapakke pi tekone madit tutwal, ma waneno i cwecce mamwonya, dok bene wapakke pi mare madit piwa, pien en odyero kwo pa Wode macalo ginkok.

2 Ka wakwano Jabuli 147, nen ka maleng botwa ni ngat mucoyo onongo tye ki miti matek me pako Jehovah. En bene ocuko cwiny jo mukene me pako Lubanga kacel kwede.​—Kwan Jabuli 147:1, 7, 12.

3 Pe wangeyo anga mucoyo Jabuli 147. Ento nen calo okwo i kare ma Luicrael gudok cen i Jerucalem i nge kare ma Jehovah ogonyogi ki i Babilon. (Jabuli 147:2) Laco jabuli opako Jehovah pien ni jone onongo gibidok cen ka wore i lobogi. En bene omiyo tyen lok  mukene me pako Jehovah. Tyen lok ango? Itye ki tyen lok ango me wacone ni ‘Wupak Jehovah!’?​—Jabuli 147:1.

JEHOVAH CANGO JO MA CWINYGI CWER

4. Luicrael guwinyo nining i kare ma Kabaka Ciro ogonyogi ki i Babilon, ki dok pingo?

4 Go kong kit ma Luicrael guwinyo kwede i kare ma gitye i opii i Babilon. Lubabilon gubedo ka nywaro Luicrael kun giwaco ni: “Wuweriwa wer mo ma loko lok i kom Cion.” Ento Lujudaya onongo pe gimito wer. Jerucalem, boma ma onongo weko gibedo ki yomcwiny madit adada onongo kituro woko. (Jabuli 137:1-3, 6) Cwinygi onongo otur adada, dok onongo gimito kwecwiny. Ento kit ma Lok pa Lubanga otito kwede con, Jehovah okonyo jone. I yo ma nining? Ciro, Kabaka me Percia oturo Babilon ci oloko i kom Jehovah ni: “Ocika ni ager ot pire i Jerucalem.” Ciro bene owaco bot Luicrael ni: “Bot ngat mo keken ma i kinwu ma i kom lwakke ducu awaco ni, Rwot Lubangane myero obed kwede. Wek en oa ociti.” (2 Tekwaro 36:23) Lok man nen calo okweyo cwiny Luicrael adada!

5. Gin ango ma laco jabuli owaco i kom teko ma Jehovah tye kwede me cangowa?

5 Jehovah okweyo cwiny Luicrael pe macalo gurup keken ento en okweyo cwinygi ki acel acel. Jehovah bene timo kit meno piwa i kare-ni. Laco jabuli ocoyo ni Lubanga “cango jo ma cwinygi cwer, dok tweyo wang retgi woko.” (Jabuli 147:3) Ka komwa lit nyo watye ki par, watwero bedo ki gen ni Jehovah paro piwa. Jehovah tye ki miti me kweyo cwinywa ki me cango arem cwinywa. (Jabuli 34:18; Icaya 57:15) En miniwa ryeko ki kero me lweny ki peko ma wakemme kwede.​—Yakobo 1:5.

Jehovah tye ki miti me kweyo cwinywa ki me cango arem cwinywa

6. Adwogi maber ango ma wanongo ki i lok ma kicoyo i Jabuli 147:4? (Nen cal ma i pot karatac 15.)

6 Laco jabuli dok oneno dan polo ci owaco ni Jehovah “omoko wel lakalatwe woko ducu” ci “ocako nyinggi woko ducu liweng.” (Jabuli 147:4) Laco jabuli onongo twero neno lakalatwe ento pe ngeyo welgi. I kare-ni, lucayan gingeyo ni tye lakalatwe bilion mapol ata i yogo ma watye iye-ni. Dok nen calo tye yogo trilion mapol ata! Dano pe twero kwano wel lakalatwe, ento Lacwec twero. Ki lok ada, en ngeyo lakalatwe ducu ki acel acel ma oweko en ocako nyinggi ducu. (1 Jo Korint 15:41) Lubanga ma ngeyo ka ma lakalatwe ducu ki acel acel tye iye bene ngeyi maber. En ngeyo ka ma itye iye kikome, kit ma iwinyo kwede, ki gin ma imito!

7, 8. (a) Gin ango ma Jehovah ngeyo maber i kwowa? (b) Mi labol ma nyuto ni Jehovah lakica.

 7 Jehovah ngeyo kwo ma itye ka wok ki iye, dok en tye ki teko me konyi ki i peko ma itye ka kemme kwede. (Kwan Jabuli 147:5.) Itwero tamone ni pekoni dit tutwal ma pe itwero lweny kwede. Lubanga niang gorowa, dok “en po ni wan apwa mamwa.” (Jabuli 103:14) Watye ki roc, pi meno watimo bal kare ki kare, dok cwinywa twero tur. Watwero kok ange pi jami ma wawaco ki miti marac nyo cwiny me nyeko ma wabedo kwede! Jehovah pe ki goro mo keken, ento en niang kit ma wawinyo kwede.​—Icaya 40:28.

8 In tika dong ineno ni Jehovah okonyi ki i atematema mo? (Icaya 41:10, 13) Man otimme i kom lapainia mo ma nyinge Kyoko. I kare ma kikobe i wang tic mukene, cwinye otur adada. Ento Kyoko ongeyo nining ni Jehovah oniang pekone? I kacokkene manyen-ni, onongo tye jo mapol ma giniang kit ma en winyo kwede. En owinyo calo Jehovah tye ka wacce ni: “Amari, pe ni pien itye lapainia, ento pien in i nyara dok ijale me tic pira. Amito ni ibed ki yomcwiny macalo ngat acel i kin Lucadenna!” Jehovah onyutti nining ni ‘etye ki niang matut ma pe pimme’?

JEHOVAH MINIWA JAMI MA MITTE

9, 10. Yo mene ma pire tek loyo ma Jehovah konyowa? Mi labol.

9 Wan ducu wamito jami calo cam, bongo, ki ot. Romo bedo ni itye ki par ni pe itye ki cam muromo. Ento Jehovah ocweyo lobo wek ocek cam mabup pi dano ducu, kadi wa pi “litino agak ma tye ka koko.” (Kwan Jabuli 147:8, 9.) Ka Jehovah pito wa agak, ci watwero bedo ki gen ni en biminiwa jami ma mitte.​—Jabuli 37:25.

10 Ma pire tek loyo, Jehovah miniwa jami ma mitte wek niyewa obed matek, dok en miniwa “kuc pa Lubanga ma kato ngec pa jo ducu.” (Jo Pilipi 4:6, 7) Omego mo ma nyinge Mutsuo gin ki dakone guneno kit ma Jehovah okonyogi kwede. I kare ma pii otwagge i nam ci obalo piny i Japan i 2011, guito i wi otgi me laro kwogi. I nino meno, gurwenyo cokcok jamigi ducu. I dyewor, gubuto i rum mo macol, dok mangic adada. I odiko, guyenyo gin mo ma olo to twero kweyo cwinygi. Gin ma gunongo aye 2006 Yearbook of Jehovah’s Witnesses keken. I kare ma Mutsuo ocako yabo pot buk meno, en oneno wi lok mo ma waco ni “Twagge pa Pii ma Pud Dong Obedo Rac Loyo” [“The Deadliest Tsunamis Ever Recorded.”] Onongo loko i kom oyengyeng mo ma otimme i Sumatra i 2004 ma okelo twagge pa pii ma pud dong obedo rac loyo. Mutsuo gin ki dakone gubedo ka kok i kare ma gitye ka kwano gin mutimme i kom utmegigi ma kunu. Guwinyo calo Jehovah onongo tye ka cuko cwinygi i kom pekogi. Jehovah bene ogwokogi i yo mukene. Utmegigi ma i kabedo  mukene i lobo Japan guminigi cam ki bongi. Ento gin ma ocuko cwinygi loyo aye limo pa omege mogo ma dul pa Lubanga ocwalo i kacokkegi. Mutsuo owaco ni: “Awinyo calo Jehovah onongo tye i ngetwa ki acel acel dok paro piwa. Man ocuko cwinywa adada!” Mukwongo Lubanga kong ominiwa jami ma mitte me jingo niyewa ka dong lacen ominiwa jami me kom ma mitte.

NONG KONY PA LUBANGA

11. Gin ango ma myero watim wek wanong kony pa Lubanga?

11 Jehovah ‘tingo jo ma mwol, ilogi malo.’ En marowa dok tye atera me konyowa. (Jabuli 147:6a) Gin ango ma myero watim wek en okonywa? Myero wabed ki wat macok kwede. Wek meno otimme, myero wamwolle. (Jepania 2:3) Jo ma mwol gijenge i kom Jehovah me giko ngolo kop  alenga kacel ki pekkigi. Dok bene nongo gitye ki cwak pa Jehovah.

12, 13. (a) Gin ango ma myero wagwokke kwede ka wamito ni Lubanga okonywa? (b) Nga ma Jehovah cwinye bedo yom i kome?

12 Kitungcel, Lubanga “reto jo maraco gipoto woko ducu i ngom.” (Jabuli 147:6b) Pe wamito ni meno otimme i komwa! Wamito ni Lubanga onyutiwa marre ma pe lokke. Pi meno, myero wakwer gin ma en dag. (Jabuli 97:10) Me labolle, myero wakwer tim carocaro. Man nyuto ni myero wagwokke ki i gin mo keken ma twero terowa i tim meno, me labolle neno cal ki coc ma tugo miti me buto. (Jabuli 119:37; Matayo 5:28) Pe yot me timo meno, ento tutewa bikeliwa adwogi maber pien wabinongo mot ki bot Jehovah.

13 Pe watwero timo meno piwa kenwa. Myero wajenge i kom Jehovah. Tika cwinye bibedo yom ka wajenge i kom gin ma jo mukene gijenge i kome pi nongo kony? Pe, ‘teko pa aguragura pe miyo yomcwiny’ bot Jehovah. Tika myero wajenge i komwa kekenwa, nyo i kom jo mukene? Cwiny Jehovah pe bedo yom i kom “tyen dano ma langwec.” (Jabuli 147:10) Ma ka meno, myero wamedde ki lega bot Jehovah pi kony kun wakwaye ni okonywa me lweny ki gorowa. Jehovah pe biol ki winyo legawa. Jehovah “cwinye yom i kom jo ma gilwore, ki i kom jo ma geno mar mere ma pe lokke.” (Jabuli 147:11) Wangeyo ni en bimedde ki konyowa me lweny ki miti marac ma watye kwede pien en lagen dok marowa.

14. Laco jabuli onongo tye ki gen ango?

14 Jehovah cuko cwinywa ni ebikonyowa i kare me peko. I kare ma Luicrael gudok i Jerucalem, laco jabuli obedo ka tam i kom kit ma Jehovah tye ka konyogi kwede. En owero ni: “En aye ma gwoko dog gangngi miyo cung matek; en bene ma miyo gum  i kom joni. En miyo wang apokki loboni bedo ki kuc.” (Jabuli 147:13, 14) Kit ma laco jabuli onongo ngeyo ni Jehovah aye ma gwoko dog gang-ngi dok miyo cung matek-ki, man oweko en obedo agonya. Man bene omine tekcwiny ni Jehovah bigwoko jone.

Lok pa Lubanga twero konyowa nining ka watye ki par pi peko ma watye kwede? (Nen paragraf 15-17)

15-17. (a) Watwero winyo nining i kom atematema ma wawok ki iye, ento Jehovah tiyo ki Lokke me konyowa nining? (b) Mi labol ma nyuto kit ma lok pa Lubanga “ringo bino oyotoyot” me konyowa.

15 I kine mukene itwero bedo ki par pi peko ma itye ka wok ki iye, ento Jehovah twero mini ryeko me lweny kwede. Laco jabuli owaco ni Lubanga “cwalo cikke bot lobo; lokke ringo bino oyotoyot.” En bene oloko i kom pee ci openyo ni: “Anga ma twero cung i ngico ma en miyo?” Lacen, en owaco ni Jehovah “cwalo lokke, ci lenyo pee woko.” (Jabuli 147:15-18) Lubangawa ma ngeyo jami ducu dok twero timo gin mo keken, ma doro kadi wa pee ki ngico, twero konyi me lweny ki peko mo keken.

In tika dong ineno ni Jehovah pe galle me mini tira ma mitte?

16 I kare-ni, Jehovah tiyo ki Baibul me tirowa. Laco jabuli owaco ni ‘lok pa Jehovah ringo bino oyotoyot’ me konyowa. Lubanga miniwa tira i yo maber dok i kare ma mitte kikome. Tam kong i kom adwogi mabeco ma inongo ki i Baibul, buke ma wanongo ki bot “lagwok ot ma lagen dok maryek,” JW Broadcasting, jw.org, luelda, ki dong utmegini ma i kacokke. (Matayo 24:45) In tika dong ineno ni Jehovah pe galle me mini tira ma mitte?

17 Lamego mo ma nying Simone oneno kit ma lok pa Lubanga okonye kwede. En onongo winyo calo konye pe, dok ni cwiny Jehovah pe yom i kome. Ento i kare ma cwinye otur, en omedde ki lega bot Jehovah, kun bako doge pi kony. En bene obedo ka kwano Baibul kare ducu. Simone owaco ni: “Pe tye nino mo ma pe awinyo teko pa Jehovah ki tirane.” Man okonye adada me bedo ki neno matir.

18. Pingo iwinyo ni Jehovah tye cok kwedi, ki dok tyen lok ango ma itye kwede me ‘Pako Jehovah!’?

18 Laco jabuli onongo ngeyo ni Jehovah oyero rok me Icrael ki i kin rok ducu me wi lobo wek gubed jone. Lubanga omiyo “lokke” ki “cikke” bot Luicrael keken. (Kwan Jabuli 147:19, 20.) I kare-ni, watye ki mot madit pien kilwongowa ki nying Lubanga. Watye ki pwoc madit pien wangeye, watye ki Lokke me tirowa, ki dok wat macok kwede. Calo laco Jabuli 147, itye ki tyen lok mapol me ‘Pako Jehovah’ ki dok me cuko cwiny jo mukene me timo meno bene.