Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 8

Pingo Omyero Inyut Pwoc?

Pingo Omyero Inyut Pwoc?

“Wubed jo ma miyo pwoc kare ducu.”—KOL. 3:15.

WER 46 Wapwoyi Jehovah

GIN MA WABINYAMO *

1. Lacamaria ma Yecu ocango-ni onyuto pwoc nining?

CO APAR-NI onongo kwogi tye ka matek adada. Onongo gitye ki two dobo dok gen mo pe pigi. Ento i nino mo acel, guneno Lapwony Madit, Yecu tye ka kato ki ka mabor. Gin onongo guwinyo ni Yecu ocango kwai two mapol mapatpat, dok onongo gipe ki akalakala mo ni en twero cangogi bene. Pi meno, gubedo ka dange ni: “Yecu, Ladit, timwa kica!” Ci Yecu ocango co apar-ni woko ducu. Ngene kene ni gin ducu cwinygi obedo yom pi kica ma Yecu onyuto botgi. Ngat acel i kingi, pe obedo ki yomcwiny keken—ento onyuto pwocce bene * bot Yecu. Lacamaria meno ma kicango-ni omiyo deyo bot Lubanga “ki dwan malongo.”—Luka 17:12-19.

2-3. (a) Pingo i kine mukene pe wamiyo pwoc? (b) Ngo ma wabinyamo i pwony man?

2 Calo Lacamaria-ni, wan bene wamito nyuto pwoc bot jo ma lukica. Ento i kine mukene, wiwa wil woko me nyuto pwoc i lokwa ki ticwa.

3 I pwony man, wabineno pingo pire tek me nyuto pwoc i gin ma watimo ki ma wawaco. Wabinyamo labol mogo me Baibul pa jo ma gunyuto pwoc ki ma pe gunyuto pwoc. I ngeye, wabinyamo yo mogo ma watwero nyuto kwede ki pwoc.

 PINGO OMYERO WANYUT PWOC?

4-5. Pingo pire tek me nyuto pwoc?

4 Jehovah owekiwa lanen maber i nyuto pwoc. Yo acel ma en timo kwede meno aye ki miyo mot bot jo ma yomo cwinye. (2 Cam. 22:21; Jab. 13:6; Mat. 10:40, 41) Dok Ginacoya cuko cwinywa ni omyero ‘walub kit pa Lubanga, pien wan litinone ma en maro.’ (Ep. 5:1) Tyen lok ma pire tek ma weko wanyuto pwoc aye pien wamito lubo lanen pa Jehovah.

5 Nen dok tyen lok mukene ma weko wamiyo pwoc bot jo mukene. Pwoc obedo calo cam mamit—cwinywa bedo yom me nywako cam ma kit meno ki jo mukene. Ka wangeyo ni jo mukene gitye ki pwoc i komwa, ci cwinywa bedo yom. Dok ka wanyuto pwoc bot jo mukene, ci cwinygi bene bedo yom. Ngat ma wamine pwoc-ci nongo ngeyo ni tutene me konyowa nyo me miniwa gin mo obedo me kony botwa adada. Macalo adwogine, wat i kinwa ki ngat meno jing doko matek.

6. Pwoc ma wamiyo kitwero porone ki lagit cing ma kiyubo ki jabu nining?

6 Pwoc ma wanyuto pire tek adada. Baibul waco ni: “Lok ma giloko kakare obedo calo jabu ma gimwono i kom ryal.” (Car. 25:11) Go kong kit ma lagit cing ma kiyubo ki jabu kacel ki ryal bedo mwonya kwede! Dok tam kit ma welle bedo tek kwede! Ibiwinyone nining ka ngat mo omini lagit meno calo mic? Ki lok ada, pwoc ma imiyo bene pire romo bedo tek kit meno. Lagit ma kiyubo ki jabu rii pi kare malac adada. I yo acel-li, wi ngat moni twero po i kom pwoc ma imiye pi kare me kwone ducu.

 GUNYUTO PWOC

7. Ma lubbe ki Jabuli 27:4, Daudi onyuto pwocce nining, dok luco jabuli mukene-ni bene gunyuto pwoc nining?

7 Pol pa lutic pa Lubanga ma i kare macon gunyuto pwoc. Ngat acel i kingi obedo Daudi. (Kwan Jabuli 27:4.) En onongo tye ki pwoc pi woro me ada, dok man onen ka maleng i ticce. En omiyo lonyo madwong adada pi gero ot pa Lubanga. Likwayi pa Acap gunyuto pwoc ki coyo jabuli, nyo wer me pak. I wer mo acel, gin gumiyo pwoc bot Lubanga dok gunyuto margi pi “tic me aura” pa Jehovah. (Jab. 75:1) Nen ka maleng ni, Daudi ki likwayi pa Acap onongo gimito nyuto bot Jehovah pwoc ma gitye kwede pi mot ducu ma gunongo ki bote. Tika iromo tam i kom yo mogo ma itwero lubu lanen pa luco jabuli magi?

Waraga ma Paulo ocoyo bot jo Roma pwonyowa gin ango madok i kom nyuto pwoc? (Nen paragraf 8-9) *

8-9. Lakwena Paulo onyuto pwoc pi omege ki lumege nining, dok man okelo adwogi ango?

8 Lakwena Paulo onongo tye ki pwoc pi omege ki lumege dok onyuto meno i kit ma en oloko kwede i komgi. Kare ducu, en onongo pwoyo Lubanga pigi i legane. En bene onyuto pwocce pigi i waraga ma ocoyo botgi. I tyeng 15 mukwongo i buk pa Jo Roma cura 16, Paulo oloko i kom Lukricitayo 27, kun lwongogi ki nyinggi. Paulo onongo pud wiye po kit ma Pricika gin ki Akwila “gudyero kwogi pi laro” kwone, ki kit ma Foibe “okonyo jo mapol,” kadi wa en bene. En opwoyo omege ki lumege me amara magi ma onongo gin lutic matek-ki.—Rom. 16:1-15.

9 Lakwena Paulo onongo ngeyo ni omege ki lumege gitye ki roc, ento i agikki me waragane bot Luroma, en oketo cwinye i kom kit mabeco ma gitye kwede. Tam kong cuko cwiny ma omege ki lumege magi gunongo i kare ma gitye ka winyo ka gikwano pwoc pa lakwena Paulo bot jo me kacokke! Macalo adwogine, wat i kingi ki Paulo ojing matek. In tika kare ki kare inyuto pwoc pi jami mabeco ma jo me kacokkewu giwaco nyo gitimo?

10. Ngo ma wapwonyo ki i kit ma Yecu omiyo kwede pwoc bot lulub kore?

10 I kwena ma Yecu ocwalo lok bot jo me kacokke mogo ma i Asia Minor, en omiyo pwoc bot lulub kore pi ticgi. Me labolle, en ocako lokke bot jo me kacokke ma i Tuatira ni: “Angeyo ticci ducu, mar ma itye kwede, niyeni ki ticci me konyo dano, ki kit ma idiyo kwede cwinyi. Angeyo ni ticci ma kombeddi itye ka tiyone kato me kare mukwongo.” (Yabo 2:19) Yecu pe oloko i kom ticgi matek keken, ento opwoyogi bene pi kitgi mabeco ma onongo tye ka tugo cwinygi me timo jami mabeco. Kadi bed ni onongo mitte ni Yecu omi tira bot jo mogo ma i Tuatira, en pud ocako lokke dok ogiko ki pwoc. (Yabo 2:25-28) Tam kong i kom twero ma Yecu tye kwede macalo lawi kacokke ducu. Pe mitte ni en opwowa pi jami ma watimo pire. Kadi bed kumeno, en pud miniwa pwoc. Man tye lanen maber adada pi luelda!

PE GUNYUTO PWOC

11. Kit ma kitito kwede i Jo Ibru 12:16, cwiny ango ma Ecau onongo tye kwede pi jami me cwiny?

11 Ki cwercwiny, jo mogo ma kicoyo lok komgi i Baibul gubedo jo ma pe miyo pwoc. Me labolle, kadi bed ni lunyodo pa Ecau onongo gimaro dok giworo Jehovah, Ecau onongo pe ki pwoc pi jami me cwiny. (Kwan Jo Ibru 12:16.) Cwiny meno ocako nen nining? Ecau  orune ka cato twerone me bedo latin kayo bot ominne matidi, Yakobo, pi atabo acel keken me dek ngor. (Acak. 25:30-34) Lacen, Ecau okoko ange pi tam ma en omoko. Ento en pe onyuto pwoc pi gin ma onongo tye kwede, pi meno, en pe obedo ki tyen lok mo keken me kok i kom ngat mo i kare ma okeng mot me bedo latin kayo.

12-13. Luicrael gunyuto nining ni pe gitye ki pwoc, dok adwogine obedo ningo?

12 Luicrael onongo gitye ki tyen lok mapol me nyuto pwoc. Kigonyogi ki i opii i nge pwod apar mapatpat ma Jehovah okelo i kom jo Ejipt. Dok Lubanga olarogi ki neko lumony me Ejipt ducu i Nam Makwar. Cwiny Luicrael obedo yom adada ma oweko guwero wer me loyo lweny kun gipako Jehovah. Ento tika gumedde ki nyuto pwoc?

13 I kare ma Luicrael gukemme ki ariya manyen, wigi owil woko i kom jami maber ducu ma Jehovah otimo pigi. Gin gunyuto ni gipe ki pwoc. (Jab. 106:7) I yo ma nining? “Lwak jo Icrael ducu gungur i kom Moses ki Aron i tim,”—ento ki lok ada, onongo gitye ka nguru i kom Jehovah. (Nia 16:2, 8) Ocwero cwiny Jehovah adada pien jone onongo gipe ki cwiny me pwoc. Lacen, en otito ni yalwak meno ducu gibito i dye tim mapat ki Yocwa gin ki Kaleb. (Wel 14:22-24; 26:65) Kong dong wanenu kit ma watwero gwokke kwede ki lubu lanen maraco magi kun walubo lanen mabeco.

CAK NYUTO PWOC

14-15. (a) Jo munyomme gitwero nyuto pwoc i kingi nining? (b) Lunyodo gitwero pwonyo lutinogi nining me nyuto pwoc?

14 I paco. Jo ma i paco ducu ginongo adwogi maber ka ginyuto pwoc i kingi. Ka jo munyomme ginyuto pwoc i kingi, ci wat i kingi bene doko cok. Doko yot bene me timo kica i kingi ka ngat acel obalo. Laco ma pwoyo dakone pe neno nyo winyo gin maber ma dakone waco nyo timo keken ento bene “pake matek.” (Car. 31:10, 28) Ki dako maryek bene weko cware ngeyo gin ma etye ki pwoc iye.

15 Lunyodo, wutwero pwonyo lutinowu nining wek gubed jo ma nyuto pwoc? Wi myero opo ni lutinoni gibilubo gin ma iwaco ki ma itimo. Pi meno, nyut lanen maber kun ipwoyo lutinoni ka gutimo gin mo maber. Medo i kom meno,  pwony lutinoni me pwoyo ngat mo ma otimigi gin mo. Kony lutinoni wek guniang ni pwoc myero oa ki i cwinygi dok lok ma giwaco me miyo pwoc konyo adada. Me labolle, lamego mo owaco ni: “I kare ma mamana tye ki mwaka 32, en odong kene ki lutino adek. Dong ma an bene ao mwaka 32, abedo ka tamo kit ma kwo obedo tek kwede bote i kare meno. Pi meno, awacce pwoc ma atye kwede pi cwiny me jalle ma en onyuto me gwoko an ki omegina. Cokcok-ki, en owacca ni pwoc ma amiye-ni pud pire tek bote wa tin, dok ni etamo iye kare ducu ci miyo cwinye bedo yom.”

Pwony lutinoni me nyuto pwoc (Nen paragraf 15) *

16. Mi labol ma nyuto kit ma miyo pwoc twero cuko cwiny jo mukene.

16 I kacokke. Ka wanyuto pwoc bot omege ki lumegiwa, ci wacuko cwinygi adada. Me labolle, two mo matek ogoyo Jorge, laelda ma tye ki mwaka 28. Onongo pe twero cito i cokke pi dwe acel. Dok kadi wa ma ocako cito i cokke, onongo pud pe twero miyo pwony. Jorge owaco ni: “Onongo awinyo calo konya pe pien ni pe atwero timo tic me kacokke. Ento i nge cokke mo acel, omego mo owacca ni: ‘Amito pwoyi pi lanen maber ma inyuto pi jo me ganga. Pe ingeyo kit ma wamaro kwede pwony ma onongo imiyo i mwaki mogo mukato angec. Pwonyi okonyowa me dongo i yo me cwiny.’ Man ogudo cwinya adada, ma okelo wa pig wanga. Lok ma en owacca-ni aye gin ma onongo amito winyone kikome.”

17. Kit ma kitito kwede i Jo Kolocai 3:15, watwero nyuto pwocwa bot Jehovah pi yot cinge nining?

17 Bot Lubangawa ma cinge yot. Jehovah ominiwa cam me cwiny madwong adada. Me labolle, wanongo tira ma konyo ki i cokkewa, magajin, ki dong ki i kabedowa me Intanet. Tika dong i nino mo iwinyo pwony, ikwano bukkewa, nyo ineno purogramwa ma katti dwe ki dwe i Broadcast ci iwacci, ‘Man aye gin ma onongo amito kikome’? Watwero nyuto pwocwa bot Jehovah nining? (Kwan Jo Kolocai 3:15.) Yo acel aye me pwoye i legawa kare ducu pi mic mabeco magi.—Yak. 1:17.

Miyo kony me gwoko lengo me Otwa me Ker obedo yo maber adada me nyuto pwocwa (Nen paragraf 18)

18. I yo mene ma watwero nyuto pwocwa pi Otwa me Ker?

18 Watwero bene nyuto pwocwa bot Jehovah ka wagwoko ot me worowa bedo maleng. Wanywako i gwoko lengo  me Ot me Kerwa, dok jo ma gitiyo i kom lakub dwan, gin me wer ki vidio omyero gugwoki wek pe oballe. Ka wagwoko Otwa me Ker maber, ci rii pi kare malac dok roco ka muballe nongo pe tek tutwal. Man weko pe wabalo cente ma dok kitwero tic kwede me yubo nyo roco Ot me Ker mukene i but lobo mapatpat.

19. Ngo ma ipwonyo ki i gin mutimme i kom laneno mo acel gin ki dakone?

19 Bot jo ma gitiyo matek piwa. Ka wamiyo pwoc, lokwa twero loko kit ma ngat moni winyo kwede i kom ariya ma nongo en tye ka kato ki iye. Nen kong gin mutimme i kom laneno me adwol mo gin ki dakone. I nge tito kwena pi cawa malac ka ma piny omake iye pee, gudwogo ka ma gitye ka buto iye ma guol adada. Piny onongo ngic adada muweko dakone obuto ki jaket mapek i kome. I odiko, en owaco ki cware ni pe dong etwero medde ki tic me limo adwol. Ento i nge cawa manok i odiko meno, gunongo waraga ma oa ki i jang gang kal. Waraga meno onongo kicoyo bot laminwa-ni. I waraga meno, kipwoye adada pi ticce me pwony ki pi diyo cwinye. Dok kiwacce ni giniang kit ma tek kwede me wot i kabedo mapatpat cabit ki cabit. Cware owaco ni: “Waraga meno ogudo cwinye adada ma oweko pe dong onwoyo wacone ni myero wawek tic me limo adwol woko. Ki lok ada, en aye dok ocuko cwinya tyen mapol me medde ka atamo me juko tic meno woko.” Luot meno gumedde ki tic me limo adwol pi mwaki makato 40 kulu.

20. Gin ango ma myero watute me timone nino ducu, dok pingo?

20 Nino ki nino, myero watute me nyuto pwoc i lokwa ki ticwa. Lok nyo tic ma a ki i cwinywa twero bedo gin ma ngat moni mito kikome me medde ki kwo i lobo man ma dano pe ginyuto pwoc-ci. Dok ka wanyuto pwoc ci wadongo wat macok ma bedo matwal i kinwa. Ma dong pire tek loyo, nongo watye ka lubo lanen pa Jehovah, Wonwa ma cinge yot, dok lami pwoc.

WER 20 Imiyo Wodi me Amara

^ par. 5 Gin ango ma wapwonyo ki bot Jehovah, Yecu, ki dong ladobo ma Lacamaria-ni madok i kom miyo pwoc? I pwony man wabinyamo labol pa jo magi ki mukene mapol. Wabinyamo bene pingo pire tek me miyo pwoc, ki yo mogo ma waromo timone kwede.

^ par. 1 LOK MA KITITO TERE: Ka inyuto pwoc bot ngat mo nyo gin mo, nongo itye ki ngec ni ngat meno nyo gin meno pire tek boti. Nyig lok man nyuto kit ma wawinyo kwede ki i cwinywa.

^ par. 55 LOK I KOM CAL: Kitye ka kwano waraga ma Paulo ocoyo bot kacokke me Roma. Pricika, Akwila, Foibe ki dong jo mukene gitye ki yomcwiny me winyo ka kikwano nyinggi.

^ par. 57 LOK I KOM CAL: Mego mo tye ka konyo nyare me nyuto pwoc pi lanen maber ma lamego mo muteggi nyuto.