Cit atir i jami ma tye

Cit atir ka ma nyuto lok ma tye iye

Medde ki Tic pi Jehovah ki Yomcwiny

Medde ki Tic pi Jehovah ki Yomcwiny

TAM kong i kom nino me yomcwiny madit loyo i kwoni. Meno tika obedo nino me nyommi nyo me nywalo latin kayoni? Nyo gwok obedo nino ma inyuto dyereni bot Jehovah ki nongo iye batija? Iromo bene neno nino meno ni obedo nino ma pire tek dok me yomcwiny loyo i kwoni. Luye luwoti pud dong gibibedo ki yomcwiny madit ya, me neno ka i nyuto mari pi Lubanga ki cwinyi, kwoni, tammi ki dong tekoni ducu!—Mar. 12:30.

Twero bedo ni i nongo yomcwiny madit inge kare ma inongo iye batija. Kadi bed kit meno, lutit kwena me Ker mogo gurwenyo yomcwiny ma onongo gitye kwede woko. Pingo meno otimme? Tyen lok ango ma watye kwede me medde ki tic pi Jehovah ki yomcwiny?

GIN MUMIYO JO MOGO GURWENYO YOMCWINYGI

Kwena me Ker-ri—kacel ki cikkene ni Jehovah cokcok-ki bikelo agikki pa lobo man ma marac-ci ki dok kelo lobo manyen—labongo akalakala mo weko wabedo ki yomcwiny. Medo i kom meno, Jepania 1:14 ocuko cwinywa ni: “Nino madit pa Rwot [Jehovah] tye cok, tye cok dok tye ka bino oyotoyot.” Kadi bed kumeno, bedo ka kurone pi kare malac makato kit ma onongo watamo kwede romo kwanyo yomcwiny ma onongo watye kwede dok man twero weko ticwa pi Lubanga kwe woko.—Car. 13:12.

Bedo kacel ki jo pa Lubanga miniwa kare me medde ki tic pi Jehovah ki yomcwiny. Ki lok ada, oromo bedo ni kit mabeco pa lutic pa Jehovah aye oywayowa i woro me ada dok okonyowa me cako tic pi Lubanga ki yomcwiny. (1 Pet. 2:12) Ento ngo ma romo timme ka gimiyo tira bot Lakricitayo mo pien ni pe olubo cik pa Lubanga? Ka gin ma kit meno otimme, cwiny jo mogo ma gubino i ada pi kit mabeco pa jo pa Jehovah twero tur adada dok girwenyo yomcwinygi woko.

Lok goba me cato wil ma tye i lobo marac pa Catan-ni bene romo kwanyo yomcwinywa woko. Catan tiyo ki lobone wek waye ni wamito jami mogo ma nongo ki lok ada pe wamito. Ento, bedo ber ka wiwa opo i kom lok pa Yecu ni: “Pe tye dano mo ma twero tic ki rwodi aryo; pien bikwero ngat acel ci maro mukene-ni, nyo bimoko i kom ngat acel, ci cayo ngat mukene-ni. Pe wutwero tic pi Lubanga ka dok wutiyo pi lim bene” (Mat. 6:24) Pe watwero tic pi Jehovah ki yomcwiny kun nongo ki tungcel watemme me nongo jami ducu ma watwero ki i loboni.  

 ‘WANYATTE KI YOMCWINY PI LUBANGA LALARWA’

Tic pi Jehovah pe nuro jo ma gimare. (1 Jon 5:3) Wi opo ni Yecu owacci: “Wubin bota, jo ducu muol ki ma yec onurowu, ci abimiyo wuywe. Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. Pien yatta yot, ki yecca bene pe pek.” (Mat. 11:28-30) Tingo yat pa Yecu keliwa yweyo ki yomcwiny. Dok watye ki tyen lok matir me bedo ki yomcwiny i tic pi Jehovah. Kong wanenu tyen lok adek ma pigi tego mumiyo watwero bedo ki ‘yomcwiny pi Lubanga lalarwa’—Kab. 3:18.

Watiyo pi ngat ma Ominiwa Kwo, Lubanga ma layomcwiny. (Tic 17:28; 1 Tem. 1:11) Waniang ni meno kwowa ducu a ki bot Lacwecwa. Pi meno, wamedde ki tic pire ki yomcwiny, kadi bed ni dong wanongo batija mwaki malac angec.

Po i kom gen me Ker-ri kacel ki tic ki mit kom okonyo Héctor me bedo ki yomcwiny

Tam i kom Héctor, ma otiyo macalo laneno ma woto awota pi mwaki 40 kulu. ‘Kadi dong oti’ woko ento en pud tye ka medde ki tic pi Jehovah. (Jab. 92:12-14) Two pa dakone ogenge me medde ki tic pi Lubanga kit ma onongo en tiyo kwede, ento man pe balo yomcwiny ma en tye kwede. En owaco ni: “Kadi bed ni lit adada me neno ka two pa dakona tye ka medde ameda dok bene pe obedo gin mayot me gwokke, ento pe aye ni man obal yomcwiny ma atye kwede me tic pi Jehovah Lubanga me ada. Ngeyo ni meno kwona a ki bot Jehovah ma ocweya ki tyen lok, weko abedo ki mar madit i kome kun atiyo pire ki cwinya ducu. Pud atute me tiyo tic me tito kwena ki mit kom, dok aketo genna mukwongo i kom Ker-ri wek yomcwiny ma atye kwede pe orweny woko.”

Jehovah omiyo botwa ginkok ma weko twere ki wan me bedo ki yomcwiny i kwo. Ki lok ada, “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Ada, kitwero timo kica pi balwa dok bene watwero nongo kwo ma pe tum ka waketo niyewa i kom Lubanga pi micce me mar pi ginkok pa Yecu. Meno pe obedo tyen lok mamwonya adada ma weko watwero bedo ki pwoc pire? Tika pwoc ma watye kwede pi ginkok pe myero ocuk cwinya me tic pi Jehovah ki yomcwiny?

Jesús odwoko rwom me kwone piny dok man okonye me tic pi Jehovah ki yomcwiny pi mwaki mapol

Omego mo ma nyinge Jesús ma bedo i lobo Mexico owaco ni: “Abedo calo opii me dog ticca, onongo atiyo pi cawa malac nino ducu kadi bed ni meno i cawa mukene nongo bene pe mitte. Atimo meno wek abed ki cente mabup. Lacen apwonyo lok i kom Jehovah ki kit ma omiyo kwede ki  Wode me amara pi dano. Abedo ki miti madit me tic pire. Pi meno, adyero kwona bot Jehovah, dok i nge tic pi kampuni pi mwaki 28 kulu amoko tamma me weko tic meno wek acak tito kwena pi kare malac. Meno aye obedo mwaka me acakki me bedo ki yomcwiny i tic pi Jehovah.”

Nyig ma wanyako keliwa yomcwiny madit ento pe cwercwiny. Wi tika po i kom kit ma kwoni onongo tye kwede ma peya ingeyo Jehovah? Lakwena Paulo opoyo wi Lukricitayo me Roma ni gin onongo gubedo “opii me bal” ento dong gudoko “opii me kit ma atir.” Onongo dong gitye ka doko “jo maleng,” dok man onongo biminigi kwo ma pe tum. (Jo Rom. 6:17-22) Wan bene walubo yo me kwo maleng, dok labongo cwercwiny ma bino pi timo tim macilo nyo tim gero. Man pud dong keliwa yomcwiny ya!

“Mwaki me yomcwiny madit loyo i kwona aye obedo kare ma abedo ka tic pi Jehovah.”—Jaime

Nen kong ngo ma otimme i kom Jaime, ma onongo pe ye ni Lubanga tye ento ye ni kwo ocakke pire kene dok onongo ladong bun nyo bokcing. En ocako wot i cokke pa Lukricitayo dok mar ma en oneno ogudo cwinye adada. Me weko kit yo me kwone macon-ni, en olego bot Jehovah wek okonye me bedo ki niye i Kome. Jaime owaco ni: “Mot mot, aniang ni Wonwa ma lamar dok Lubanga ma lakica tye ada, kwo ma lubbe rwom me kwo matir pa Jehovah ogwoka adada. Ka onongo pe aloko kwona, kono onongo dong kineka woko, kit ma otimme i kom luwota mogo ma onongo bene gin ludong bun-ni. Mwaki me yomcwiny madit loyo i kwona aye obedo kare ma abedo ka tic pi Jehovah.”

PE IIL CINGI WOKO!

Itamo ni myero wawiny nining ka nongo wakuro agikki me lobo man marac-ci? Wi opo ni, watye ka “coyo kodine i poto me Cwiny Maleng”, dok ‘wabikayo mere kwo ma pe tum pi cwiny maleng’. Pi meno, “pe myero waol ka tiyo gin maber, pien ka kare oromo, ka cwinywa pe odoko nyap, ci wabikayo kac.” (Gal. 6:8, 9) Ki kony pa Jehovah, myero wadiyo cwinywa, watiyu matek me dongo kit mabeco ma mitte wek wabwot i kare me “can madit atika,” ki dok wamedde ki tic pi Jehovah ki yomcwiny kadi bed watye i kwo matek.—Yabo 7:9, 13, 14; Yak. 1:2-4.

Watwero bedo labongo akalakala ni wabinongo adwogi maber ka wamedde ki diyo cwinywa, pien Lubanga ngeyo mar ma watye kwede pire kacel ki tic matek ma watiyo pi nyinge. Ka wamedde ki tic pi Jehovah ki yomcwiny, ci wabibedo calo Daudi, ma owaco ni: “Kare ducu angeyo ni Rwot tye kweda; pe gibidira woko cen, pien en tye yo tung cinga ma lacuc. Pi meno omiyo abedo ki yomcwiny madwong, nino ducu abedo maber ki kuc.”—Jab. 16:8, 9.