Cit atir i jami ma tye

Cit atir ka ma nyuto lok ma tye iye

Wuket Parwu Ducu i Kom Jehovah

Wuket Parwu Ducu i Kom Jehovah

“Wuket parwu ducu i kome [Jehovah], pien en tamo piwu.”​—1 PET. 5:7.

WER: 60, 23

1, 2. (a) Pingo pe myero wabed ki ur ka watye ki par? (Nen cal ma i pot karatac man.) (b) Gin ango ma wabinyamo i pwony man?

WAKWO i kare ma kwo tek adada. Catan Larac-ci cwinye kec adada dok “tye ka wirre macalo labwor ma kok, kun yenyo dano me amwoda.” (1 Pet. 5:8; Yabo 12:17) Pi meno, pe tye me ur ka wa wan macalo lutic pa Lubanga bene wabedo ki par i kare mogo. Lutic pa Jehovah i kare macon, calo Kabaka Daudi bene i kare mogo gubedo ki ‘arem i cwinygi.’ (Jab. 13:2) Wii opo ni lakwena Paulo bene obedo ki ‘par pi jo muye Kricito i kabedo mapatpat ducu.’ (2 Kor. 11:28) Ento ngo ma watwero timone ka par obwoyowa woko?

2 Wonwa ma lamar me polo okonyo luticce i kare macon, dok i kare-ni en bene twero konyowa me nongo kwe cwiny mo olo to ki i peko nyo par ma watye kwede. Baibul cuko cwinywa ni: “Wuket parwu ducu i kome, pien en tamo piwu.” (1 Pet. 5:7) Ento itwero timo meno nining? Kong dong wanen yo angwen i kit ma itwero timone kwede​—lega ki cwinyi ducu, kwano Lok pa Lubanga ki lwodo lok i kom gin ma ikwano, ki dong tito kit ma iwinyo kwede bot ngat mo ma igeno. Ka watye ka nyamo yo angwen magi, ngi kabedo mene i kwoni ma imito timo iye alokaloka.

 “WUKET PARWU DUCU I KOM” JEHOVAH

3. Itwero ‘kelo pekoni ducu bot Jehovah’ i lega nining?

3 Yo me acel aye me lega bot Jehovah ki cwinywa ducu. Ka itye ka kemme ki gin mo keken ma weko ibedo ki par, yab cwinyi bot Woru me amara me polo. Daudi olego Jehovah ni: “Cik iti iwiny legana, ai Lubanga.” Dok i jabuli acel-lu, en owaco ni: “Kel, pekoni ducu bot Rwot [Jehovah] ci en bikonyi.” (Jab. 55:1, 22) Ka dong itimo jami ducu ma itwero me cobo pekoni, lega ki cwinyi ducu bikonyi loyo bedo ki par. Ento lega twero konyi nining wek pe ibed ki tam kacel ki par mapol?​—Jab. 94:18, 19.

4. Pingo lega pire tek adada ka watye ki par?

4 Kwan Jo Pilipi 4:6, 7. Jehovah twero winyowa ka wabako dogwa bote teretere dok ki cwinywa ducu. Man timme nining? En miniwa cwiny ma opye mot dok weko pe wabedo ki par. Jo mapol gitwero moko meno ma lubbe ki jami mutimme i komgi. Maka bedo ki par kacel ki lworo mapol, Lubanga ominigi cwiny ma opye mot ki dok kuc i yo ma dano pe twero niang iye. Gin ma kumeno bene twero timme i komi. Pi meno, “kuc pa Lubanga” twero konyi me loyo kit peko mo keken ma nongo itye kwede. Dok itwero geno cikke pa Jehovah ni: “Cwinyi pe opoti [pe ibed ki par], pien an Lubangani; abimiyi tek, dok abikonyi.”​—Ic. 41:10.

LOK PA LUBANGA WEKO WABEDO KI KUC I CWINYWA

5. Lok pa Lubanga twero kelo kuc i cwinywa nining?

5 Yo me aryo me bedo ki kuc i cwinywa aye me kwano Baibul ki lwodo lok i kom gin ma wakwano. Pingo man pire tek? Baibul tye ki tira ma twero konyowa me gwokke ki i gin ma keliwa par, me jwiko par, ki dong me lweny ki par. Lok pa Lubanga tye me kony dok kweyo cwiny pien tye ki lok me ryeko ma a ki bot Lacwecwa kikomwa. Ka ilwodo lok i kom tam pa Lubanga​—dyeceng ki dyewor​—kun bene itamo i kom kit ma itwero keto kwede tira me Baibul i tic, ci ijing matek adada. Jehovah onyuto wat ma tye i kin kwano Lokke ki ‘bedo oteka ma cwinye nwang,’ ma ‘kome pe myel, ki dok ma cwinye pe ryangnge.’​—Yoc. 1:7-9.

6. Adwogi maber ango ma watwero nongo ki i lok pa Yecu?

6 Wanongo lok me kwe cwiny ma Yecu owaco i Lok pa Lubanga. Lokke kacel ki pwonye okelo kwe cwiny bot jo ma winye. Jo mapol gubino bote pien en onongo kweyo cwiny jo ma cwinygi cwer, jingo jo ma goro ki dok cuko cwiny jo ma cwinygi otur. (Kwan Matayo 11:28-30.) En onongo paro pi miti pa jo mukene i yo me cwiny ki me kom ki bene kit ma giwinyo kwede. (Mar. 6:30-32) Yecu ocikke me miyo kony wa i kare-ni bene. Yecu bene pud twero konyi kit ma okonyo kwede lukwena ma en obedo ka wot kacel kwedgi. Pe mitte ni ibed kacel ki Yecu wek inong kony ki bote. Macalo Kabaka me polo, Yecu pud paro piwa. Pi meno, ka itye ki par, en twero ‘konyi’ dok “i kare ma mitte” kikome. Ki lok ada, Yecu twero konyi me lweny ki par kun miyo ibedo ki gen dok ma cwinyi tek.​—Ibru 2:17, 18; 4:16.

NYIG MANYAK PI CWINY MALENG

7. Gin ango ma Lubanga bitimo ka walege pi cwiny maleng?

7 Yecu ocikke ni Wonwa me polo bimiyo  cwiny maleng bot jo ma lege. (Luka 11:10-13) Man miniwa yo me adek me jwiko par​—nyig manyak pi cwiny maleng. Nyig magi manyak pi teko pa Lubanga-ni nyuto kit ma Lubanga won twer ducu tye kwede. (Kwan Jo Galatia 5:22, 23; Kol. 3:10) Ka itye ka dongo nyig magi manyak pi cwiny maleng-ngi, ci watti ki jo mukene bene biyubbe bedo maber. Pi meno, ibineno ni jami mapol ma kelo par bibedo pe. Tam kong manok i kom kit ma nyig manyak pi cwiny maleng bikonyi kwede.

8-12. Nyig manyak pi cwiny maleng twero konyi me lweny ki par nyo me jukone nining?

8 “Mar, yomcwiny, kuc.” Ka itutte me tero jo mukene ki woro, ci bibedo yot boti me lweny ki par. Man twere nining? Ka inyuto mar me omego kacel ki woro, ci ibigwokke ki i jami ma twero keli par.​—Rom 12:10.

9 “Diyo cwiny, kica, ber.” Ibikelo kuc ka ilubo tira man ni: “Wubed jo ma lukica ki cwiny maber; dano acel acel omyero otim ber bot lawote. Wutim kica i kinwu kekenwu ki luwotwu i kom balwu.” (Ep. 4:32) Ka itimo meno, ibigwokke ki i gin ma twero kelo par. Dok bene itwero lweny ki peko mo keken ma bino pi roc ma watye kwede.

10 “Gen.” I kare-ni, par pol kare bino pi bedo ki tam pi cente ki jami me kom. (Car. 18:11) Bedo ki gen ni Jehovah paro piwa twero konyowa me juko par. Man twere nining? Itwero juko par mapol ka ilubo tira ma lakwena Paulo ocoyo ni “jami ma wutye kwede myero oromwu.” Paulo omedde ni: “Pien Lubanga yam oloko ni, ‘Pe abiboli, pe abibwoti ata.’ En meno gin mumiyo cwinywa tek, kun wawaco ni, ‘Rwot [Jehovah] en lakony mera, pe abibedo ki lworo; ngo kono ma dano twero timo i koma?’”​—Ibru 13:5, 6.

11 “Mwolo, gwokke ken.” Tam kong i kom gin maber ma twero timme ka inyako nyig man. Pi meno, ibigwoko ki i timo jami ma twero keli par, dok bene ibinongo adwogi maber ka iweko “keccwiny ducu, ki wang-ic ki kiniga, da i wi dano mukene, yet.”​—Ep. 4:31.

12 Mitte ni ibed ki cwiny me mwolo wek imine “i te twero pa Lubanga” dok ‘iket parri ducu i kome.’ (1 Pet. 5:6, 7) Ento ka idongo cwiny me mwolo, ci ibinongo cwak ki kony pa Lubanga. (Mik. 6:8) Ka ingeyo kero ki goroni, ci pe ibibedo ki par ma okato kare woko, pien nongo ibibedo ka jenge i kom Lubanga.

“PE WUBED KI PAR MAPOL”

13. Ngo ma onongo Yecu tye ka wacone i kare ma owaco ni: “Pe wubed ki par mapol”?

13 I Matayo 6:34 (kwan), wanongo tam ma Yecu omiyo ni: “Pe wubed ki par mapol.” Twero nen calo tek adada me keto tam meno i tic. Ngo ma onongo Yecu tye ka wacone i kare ma owaco ni: “Pe wubed ki par mapol”? Ngene kene ni en onongo pe tye ka wacone ni lutic pa Lubanga gibibedo labongo par mo i kwogi i kare mogo; dong waneno gin ma Daudi gin ki Paulo guwaco madok i kom lok man. Ento Yecu onongo tye ka konyo lupwonnyene wek guniang ni bedo ki par ma pe opore nyo mukato kare woko pe twero cobo peko mo. Nino acel acel tye ki pekone, pi meno Lakricitayo myero pe omed par mukene pi gin mukato nyo ma tye anyim i kom par me nino meno. Itwero jwiko par nining ka ilubo tam pa Yecu-ni?

14. Itwero lweny ki par pi gin mutimme i kare mukato angec nining?

 14 Par mogo bino pi jami ma ngat moni otimo con nyo pi balle. Romo bedo ni cwinye tye ka pidde pi gin ma otimo i kare mukato angec, nyo bene mwaki mogo mapol mukato angec. I kare mogo, Kabaka Daudi owinyo calo ‘Balle dong oketo kome woko.’ En owaco ni: “Acur pien atye ki remcwiny madwong twatwal.” (Jab. 38:3, 4, 8, 18) I kare meno, gin ango ma onongo myero Daudi otim? Gin ango me en otimo? En oketo genne i kom kica Jehovah ki dok ni en weko bal pa dano. En owaco ki tek cwiny ni: “Dano ma dong giweko balle tye ki gum [yomcwiny].”​—Kwan Jabuli 32:1-3, 5.

15. (a) Pingo pe myero ibed ki par i kom gin ma twero timme i kwoni i kare-ni? (b) Gin ango ma itwero timone me jwiko par? (Nen bok ma wiye tye ni “ Yo ma Twero Konyi me Jwiko Par.”)

15 I kare mogo, itwero bedo ki par pi gin ma twero timme i kwoni. Me labolle, i kare ma Daudi coyo Jabuli 55, en onongo tye ki lworo ni kibineko woko. (Jab. 55:2-5) Kadi bed kumeno, en pe oye ni par otur gen ma etye kwede i kom Jehovah. Daudi olego matek pi pekone, ento en bene oniang kit ma pire tek kwede me timo gin mo keken ma etwero me lweny ki pekone. (2 Cam. 15:30-34) Nong pwony ki bot Daudi. Ma ka ye ni par onuri kwicikwici, temme ki tekki me lweny kwede ci dong iwek jami ducu i cing Jehovah.

16. Te lok me nying Lubanga twero jingo niyeni nining?

16 Par ma tere pe twero bino ka Lukricitayo bedo ka tam i kom peko ma twero timme i anyim. Kadi bed kumeno, pe mitte ni iwek par onuri kwicikwici pi gin mo ma pe ingeyo. Pingo? Pien pol kare pe twero timme marac kit ma onongo watamo ni twero timme kwede-ni. Medo i kom meno, pe tye gin mo ma twero loyo Lubanga ma ibolo parri bote-ni. Nyinge bene gonye ni “En Miyo Timme.” (Nia 3:14) Te lok me nying man jingo cwinywa ni Lubanga tye ki kero me neno ni yubbe pi luticce ocobbe kakare. Itwero bedo labongo akalakala mo ni Lubanga bimiyo mot bot luticce ma lugen ki dok me konyogi me lweny ki par pi gin mutimme angec, gin ma tye ka timme i kare-ni, ki dong gin ma twero timme i anyim.

TIT LOK DUCU MA I CWINYI

17, 18. Tito lok ma i cwinyi twero konyi me lweny ki par nining?

17 Yo me angwen ma twero konyi me lweny ki par aye me tito lokke bot jo mukene, tit kit ma iwinyo kwede bot ngat ma igeno. Luoti, laremi macok,  nyo laelda me kacokke twero konyi me bedo ki neno matir i kom par ma itye kwede. “Par mapol gengo dano me bedo ki yomcwiny, lok maber me kica aye romo kweyo cwinye.” (Car. 12:25) Tito lok ma i cwinyi ducu ka maleng twero konyi me niang ki dong me lweny ki par. Baibul wacciwa ni: “Yub mo ma giyubo labongo nongo tam muromo pe twero cobbe maber, dong yub ma giyubo ma kong gipenyo tam bot jo mapol cobbe kakare.”​—Car. 15:22.

18 Jehovah bene konyo Lukricitayo me lweny ki par kun tiyo ki cokke ma bedo cabit ducu. Ki i cokke, iribbe ki luye luwoti ma gitamo piri dok ma gicuko cwinygi i kingi kekengi. (Ibru 10:24, 25) Dok ka ‘wakonnye lawangacel’ ci man mini teko i yo me cwiny dok weko bedo yot boti me lweny ki par.​—Rom. 1:12.

WATTI KI LUBANGA​—OBEDO TEKONI MADIT LOYO

19. Pingo itwero bedo ki gen ni bedo ki wat maber ki Lubanga jingo cwinyi?

19 Nen kong kit ma laelda mo i Canada oniang kwede kit ma pire tek kwede me tito par ducu ma i cwinye bot Jehovah. En onongo tiyo macalo lapwony ki lami tam, dok tic man onongo weko en ol adada, ki bene onongo tye ki peko me yot kom ma weko en bedo ki par. En olwenyo ki peko man nining? En owaco ni: “Ma dong pire tek loyo, anongo ni tute matek me bedo ki wat maber ki Jehovah omina kero me lweny ki peko kacel ki par. Kony pa lurem ma gigenne kacel ki omegiwa me kacokke pire tek adada i kare me peko. Atito kit ma awinyo kwede ka maleng bot dakona. Luelda luwota kacel ki laneno me adwol bene gukonya adada me bedo ki neno matir. Anongo bene kony me yotkom, aloko kit ma atiyo kwede ki cawana, ki dok akwanyo cawa me yweyo ki tuku me ryeyo ler. Motmot, acako winyo alokaloka. Ka pe tye gin mo ma atwero timone i kom peko moni, onongo aweko jami ducu i cing Jehovah.”

20. (a) Watwero miyo pekowa ducu bot Lubanga nining? (b) Gin ango ma wabinyamo i pwony ma lubo man

20 Me titone wiye wiye, waniang pingo pire tek me tito par ma i cwinywa ducu bot Lubanga i lega, kwano ki dok lwodo Lokke. Waniang bene kit ma pire tek kwede me dongo nyig manyak pi cwiny maleng, tito kit ma wawinyo kwede bot ngat ma wageno, ki dong nongo teko ki i cokke kacel ki bot Lukricitayo luwotwa. I pwony ma lubu man, wabimedde ki nyamo kit ma Jehovah gwokowa kwede kun miniwa gen me nongo mot.​—Ibru 11:6.