Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 16

Cung Matek pi Lok Ada Madok i kom To

Cung Matek pi Lok Ada Madok i kom To

“Wangeyo poko cwiny me ada ki cwiny me goba.”​—1 JON 4:6.

WER 73 Miwa Tekcwiny

GIN MA WABINYAMO *

Me ka nywako i kwer ma pe yomo cwiny Lubanga, tem kweyo cwiny wadini ka wurwenyo dano me amara i to (Nen paragraf 1-2) *

1-2. (a) Catan dong obwolo dano i yo mapatpat ango? (b) Gin ango ma wabinyamo i pwony man?

CATAN “won goba” obwolo dano nicakke wa i kare pa Adam ki Kawa. (Jon 8:44) Gobane mogo tye iye pwony goba i kom to kacel ki kwo i nge to. Pol pa tim ki kwer me tekwaro jenge i kom pwony goba pa Catan i kom to. Macalo adwogine, omegiwa ki lumegiwa mapol myero ‘gulweny matek pi niye’ ka ngat mo oto ki ganggi nyo i kabedogi.​—Juda 3.

2 Ka itye ka nongo dic me nywako i kwer magi, gin ango ma twero konyi me cung matek pi lok ada ma Baibul pwonyo i kom to? (Ep. 6:11) Itwero cuko ki jingo cwiny Lakricitayo lawoti ma tye ka nongo dic me nywako i kwer ma pe yomo cwiny Lubanga nining? Pwony man binyamo tira ma Jehovah ominiwa. Mukwongo, kong wanenu gin ma Baibul waco i kom to.

LOK ADA I KOM KIT MA JO MUTO GITYE KWEDE

3. Ngo mutimme macalo adwogi me goba me acel?

3 Pe obedo miti pa Lubanga ni dano myero guto. Ento wek gumedde ki bedo kwo pi naka, Adam ki Kawa onongo myero guwiny Jehovah, ma ominigi cik ma lubone yot ni: “Yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acak. 2:16, 17) Ci Catan otugo peko. En otiyo ki twol me waco bot Kawa ni: “Pe wubito.” Ki cwercwiny madit, Kawa oye goba-ni ci ocamo nyig yat meno. Lacen, cware bene ocamo. (Acak. 3:4, 6) I yo ma kit man, bal ki to odonyo i lobo.​—Rom. 5:12.

4-5. I yo ma nining ma Catan tye ka medde ki bwolo dano?

4 Adam ki Kawa guto, kit ma Lubanga onongo owaco ni bitimme kwede. Ento Catan pe ojuko waco lok goba i kom  to. Lacen en ocako waco goba mukene. Goba acel i kin goba mapol magi aye pwony ni ka kom dano oto, tye gin mo ma pud dok medde ki kwo calo cwiny. Goba meno ma dong iye opokke mapatpat-ti obwolo dano mapol ata nio wa i karewa-ni.​—1 Tem. 4:1.

5 Pingo goba magi bwolo jo mapol tutwal? Catan ngeyo kit ma dano winyo kwede i kom to, dok en tiyo ki ngec man me tuko ki wigi. Kit macalo kicweyowa me kwo pi naka, wan ducu pe wamito to. (Latit. 3:11) Waneno to calo lamonewa.​—1 Kor. 15:26.

6-7. (a) Catan tika dong ogengo dano ducu ki ngeyo lok ada i kom to? Tit kong. (b) I yo ango ma lok ada me Baibul gonyowa ki i lworo jo muto?

6 Kadi bed ni Catan dong oyelle matek, ento en pe otwero gengo dano ki ngeyo lok ada i kom to. Ki lok ada, tye jo mapol ma dong gingeyo dok gitito gin ma Baibul pwonyo madok i kom kit ma jo muto gitye kwede ki gen ma tye pi jo muto. (Latit. 9:5, 10; Tic 24:15) Lok ada magi kweyo cwinywa, dok konyowa pe me bedo ki lworo nyo akalakala i kom gin ma timme ka dano oto. Me labolle, wan pe walworo jo muto, dok pe walworo ni gin mo marac bitimme i kom jowa me amara ma guto. Wangeyo ni pe gitye kwo dok pe gitwero yelo ngat mo. Bedo calo gunino nino matut. (Jon 11:11-14) Wangeyo bene ni jo muto pe gingeyo cawa. Dong i kare me cer, kadi wa jo ma guto pi mwaki miya mapol gubiwinyo calo gimiyo mere wanggi manok ci guyabo cutcut.

7 Labongo akalakala mo, iye ni lok ada i kom jo muto niang iye yot. Pud dong pat adada ki goba pa Catan ma nyweno wi dano! Medo i kom rwenyo dano, goba magi bene balo nying Lacwecwa. Me konyowa wek waniang peko ma goba pa Catan okelo, wabinyamo lapeny magi: I yo ma nining ma goba pa Catan obalo nying Jehovah? I yo ma nining ma goba magi cayo niye i kom ginkok pa Kricito? Goba magi omedo arem ki deno can bot dano nining?

GOBA PA CATAN OKELO ADWOGI MARACO MAPOL

8. Kit ma kinyuto kwede i Jeremia 19:5, i yo ango ma goba pa Catan i kom jo muto balo kwede nying Jehovah?

8 Goba pa Catan i kom jo muto balo nying Jehovah. Goba magi tye iye pwony  goba ni jo muto kiwangogi i mac me kapiny. Pwony ma kit man balo nying Lubanga! I yo ma nining? Pwony man weko dano tamo ni Lubanga ma lamar tye ki kit maraco calo Catan. (1 Jon 4:8) Meno miyo iwinyo nining? Ma pire tek loyo, pwony meno weko Jehovah winyo ningo? Nge ni en dag tim me uno dano i yo mo keken.​—Kwan Jeremia 19:5.

9. I yo ango ma goba pa Catan gudo kwede niye pa dano i kom ginkok pa Yecu ma kiloko iye i Jon 3:16 ki 15:13?

9 Goba pa Catan i kom to cayo niye i kom ginkok pa Kricito. (Mat. 20:28) Goba pa Catan mukene aye ni dano tye ki cwiny nyo tipo mo ma pe to. Ka man lok ada, ci dano ducu gikwo pi naka, dok onongo pe bimitte ni Kricito oto piwa wek wanong kwo ma pe tum. Wi opo bene ni to pa Kricito obedo lanyut me mar ma pud dong dit loyo ma kinyuto ki wan dano. (Kwan Jon 3:16; 15:13.) Tam kong kit ma Jehovah gin ki Wode giwinyo kwede i kom pwony ma cayo mic ma pire tek meno!

10. I yo ango ma goba pa Catan i kom to omedo cwercwiny ki peko i kom dano?

10 Goba pa Catan medo cwercwiny ki peko i kom dano. Lunywal ma gitye ka kumo pi to pa latingi pol kare kiwacigi ni Lubanga okwanyo latingi me bedo malaika i polo. Tika goba pa Catan-ni kweyo cwinygi nyo medo aremgi ameda? Pwony goba i kom mac me kapiny dong kitiyo kwede me cwako tim mogo maraco, ma i kine tye iye wango jo ma gukwero pwony pa kanica i kom yat. Spanish Inquisition obedo kot pa Katoli ma kicako i lobo Spain yam con, dok obedo ka uno ki keto can malit i kom jo ma niyegi pat ki me Dini pa Katoli. Lungolkop mogo me kot man onongo giwango jo ma gikwero pwony pa Katoli i kom yat, wek gungut i kom balgi ma peya guto pien gitamo ni man weko gibwot ki i mac me kapiny i nge to. I lobe mapol, dano gitamo ni omyero giwor kwarigi ma guto, giminigi deyo nyo giyeny gum ki botgi. Jo mukene gitimo jami calo guro/yabo lyel me yomo cwiny kwarigi ma guto wek pe guyelgi. Ki cwercwiny, niye ma ojenge i kom goba pa Catan pe kelo kwe cwiny me ada. Me ka meno, kelo par ki lworo mukato kare woko.

KIT MA WATWERO CUNG MATEK PI LOK ADA ME BAIBUL

11. I yo ango ma wadi ki lurem ma pe gitye ki cwiny marac gitwero diyowa me nywako i tim ma Baibul pe cwako?

11 Mar pi Lubanga ki Lokke jingowa me bedo luwiny bot Jehovah kadi bed wadiwa nyo luremwa gitye ka keto dic i komwa me nywako i kwer ma pe rwatte ki cik me Baibul. Gimito ni lewic omakwa ka pe waribbe kwedgi, kun giwaco ni pe wamaro nyo waworo lato-ni. Nyo giromo wacci timwa-ni biweko lato-ni yelo jo makwo i yo mo. Watwero cung matek pi lok ada me Baibul nining? Kong wanenu kit me keto cik ma igi lac me Baibul mogo i tic.

12. Kwer mene ma kwako jo muto ma pe rwatte ki ginacoya?

12 Mok tammi me ‘pokke woko’ ki i kwer ki tim me tekwaro ma pe rwatte ki Baibul. (2 Kor. 6:17) I lobo mo acel ma tye i nam me Caribbean, jo mapol giye ni ka ngat moni oto, “tipone” romo dong kenyu kun woto ki uno jo ma yam gitere marac. Buk mo acel owaco ni “tipo-ni” twero bene “kelo ayelayela i kabedo meno.” Kwer ma tye i kabedo mapol i Afrika aye ni kiweko mac bedo ka lyel i gang lyel dyewor benebene. Pi tyen lok ango? Jo mogo gitamo  ni tim man gengo bino pa cen maraco! Wan macalo jo pa Jehovah, pe waye nyo wanywako i kwer nyo tim me kwiya piny ma cwako goba pa Catan!​—1 Kor. 10:21, 22.

Kwedo lok me Baibul ki diro ki dong lok ki mwolo bot wadini ma pe gitye Lucaden pa Jehovah twero konyi me gengo tele i kinwu (Nen paragraf 13-14) *

13. Ka itye ki gung cwiny i kom kwer moni, ngo ma omyero itim ma lubbe ki Yakobo 1:5?

13 Ka itye ki gung cwiny i kom kwer moni, leg bot Jehovah kun ipenye ni omini ryeko. (Kwan Yakobo 1:5.) Dok i nge meno kwed lok i bukkewa. Ka mitte, peny tam ki bot luelda me kacokkewu. Pe gibititi gin me atima, ento gitwero konyi me nongo cik ma igi lac me Baibul, calo mogo ma kinyamo i pwony man. Ka itimo jami magi, nongo itye ka pwonyo ‘ryekoni’ dok ryeko man bikonyi me “poko gin maber ki gin marac.”​—Ibru 5:14.

14. Watwero gwokke nining wek pe waket ariya i nyim jo mukene?

14 “Gin ducu ma wutiyo, wutim ducu pi miyo deyo bot Lubanga. Pe wubal cwiny [ngat mo].” (1 Kor. 10:31, 32) Ka watye ka moko tamwa me nywako i kwer moni nyo pe, omyero bene watam i kom kit ma tamwa bigudo kwede cwiny ma ngolo kop pa jo mukene, tutwalle Lukricitayo luwotwa. Pe wamito ni waket ariya i nyim ngat mo keken! (Mar. 9:42) Dok bene, pe wamito balo cwiny jo ma pe gitye Lucaden pa Jehovah. Mar biweko waloko kwedgi ki mwolo, i yo ma kelo deyo bot Jehovah. Pe omyero wadaa ki dano nyo waca kwergi. Wi myero opo ni, mar tye ki teko! Ka wanyuto mar kun bene wamwol dok wawor, ci watwero konyo me loko cwiny jo ma dagwa.

15-16. (a) Pingo tye me ryeko me weko jo mukene ngeyo ka cungoni? Mi labol. (b) Lok pa Paulo ma kicoyo i Jo Roma 1:16 gudowa nining?

15 Wek dano me kabedowu gunge ni ibedo Lacaden pa Jehovah. (Ic. 43:10) Ka ngat mo me pacowu oto, wadini ki jiraniwu igi twero wang i komi ka pe inywako i kwer mogo. Twero bedo yot me gengo peko man ka onongo itittigi con pi niyeni. Francisco, ma bedo i lobo Mozambique, ocoyo ni: “I kare ma an wan ki dakona, Carolina wapwonyo ada, wawaco bot wadiwa ni dong pe wabiworo jo muto. Kiketowa i atematema matek i kare ma lamin Carolina oto. Gin ma kitimo i  tekwarowa aye ni kilwoko lyel i kwer mo. Ka dong wat macok loyo pa lato-ni myero obut ka ma kionyo iye pii ma kilwoko ki lyel pi dyewor adek. Gitamo ni man yomo cwiny tipo pa lato. Jo gang pa Carolina onongo gimito ni en aye obut ka ma kionyo iye pii man.”

16 Francisco gin ki dakone gudok i lok man nining? Francisco otito ni: “Kit macalo wan wamaro Jehovah dok wamito yomo cwinye, wakwero nywako i kwer meno. Jo gang pa Carolina cwinygi owang matek adada. Gukok i komwa ni wan pe wamiyo woro bot jo muto dok guwaco ni wadiwa pe dong gibimiyowa kony nyo limowa. Kit ma onongo watyeko tittigi pi niyewa con, pe dong wanywako lok mo kwedgi ma igi tye ka wang. Wadiwa mukene dok gucako cwakowa, kun giwacci wan onongo dong watyeko tito ka cungowa con. I nge kare mo, wadi pa Carolina cwinygi opye, dok wabedo ki kare me yubo wat. Ki lok ada, mukene gibino wa i pacowa me penyo pi bukkewa ma jenge i Baibul.” Dong pe omyero wawek lewic omakwa me cung matek pi lok ada madok i kom to.​—Kwan Jo Roma 1:16.

MI KONY DOK IKWE CWINY JO MA KUMO

Lurem me ada gikonyo dok gikweyo cwiny jo ma gurwenyo danogi me amara i to (Nen paragraf 17-19) *

17. Ngo ma twero konyowa me bedo larem me ada bot Lakricitayo lawotwa ma tye ka kumo?

17 Ka Lakricitayo lawotwa orwenyo danone me amara, omyero watemme matek me bedo ‘larem me ada, omego ma kinywalo me nywako peko ki omegine.’ (Car. 17:17) Watwero bedo ‘larem me ada’ nining, tutwalle ka omego nyo lamego moni tye ka nongo dic me nywako i kwer ma pe rwatte ki cik me Baibul? Wanenu kong cik ma igi lac aryo me Baibul ma twero konyowa me kweyo cwiny jo ma kumo.

18. Pingo Yecu okok ki pig wange, dok ngo ma waromo pwonyo ki i lanene?

18 “Wukok bene kacel ki jo ma kok.” (Rom. 12:15) Waromo nongo tek me ngeyo gin ma myero wawac bot ngat ma orwenyo danone me amara. I kine mukene pig wangwa romo gudo cwinygi loyo lokwa. I kare ma larem Yecu ma nyinge  Lajaro oto, Maliam, Marita, ki jo mukene gukoko omingi ki laremgi matek. Ma Yecu oo nino angwen i nge to pa Lajaro, en bene “okok ki pig wange,” kadi bed en ongeyo ni ebicero Lajaro woko. (Jon 11:17, 33-35) Koko pa Yecu ki pig wange onyuto kit ma Jehovah owinyo kwede i kom to pa Lajaro. Pig wang Yecu bene omoko marre pi jo gang pa Lajaro, dok labongo akalakala mo, man okweyo cwiny Maliam ki Marita. I yo acel-lu, ka omegiwa ki lumegiwa gineno ni wamaro dok waparo pigi, man weko gingeyo ni pe gitye kengi ento gitye ki lurem ma marogi.

19. Ka watye ka kweyo cwiny Lakricitayo lawotwa mo ma tye ka kumo, i yo ma nining ma watwero tic ki Latitlok 3:7?

19 “Kare me ling alinga, ki kare me lok.” (Latit. 3:7) Yo acel me kweyo cwiny Lakricitayo lawoti ma kumo aye me winyo lokke. Mi kare ki omeru me tito gin ma tye i cwinye, dok pe iwek i owang ka en tye ka loko “lok atata.” (Yubu 6:2, 3) Romo bedo ni en ool matek pi lyeto ma tye ka nongone ki bot wadine ma pe gitye Lucaden pa Jehovah. Pi meno leg kwede. Leg ‘Lawiny lega’ wek omiye teko ki tam ma atir. (Jab. 65:2) Ka twere, kwan Baibul kacel kwede. Nyo wuromo kwano pwony mo ma rwatte ki i bukkewa, calo gin mutimme i kwo pa ngat mo, ma romo cuko cwinye.

20. Gin ango ma wabinyamo i pwony ma lubo man?

20 Pud dong watye ki mot madit me ngeyo lok ada i kom jo muto ki anyim mamwonya ma tye ka kuro jo ma gitye i lyel! (Jon 5:28, 29) Dong, i lokwa ki ticwa, omyero wacung matek pi lok ada me Baibul dok wanywak ki jo mukene i cawa mo keken ma opore. Pwony ma lubo man bilok i kom yo mukene ma Catan tiyo kwede me gwoko dano i colpiny​—tim tyet. Wabineno pingo omyero wagwokke ki tim nyo galowang ma kubbe ki owic me tim jokjok.

WER 24 Wubin i Wi Got pa Jehovah

^ par. 5 Catan ki jogine gubwolo dano ki lok goba mapol i kom kit ma jo muto gitye kwede. Goba magi giweko dano donyo i kwer mogo ma pe rwatte ki ginacoya. Pwony man bikonyi me gwoko genneni bot Jehovah ka jo mukene giketo lyeto i komi me nywako i kwer magi.

^ par. 55 LOK I KOM CAL: Lucaden aryo gitye ka kweyo cwiny watgi ma orwenyo danone me amara i to.

^ par. 57 LOK I KOM CAL: I nge kwedo lok i kom kwer mogo ma kitimo i ka lyel, Lacaden man tye ka tito niyene bot wadine ki mwolo.

^ par. 59 LOK I KOM CAL: Luelda me kacokke gitye ka kweyo cwiny Lacaden mo ma orwenyo danone me amara i to.