Cit atir i jami ma tye

Cit atir ka ma nyuto lok ma tye iye

Lub Lanen pa Jehovah​—Lubanga ma Cuko Cwiny Dano

Lub Lanen pa Jehovah​—Lubanga ma Cuko Cwiny Dano

“Myero gipwo Lubanga . . . en kweyo [nyo cuko] cwinywa i can ducu ma walimo.”​—2 JO KORINT 1:3, 4.

WER: 23, 152

1. I kare ma Adam ki Kawa gujemo, Jehovah ocuko cwiny dano kun miyogi gen nining?

JEHOVAH obedo Lubanga ma cuko cwinywa. En obedo ka timo man nicakke ma dano gubalo ci gudoko jo ma tye ki roc. Cutcut ma Adam ki Kawa gujemo i kom Lubanga, En otito lok ma onongo bimiyo tekcwiny ki gen bot dano ma gibinywalogi i anyim. Lok man nonge i Acakki 3:15 dok tito ni kibityeko Catan Larac-ci ki ticce ducu.​—1 Jon 3:8; Niyabo 12:9.

JEHOVAH OCUKO CWINY LUTICCE I KARE MUKATO ANGEC

2. Jehovah ocuko cwiny Nua nining?

2 Tam kong i kom kit ma Jehovah ocuko kwede cwiny laticce Nua. Jo ma gukwo i kare pa Nua onongo gimaro tim gero ki tarwang, dok Nua ki jo me ode keken aye  ma onongo giworo Jehovah. Man onongo twero turo cwiny Nua woko. (Acakki 6:4, 5, 11; Juda 6) Ento Jehovah omiyo bot Nua tekcwiny ma mitte me Wore ki me timo gin matir. (Acakki 6:9) Jehovah owaco bot Nua ni Ebijwero jo me lobo meno marac-ci woko dok otito ngo ma Nua myero otim wek en kacel ki jo me ode gubwoti. (Acakki 6:13-18) Ada, man ocuko cwiny Nua.

3. Jehovah ocuko cwiny Yocwa nining? (Nen cal ma tye i pot karatac 15.)

3 Lacen Jehovah ocuko cwiny laticce Yocwa, ma onongo tye ki tic matek i nyimme. En aye onongo myero otel wi jo pa Lubanga me donyo i Lobo ma Kiciko Pire-ni kun gilwenyo ki mony pa rok ma gibedo kunnu. Jehovah onongo ngeyo ni Yocwa tye ki tyen lok mapol me bedo ki lworo, man oweko En owaco ki Moses ni: “Ento in icik Yocwa, icuk cwinye, imiye tek; pien en aye bikato loka ca kun telo wi lwak man; ci bimiyogi camo lobo ma ibineno-ni.” (Nwoyo Cik 3:28) Ci lacen Jehovah kikome ocuko cwiny Yocwa kun waco ni: “An dong atyeko ciki ba. Bed oteka ma cwinyi nwang; pe komi omyel, pe cwinyi oryangnge, pien Rwot [Jehovah] Lubangani tye kwedi ka ma iwoto iye ducu.” (Yocwa 1:1, 9) Itamo ni lok meno oweko Yocwa owinyo nining?

4, 5. (a) I yo ma nining ma Jehovah ocuko kwede cwiny jone i kare mukato angec? (b) Jehovah ocuko cwiny Wode nining?

4 Jehovah bene cuko cwiny jone macalo gurup. Me labolle, Jehovah onongo ngeyo ni Lujudaya ma gitye i opii i Babilon gubibedo ki turcwiny, pi meno en ocuko cwinygi kun tiyo ki lanebine ni: “Pe ilwor, an atye kwedi, cwinyi pe opoti, pien an Lubangani; abimiyi tek, dok abikonyi, abimaki ki cinga lacuc, ma miyo aloyo lukworra-ni.” (Icaya 41:10) Lacen, Jehovah ocuko cwiny Lukricitayo me cencwari me acel, dok en bene cuko cwinywa i yo acel-lu.​—Kwan 2 Jo Korint 1:3, 4.

5 Jehovah bene ocuko cwiny Wode. I nge nongo batija, Yecu owinyo dwan mo ki i polo ma waco ni: “Man aye Woda ma amare, ma cwinya yom i kome.” (Matayo 3:17) Tam kong kit ma lok man ocuko cwiny Yecu i kare ma en tiyo ticce me pwony i lobo!

YECU OCUKO CWINY JO MUKENE

6. Carolok pa Yecu i kom ciling twero cuko cwinywa nining?

6 Yecu olubo lanen pa Wonne kun cuko cwiny jo mukene me bedo lugen. I carolok ma en obolo i kom ciling, otito ni ladit owaco bot luticce ma lugen ni: “Itimo ber mada, in latic maber dok lagen. Onongo ibedo lagen i kom jami matidi mo, abiketi dong ibedo ki twero i kom jami mapol. Dony i yomcwiny pa laditti.” (Matayo 25:21, 23) Lok man ocuko cwiny lupwonnyene me medde ki tic pi Jehovah ki gen!

Yecu ocuko cwiny Petero dok omiyo bote tic me jingo jo mukene

7. I yo ango ma Yecu ocuko kwede cwiny lukwenane, tutwalle Petero?

7 Kadi bed lukwena pa Yecu onongo gimaro laro lok i kom anga ma ladit i kingi, Yecu kare ducu odiyo cwinye i komgi. En ocuko cwinygi me bedo jo  ma mwol ma gitiyo pi luwotgi, me ka bedo ki miti ni jo mukene aye oti pigi. (Luka 22:24-26) Petero otimo bal tyen mapol dok ocwero cwiny Yecu bene. (Matayo 16:21-23; 26:31-35, 75) Ento Yecu pe okwero Petero. Ma ka meno, en ocuko cwiny Petero dok omiyo bote tic me cuko cwiny jo mukene.​—Jon 21:16.

LABOL ME CUKO CWINY I KARE MACON

8. Kejekia ocuko cwiny ludito wi mony kacel ki lwak me Jerucalem nining?

8 Kadi wa ma Yecu peya obino i lobo, lutic pa Jehovah onongo gingeyo ni omyero gicuk cwiny jo mukene. Tam kong i kom Kabaka Kejekia. I kare ma jo Aciria gubino ka lweny i kom Jerucalem, Kejekia ocoko ludito wi mony kacel ki lwak ci ocuko cwinygi, dok “gucako bedo ki gen pi lok pa Kejekia.”​—Kwan 2 Tekwaro 32:6-8.

9. Ngo ma waromo pwonyo ki bot Yubu madok i kom cuko cwiny?

9 Watwero bene pwonyo kit me cuko cwiny ki bot Yubu. Kadi bed en kikome onongo mito ni kicuk cwinye, en opwonyo jo mukene kit me cuko cwiny. Yubu owaco bot co ma gubino ka kweyo cwinye ni ka onongo en aye etye ka kweyo cwinygi, kono eloko lok ma jingogi dok ma weko giwinyo maber, ento pe lok ma medo arem cwinygi ameda. (Yubu 16:1-5) Lacen gire Yubu onongo kwe cwiny ki bot Eliu ki dong Jehovah.​—Yubu 33:24, 25; 36:1, 11; 42:7, 10.

10, 11. (a) Pingo nya pa Jeputa onongo mito cuko cwiny? (b) Angagi ma watwero cuko cwinygi i kare-ni?

10 Nya pa Jeputa bene onongo mito cuko cwiny. Wonne, Langolkop Jeputa onongo bicito ka lweny i kom jo Ammon. En ocikke ni ka Jehovah okonye me loyo lweny, ci ebimiyo bot Jehovah ngat mukwongo kato ki i ode me rwatte kwede ka edwogo ki i dog lweny. Jo Icrael guloyo lweny, dok ngat ma okwongo kato me rwatte ki Jeputa obedo nyare, latinne acel keken. Cwiny Jeputa otur woko. Ento en ogwoko cikkene dok ocwalo nyare ka tic i kema me woro pi kwone ducu.​—Lungolkop 11:30-35.

11 Kadi bed timo man obedo tek pi Jeputa, nen calo obedo tek ma loyo bot nyare. Ento, en obedo atera me cobo kwonge pa wonne. (Lungolkop 11:36, 37) Man tyen lokke ni pe kibinyomme dok pe obinywalo lutino ma mege. Dog ot pa Jeputa onongo bigik woko. En onongo mito kwe cwiny ki cuko cwiny muromo. Baibul waco ni: ‘Odoko kit pa jo Icrael: Anyira Icrael yam gicito ka pwoyo nya pa Jeputa ma Lagilead nino angwen i mwaka acel acel.’ (Lungolkop 11:39, 40) Nya pa Jeputa miyo watamo i kom  Lukricitayo mogo me kare-ni ma pe ginyomme pien gimito medo ticgi pi Jehovah. Tika watwero pwoyo ki cuko cwinygi?​—1 Jo Korint 7:32-35.

LUKWENA GUCUKO CWINY UTMEGIGI

12, 13. Petero ‘ojingo cwiny utmegine’ nining?

12 I dyewor ma Yecu peya oto, en owaco bot lakwena Petero ni: “Cimon, Cimon, nen, Catan otyeko penyo piwu me apyeta macalo bel, ento alego piri ni niyeni pe odok cen. In bene ka dong ilokke, myero ijing cwiny utmegini.”​—Luka 22:31, 32.

Waraga ma lukwena gucoyo ocuko cwiny Lukricitayo i cencwari me acel, dok pud cuko cwinywa wa i kare-ni (Nen paragraf 12-17)

13 Petero onongo tye i kin luelda me kacokke pa Lukricitayo macon. (Jo Galatia 2:9) En ocuko cwiny utmege ki tekcwiny ma en onyuto i nino me Pentekote ki dok i ngeye. I nge tic pi mwaki mapol, en ocoyo bot utmege ni: “Acoyo botwu waraga man manok, . . . pi cuko cwinywu kun aloko macalo caden ni, man en kica pa Lubanga ada; wucung iye matek.” (1 Petero 5:12) Waraga pa Petero ocuko cwiny Lukricitayo me kare meno adada. Dok pud tye ka cuko cwinywa i kare-ni ka wawoto ki kuro cobbe pa cikke pa Jehovah ducu!​—2 Petero 3:13.

14, 15. I yo ango ma bukke ma lakwena Jon ocoyo cuko cwinywa?

14 Lakwena Jon bene onongo tye i kin luelda me kacokke me cencwari me acel. En ocoyo Jiri i kom tic me pwony  pa Yecu. Buk ma en ocoyo-ni ocuko cwiny Lukricitayo pi mwaki miya mapol dok pud medde ki cuko cwinywa i kare-ni. Me labolle, i Jiri pa Jon keken aye wakwano lok pa Yecu ni mar aye gin ma nyuto Lukricitayo me ada.​—Kwan Jon 13:34, 35.

15 Waraga adek ma Jon ocoyo-ni bene tye ki lok ada ma pigi tego. Ka cwinywa otur pi balwa, wanongo kwe cwiny ka wakwano ni ginkok pa Yecu “lwoko bal ducu woko ki i komwa.” (1 Jon 1:7) Dok ka cwinywa pidowa mukato kare woko, wanongo kwe cwiny ka wakwano ni “Lubanga dit kato cwinywa.” (1 Jon 3:20) I kin luco Baibul ducu, Jon keken aye ocoyo ni “Lubanga aye mar.” (1 Jon 4:8, 16) I waragane me aryo ki me adek, en opwoyo Lukricitayo ma “gitye ka lubo lok ada.”​—2 Jon 4; 3 Jon 3, 4.

16, 17. I yo ma nining ma lakwena Paulo ocuko kwede cwiny Lukricitayo me cencwari me acel?

16 Lakwena Paulo oweko lanen maber adada me cuko cwiny utmegine. I nge kare manok ma Yecu oto, pol pa lukwena gubedo i Jerucalem, ka ma lukiko madit onongo tye iye. (Tic pa Lukwena 8:14; 15:2) Lukricitayo ma i Judaya gutito lok i kom Kricito bot dano ma onongo dong giye i kom Lubanga acel. Ento cwiny maleng ocwalo Paulo ka tito kwena bot Lugrik, Luroma, ki jo mukene ma giworo lubange  mapol.​—Jo Galatia 2:7-9; 1 Temceo 2:7.

17 Paulo owoto i lobo ma kombeddi kilwongo ni Turkey, ki i lobo Grik ki Italy. En otito kwena bot jo ma pe gin Lujudaya ma gibedo kunnu, dok ocako kacokke i kabedo magi. Kwo onongo pe yot pi Lukricitayo manyen magi. Gunongo aunauna ki bot jo tugi, dong pi meno onongo gimito cuko cwiny. (1 Jo Tecalonika 2:14) I kine ka mwaka 50, Paulo ocoyo waraga me cuko cwiny jo me kacokke manyen ma i Tecalonika. En owaco ni: “Wapwoyo Lubanga jwijwi piwu ducu kun walwongo nyingwu i legawa me kare ducu, kun wapo i nyim Lubanga Wonwa i kit ma wuketo kwede niyewu i tic, ki kit ma wucanne kwede pi mar, dok ki kit ma wudiyo kwede cwinywu.” (1 Jo Tecalonika 1:2, 3) En bene okwayogi me jingo luwotgi kun coyo ni: “Wucuk cwinywu kekenwu, dok wukonnye bene kekenwu . . ngat acel acel okony lawote me dongo.”​—1 Jo Tecalonika 5:11.

LUKIKO MADIT CUKO CWINYWA

18. Lukiko madit me cencwari me acel ocuko cwiny Pilipo nining?

18 I cencwari me acel, Jehovah otiyo ki lukiko madit me cuko cwiny Lukricitayo ducu, ma meno kwako wa jo ma onongo gitye ka doro kacokke. I kare ma Pilipo otito lok i kom Kricito bot Lucamaria, lukiko madit omiyo bote kony. Gucwalo lumembagi aryo, Petero ki Jon, me lega pi Lukricitayo manyen-ni wek gunong cwiny maleng. (Tic pa Lukwena 8:5, 14-17) Pilipo kacel ki omege ki lumege manyen-ni gunongo cuko cwiny pi kony ma lukiko madit omiyo!

19. Lukricitayo me cencwari me acel guwinyo nining i kare ma gukwano waraga ma oa ki bot lukiko madit?

19 Lacen, onongo mitte ni lukiko madit omok tam ma pire tek. Tika onongo mitte ni Lukricitayo ma pe gin Lujudaya bene gilirgi calo Lujudaya, ma lubbe ki Cik pa Moses? (Tic pa Lukwena 15:1, 2) I nge lega pi cwiny maleng ki nyamo lok ma i Ginacoya, lukiko madit omoko ni lirre onongo dong pe mitte. Ci dong gucoyo waraga me tito tam ma gumoko dok guoro omege mogo me terone bot kacokke mapatpat. I kare ma Lukricitayo gukwano waraga man, “cwinygi obedo yom i kom lok ma gicoyo iye me cuko cwinygi.”​—Tic pa Lukwena 15:27-32.

20. (a) I yo ango ma Lukiko Madit i kare-ni cuko kwede cwinywa? (b) Lapeny mene ma wabinyamone i pwony ma lubo man?

20 I kare-ni, Lukiko Madit pa Lucaden pa Jehovah gicuko cwiny Lubetel, jo mukene ma gitye ka tic pi kare malac, ki dong wan ducu. Calo omege me cencwari me acel, wan bene wabedo ki yomcwiny me nongo cuko cwiny man! Medo i kom meno, me cuko cwiny jo ma ticgi me pwony okwe woko, i mwaka 2015 Lukiko Madit oyubo brocuwa me Return to Jehovah. Ento, tika jo ma gidoro kacokke keken aye myero gucuk cwiny dano, nyo wan ducu watwero timone? Wabinyamo lok man i pwony ma lubo-ni.