Cit atir i jami ma tye

Cit atir ka ma nyuto lok ma tye iye

 PWONY ME ANYAMA ME 32

Mar Mewu Myero Odong Omedde Ameda

Mar Mewu Myero Odong Omedde Ameda

“Alego Lubanga ni meno, mar mewu myero odong omedde ameda.”​—PIL. 1:9.

WER 106 Nyako Nyig me Mar

GIN MA WABINYAMO *

1. Angagi ma gukonyo me cako kacokke me Pilipi?

I KARE ma lakwena Paulo gin ki Cira, Luka, ki Temceo guo i boma me Pilipi ma onongo tye i te ker me Roma, gunongo jo mapol ma gimito winyo lok me kwena maber. Omege angwen ma gutiyo ki mit kom-mi gukonyo me cako kacokke, dok omege ki lumege me kacokke manyen-ni gucako cokke kacel nen calo i gang pa lamego mo ma nyinge Ludia, ma lajol wele.​—Tic 16:40.

2. Ariya ango ma kacokke man okato ki iye?

2 Ma pe otero kare malac, kacokke manyen man okato ki i aunauna magwar. Catan oweko jo ma gidag ada gulwenyo i kom tic me tito kwena ma Paulo kacel ki luwote gubedo ka timone. Kimako Paulo ki Cira, kigoyogi ki odo, dok kitweyogi i buc. I nge gonyogi ki i buc, gulimo utmege manyen-ni dok gucuko cwinygi. Ci Paulo, Cira, ki Temceo gua woko ki i boma man ento Luka nen calo odong cen. Omege ki lumege manyen magi onongo dong gibitimo ngo? Ki kony pa cwiny maleng pa Jehovah, utmege magi gumedde ki tic ki mit kom. (Pil. 2:12) Paulo onongo tye ki tyen lok ma atir me bedo ki awaka i komgi!

3. Kit ma kitito kwede i Jo Pilipi 1:9-11, Paulo olego i kom gin ango?

3 I nge mwaki apar ma gucako kacokke me Pilipi, Paulo ocoyo waraga botgi. Ka iwoto ki kwano waraga pa Paulo man, ci ibineno mar madwong ma Paulo onongo tye kwede pi omegine. En ocoyo ni, “par matut ma abedo kwede piwu a i mar pa Kricito Yecu kikome.” (Pil. 1:8) En owaco  ni ebedo ka lega pigi. En olego ni Jehovah okony utmege magi gudong mar i kingi, guket pi jami ma pigi tego obed mukwongo, guwek keto ariya i nyim jo mukene, dok gumedde ki tiyo tic ducu mabeco me kit ma atir. Labongo akalakala mo, in bene iye ni watwero nongo adwogi maber ki i lok pa Paulo man i kare-ni. (Kwan Jo Pilipi 1:9-11.) * I pwony man, wabineno tam mogo ma en oloko iye dok wabinyamo kit ma watwero ketogi kwede i tic.

WUWEK MARWU ODONG

4. (a) Ma lubbe ki 1 Jon 4:9, 10, Jehovah onyuto marre piwa nining? (b) Omyero wamar Lubanga ma rom mene?

4 Jehovah onyuto marre ma pe lokke piwa i kare ma ocwalo Wode i lobo me to pi balwa. (Kwan 1 Jon 4:9, 10.) Mar pa Lubanga tugo cwinywa me marre bene. (Rom. 5:8) Omyero wamar Lubanga ma rom mene? Yecu ogamo lapeny meno i kare ma owaco ki Luparicayo ni: ‘Mar Jehovah Lubangani ki cwinyi ducu, ki kwoni ducu, ki tammi ducu.’ (Mat. 22:36, 37) Mitte ni wamar Lubanga ki cwinywa ducu. Dok wamito ni marwa pire odong obed matek nino ki nino. Paulo owaco ki omege me Pilipi ni margi “myero odong omedde ameda.” Gin ango ma watwero timone me jingo marwa pi Lubanga?

5. Marwa pi Lubanga dongo doko matek nining?

5 Mitte ni wange Lubanga ka wek wamare. Baibul waco ni: “Ngat ma pe ki mar, nongo en pe ngeyo Lubanga, pien Lubanga aye mar.” (1 Jon 4:8) Lakwena Paulo otito ni marwa pi Lubanga bidongo bedo matek ka wamedde ki nongo “ngec kikome ki niang matut” madok i kom Lubanga. (Pil. 1:9) I kare ma wacako kwano Baibul nyen, wacako maro Jehovah kadi bed ni onongo pe wangeyo jami ducu madok i kome. Dok i kare ma wacako pwonyo jami mapol i kome, marwa pire bene ocako doko matek. Man aye oweko watero kwano Baibul piwa kenwa ki lwodo lok pa Lubanga calo jami ma pigi tego loyo i kwowa!​—Pil. 2:16.

6. Gin ango ma wapwonyo ki i 1 Jon 4:11, 20, 21 madok i kom dongo marwa?

6 Marwa pi Lubanga bitugo cwinywa me maro utmegiwa. (Kwan 1 Jon 4:11, 20, 21.) Watwero tamo ni marwa pi utmegiwa bibino pire kene. Tye kit man pien wan ducu waworo Jehovah dok watute me bedo calo en. Walubo lanen pa Yecu, ma marre oweko en omiyo kwone piwa. Kadi bed kit meno, i kine mukene wanongo ni tek adada me lubo tira me maro utmegiwa. Nen kong labol mo ma otimme i kacokke me Pilipi.

7. Gin ango ma wapwonyo ki i kom tira ma Paulo omiyo bot Euodia ki Cintuke?

7 Euodia ki Cintuke onongo gubedo lumege ma ‘gutiyo’ kacel ki lakwena Paulo ki mit kom. Ento nen calo gubedo ki niang manok dok lirem i kingi oket woko. I waragane bot kacokke ma lumege magi tye iye, lakwena Paulo ocoyo nying Euodia gin ki Cintuke ci ominigi tira me bedo ki “cwiny acel.” (Pil. 4:2, 3) Lakwena Paulo onongo ni mitte me miyo tira bot jo ma i kacokke ducu kun waco ni: “Wuti tic ducu labongo nguru nyo pyem mo.” (Pil. 2:14) Ki lok ada, tira ma Paulo omiyo pe okonyo lumege  aryo man keken ento okonyo jo ducu me kacokke man me jingo margi pi ngat acel acel.

Pingo myero wabed ki neno matir i kom omegiwa? (Nen paragraf 8) *

8. Ariya ango ma gengowa maro omegiwa, dok watwero loyone nining?

8 I kine mukene twero bedo tek adada me maro utmegiwa pien nongo watye ka keto cwinywa i kom gorogi kit macalo Euodia ki Cintuke gutimo. Wan weng wabalo nino ducu. Ka wabedo ka keto cwinywa i kom bal pa jo mukene, ci marwa pigi bidok woko piny. Me labolle, ka omego mo wiye owil woko ki konyowa me gwoko lengo me Ot me Ker, cwinywa twero cwer. Pi meno, ka dong wacako tamo jami mukene ma omego-ni otimo marac, ci cwinywa bicwer makato dok wabibedo ki mar manok pi omego man. Ka itye ki peko ma kit man ki ngat mo i kacokkewu, ci bedo ber ka itamo i kom lok man: Jehovah ngeyo gorowa kacel ki goro pa ngat meno. Kadi bed ni watye ki goro, en pud maro wan ducu. Pi tyen lok man, mitte ni walub lanen me mar pa Jehovah dok waket cwinywa i kom kit mabeco ma omegiwa gitye kwede. Ka watute matek me maro utmegiwa, ci wajingo wat ki note ma tye i kinwa.​—Pil. 2:1, 2.

“JAMI MA PIGI TEGO”

9. “Jami ma pigi tego” ma Paulo oloko iye i waragane bot jo Pilipi obedo gin ango?

9 Cwiny maleng oweko Paulo otito ki jo ma i Pilipi​—ki Lukricitayo ducu—​me “keto pi jami ma pigi tego obed mukwongo.” (Pil. 1:10, NW.) Jami ma pigi tego magi tye iye lonyo nying Jehovah, cobbe pa yubbe, kacel ki kuc ki note me kacokke. (Mat. 6:9, 10; Jon 13:35) Ka jami magi pigi tek i kwowa, ci wanyuto ni wamaro Jehovah.

10. Gin ango ma omyero watim ka wamito ni Jehovah onenwa calo jo ma pe ki roc?

10 Paulo bene owaco ni wabed “labongo roc.” Man pe tyen lokke ni wabed ma pa wabalo. Pe watwero bedo labongo roc mo kulu i rwom ma Lubanga Jehovah tye kwede. Ento Jehovah binenowa calo jo ma gipe ki roc ka watute me dongo marwa dok waketo pi jami ma pigi tego bedo mukwongo. Yo acel ma watwero nyuto kwede marwa aye bedo ma wagwokke ki keto ariya i nyim jo mukene.

11. Pingo omyero wagwokke ki keto ariya i nyim jo mukene?

11 Tira man ni pe waket ariya i nyim jo mukene pire tek adada. Watwero keto ariya i nyim jo mukene nining? Watwero timo man ki galowang ma wayero, cital me rukwa, nyo bene dog tic ma wayero. Twero bedo ni jami ma wayero me timone pe jami maraco ma Jehovah dagi. Ento ka balo cwiny ma ngolo kop pa ngat mukene dok keto ariya i nyimme ci man nongo dong odoko bal madit. Yecu owaco ni bedo ber ka kitweyo kidi rego madit i ngutwa ci kibolowa kwede wa i nam, ka wabalo cwiny ngat acel ma i kin romine!​—Mat. 18:6.

12. Gin ango ma wapwonyo ki i labol pa luot mo ma lupainia?

12 Nen kong kit ma luot mo ma gitye lupainia gulubo kwede tira ma Yecu omiyo-ni. Onongo gitye i kacokke acel ki luot mo ma pud gunongo batija nyen dok gudongo i paco ma cik tek iye dok kigengo iye jami mapol. Luot ma gunongo batija nyen-ni onongo gitamo ni Lukricitayo omyero pe gunen filim mo kadi wa mabecone. Gubedo ki ur matek adada i kare ma guniang ni lupainia man gucito ka neno filim. I nge timme  pa gin man, luot ma lupainia-ni guweko cito ka ma kinyuto iye filim nio ka luot manyen-ni gupwonyo cwinygi ma ngoligi kop-pi me bedo ki neno mupore. (Ibru 5:14) I yo ma kit man, luot ma lupainia-ni gunyuto ni gimaro omingi ki lamingi manyen-ni pe ki i lokgi keken ento wa i ticgi bene.​—Rom. 14:19-21; 1 Jon 3:18.

13. Watwero weko ngat mo timo bal nining?

13 Yo mukene ma watwero keto kwede ariya i nyim jo mukene aye obedo ka wabitogi me timo bal. Man twero timme nining? Tam kong i kom labol man. I nge tute matek, latin kwan mo me Baibul oweko mato kongo. En oniang ni omyero pe emat kongo kadi matidi. En odongo oyotoyot i yo me cwiny dok onongo batija. Lacen, omego mo olwonge i gure mo me galowang ci omine kongo kun waco ni: “In dong itye Lakricitayo, dok itye ki cwiny maleng pa Jehovah. I kin nyig ma nyak pi cwiny maleng tye iye jukke ken. Ka itye ki nyig man ci itwero mato kongo manok.” Bedo me cwercwiny adada ka omego man manyen-ni owinyo tam marac-ci dok ocako mero matek ki kongo!

14. Cokke pa Lukricitayo konyowa me keto i tic lok ma i Jo Pilipi 1:10 nining?

14 Cokke pa Lukricitayo konyowa me keto i tic tam ma kimiyo i Jo Pilipi 1:10 i yo mapol mapatpat. Mukwongo, jami ma wanyamo i cokke nyutiwa jami ma Jehovah neno ni pigi tek. Me aryo,  wapwonyo kit me ketogi i tic wek wabed labongo roc mo. Me adek, tugo cwinywa me nyuto ‘mar ki tiyo tic mabeco.’ (Ibru 10:24, 25) Ka utmegiwa gicuko cwinywa, marwa pi Lubangawa ki utmegiwa bene dongo medde ameda. Ka mar pi Lubanga ki utmegiwa odongo i cwinywa, ci wabitute matek wek pe waket ariya i nyim utmegiwa.

WUWEK ‘TICWU DUCU MABECO ME KIT MA ATIR ONYA I KOMWU’

15. Tyen lokke ngo me weko “ticwu ducu mabeco me kit ma atir nya i komwu”?

15 Lakwena Paulo olego matek adada pi jo ma i Pilipi wek ‘ticgi ducu mabeco me kit ma atir onya.’ (Pil. 1:11) Labongo akalakala mo, ‘ticgi ducu mabeco me kit ma atir’ onongo tye iye margi pi Jehovah kacel ki jone. Meno bene onongo kwako tito pi niyegi i kom Yecu ki gengi mamwonya. Jo Pilipi 2:15 tiyo ki labol mukene me “ryeny i lobo i kin dano calo lakalatwe.” Man rwatte pien Yecu owaco bot lupwonnyene ni, “wun wuceng me lobo.” (Mat. 5:14-16) En bene ociko lulub kore ni, “wucilok jo me rok ducu gudok jo ma luba,” dok owaco ni gin ‘gibibedo lucadenne wa i agikki lobo ducu.’ (Mat. 28:18-20; Tic 1:8) Wanyako nyig me “kit ma atir” ka watute matek i tic man ma pire tek-ki.

Ma kitweyo Paulo macalo mabuc i ode i Roma, en tye ka coyo waraga bot kacokke ma tye i boma me Pilipi. Paulo bene otiyo ki kare meno me tito kwena bot acikari ma gwoke kacel ki welle ma gibino ka limme (Nen paragraf 16)

16. Jo Pilipi 1:12-14 nyuto nining ni pud watwero medde ki ryeny kadi bed watye ka kato ki i kwo matek? (Nen cal ma tye i pok ngeye.)

16 Kadi bed watye ka kato ki i kwo matek, pud watwero ryeny. I kine mukene, jami ma twero nen calo kigeng i ticwa me pwony, twero doko yo mupore me tito kwena. Me labolle, lakwena Paulo onongo kitweye i ode macalo mabuc i Roma i kare ma ocoyo waragane bot jo Pilipi.  Kadi bed en onongo tye mabuc, en pe ogiko tito kwena bot acikari kacel ki wele ma gilime. Paulo otito kwena ki mit kom i kare ma kwone olokke, dok man ocuko cwiny utmege me ‘tito lok pa Lubanga ki tekcwiny, labongo lworo.’​—Kwan Jo Pilipi 1:12-14; 4:22.

Kare ducu yeny yo wek inywak i tic me pwony (Nen paragraf 17) *

17. Mi labol me karewa-ni ma nyuto ni watwero nyako nyig kadi bed watye ki ariya i tic me tito kwena.

17 Omege mapol gitye ka nyuto tekcwiny calo Paulo. Gikwo i lobe ma gamente oketo kigeng i kom ticwa, pi meno giyenyo yo mukene me tito kwena. (Mat. 10:16-20) I lobo mo acel ma kigeng tye iye, laneno me adwol omiyo tam ki lutit kwena ni ngat acel acel myero otit kwena i “wang ticce” ma man tye iye wadine, jiranine, lutino kwan luwote, lutic luwote, kacel ki jo ma en ngeyogi. I nge mwaki aryo, wel kacokke ma i adwol meno omedde matek adada. Twero bedo ni kigeng mo pe i tito kwena ka ma wabedo iye. Ento, pud watwero nongo pwony ma pire tek adada ki bot omege ki lumege magi: Ka itimo jami ducu ma keroni romo me tito kwena bot jo mukene, Jehovah bimini kero me medde ki tito kwena kadi ariya mo keken ongolle.​—Pil. 2:13.

18. Omyero wamok tamwa me timo gin ango?

18 I kare-ni, makato kare mo keken, omyero wamoku tamwa me lubo tira ma tye i waraga pa lakwena Paulo bot utmegiwa ma i Pilipi. Omyero waket jami ma pigi tego obed mukwongo, wabed labongo roc mo, wagwokke ki keto ariya i nyim jo mukene, dok wamedde ki nyako nyig me kit ma atir. Ka watimo meno, ci wabidongo marwa dok wabikelo deyo i kom Wonwa Jehovah.

WER 17 “Amito”

^ para. 5 I kare-ni, mitte ni wajing marwa pi omegiwa makato kare mo keken. Waraga ma kicoyo bot jo Pilipi konyowa me niang kit ma watwero dongo kwede mar, kadi bed tek me nyutone.

^ para. 3 Jo Pilipi 1:10, NW: “Man bimiyo wuketo pi jami ma pigi tego bedo mukwongo, wek wubed labongo roc mo dok pe wuket ariya i nyim jo mukene nio wa i nino pa Kricito.”

^ para. 55 LOK I KOM CAL: I kare ma kitye ka dunyo Ot me Ker, omego Joe ocung mot ka boko lok ki omego mo acel gin ki wode. Man ocwero cwiny Mike, omego ma tye ka tic ki macin me yweyo ot. En tye ka tam ni, ‘Joe myero obed ka tic me ka boko lok.’ Lacen Mike oneno kit ma Joe tye ka konyo kwede laminwa mo mutegi. Gin man ogudo cwiny Mike dok opoyo wiye me tam i kom kit mabeco ma Joe tye kwede.

^ para. 59 LOK I KOM CAL: I lobo mo acel ma pe kiye ni Lucaden gutit kwena atyer, omego mo orwatte ki ngat mo ma en ngeyo dok en tye ka nywako kwena me Ker-ri kwede ki diro. Lacen ma en dok tye i yweyo manok i ka ticce, omego-ni tye ka miyo caden bot latic lawote.