Cit atir i jami ma tye

Cit atir ka ma nyuto lok ma tye iye

Yeny Gin me Wel Makato Jabu

Yeny Gin me Wel Makato Jabu

Tika dong i nino mo inongo jabu mo? Jo manok adada aye dong gunongo. Ento, dano milion gunongo gin mo maber makato. Man aye ryeko mua ki bot Lubanga, ma ‘pe gitwero poro welle ki jabu.’—Yubu 28:12, 16.

LUTINO kwan me Baibul bene girom ki ngat ma tye ka yenyo jabu. Lutino kwan meno myero gutute matek me kwedo lok i Ginacoya wek gunong ryeko ma a ki iye. Macalo lutino kwan me Baibul, gin ango ma watwero pwonyone ki i neno yo adek kit ma kiyenyo kwede ki jabu?

INONGO JABU!

Go kong ni itye ka wot i dog nam ci ineno gin mo matidi ma ryeny. I kule piny ci cwinyi obedo yom me neno ni meno obedo jabu. Nyige tidi mito rom ki wi kibirit dok nongone tek calo kidi dayaman me wel. Ngene kene ni, ibicako neno ka dok pud itwero nongo mukene.

I yo acel-li, twero bedo ni wi pud po i kom nino ma latic pa Jehovah odwongo iye doggola-ni me tito boti kwena maber ma tye i Baibul. Gwok nyo wi po i kom nino ma inongo iye lok me ada ma kitwero porone ki jabu. Romo bedo ni pud wi po i kom kare ma ingeyo iye nying Lubanga Jehovah ki i Baibul pi tyen mukwongo. (Jab. 83:18) Nyo bene ipwonyo ni itwero bedo larem Jehovah. (Yak. 2:23) Iniang cutcut ni inongo gin mo maber makato jabu! Twero bedo ni ibedo ki miti me medde ki nongo jabu i yo me cwiny.

INONGO MUKENE!

Ngidi-ngidi jabu matino i cawa mukene gigure i nam. I kare macalo man, luyeny jabu ma gitiyo matek gitwero nongo jabu madit, ma welgi romo dolla mapol.

I kare ma icako kwano Baibul ki Lacaden pa Jehovah mo, twero bedo ni iwinyo calo ngat ma tye ka golo te pii ka ma jabu tye iye. Lwodo lok i kom gin ma inongo ki Baibul twero medo ngec-ci, dok weko idongo i yo me cwiny. Ka itye ka lwodo lok i kom ngec ma inongo ki i Baibul, ipwonyo kit me nyikke cok ki Jehovah kun imedde ki bedo i marre ki gen me nongo kwo ma pe tum i anyim.—Yak. 4:8; Juda 20, 21.

Macalo ngat ma tute matek me yenyo jabu, tika itute matek me yenyo lok ada ma pigi tego me Baibul?

Kit macalo ngat moni tute me yenyo jabu, twero bedo ni in bene itute matek me yenyo lonyo  i yo cwiny. I nge pwonyo lok ada me Baibul ma pigi tego, twero bedo ni icako timo jami ma weko ibedo ma ipore me dyero kwoni ki nongo batija.—Mat. 28:19, 20.

MEDDE KI YENYONE!

Ngat moni twero nongo ngidi-ngidi jabu ma tye i got ma con kong oleny ci omake. Kit got meno nongo tye ki ngidi-ngidi jabu dok man twero weko kitongo got meno ci kiliyo jabu ki iye. Ka pud ineno anena, pe itwero neno jabu i got meno. Pingo? Pien got madit ma romo kilo 1,000 twero bedo ki jabu guram 10 keken! Kadi bed kit meno, ki bot layeny jabu, nongo kerone pe opoto nono.

Tute bene mitte ka ngat moni dong opwonyo “lok mukwongo i kom Kricito.” (Ibru 6:1, 2) Myero itute matek wek inongo pwony manyen ki ma itwero ketogi i tic ki i kwano Baibul piri keni. Pi meno, ngo ma itwero timone wek kwan-ni me Baibul obed mamit kadi dong ibedo ka kwano Ginacoya pi mwaki mapol?

Bed ki miti me pwonyo jami manyen. Ket tammi i kom jami ma pigi tego. Medde ki tute matek, ci ibinongo lonyo i Ginacoya ma weko inongo ryeko ki tira pa Lubanga. (Rom. 11:33) Me medo ngec-ci i kom Ginacoya, ti ki jami ma kimiyogi me kwedo lok ma gitye i leb ma megi. Dicwinyi me yenyo tira ma imito ki dok lagam pi lapeny-nyi me Baibul. Peny jo mukene pi ginacoya ma gunongo ni tye me kony ki dok me cuko cwiny. Nywak pwony mamit ma inongo ki i kwanni me Baibul.

Ki lok ada, yubbi myero pe obed me medo ngec-ci keken. Lakwena Paulo omiyo tira ni “ngec meno miyo dano giwakke awaka.” (1 Kor. 8:1) Pi meno, tute matek me bedo ki cwiny me mwolo ki niye matek. Yub me woro pi jo me ot ki kwan piri keni bikonyi me kwo ma rwatte ki cik pa Jehovah dok bicuko cwinyi me konyo jo mukene. Makato ducu, ibibedo ki yomcwiny pien ni inongo gin mo ma welle dit kato jabu.—Car. 3:13, 14.