Cit atir i jami ma tye

Cit atir ka ma nyuto lok ma tye iye

Gin ma Kelo Yomcwiny i Nyom pa Lukricitayo

Gin ma Kelo Yomcwiny i Nyom pa Lukricitayo

“Laco acel acel i kinwu myero omar dakone macalo maro kome kene, ki dako bene myero onen ni eworo cware.”—EP. 5:33.

WER: 87, 3

1. Kadi bed ni nyom cakke ki yomcwiny madit, ento ngo ma jo munyomme myero gunge ni wang ma otimme? (Nen cal ma tye i pot karatac man.)

KA LANYOM oneno pi tyen me acel ngat ma en binyomo i nino me tweyo agit, gin aryo ducu nongo cwinygi opong ki yomcwiny. I kare me cunnegi nyo yamo, margi nongo odongo adada, dok man weko ngat acel acel nongo tye atera me kwonge ni ebibedo lagen i nyomgi. Ki lok ada, alokaloka mitte ka nongo jo aryo magi gikwo kacel kun bene gimoko otgi wek obed matek. Ento Baibul miyo tam maber bot jo ducu ma gumoko tamgi me nyomme, pien Ngat ma lamar ma ocako te yub me nyom mito ni luot ducu gubed ki yomcwiny i nyomgi. (Car. 18:22) Ento, Ginacoya tito ka maleng ni jo ma gitye ki roc ma gunyomme “gibinongo ayelayela me kwo.” (1 Kor. 7:28) Kitwero jwiko ayelayela man nining? Ngo ma biweko Lukricitayo gibedo ki yomcwiny i nyomgi?

2. Kodi mar ango ma jo munyomme myero gunyut i kingi?

2 Baibul tito tyen lok mumiyo mar pire tek. Mar me lirem  (i leb Grik, phi·liʹa) mitte i nyom. Mar ma bedo i kin laco ki dakone (eʹros) medo yomcwiny, ki dong mar i kin jo me paco (stor·geʹ) bene pire tek ka lutino tye. Ento, mar ma cung i kom cik ma iye lac me Baibul (a·gaʹpe) en aye ma kelo adwogi maber i nyom. Lakwena Paulo ocoyo lok madok i kom mar meno ni: “Laco acel acel i kinwu myero omar dakone macalo maro kome kene, ki dako bene myero onen ni eworo cware.”—Ep. 5:33.

TIC PA LACO KI DAKO I NYOM

3. Mar myero obed matek ma rom mene i nyom?

3 Paulo ocoyo ni: “Wun co bene wumar monwu i kit macalo Kricito omaro kwede lwak muye en ci omiyo kwone pigi.” (Ep. 5:25) Wek walub lanen pa Yecu, mitte ni wamarre i kinwa kit ma en omarowa kwede. (Kwan Jon 13:34, 35; 15:12, 13.) Mar i kin Lukricitayo munyomme myero obed matek ma weko ngat acel acel dyero kwone pi lawote kace twere. Bibedo tek adada me timo gin ma kit meno ka winye manok tye i kin jo munyomme. Kadi bed kit meno, mar (a·gaʹpe) “diyo cwinye i kom jami ducu, ye lok ducu, dok bedo ki gen i kare ducu, keto tek bene me ciro jami ducu.” Ada, “mar pe gik.” (1 Cor. 13:7, 8) Ka wigi po i kom kwongegi me marre ki dok me bedo lugen i kingi, ci man bikonyo jo munyomme ma gilworo Lubanga me lubo cikke me cobo peko mo keken ma tye i kingi.

4, 5. (a) Tic ango ma laco tye kwede macalo lawi jo me ode? (b) Dako myero onen mine i te loc pa cware nining? (c) Alokaloka ango ma luot mo acel gutimo?

4 Paulo oloko i kom tic pa ngat acel acel ma i ot kun coyo ni: “Wun mon wumine kenwu i te loc pa cogwu, macalo wumine kenwu bot Rwot. Pien laco obedo lawi dakone, macalo Kricito en aye lawi lwak muye en.” (Ep. 5:22, 23) Cik man pe dwoko rwom pa dako lapiny ka ipore ki pa laco. Ki lok ada, konyo dako me cobo ticce ma Lubanga oyubo pire i kare ma owaco ni: “Pe ber dano [Adam] obed kene; abitimo lakony ma romme.” (Acak. 2:18) Kit macalo Kricito ma obedo “lawi lwak muye en” onyuto mar-ni, laco bene myero otel wi jo me ode i yo me mar. Ka otimo meno, dakone winyo agonya dok cwinye bedo yom me konyo kore, wore, ki dok mine i te locce.

5 Cathy oye ni ka inyomme myero ilok kwoni [1] kun waco ni: “Macalo lamego ma wiye nono, onongo atimo jamina pire kena dok bene agwokke kena. I kare ma anyomme, onongo mitte ni alok kit me kwona kun apwonye me jenge i kom cwara. Pe obedo yot i kare ducu, ento wajingo wat i kinwa macalo jo me ot kun watimo jami kit ma Jehovah mito.” Cware Fred, owaco ni: “Moko tam pira kena onongo pe yot. I nyom, moko tam pi jo aryo dong tek ma loyo. Ento lega bot Jehovah ki dok ciko ita me winyo tam pa dakona, oweko moko tam odoko yot nino ki nino. Awinyo ni dong watye ka tic kacel macalo luot!”

6. Mar “tweyo jami ducu, ribogi kacel ma cobo bene maber licwic” nining ka winye manok tye i nyom?

6 Nyom pa jo ma giye me timo kica i kom roc pa luwotgi moko matek. Gimedde ki ‘diyo cwinygi kekengi kun gitimo kica i kingi.’ Ada, luot aryo ducu gitimo bal. Ka meno otimme, bimiyo kare me nongo pwony i kom bal ma gutimo-ni, me bedo ngat ma timo kica, ki dok me weko mar odor yo me kwogi pien mar “tweyo jami ducu, ribogi kacel ma  cobo bene maber licwic.” (Kol. 3:13, 14) Medo i kom meno, “mar diyo cwinye, dok lakica bene . . . pe bedo kun keto cwinye i kom gin marac ma gitimo i kome.” (1 Kor. 13:4, 5) Winye manok myero kityek woko oyotoyot adada. Luot myero gutemme me cobo lok mo keken ma tye i kingi ma nongo peya ceng opoto. (Ep. 4:26, 27) Wacone ki cwinyi ducu ni, “Tima kica pi cwero cwinyi,” mito mwolo ki tekcwiny, ento twero kelo alokaloka madit i cobo peko ki dok jingo wat i kin luot moni.

PIRE TEK ME TERO DAKO MOT DOK KI MAR

7, 8. (a) Tam ango ma Baibul miyo ma lubbe ki nyuto mar i yo me buto i kin jo munyomme? (b) Pingo luot myero guter luwotgi mot dok i yo me mar?

7 Baibul miyo bot luot tira ma twero konyogi me bedo ki neno mupore madok i kom lok me cobo mitigi i yo me buto. (Kwan 1 Jo Korint 7:3-5.) Paro ki dok cobo miti pa luoti i yo me mar pire tek. Dako ka pe itero mot dok ki mar, pe twero bedo ki yomcwiny me nongo mit pa rwatte i buto. Kimiyo tam bot co me tero mongi ki “niang maber.” (1 Pet. 3:7) Miti me buto myero pe kidi ngat moni adiya iye nyo dok kipeny tektek, ento myero obin pire kene. Miti pa co mere bino oyotoyot adada ka iporo ki mon, ento myero karene obed mupore pi gin aryo-ni ducu.

8 Kadi bed ni Baibul pe omiyo macalo cik kit ma myero kinyut kwede ki mar ki bene wang cone ka odok i lok me buto, ento bene pud tito jami mogo ma myero kitim me nyuto mar. (Wer 1:2; 2:6) Luot ma Lukricitayo myero guter luwotgi mot dok i yo me mar.

9. Pingo bedo ki miti i kom ngat mo mapat ki luoti pe opore?

9 Mar matek pi Lubanga ki jiraniwa pe biweko ngat nyo gin mo keken balo wat ma tye i kin jo munyomme. Nyom mukene pe tye maber nyo bene oket woko pi neno cal ki coc ma tugo miti me buto. Kodi miti macalo man nyo bedo ki miti i kom ngat mapat ki luoti myero kijwa woko. Kadi wa loko lok ore ki ngat mo ma pe luoti pe nyuto mar pi nyom dok myero kijwa woko. Ka wiwa po ni Lubanga ngeyo tamwa ki ticwa ci bicuko cwinywa me yomo cwinye kun bene wabedo maleng.—Kwan Matayo 5:27, 28; Jo Ibru 4:13.

KA PEKO TYE I NYOM

10, 11. (a) Keto nyom tye ka medde i rom mene? (b) Ngo ma Baibul loko i kom pokke? (c) Gin ango ma bikonyo jo munyomme pe me pokke oyotoyot adada?

10 Ka pe kicobo peko ma tye i nyom ci twero weko ngat acel nyo luot ducu cako tam i kom pokke nyo keto nyom. I lobe mogo, nucu pa jo munyomme dong nyomgi oket woko. Man pe obedo gin ma maro timme i kacokke pa Lukricitayo, ento kit ma peko tye ka medde kwede i kin Lukricitayo ma gunyomme bene weko wabedo ki par mapol.

11 Baibul miyo tira man ni: “Dako pe okwer cware. . . . Ento ka ce dako mo dong oweko cware, myero obed kene, nyo odwog cen bot cware, pe oger laco mo mukene. Dok laco bene pe myero oryem dakone.” (1 Kor. 7:10, 11) Pokke ki bot luoti myero pe kiter calo obedo lok me tuko mo ata. Kadi bed ni kitwero neno pokke calo yat lacang pekki mogo madongo ma twero bino, ento medo peko ameda. I nge nwoyo lok ma Lubanga owaco ni laco biweko wonne  ki minne ci moko i kom dakone, Yecu owaco ni: “Gin ma Lubanga oribo kacel, dano pe opok kingi.” (Mat. 19:3-6; Acak. 2:24) Man bene te lokke ni kadi wa laco nyo dako pe otem poko “gin ma Lubanga oribo kacel.” Jehovah mito ni to aye myero opok kin jo munyomme. (1 Kor. 7:39) Ngeyo ni wan ducu wabicung i nyim komker pa Lubanga myero ocuk cwiny jo munyomme me tute matek me cobo peko mo keken oyotoyot adada wek pe onya.

12. Gin ango ma twero weko jo munyomme gicako tamo pi pokke?

12 Bedo ki miti i kom jami mogo ma pe twero timme aye tye ka kelo pekki mapol i kin jo munyomme. Ka lek me bedo i nyom ki yomcwiny i cawa ducu pe ocobbe, ngat moni twero cako winyo ni mitine pe ocobbe, kibwole, nyo cwinye doko kec adada. Apokapoka i kom kit ma giwinyo kwede nyo kit ma gudongo kwede twero kelo lok madit, nyo winye manok i lok kom cente, wadi, ki dong nywal. Kadi bed kit meno, tye me yomcwiny ni Lukricitayo mapol ma gunyomme ginongo tira mapol ma gitwero tic kwede me cobo pekogi pien nongo giye ni tira pa Lubanga otelgi.

13. Tyen lok ango ma twero weko Lukricitayo munyomme gipokke?

13 Jo munyomme gitwero pokke pi tyen lok mogo. Ka ngat moni kwero konyo kor luote akaka, lwenyo i kome, ki bene keto kwo pa ngat moni i yo me cwiny ka mading magi gubedo tyen lok mogo ma twero weko jo moni gipokke. Luot ma gitye ki peko i nyomgi gitwero penyo pi kony ki bot luelda. Omege magi ma guteggi i yo me cwiny gitwero konyo Lukricitayo ma gunyomme me keto cik ma tye i Lok pa Lubanga i tic. Me cobo peko ma tye i kin jo munyomme, myero bene waleg pi cwiny maleng pa Jehovah wek okonywa me keto cik ma iye lac ki dok nyako nyig ma nyak pi cwiny maleng.—Gal. 5:22, 23. [2]

14. Gin ango ma Baibul waco bot Lukricitayo ma gunyomme ki jo ma pe giworo Jehovah?

14 I kine mogo, Lakricitayo nongo onyomme ki ngat mo ma pe obedo latic pa Jehovah. Ka tye kit meno, Baibul bene miyo tyen lok maber ma weko gimedde ki bedo kacel. (Kwan 1 Jo Korint 7:12-14.) Kadi bed ni luot ma pe laye-ni oniang nyo pe, en “doko leng” pien nongo onyomme ki laye. Latin mo keken ma gunywalo i kingi nongo “leng” dok nongo tye i te gwok pa Lubanga. Paulo otito ni: “In dako, ingeyo nining ka ibilaro cwari? Nyo in laco, ingeyo nining ka ibilaro dakoni?” (1 Kor. 7:16) Watye ki labol mapol pa Lukricitayo ma gukonyo luotgi me doko lutic pa Jehovah.

15, 16. (a) Tira ango ma Baibul miyo bot mon ma Lukricitayo ma coggi pe gubedo lutic pa Lubanga? (b) Gin ango ma Lakricitayo myero otim “ka ngat ma pe oye Yecu mito pokke woko”?

15 Lakwena Petero omiyo tira bot mon ma gin Lukricitayo ni myero gumine i te loc pa coggi, pien ‘gitwero lokke pi kit pa mongi, kadi bed gin ki komgi pe giloko lok mo ki doggi, ento ka guneno kitgi maleng ma nen me woro.’ Ka en timo jami ma nyuto “cwiny mamwol, ma ling mot; meno aye welle dit i nyim Lubanga,” dok man twero loko tam pa cware me jolo wore me ada ma loyo bedo ka tito pi niyene.—1 Pet. 3:1-4.

16 Ka luot ma pe laye oyero me pokke woko kono? Baibul waco ni: “Ka ngat ma pe oye Yecu mito pokke woko ki lawote, wek opokke. Dong lok macalo meno Lakricitayo ma laco nyo dako pe tye iye ki dic mo, pien Lubanga olwongowa ni  wabed ki kuc.” (1 Kor. 7:15) Man pe te lokke ni Lakricitayo dong tye agonya me nyomme, ento man nyuto ni pe tye cik mo ma weko en diyo lawote wek gibed kacel. Pokke olo to twero weko kuc moni bedo tye. Lakricitayo pud medde me bedo ki gen ni meno luote ma opokke-ni twero dwogo cen ki tam manyen ki miti me tic kacel me gwoko nyomgi dok lacen lokke doko laye.

NYOM KI GIN MA MYERO OBED MUKWONGO

Keto pi jami me cwiny mukwongo twero medo yomcwiny i nyom (Nen paragraf 17)

17. Gin ango ma myero obed mukwongo pi Lukricitayo munyomme?

17 Pien watye ka kwo i “agikki piny,” “piny bibedo marac i kare mogo.” (2 Tem. 3:1-5) Ento, ka wacung matek i yo me cwiny, man bikonyowa me lweny matek ki tam maraco me lobo man. Paulo ocoyo ni: “Kare dong odoko ding; cakke kombeddi jo ma tye ki mon myero gubed calo jo ma pe ki mon, . . . jo ma tiyo ki jami me lobo man calo jo ma pe gitye ka tic kwede.” (1 Kor. 7:29-31) Paulo onongo pe tye ka waco ki jo munyomme ni pe gucob ticgi macalo luot. Kit macalo kare dong odoko ding-ngi, pire tek ni waket pi jami me cwiny obed mukwongo.—Mat. 6:33.

18. Pingo twere pi Lukricitayo ma gunyomme me nongo adwogi maber ki me bedo ki yomcwiny i nyom?

18 Kadi bed ni watye ka kwo i kare ma kwo tek dok nyom pa dano mapol tye ka ket, twere me nongo adwogi maber kun wabedo ki yomcwiny i nyom. Ki lok ada, Lukricitayo ma gunyomme dok gimoko i kom jo pa Jehovah gilubo tira me Baibul, dok giye mine i te tela pa cwiny maleng ma bikonyogi me gwoko “gin ma Lubanga oribo kacel.”—Mar. 10:9.

^ [1] (paragraf 5) Nying mogo kiloko.

^ [2] (paragraf 13) Nen lamed ngec i buk me ‘Wubed i Mar pa Lubanga,’ ma wiye tye ni: “Kit ma Baibul Neno Kwede Lok Kom Pokke ki Keto Nyom,” pot. 219-221.