Cit atir i jami ma tye

Kit ma Cokke me Kwowa ki Ticwa Macalo Lukricitayo Myero Obed Kwede

Kit ma Cokke me Kwowa ki Ticwa Macalo Lukricitayo Myero Obed Kwede

Lok ma Tye Iye

1. Cokke me Kwowa ki Ticwa bibedo kit ma kiketo kwede i Yub me Cokke me Kwowa ki Ticwa Macalo Lukricitayo kun kilubo bene kit ma kinyuto kwede piny kany. Myero kicuk cwiny lutit kwena ducu me miyo pwonygi. Jo mukene ma gibino i cokkewa bene gitwero miyo pwony tekke giye i kom pwony me Baibul dok gikwo ma lubbe ki cik ma igi lac me Baibul.​—be-E p. 282.

LOK ME CAKONE

 2. Dakika acel. Cabit ducu, i nge cako cokke ki wer ki lega, wonkom me Cokke me Kwowa ki Ticwa bitugo miti i cwiny dano pi purogram me cokke meno. Dok myero olok tutwalle i kom jami ma pigi tego ma twero konyo kacokke.

LONYO MA TYE I LOK PA LUBANGA

  3. Pwony: Dakika apar. Kiketo wi lok madit me pwony man kacel ki lok aryo nyo adek mo ma pigi tego i Yub me Cokke me Kwowa ki Ticwa. Laelda nyo lakony kor tic mucwiny aye myero omi pwony man. Ka kicako kwano buk manyen me Baibul i cabit meno, ci kibinyuto vidio ma loko i  kom buk meno. Ngat ma tye ka miyo pwony twero lok i kom kit ma vidio meno kubbe kwede ki wi lok madit me pwonye. Ento, myero onen ni enyamo lok ma pigi tego ma kiketogi i Yub me Cokke. Dok ka cawa pud tye, en myero olok i kom cal ki lok ma kicoyo ma kubbe ki pwony meno.

 4. Yenyo Lonyo me Cwiny: Dakika apar. Man obedo lapeny ki lagam, labongo lok mo me cakone, ki me dolo tere. Laelda nyo lakony kor tic mucwiny aye myero odor bute man. En twero poko cawa i kin lapeny adek-ki ma lubbe ki miti pa kacokke. Ento myero kinyam lapeny magi ducu. Dok en twero neno ka ce mitte ni kikwan ginacoya ducu ma kiketo, nyo pe. Jo ma kicimogi myero gumi lagam pi cekon 30 nyo ma pe o.

  5. Kwano Baibul: Dakika angwen nyo ma pe o. Pwony man omego aye myero omi. Lutino kwan ma kiminigi pwony man myero gukwan wang Ginacoya ma kiketo-ni labongo waco lok mo me cakone nyo me dolo tere. Wonkom me cokke myero oket cwinye tutwalle me konyo latin kwan me kwano nyig lok ducu kit ma kicoyo kwede, me kwan mapwot dok i yo ma niange maber kun weko lok ma pigi tego cung ka maleng, me loko dwane i yo mupore, ling ka ma mitte, ki dong me lok kit ma loko kwede jwi. Kit macalo Kwan me Baibul mogo cego dok mukene boco, wonkom me Cokke me Kwowa ki Ticwa myero otam pi kero pa latin kwan ka tye ka pongo fom pi lutino kwan me bute man.

TUTE MATEK I TIC ME PWONY

 6. Dakika aparabic nyo ma pe o. Bute man kiyubo me konyo dano ducu me yubbe maber ki me dongo dirogi i tic me tito kwena ki pwony. Ka ce latin kwan tye ka miyo pwony me lim me acel nyo dok cen ka lim, ci en myero owek pwonye ojenge i kom kit me nyamo lok ma tye i pot karatac me 1 i Yub me Cokke me Kwowa ki Ticwa. Lutit kwena gitwero moko tamgi ka ce myero gimi ginakwana nyo ginyut vidio mo ma tye i kin Jami Ticwa ma Pigi Tego. Me konyo lutit kwena i tic me pwony, kit me nyamo lok ma kiketo i yub me cokke tye ki bute ma waco ni, “Ka ma Ginacoya Man Nonge Iye ki i Kin Jami Ticwa me Pwony.” Lutino kwan gitwero yero ka ce gibitic kwede ka gitye ka miyo pwonygi i cokke, nyo pe. Yub me Cokke me Kwowa ki Ticwa nyuto cawa ma pwony acel acel myero oter. I kine mukene, kiromo medo ngec mukene. Pe mitte ni lutino kwan gumed lok mukene mapol mere pien ni gimito tic ki cawagi ducu. Pwony ma kiyubo maber twero tum ma nongo pud odong dakika acel nyo makato. Ka mitte, kitwero bene miyo pwony man bot luelda.

 7. Vidio pi Kit me Nyamo Lok: Kibinyuto ci kinyamo vidio madok i kom kit me nyamo lok dwe ki dwe. Vidio magi binyuto lim me acel, ki dok cen ka lim. Wonkom me Cokke me Kwowa ki Ticwa aye myero odor bute man.

 8. Lim me Acel: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene nyo jo me gange. Dok ka kimiyo ki lamego ci lakony kore myero obed lamego bene nyo jo me gange. Latin kwan ki lakony kore gitwero bedo piny nyo cung acunga. Lutino kwan myero guyer kit me mot ma rwatte ki wang ticgi. Kit me nyamo lok ma tye i Yub me Cokke me Kwowa ki Ticwa myero obed macalo te guti me lokgi.

 9. Dok Cen ka Lim: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene. Dok ka kimiyo ki lamego ci lakony kore myero obed lamego bene. (km-E 5/97 pot 2) Latin kwan ki lakony kore gitwero bedo piny nyo cung acunga. Latin kwan myero onyut ngo me awaca ka odok cen bot ngat ma onyuto miti i lim me acel. Kit me nyamo lok ma kimiyo i Yub me Cokke me Kwowa ki Ticwa myero obed macalo te guti me lokgi.

 10. Kwano Baibul ki Dano: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene. Dok ka kimiyo ki lamego ci lakony kore myero obed lamego bene. (km-E 5/97 pot 2) Latin kwan ki lakony kore gitwero bedo piny nyo cung acunga.  Pwony man myero onyut kit me kwano Baibul ki dano kun kimiyo i yo ma nyuto ni kwan onongo dong ocakke woko. Pe mitte ni iwac lok mo ma nyuto ni pud wubicako kwan acaka nyo me dolo te kwanwu, nikwanyo ka latin kwan tye ka tic i diro me pwony pi kit me cako nyo dolo te lok. Pe mitte ni kikwan paragraf ducu, kadi bed i kine mukene kitwero kwanone. Myero kinyut diro me pwony maber.

 11. Pwony: Omego aye myero omi pwony man kun miyo bot kacokke.

KWOWA MACALO LUKRICITAYO

 12. I nge cakone ki wer, kibitic ki dakika 15 mukwongo pi pwony acel nyo aryo ma kiyubo pi konyo lwak me keto Cik me Baibul i tic. Ka pe kinyuto anga kikome ma myero omi pwony man, ci laelda nyo lakony kor tic mucwiny twero dorone. Ento luelda keken aye myero gumi kop ma mako kacokkewa.

  13. Kwano Baibul Kacel Macalo Kacokke: Dakika pyeradek nyo ma pe o. Laelda mupore aye myero odor bute man. (Lakony kor tic mucwiny twero doro bute man i kacokke ma luelda nok iye.) Luelda myero gumok anga ma opore me doro bute me Kwano Baibul Kacel Macalo Kacokke. Jo ma kiyerogi myero gudor yub man i yo maber, gugwok cawa, guwek pwony ma pigi tego ma tye i ginacoya okati ka maleng, dok gukony dano ducu me nongo adwogi maber ki i gin ma kitye ka nyamone. Gitwero nongo tam maber ki i tira ma kicoyo i kom kit me doro Wi Lubele. Ka dong kityeko nyamo bute ma kimiyo pi cabit meno, pe mitte ni dok kidur lok mapol. Ka twere, ci kiti ki omege mapatpat me doro ki kwano buk nyo brocuwa ma kitye ka nyamone-ni. Ka wonkom me Cokke me Kwowa ki Ticwa owaco ni myero kijwik cawa ma kibitero i bute man, ci ladorone myero onen kit ma etwero jwikone kwede. En twero yero ni kikal kwano paragraf mukene.

LOK ME GIKONE

  14. Dakika adek nyo ma pe o. Wonkom me Cokke me Kwowa ki Ticwa myero otit wiye wiye lok mogo ma pigi tego ma kinyamo i cokke me nino meno. En bene twero lok i kom jami mogo ma kibinyamo i cokke ma lubo, me labolle lapeny ma kibigamone. Ka cawa pud tye, en twero poyo wi lutino kwan ma gibimiyo pwony i cabit ma lubu. Wonkom me cokke myero okwan lok angeya mo keken kacel ki waraga ma tye bot jo me kacokke i cawa ma en tye ka dolo te cokke. Lok angeya ma jwi kimiyo calo yub me cokke pi tic me pwony ki dong yub me gwoko lengo omyero pe kikwan i wi abam ento kiket i kor ot ka ma kimwono iye lok angeya. Ka cawa pe obiromo me kwano lok angeya nyo waraga ma tye, ci wonkom myero olok ki omege ma bidoro but Cokke me Kwowa macalo Lukricitayo wek gujwik pwonygi macego cego. (Nen  paragraf 13 ki  17.) Cokke bigik ki wer ki lega.

DONG DIRONI ME KWAN KI PWONY

 15. Lutino kwan ducu myero guwot ki brocuwagi me Pwony i Cokke me Kwowa ki Ticwa dok wonkom myero oti ki brocuwa man ka en tye ka pwoyo nyo miyo tira bot lutino kwan. Latin kwan acel acel myero oti i kom diro pwony ma kiketo i braket i nget pwony meno i Yub me Cokke me Kwowa ki Ticwa. Lok ma tye i brocuwa man ma wiye tye ni “Co Piny Kit ma Itye ka Dongo Kwede” kiyubo pi lutino kwan keken. Wonkom pe myero oco gin mo iye.

TIRA

  16. I nge pwony pa latin kwan acel acel, Wonkom me Cokke me Kwowa ki Ticwa myero oti ki dakika ma romo acel me miyo pwoc ki tira kun tiyo ki brocuwa me Pwony. Ka wonkom tye ka lwongo latin kwan moni i wi abam, en pe myero otit diro me pwony ma latin kwan bitic iye. Ento, ka latin kwan otyeko miyo pwonnye, wonkom me cokke myero opwoye, ci dong en twero tito diro me pwony ma latin kwan otiyo iye dok otit gin mumiyo latin kwan omiyo pwonye maber nyo otit ki kica ka ma mito ayuba. Wonkom bene twero lok i kom jami mukene ma latin kwan otimo ka en  tamo ni meno bikonyo latin kwan-ni nyo lwak. I nge cokke nyo i kare mukene, wonkom bene twero miyo tira i wi mung bot latin kwan-ni kun tiyo ki brocuwa me Pwony nyo buk me Ministry School.​—Pi ngec mukene ma lubbe ki tic pa wonkom me Cokke me Kwowa ki Ticwa, ki tic pa lami tira, nen  paragraf me 17,  22, ki  24.

CAWA

     17. Pwony mo keken pe myero okat wang cawa ma kimiyo, kadi wa lok pa wonkom me Cokke me Kwowa ki Ticwa. Myero kijuk lutino kwan ma gitye ka miyo pwonygi ki diro ka ce cawagi otum. Ka laelda nyo lakony kor tic okato wang cawane, ci lami tira myero olok kwede i wi mung. (Nen  paragraf 24.) Cokke ducu, wa ki wer kacel ki lega omyero oter cawa 1 ki dakika 45.

LIMO PA LANENO ME ADWOL

 18. Ka kacokke tye ki limo pa laneno, ci yub me cokke myero owot kit ma kitito kwede i Yub me Cokke me Kwowa ki Ticwa, ento pe kibibedo ki Kwano Baibul Kacel Macalo Kacokke i bute me Kwowa Macalo Lukricitayo. Me ka meno, kibileyo kakare ki pwony pa laneno ma tero dakika 30. Ento ma peya laneno omiyo pwony meno, wonkom me Cokke me Kwowa ki Ticwa myero kong owot wiye wiye i lok mogo ma pigi tego ma kinyamo i cokke me nino meno ki jami ma kibinyamone i cabit ma lubu, myero bene omi lok angeya ki dok okwan waraga ma tye, ka dong olwong laneno. I nge pwony meno, laneno bidolo te cokke ki wer ma en oyero. En twero lwongo omego mukene me dolone ki lega. Pe kibibedo ki kilaci mukene i cukul me aryo i cabit me limo pa laneno. Ento gurup mapat ki kacokke madit ma laneno bilimone-ni bibedo ki cokkegi kadi wa i cabit me limo pa laneno. Ento gibiribbe ki jo me kacokke madit ka winyo pwony pa laneno.

CABIT ME GURE ME ADWOL KI GURE MADIT

 19. I cabit me gure me adwol nyo gure madit me rijon, cokke mo keken bibedo pe. Ngat acel acel twero kwano pwony ma kiyubo pi cabit meno pire kene nyo macalo jo me ot.

CABIT ME NIPO

  20. Ka Nipo opoto i dye cabit, ci Cokke me Kwowa ki Ticwa bibedo pe. Ngene kene ni cokke me cito i tic me pwony bibedo tye i nino me Nipo.

LANENO ME COKKE ME KWOWA KI TICWA

21. Komitti pa luelda aye biyero laelda ma myero obed laneno me Cokke me Kwowa ki Ticwa. En aye myero onen ni yub me cokke owoto maber, dok kilubo kore ki kore tira ma kimiyo kany. Kubbe maber myero obed tye i kin en ki lami tira. Ka Yub me Cokke me Kwowa ki Ticwa pi dwe moni oo, laneno me Cokke me Kwowa ki Ticwa myero oco piny nying lutino kwan me dwe meno. (Nen  paragraf me 5-11.) Myero kimi bot latin kwan karatac ma nyuto pwony ma en bitic iye ma nongo pud odong olo cabit adek, kun kitiyo ki Karatac pi Jo ma Bimiyo Pwony i Cokke me Kwowa ki Ticwa (S-89).

WONKOM ME COKKE ME KWOWA KI TICWA

  22. Cabit ki cabit, laelda acel bibedo wonkom me Cokke me Kwowa ki Ticwa. (Ka ma luelda nok iye, kitwero tic ki lakony kor tic mucwiny.) En aye biyubo lok me cakone ki lok me gikone dok binyamo vidio ma nyuto kit me nyamo lok ki vidio madok i kom diro me pwony ma tye i brocuwa me Pwony. En aye bene bilwongo jo ma gibibino i wi abam. Dok kitwero medde bene pwony mukene ka luelda nok. Lok ma en loko i nge pwony pa jo mukene myero obed macek. Luelda aye myero gumok angagi ma gupore me bedo wegi kom me Cokke me Kwowa ki Ticwa. Dok kibibedo ka lokogi aloka. I kine mukene, lanen wi Cokke me Kwowa ki Ticwa aye pol kare bitic macalo wonkom me Cokke. Ka laelda moni opore me doro Kwano Baibul Kacel Macalo Kacokke, ci nongo opore bene me bedo wonkom me cokke. Ento myero kiket i wic ni laelda ma bibedo wonkom myero omi pwoc ki tira i yo me mar bot lutino kwan ma gumiyo pwonygi. Wonkom myero onen ni  cokke otum i cawane kikome. (Nen  paragraf 14 ki 17.) Ka wi abam lac dok wonkom mito, ci kitwero keto lakub dwan mukene ka ma en twero cung iye ka tye ka lok i kom pwony ma bilubo, wek omego ma bimiyo pwony meno ocit atir ocung cok ki lakub dwan pa lami pwony. I yo acel-li, wonkom twero bedo i nyim meja ka omego ma bikwano Baibul tye ka kwanone ki dok ka lutino kwan mukene-ni gitye ka miyo pwonygi. Man weko cawa pe balle.

LAKUB KIN LUELDA

 23. Lakub kin luelda nyo laelda ma konyo kore bimiyo ki luelda kacel ki lukony kor tic pwony ma gibimiyone i kacokke, mapat ki pwony pa lutino kwan. Man kwako nyuto anga ma bibedo macalo wonkom me cokke. Lakub kin luelda myero oti kacel ki laneno me Cokke me Kwowa ki Ticwa me neno ni kiketo nying jo ma gibimiyo pwony i ka keto ngec.

LAMI TIRA

   24. Ka twere, ber me tic ki laelda ma miyo pwony i yo mucwiny wek otim tic man. Tic pa lami tira aye me nyuto i wi mung ka ma mito ayuba bot luelda nyo lukony kor tic ma lubbe ki pwonygi, ma man kwako Cokke me Kwowa ki Ticwa, pwony pi lwak, doro ki kwano Wi Lubele i wi abam ki dong Kwano Baibul Kacel Macalo Kacokke. (Nen  paragraf me 17.) Ka luelda ma gimiyo pwony i yo mucwiny gitye mapol, ci mwaka ki mwaka kiromo loko luelda aloka me tic macalo lumi tira. Pe mitte ni lami tira omi tira cawa weng ka teke omego moni omiyo pwonye.

KILACI MUKENE

 25. Ka lutino kwan pol, ci kacokke twero bedo ki kilaci mukene. Kilaci man myero obed ki lami tira mucwiny, tutwalle laelda. Ka mitte, kitwero tic ki lakony kor tic. Luelda aye myero gumok anga ma twero timo tic man ki dok ka mitte ni omyero kiler aleya. Lami tira myero olub tam ma kimiyo i  paragraf me 16. Ka kibibedo ki kilaci mukene, ci lutino kwan myero gukob i rumgi i nge bute me Yenyo Lonyo me Cwiny. Dok myero guribbe ki jo mukene i nge bute me Tute Matek i Tic me Pwony. Ka kibineno vidio ma nyuto kit me nyamo lok, ci jo ma i kilaci mukene-ni gitwero nenone ki i rumgi ka twere. Nyo lami tira twero tic ki cim cing nyo tabulet me nyuto vidio man.

VIDIO

 26. Kibiyero vidio ma rwatte pi cokke man. Kiketo vidio ma kibinyutogi i cokkewa me dye cabit i JW Library®, dok kitwero kwanyone kun kitiyo ki cim cing, tabulet nyo kompiuta. I kine mukene, vidio ma nyuto kit me nyamo lok ma dong kinyuto i cokkewa me dye cabit pud dok kitwero nenone i cokke me cito woko ka pwony.