Cit atir i jami ma tye

Cit atir ka ma nyuto lok ma tye iye

 KWOWA MACALO LUKRICITAYO

Nong Yomcwiny i Tito Kwena Maber-ri

Nong Yomcwiny i Tito Kwena Maber-ri

Tika dong inongo ni tito kwena tek? Pol pa wan watwero gamo lapeny meno ni eyo. Pingo? Romo bedo ni kare ki kare warwatte ki dano i wang ticwa ma cwinygi nok i kom kwenawa nyo giger nyo wan kikomwa aye walworo lok ki dano ma pe wangeyo. Adada, jami magi twero rwenyo yomcwinywa woko. Ento, wan waworo Lubanga ma cwinye yom ma mito ni wati pire ki yomcwiny. (Jab 100:2; 1Tem 1:11, NW) Tyen lok adek mene ma omiyo omyero wanong yomcwiny i tito kwena?

Me acel, watye ka tito kwena me gen. Kadi bed gen pa dano tye ka rweny woko i kareni, pud watwero tero botgi “lok maber me gin maber.” (Ic 52:7) Ento kwena maber me Ker pa Lubanga bene twero keliwa yomcwiny. Dong, ma peya icito ka tito kwena, lwod lok i kom mot ma Ker pa Lubanga bikelone i wi lobo ducu.

Me aryo, kwena maber-ri konyo kwo pa dano dok dongo watgi ki Lubanga. Gipwonnye me weko tim maraco dok ginongo gen me kwo nakanaka. (Ic 48:17, 18; Rom 1:16) Watye calo lutic ma gitye ka yenyo dano me alara i kabedo ma peko opoto iye. Kadi bed jo mogo pe gimito ni kilargi, ento pud wamedde ki yenyo jo ma gimito larre.Mat 10:11-14.

Me adek, dok ma pire tek loyo, tito kwena kelo deyo bot Jehovah. En tero ticwa me miyo caden calo gin ma pire tek adada. (Ic 43:10; Ibru 6:10) Medo i kom meno, en miyo botwa cwiny mere maleng me cobo tic man. Pi meno, leg Jehovah wek omini yomcwiny ma bino pi cwiny maleng. (Gal 5:22) Ki kony ma mege, watwero loyo lworo ma watye kwede ci watito kwena ki tekcwiny. (Tic 4:31) Dong ka watimo kit meno, ci wabinongo yomcwiny i ticwa me tito kwena kadi bed dano gudok i kwenawa i yo maber nyo marac.Ejek 3:3.

Imito ni wangi obed ma nen nining ka itye ka tito kwena? Itwero nyuto yomcwiny nining?

NEN VIDIO MA WIYE TYE NI NONG YOMCWINY ODOCO KI KWAN KACEL KI LWODO LOK, CI INGEYE WUGAM LAPENY MAGI:

  • Pingo myero water kwan piwa kenwa calo gin ma pire tek, kadi bed wacwalo kare malac i tito kwena dwe ki dwe?

  • I yo mene ma omyero walub lanen pa Maliam?

  • Cawa mene ma in ikwanyo me lwodo Lok pa Lubanga?

  • Ngo ma keli yomcwiny ka itye ka tito lok me kwena maber-ri?