Cit atir i jami ma tye

Cit atir ka ma nyuto lok ma tye iye

 PWONY ME 13

Yakobo ki Ecau Guyubo Wat i Kingi

Yakobo ki Ecau Guyubo Wat i Kingi

Jehovah ocikke bot Yakobo ni ebigwoke kit ma en egwoko kwede Abraim ki Icaka. Yakobo oyubo pacone i kabedo ma kilwongo ni Karan, ka ma en onyomme iye ci onywalo lutino mapol, dok odoko lalonyo adada.

Lacen, Jehovah owaco ki Yakobo ni: ‘Dong idok i lobo pa kwarowu.’ Ci Yakobo ki jo me pacone ducu gucako wot mabor adada. Ma gitye ka wot i yo, lutic pa Yakobo gubino bote ci guwaco bote ni: ‘Omeru Ecau tye ka bino ki co 400 kulu!’ Yakobo onongo lworo ni Ecau mito wanne ki jo me ode. En olego bot Jehovah ni: ‘Lara do ki i cing omera.’ Orwone, Yakobo ocwalo romi, dyegi, dyangi, kinaga, ki kana mapol macalo mot bot omine Ecau.

I dyewor meno ma Yakobo onongo tye kene, en oneno lamalaika! Lamalaika-ni ocako lweny kwede. Gulwenyo nio ka piny oruu. Kadi bed Yakobo onongo awano, ento en pe oilo cinge. Lamalaika owaco ni: ‘Weka dong aciti.’ Ento Yakobo ogamo ni: ‘Pe abiweki nio wang ma kong imiya mot.’

Lamalaika-ni omiyo mot bot Yakobo. Yakobo dong ongeyo ni Jehovah pe biweko Ecau keto awano i kome.

I odiko meno, Yakobo oneno ki ka mabor ka Ecau tye ka bino ki co 400 kulu. Yakobo owoto anyim oweko jo me ode angec ci  okulle piny tyen abiro kulu i nyim ominne. Ecau oringo bot Yakobo ka okwako kore. Omego magi gucako koko matek ci guyubo wat i kingi. Itamo ni Jehovah owinyo nining i kom gin ma Yakobo otimo?

Lacen, Ecau odok cen i pacone ci Yakobo omedde ki wotte. Yakobo onongo tye ki lutino awobe 12. Nyinggi Reuben, Cimeon, Levi, Juda, Dan, Naputali, Gad, Acer, Icakar, Jabulon, Yucepu, ki dong Benjamin. Jehovah otiyo ki wod pa Yakobo ma nyinge Yucepu me laro Jone. Ingeyo kit ma otimo man kwede? Kong dong wanenu lok man.

“Wumar lukworwu, dok bene wuleg Lubanga pi jo ma keto ayelayela i komwu, wek wudok litino pa Wonwu ma tye i polo.”​—Matayo 5:44, 45