Cit atir i jami ma tye

Cit atir ka ma nyuto lok ma tye iye

 PWONY ME 10

Wupo i kom Dako pa Lot

Wupo i kom Dako pa Lot

Lot onongo bedo kacel ki Abraim omin babane, i lobo Kanaan. Oo kare mo ma leyi pa Abraim ki Lot onya mapol adada ma kabedo meno dong pe romogi. Abraim owaco bot Lot ni: ‘Wan pe dong watwero bedo kacel. Tim ber iyer ka ma imito wot iye, ci an abicito tung ka mukene.’ Man onyuto ni Abraim pe laworo, pe kumeno?

Lot oneno kabedo mo ma mwonya adada, macok ki boma ma kilwongo ni Codom. Kabedo meno onongo tye ki pii madwong ki lum ma olot maboco. Pi meno en oyero kabedo man ci okobo iye ki jo me ode. I agikkine gudak gubedo i Codom.

Dano me Codom ki boma macok kenyu ma kilwongo ni Gomora onongo kitgi rac adada. Ki lok ada, kitgi obedo rac ma Jehovah omoko tamme me wango boma magi woko. Ento Lubanga onongo mito laro Lot ki jo me ode, pi meno en ooro malaika aryo me cikogi ni: ‘Wurune! Wua woko ki i boma man! Jehovah bityeko boma man woko!’

Lot pe oa cutcut. Obedo ka galle. Pi man lumalaika gumako cing Lot, dakone, ki anyiragi aryo ci guterogi woko ki i boma man oyotoyot kun giwacci: ‘Wuring! Wular kwowu, pe wulokke wunen ngewu. Ka wuneno ngewu, wubito woko!’

I kare ma guo i boma ma kilwongo ni Joar, Jehovah ocwalo mac ki gweng calfa ocwer i kom Codom ki Gomora. Kijwero boma aryo magi  ki pete tere. I kare ma dako pa Lot okwero winyo Jehovah ci olokke oneno ngeye, otugi lokke odoko wir me kado! Ento Lot ki anyirane gubwot pien gulubo cik pa Jehovah. Myero obed ni cwinygi ocwer mada ni dako pa Lot okwero winyo Lubanga. Man pwonyowa kit ma pire tek kwede me lubo cik pa Jehovah.

‘Wupo i kom dako pa Lot.’​—Luka 17:32