Cit atir i jami ma tye

Cit atir ka ma nyuto lok ma tye iye

 PWONY ME 8

Abraim ki Cara Guwinyo Dog Lubanga

Abraim ki Cara Guwinyo Dog Lubanga

Tye boma mo macok ki Babel ma kilwongo ni Ur, ka ma dano onongo giworo iye lubange mapol ma ka woro Jehovah. Ento onongo tye laco mo i boma me Ur ma woro Jehovah keken. Nyinge Abraim.

Jehovah owaco bot Abraim ni: ‘A woko ki i lobowu ki bot wadiwu, icit i lobo ma abinyutti.’ Ci Lubanga ocikke ni: ‘Ibidoko rok madit, dok abitimo jami mabeco bot jo mapol i wi lobo ducu pi in.’

Abraim onongo pe ngeyo ka ma Jehovah bicwalle iye, ento en onongo geno Jehovah. Dong Abraim, dakone Cara, wonne Tera, ki Lot latin pa ominne, gudolo yecgi ci gucako wot me cito ka mabor.

 Abraim onongo tye ki mwaka 75 i kare ma en ki jo me ode guo i lobo ma Jehovah mito ni gunen. Kilwongo ni lobo me Kanaan. Ki kunnu, Lubanga oloko ki Abraim kun cikke bote ni: ‘Abimiyo lobo ma ineno-ni ducu bot lutinoni.’ Ento Abraim ki Cara onongo dong guti woko ma pe gunywalo lutino. Dong Jehovah onongo bicobo cikkene nining?

“Pi niye Abraim owinyo dog Lubanga i kare ma olwonge me cito i lobo mo mukene ma onongo yam en mito miye ni obed mere. En oa ki i lobo tugi kun pe ngeyo ka ma ecito iye.”​—Jo Ibru 11:8