Cit atir i jami ma tye

Cit atir ka ma nyuto lok ma tye iye

 PWONY ME 11

Kitemo Niye pa Abraim

Kitemo Niye pa Abraim

Abraim opwonyo wode Icaka me maro Jehovah ki me geno cikke pa Jehovah ducu. Ento i kare ma Icaka tye ki mwaka 25, Jehovah openyo Abraim ni otim gin mo matek adada. Gin ango?

Lubanga owaco bot Abraim ni: ‘Kwany wodi acel keken-ni ci ityere macalo gitum bota i wi got mo me lobo Moria.’ Abraim onongo pe ngeyo pingo Jehovah openye me timo meno. Ento en pud owinyo lok pa Jehovah.

Odiko con me nino ma lubo meno, Abraim okwanyo Icaka ki luticce aryo ci gucito i lobo Moria. I nge wot pi nino adek, onongo dong gitwero neno wi godi mogo me Moria. Abraim owaco bot luticce ni kong gubed piny gukur ka en ki Icaka gicito ka tyero gityer. Abraim omiyo yen bot Icaka ni oting, dok okwanyo pala bene. Icaka openyo wonne ni: ‘Lee ma wabityero-ni tye kwene?’ Abraim ogamo ni: ‘Woda, Jehovah aye bimiyone.’

I kare ma dong guo i wi got, gucano keno tyer. I nge meno, Abraim otweyo cing Icaka ki tyene ci opyelo i wi keno tyer.

Abraim otingo cinge, okwanyo pala. I cawa meno kikome, lamalaika pa Jehovah olwonge ki i polo, kun wacci: ‘Abraim! Pe iwan awobi-ni! Dong aniang maber ni itye ki niye i kom Lubanga pien ibedo atera me tyero wodi.’ Ci Abraim oneno nyok romo ma tunge  omoko i latin yat moni. Oyotoyot en ogonyo Icaka ci otyero nyok romo meno me kakare.

Cakke ki i nino meno, Jehovah olwongo Abraim ni lareme. Ingeyo pingo? Abraim otimo gin mo keken ma Jehovah onongo mito ni otim, kadi bed pe oniang pingo Jehovah openye me timone.

Jehovah onwoyo cikkene bot Abraim ni: ‘Abimiyi gum, dok abimiyo lutinoni, nyo likwayi ginya mapol.’ Man te lokke ni Jehovah bimiyo mot bot jo ducu ma kitgi beco kun wok ki i ot pa Abraim.

“Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”​—Jon 3:16