Cit atir i jami ma tye

Cit atir ka ma nyuto lok ma tye iye

 DUL ME 39

Wi Lubanga Opo i Kom Wode

Wi Lubanga Opo i Kom Wode

YECU okok i kare ma lareme Lajaro oto. In mono itamo ni Jehovah owinyo malit i kare ma Yecu tye ka deno can paka wa i tone?— Baibul waco ni Lubanga ‘cwinye cwer’ dok bene twero winyo ‘arem’ pi jami ma timme.Jabuli 78:40, 41; Jon 11:35.

Tika itwero goyo kit arem ma Jehovah obedo kwede i kare ma en tye ka neno Wode me amara ka to?— Yecu onongo tye ki gen ni wi Lubanga pe biwil i kome. Man omiyo lokke me agikki ma peya en oto obedo ni: “Aba, amiyo [kwona] i cingi!”Luka 23:46.

Yecu obedo ki gen ni kibicere woko dok kome pe bidong “i Kadec,” nyo i lyel. I nge cer pa Yecu, lakwena Petero okwanyo coc ma i Baibul ma oloko i kom Yecu, kun waco ni: “Mom oweke ata i Kadec, anaka kome dang pe otop.” (Tic pa Lukwena 2:31, Baibul me leb Lango; Jabuli 16:10) Ada, kom Yecu pe onongo kare me balle i bur lyel nyo me top kun doko ngwe.

 I kare ma Yecu tye i lobo, en owaco bot lupwonnyene ni ebito ento pe ebiri i lyel. En otito botgi ni ‘kibineke, ento myero gicere woko i nino me adekke.’ (Luka 9:22) Dong lupwonnyene onongo myero pe gubed ki ur i kare ma Yecu ocer. Ento tika gubedo ki ur?— Kong wanen.

Lapwony Madit-ti oto i kom yat i kine ka cawa abongwen me dye ceng i Ceng Abic. Yucepu, lalonyo mo ma tye lamemba me Lukiko, obedo lapwonnye pa Yecu i mung. I kare ma en oniang ni Yecu oto, en ocito bot Pilato laloc ma obedo Laroma. Openyo me kwanyo kom Yecu piny ki i kom yat wek ecit eyik woko. En okwanyo kom Yecu otero i boro ma tye i potone ma gikwinyo me yiko dano.

I nge keto kome i boro lyel, guloro kidi madit gucibo i dog lyel. Pi meno dog lyel-li giloro woko. I nino me adek-ke, ma obedo Ceng Cabit. Ceng onongo peya otuc, dok piny onongo pud tye macol. Co mogo gubedo kunnu ka kuro lyel. Lalamdog madit aye onongo ocwalogi ka gwoko lyel-li. Tika ingeyo pingo?—

Lulamdog bene onongo guwinyo ni Yecu owacci kibicere woko. Dong me gengo lupwonnyene wek pe gukwal kome ci guwac ni kicero Yecu, lulamdog guketo lukur piny kunnu. Cutcut piny ocako yenge. I col piny, dero omeny matar. Meno kara obedo lamalaika pa Jehovah! Lworo omako lumony matek ma pe gitwero wa ngwec. Lamalaika-ni ocito oloro kidi woko ki i dog lyel. I lyel odong nono!

Pingo lyel odong nono? Ngo ma otimme?

Otimme kit ma lakwena Petero owaco kwede lacen ni: “Man en Yecu ma Lubanga ocero woko.” (Tic pa Lukwena 2:32) Lubanga ocero Yecu ki kom marom ki ma en obedo kwede con ma peya obino i lobo-ni. Kicere ki kom me cwiny calo pa lumalaika. (1 Petero 3:18) Pi meno, wek dano gunen Yecu, en myero kong olokke i kom me lobo man. Tika man aye gin ma en otimo?— Kong wanen.

 Ceng onongo tye ka tuc. Lumony onongo dong gucito woko. Maliam Madalena kacel ki mon mukene ma gubedo lupwonnye pa Yecu onongo gitye ka cito ka ma kiyike iye. Onongo gitye ka lok i kingi kekengi ni: ‘Anga mono ma bidiro botwa kidi mapek-ki ki i dog lyel?’ (Marako 16:3) Ento i kare ma guo ka ma lyel tye iye, dog lyel onongo tye twolo. Dok iye tye nono! Kom lyel pa Yecu onongo peke! Cutcut, Maliam Madalena oringo ocito bot lukwena mukene pa Yecu.

Mon mukene-ni gudong i nget lyel. Gubedo ka tam ni: ‘Kom Yecu mono tye kwene?’ Cutcut co mogo aryo ma bongigi tye ka ryeny gubino. Meno kara onongo lumalaika! Guloko bot mon magi ni: ‘Pingo wuyenyo Yecu kany? Kicere woko. Citu oyotoyot wucitit bot lupwonnyene.’ Tika itwero tamo kit ma mon-ni gungweco oyotoyot kwede! Ki i yo, gurwatte ki laco mo. In ingeyo anga ma laco-ni onongo obedo?—

Laco-ni kara onongo obedo Yecu ma olokke i kom ma nen! En bene dok oloko ki mon-ni ni: ‘Wucit wutit bot lupwonnyena.’ Yomcwiny onongo dong oketo mon magi woko. Gunongo lupwonnye ci guwaco botgi ni: ‘Yecu tye makwo! Waneno en!’ Maliam onongo dong owaco bot Petero gin ki Jon pi lyel ma odong nono. I cawa meno gin gucito ka rotone, kit ma nen kwede i cal kany-nyi. Gin guneno bongo ma onongo kiboyo ki kom Yecu, ci wigi ocung woko. Gutamo ni Yecu tye makwo ento ki tungcel lokke onongo tye me ur ma ye iye onongo tek.

Petero gin ki Jon gitye ka tamo gin ango?

Lacen i otyeno me Ceng Cabit meno, Yecu onyutte bot lupwonnyene aryo ma gitye ka wot i yo ma cito i paco me Emau. Yecu owoto kacel kwedgi kun boko lok kwedgi, ento gin pe gungeye pien en onongo pe tye ki kom ma en obedo kwede con ca. Ento i cawa ma Yecu olego lega me cam kwedgi aye dong guniang ni en. Lupwonnye  gubedo ki yomcwiny madit atika mumiyo gurune me dok cen i Jerucalem kun tye mairo mapol! Nen calo Yecu onyutte bot Petero ni Etye kwo i nge kare man.

Lacen i otyeno me Ceng Cabit meno, lupwonnye mapol gugure kacel i ot. Doggola ducu onongo tye alora. Gupo ni Yecu otuc atura i ot botgi! I cawa meno gin guniang ni Lapwony Madit tye ma kwo dong ada. Go kong yomcwiny ma gubedo kwede!Matayo 28:1-15; Luka 24:1-49; Jon 19:38–20:21.

Pi nino ma romo 40 Yecu obedo ka nyutte bot lupwonnyene ki kom mapat pat me wek gunge ni etye ma kwo. I nge meno en  oweko lobo ka odok cen bot Wonne i polo. (Tic pa Lukwena 1:9-11) Labongo galle, lupwonnyene gucako tito bot dano ducu ni Lubanga ocero Yecu woko ki i kin jo muto. Kadi bed lulamdog gupwodgi kun gineko mogo i kingi, gin gumedde ameda ki tito kwena. Onongo gingeyo ni ka gito, wi Lubanga bipo i komgi kit ma wiye opo kwede i kom Wode.

I but lobo mukene, dano gibedo ka tam i kom ngo i kin dwe ma kicero iye Yecu? Ento in kono itamo ningo?

Lupwonnye pa Yecu me kare macon ca onongo pud dong gipat ki jo mapol me kare-ni ya! I but lobo mukene i kare me cer pa Yecu, dano gitamo mere lok i kom apwoyo ki tong gweno ma kilingo komgi me Easter keken. Baibul pe loko gin mo i kom apwoyo ki tong gweno me Easter. Baibul loko i kom tic pi Lubanga aye.

Watwero bedo calo lupwonnye pa Yecu kun watito bot dano ni Lubanga otiyo gin me aura i kare ma en ocero Wode. Pe myero wabed lwor kadi dano giwaco ni gibinekowa woko. Ka wato, wi Lubanga bipo i komwa ci bicerowa woko kit ma otimo bot Yecu.

Cwinywa mono pe yom mada me ngeyo ni wi Lubanga po i kom jo ma tiyo pire dok ni bicerogi ki i kin jo muto?— Ngeyo jami magi myero omi wacak mito ngeyo kit ma watwero yomo kwede cwiny Lubanga. Mono onongo ingeyo ni watwero yomo cwiny Lubanga?— Wek kong walok i kom yomo cwinye i nge pwony man.

Bedo ki ye i kom cer pa Yecu omyero ojing gennewa ki niyewa matek. Wakwayi me kwano Tic pa Lukwena 2:22-36; 4:18-20; ki 1 Jo Korint 15:3-8, 20-23.