Cit atir i jami ma tye

Cit atir ka ma nyuto lok ma tye iye

 DUL ME 15

Pwony i kom Bedo lakica

Pwony i kom Bedo lakica

MONO pore me bedo ki tam marac i kom ngat mo ma peya iniang i kome?— Pe. Man nongo nyutu ni pe wamaro ngat meno pien ni nyo en dok nen mapat nyo loko leb mukene.

Mono itamo ni opore me bedo ki kodi tam ma kit meno?— Pe. Tam ma kit meno pe opore dok pe nyutu cwiny me kica. Omyero pe wabed ki tam marac i kom ngat mo pien ni en dok nen mapat ki wan.

Tika ingeyo ngat mo ma rangi del kome pat ki megi nyo loko leb mukene?— Gwok nyo bene ingeyo jo mogo ma ginen pat pien ni gunongo awano nyo gitye ki two. In mono inyutu cwiny me kica kacel ki mar bot dano ma nen mapat kwedi?—

Omyero water jo ma ginen mapat ki wan nining?

Ka wawinyo lok pa Lapwony Madit, Yecu Kricito, wabibedo lukica bot dano ducu. Lok me rangi del kom nyo lobo ma ngat moni a ki i iye pe omyero obed gin ma pire tek botwa. Omyero wanyut kica bote. Man aye obedo pwony ma Yecu omiyo kadi bed ni dano ducu pe giye. Kong wanyam lok i kom pwonynyi.

Lajudaya mo ma onongo tye ki tam marac i kom jo mukene obino bot Yecu ci openye ni, ‘Atim ango wek alim kwo ma pe tum?’ Yecu ongeyo ni laco-ni onongo tye ka mito ni ewac ni omyero wabed lukica bot dano ma rangi del komgi rwatte ki megwa nyo gia ki i rokwa keken. Ma ka gamo lapeny meno, Yecu openyo laco-ni ni: ‘Cik pa Lubanga waco ni myero watim gin ango?’

Laco-ni ogamo ni: ‘Mar Jehovah Lubangani ki cwinyi ducu,  dok mar lawoti bene kit macalo imarre keni.’ Yecu owacce ni: ‘Igamo kakare. Medde kitimo meno ci ibinongo kwo ma pe tum.’

Ento, laco-ni onongo pe mito nyutu kica nyo mar bot dano me rangi del kom kacel ki rok mukene. Pi meno en otemo yenyo yo me loyo kop-pi. En openyo Yecu ni: “Lawota anga?” En nen calo onongo mito ni Yecu owacci: “lawoti aye luremi” nyo, “Dano me rangi del kom kacel ki rok ma megi.” Me gamo lapeny meno, Yeco otito lapor acel i kom Lajudaya ki Lacamaria. Lapor-re woto kit man.

Laco mo onongo oa ki i Jerucalem cito piny tung Jeriko. En onongo obedo Lajudaya. I kare ma tye ka wot luyak gumake. Gugoye opoto piny ci gukwanyo centene kacel ki bongine. Luyak-ki gugoye matek ci guweke i teng gudu ma onongo dong cok to.

I nge cawa mo manok, lalamdog pa Lubanga onongo bene tye ka lubo yo acel-lu. En oneno laco-ni ma tye ki ret marac. Ngo ma onongo in ibitimo?— Lalamdog-gi omedde mere ki wotte i teng gudu tungcel. En pe ocung matwal. En pe otimo gin mo keken me konyo laco meno.

 I ngeye, laco mo mukene ma ladini onongo tye ka lubo yo man. En onongo obedo Lalevi ma tiyo i ot pa Lubanga ma tye i Jerucalem. Tika en ocung me miyo kony?— Pe. En bene otimo gin ma lalamdog-ca otimo.

Me agikkine Lacamaria mo otuc ki i yo acel-li. Tika iromo neno en ma tye ka bino ki i kona?— En oneno Lajudaya-ni obuto kun tye ki ret maraco atika. Omyero wange ni pol pa Lucamaria ki Lujudaya onongo pe gimarre matwal. (Jon 4:9) Pi meno, Lacamaria-ni mono onongo obiweko laco-ni labongo mine kony? Itamo ni en owaco ki i cwinye ni: ‘Ngo mono ma weko akonyo Lajudaya man? En mono nongo bikonya ka an aye onongo awanne’?

Pingo Lacamaria-ni obedo lawot dano-nu maber?

 Kica omako Lacamaria-ni i kare ma oneno laco-ni tye obuto i teng gudu. En onongo pe twero weko laco-ni wek oto. Pi meno, olor piny ki i wi kanane ci ocito bot laco-ni ocako dunyo wang rette. En otiyo mo ki kongo vino i wang rette. Man onongo konyo wek rette ocang. Ci en otweyo wang rette ki bongo.

Lacamaria ni oilo laco-ni motmot i wi kana. I ngeye okomo kwede i lung mot naka nio ka guo i ot welo. Ki kunnu, Lacamaria-ni opango ot bot laco-ni, ci ogwokke maber.

Yecu openyo laco ma en tye ka lok kwede-ni ni: ‘Anga i kin jo adek-ki ma itamo ni obedo lawot dano-nu maber?’ In igamo ningo? Mono obedo lalamdog-gi, Lalevi-ni, nyo Lacamaria-ni?—

Laco-ni ogamo ni: ‘Laco ma ocung ci okonyo laco ma owane-ni aye obedo lawot dano-nu maber.’ Yecu owacce ni: ‘Igamo kakare. In bene cit, icitim kit meno.’Luka 10:25-37.

Meno mono pe obedo lapor maber atika? Lapor-ri nyutu ka maleng jo ma gubedo luwotwa. Pe gubedo luremwa macok keken.  Dok bene pe gubedo jo ma rangi del komgi nen calo mewa nyo giloko lebwa keken. Yecu opwonyowa me bedo lukica bot dano mo keken kadi bed gia ki kwene, ginen nining nyo giloko leb mene.

Man aye kit ma Lubanga Jehovah tye kwede. En pe tye ki tam marac. Yecu owaco ni: ‘Wonwu ma tye i polo miyo cengnge tuc bot jo maraco ki jo mabeco bene. Dok en miyo kot cwer bot jo ma kitgi atir, ki bot jo ma pe kitgi atir.’ Pi meno dong, omyero wabed lukica calo Lubanga bot dano ducu.Matayo 5:44-48.

In itwero bedo dano maber bot jo mukene nining?

Dong ka ineno ngat mo ma owane, ngo ma ibitimone?— Ka ngat meno oa ki i lobo mukene nyo rangi del kome pat ki megi kono? En bene obedo lawoti, dok omyero imine kony. Ka ce inongo ni itidi tutwal ma pe iromo mine kony, ci itwero lwongo ngat mo madit wek omi kony. Nyo itwero penyo pi kony ki bot abili nyo lapwony. Meno nyutu bedo ki kica, calo pa laco ma Lacamaria-ni.

Lapwony Madit mito ni wabedo lukica. En mito ni wakony jo mukene labongo parone ni gin gubedo angagi. Man aye oweko en omiyo lapor i kom Lacamaria ma lakica-ni.

Pi pwony ma nyutu bedo lakica i kom dano labongo paro pi rangi del kom nyo rok, kwan Carolok 19:22; Tic pa Lukwena 10:34, 35; ki 17:26.