Cit atir i jami ma tye

Cit atir ka ma nyuto lok ma tye iye

 DUL ME 22

Gin Mumiyo Omyero Pe Walok Goba

Gin Mumiyo Omyero Pe Walok Goba

KET kong ni latin nyako mo owaco bot minne ni: “Abidwogo paco cutcut teke kiketo lutino ki i cukul.” Ento en obedo ka tuko ki lureme ka i ngeye odwogo paco ci owaco ki minne ni: “Lapwonya aye oweko arii i cukul.” Tika rwatte me waco lok ma kit meno?—

Ngo marac ma latin awobi man otimo?

Nyo gwok latin awobi mo owaco bot wonne ni: “Pe, An pe agweyo odilo i ot.” Ento ka en onongo ogweyo kono? Mono rac ka en owaco ni pe gweyo?—

Lapwony madit onyutiwa gin matir ma myero watim. En owaco ni: ‘Ento wuwek lokwu ni Eyo obed Eyo, ki Pe obed Pe, pien gin mo makato lok man nongo oa ki bot larac.’ (Matayo 5:37) Ngo ma onongo Yecu tye ka wacone?— En onongo tye ka wacci omyero watim gin ma waloko.

Tye lapor mo macek i Baibul ma nyutiwa kit ma pire tek kwede me loko lok ada. Man obedo i kom jo mo aryo ma giwacci gibedo lulub kor Yecu. Kong dong wanen gin mutimme.

 Ma peya okato dwe aryo i nge to pa Yecu, lwak dano ma gua ki i kabedo mabor gubino i Jerucalem ka kwero kwer mo ma pire tek pa Lujudaya ma kilwongo ni Pentekote. Lakwena Petero omiyo pwony mo mamit adada i kare ma en otito bot lwak lok i kom Yecu ma Jehovah ocero ki i kin jo muto. Man obedo tyen mukwongo ma jo ma gubino i Jerucalem-mi gupwonyo iye lok i kom Yecu. Mitigi omedde me winyo lok mapol. Pi meno ngo ma gin gutimo?

Gubedo pi kare malac makato kit ma onongo gutamo kwede. Ento i nge kare mo manok, cente pa jo mogo i kingi otum woko mumiyo onongo dong gimito kony me cente pi wilo cam. Lupwonnye pa Yecu ma i Jerucalem onongo gimito konyo wele. Pi meno jo mapol gucato jamigi kun gikelo centene bot lukwena pa Yecu. Ka dong i ngeye lukwena pa Yecu aye gubedo ka miyo centene bot jo ma mito kony.

Anania gin ki dakone Capira ma onongo gitye i kin jo me kacokke me Jerucalem gucato ngomgi. Ngat mo pe owaco botgi ni myero gucat ngom meno. Gin gumoko tam meno pigi kengi. Ento gin gutimo meno pe ni pien gimaro lupwonnye  pa Yecu magi manyen-ni. Ki lok ada, Anania gin ki Capira onongo gimito ni dano gutam ni gin kitgi ber loyo kit ma ginen kwede ki woko. Pi meno gumoko tamgi me waco ni gibimiyo centegi ducu me konyo jo mukene. Gin onongo ada gubimiyo bute keken ento guwaco ni gitye ka miyone ducu. Itamo ningo i kom lok meno?—

Anania obino bot lukwena. Omiyo cente-ni botgi. Ento Lubanga onongo gire ngeyo ni en pe ka miyone ducu. Pi meno Lubanga oweko lakwena Petero ongeyo ni Anania pe tye ka loko lok ada.

Goba ango ma Anania tye ka wacone bot Petero?

I ngeye Petero owacci: ‘Anania, pingo iweko Catan omiyo in itimo gin man? Ngom man onongo meri. Onongo myero bene pe icat ngom meno. Kadi bed ma dong icato ngom-mi, onongo pud itwero moko tammi i kom gin ma myero itim ki cente meno. Ento pingo itye ka timme ni itye ka miyo cente ducu kun imiyo bute keken? Ka itimo man nongo itye ka loko lok goba, pe botwa keken ento bot Lubanga bene.’

Man pe obedo lok me tuko. Anania onongo tye ka loko lok goba! En onongo pe tye ka timo gin ma en owaco-ni. En onongo tye ka timme atima ni etye ka miyone. Baibul waco botwa gin ma otimme i ngeye. Waco ni: ‘Ka Anania owinyo lok pa Petero, en opoto  piny ci oto woko cut.’ Lubanga aye oweko en oto! I ngeye kitingo kome kitero woko ci kiyike.

Ngo mutimme i kom Anania pien ni oloko lok goba?

Ma romo kine ka cawa adek i ngeye, Capira obino. En pe ongeyo gin ma otimme i kom cware. Ci Petero openye ni: ‘Wun aryo ni mono wucato ngomwu i wel cente ma wumiyo botwa-ni?’

Capira ogamo ni: ‘Kakare, wacato ngomwa i wel meno kikome.’ Ento meno onongo obedo lok goba! Gin onongo gugwoko but cente mukene ma gucato ki ngom-mi. Pi meno Lubanga oweko en bene oto woko.Tic pa Lukwena 5:1-11.

Pwony ango ma wanongo ki i kom gin mutimme i kom Anania ki Capira?— Man pwonyowa ni Lubanga pe maro lugoba. Kare ducu en mito ni walok lok ada. Ento pol pa dano giwaco ni loko lok goba pe rac. In mono itamo ni lok ma jo-ni oloko-ni tye ada?— Tika ingeyo ni two, arem, ki to gubino i lobo pi loko lok goba?—

Yecu owaco ni anga mukwongo loko lok goba, dok adwogine obedo ningo?

Wi myero opo ni Larac-ci oloko lok goba bot dako mukwongo, Kawa. En owaco bote ni en pe obito ka okwero winyo lok pa Lubanga ci ocamo nyig yat ma Lubanga owacci pe myero ocam-mi. Kawa oye lok pa Larac-ci ci ocamo nyig yat meno. En oweko Adam ocamo bene. I kare ma gucamo nyig yat-ti gin gudoko lubalo, ma oweko lutinogi ducu kinywalogi ki bal. Dok pi kit ma lutino pa Adam gitye lubalo-ni, gin ducu gudeno can ci guto woko. Kwo matek ki deno can mono ocakke nining?— Acakkigi ducu obedo loko lok goba.

Man aye gin mumiyo Yecu owaco ni Larac-ci “lagoba doki won goba”! En aye okwongo loko lok goba. Ka ngat mo loko lok goba, nongo en tye ka timo gin ma Larac-ci okwongo timone.  Omyero watam i kom lok man ka wawinyo ki i cwinywa ni myero walok lok goba.Jon 8:44.

Awene mono ma iwinyo ki cwinyi ni myero ilok lok goba?— Meno mono pe timme ka itimo gin mo marac?— Itwero balo gin mo kadi bed cwinyi onongo pe mito. Ka kipenyi pire, mono ibiwacci omeru nyo lameru aye obalo gin meno? Nyo myero itimme calo pe ingeyo kit ma gin meno oballe kwede?—

Awene ma itwero winyo ki i cwinyi ni myero ilok lok goba?

Ento ka onongo kimini ki i cukul tic me atima ki gang ento itimo bute keken kono? Myero mono iwacci ityeko ducu kadi bed pe ityeko?— Wiwa myero opo i kom Anania gin ki Capira. Gin pe gutito lok ada ducu. Lubanga oneno rac pa tim meno ci oweko gin guto.

Gin mo keken ma watimo pol kare bedo rac adada ka warubo ki loko lok goba dok bene pe myero watemme me tito gin ma nen calo lok ada. Baibul waco ni: ‘Lok lok ada.’ Dok bene waco ni: “Pe myero wubwolle kekenwu.” Jehovah kare ducu loko lok ada dok bene en mito ni watim kumeno.Jo Epeco 4:25; Jo Kolocai 3:9.

Kare ducu omyero walok lok ada. Meno aye pen lok ma tye i Nia 20:16; Carolok 6:16-19; 12:19; 14:5; 16:6; ki Jo Ibru 4:13.