Cit atir i jami ma tye

Cit atir ka ma nyuto lok ma tye iye

 DUL ME 9

Omyero Wacung Matek i Kom Atematema

Omyero Wacung Matek i Kom Atematema

TIKA ma naka yam dong ngat mo owacci ni itim gin marac?— Tika en odiyo in me timone? Nyo gwok en owacci timo gin meno mit dok pe tye gin mo marac iye?— Ka ngat mo owacciwa ni watim gin ma kumeno nongo en tye ka temowa.

Ngo ma myero watim ka kiketowa i atematema? Omyero mono waye ci watim gin marac?— Meno pe yomo cwiny Lubanga Jehovah. Ento ingeyo anga ma cwinye bedo yom?— Catan Larac-ci.

Catan tye lamone pa Lubanga dok bene tye lamonewa. Pe watwero neno en pien obedo cwec ma tye ki kom me cwiny. Ento en twero nenowa. I nino mo acel, Larac-ci oloko ki Yecu, Lapwony Madit kun tute me yenyo yo me temme. Kong wanen gin ma Yecu otimo. Meno bimiyo wangeyo gin ma myero watim ka kiketowa i atematema.

Ngo ma wi Yecu nen calo ocako poi ye i kare ma en onongo batija?

Kare ducu Yecu onongo mito timo miti pa Lubanga. En onyutu man ka maleng kun nongo Batija i Kulu Jordan. I nge nongo Batija litap, Catan otute me yenyo yo me Temme. Baibul waco ni “polo oyabbe” bot Yecu. (Matayo 3:16) Man twero bedo ni Yecu wiye ocako po i kom kwo ducu macon i kare ma gukwo gin ki Lubanga i polo.

 I nge nongo Batija, Yecu ocito i tim wek elwod lok i kom jami ma wiye ocako po i komgi. Dyewor ki dyeceng pyerangwen otum kunu. Pi kare magi ducu, Yecu pe ocamo gin mo keken, dong kec onongo tye ka nekke adada. I cawa man kikome aye Catan otute me yenyo yo me temo Yecu.

Catan otiyo ki godi me bito Yecu nining?

Larac-ci owaci: “Ka in i Wod pa Lubanga, wac ki godi magi gulokke gudok kwon.” Kwon man onongo pud dong obibedo mit adada! Ento Yecu mono onongo twero loko godi magi me doko kwon?— En onongo twero. Pingo? Pien Yecu Wod pa Lubanga onongo tye ki teko ma dok pat.

ka onongo Larac-ci openyo in kono, onongo mono ibiloko got mo doko kwon?— Kec onongo tye ka neko Yecu. Mono onongo pe bedo ber me timone kadi kicel keken?— Yecu onongo ngeyo ni rac me tic ki tekone i yo ma kumeno. Jehovah onongo omine teko meno me ywayo dano bot en Lubanga ento pe me tic kwede me cobo miti pa en Yecu kene.

Ma ka meno, Yecu owaco bot Catan gin ma gicoyo i Baibul: ‘Dano pe kwo ki kwon keken, ento bedo kwo ki lok ducu ma a ki i dog Jehovah.’ Yecu ongeyo ni timo jami ma yomo cwiny Jehovah pire tek loyo bedo ki gin acama.

 Ento Catan dok pud oteme aye. En otero Yecu i Jerucalem ci ocibe ocung ka ma lamal i wi ot pa Lubanga. Ci Catan owacce ni: ‘Ka in i Wod pa Lubanga, kong ia ki malo kany i pot piny. Pien yam bene gicoyo ni Lumalaika pa Lubanga pe gibiweko iwanne.’

Pingo Catan owaco lok man?— En owaco man me temo Yecu wek otim gin mo me mingo. Ento Yecu pud dok aye okwero winyo lok pa Catan. En owaco ki Catan ni: ‘‘Yam bene gicoyo ni, ‘Pe iom i [Jehovah] Lubangani.’” Yecu ongeyo ni rac me temo Jehovah ki keto kwone ka mading.

Kadi bed kit meno, Catan pe oilo cinge. I ngeye, en otero Yecu i wi got mo ma lamal adada. Ki malo kunnu en onyutu bot Yecu ker, nyo gamente ducu me lobo-ni kacel ki deyogi. Ci Catan owaco bot Yecu ni: ‘Abimiyo jami magi ducu boti, ka iryebbe piny iwora.’

Tam kong mic pa Larac-ci. Tika ada ker, nyo gamente pa dano gubedo pa Catan?— Yecu pe okwero ni pe gubedo pa Catan. Kono jami magi pe gubedo pa Catan, kono Yecu onongo okwero woko. Ada, Catan kikome aye loyo ker me lobo-ni ducu. Baibul bene lwongo en ni “lalo lobo man.”Jon 12:31.

Pingo Catan onongo twero miyo ker magi ducu me lobo bot Yecu?

Ngo ma ibitimone ka Larac-ci ocikke me miyo boti gin mo ka ce iworo en?— Yecu onongo ngeyo ni rac me woro Larac-ci kadi bed ni En ebinongo iye mot. Pi meno Yecu owacce ni: ‘Cit cen, Catan! Pien Baibul wacci Jehovah Lubangani aye myero iwor dok iti pire keken.’Matayo 4:1-10; Luka 4:1-13.

Ngo ma ibitimo ka kiketi i atematema?

Wan bene warwatte ki atematema mapol. Tika ingeyo atematema mogo?— Labol acel ene. Mamani twero tedo mandaji. En romo waco boti ni pe myero icam wang ma cawa me cam oromo. Ento ket ni kec tye ka neki matek, ma miyo itwero bedo ki atematema me camone. Tika ibiwinyo lok pa mamani?— Catan pe mito ni iwiny lok pa mamani.

 Wi myero opo i kom Yecu. En bene onongo kec tye ka nekke matek. Ento en onongo ngeyo ni yomo cwiny Lubanga pire tek loyo cam. Inyutu ni itye calo Yecu ka itimo gin ma mamani wacci.

Twero bedo bene ni lutino mogo gibito in ni imat jayi. Gitwero wacci ni ka imato ci man biweko iwinyo maber adada. Ento man twero balo yotkomi nyo bene neki woko. Nyo lawoti  mo twero miyo boti taa, dok diyi tektek ni imati. Ibitimo gin ango?—

Wi myero opo i kom Yecu. Catan otemo bito Yecu me keto kwone ka ma ding kun wacce ni opye piny ki i wi ot pa Lubanga. Ento Yecu okwero timone woko. Ngo ma ibitimo ka ngat mo odiyo in tektek me timo gin mo marac?— Yecu okwero winyo lok pa Catan. I yo acel-lu, in bene omyero pe iwiny lok pa ngat mo ma diyo in me timo jami maraco.

Pingo tic ki cal i woro rac?

I nino mo kitwero penyi me woro cal, meno obedo gin mo ma Baibul waco ni pe omyero watim. (Nia 20:4, 5) Twero bedo ni man tye but kwer mo ma kikwero ki i cukul. Kitwero wacci ni pe omyero idok i cukul meno tekke ikwero woro cal. Ibitimo gin ango?—

Timo jami matir yot ka dano ducu tye ka timone. Ento timo jami matir romo bedo tek tutwal ka jo mukene gitye ka bitowa ni watim jami maraco. Gitwero waco ni gin ma gitye ka timone-ni pe rac tutwal. Ento lapeny ma pire tek tye ni, Lubanga mono loko iye ningo? En aye ngeyo maber loyo.

Pi meno, labongo paro pi lok pa jo mukene, omyero pe watim jami ma Lubanga wacci giraco. I yo ma kit meno, wayomo cwiny Lubanga kare ducu, dok pe wayomo cwiny Larac-ci.

Ngec mukene madok i kom kit me cung matek i kom atematema me timo jami marac twero nonge i Jabuli 1:1, 2; Carolok 1:10, 11; Matayo 26:41; ki 2 Temceo 2:22.