Cit atir i jami ma tye

Cit atir ka ma nyuto lok ma tye iye

 DUL ME 21

Omyero Mono Wawakke pi Gin mo Keken?

Omyero Mono Wawakke pi Gin mo Keken?

LOK me wakke tere gonye ningo? Tika ingeyo?— Lanen acel tye ene. Tika dong itemo timo gin mo ma pe ingeyo timone maber? Gwok nyo itemo gweyo odilo. Nyo itemo kalo tol. Tika ngat mo dong owacci, “Aa! Aa! Aa! Atwero timone maber aloyo in”?— Ngat meno onongo tye ka wakke.

Iwinyo ki i cwinyi nining ka jo mukene giloko lok ma kumeno? Mono yomo cwinyi?— Ci dong itamo ni jo mukene giwinyo nining ka i wakke botgi?— Mono nyutu kica me waco ki ngat mukene ni, “An angeyo maber aloyo in”?— Jehovah mono maro jo ma giloko kumeno?—

Lapwony Madit onongo ngeyo jo mo ma gitamo ni kitgi atir loyo jo mukene. Gin onongo giwakke kun gicayo jo mukene. Pi meno, i nino mo acel Yecu otito bot luwiny en lapor mo macek me nyutu botgi rac pa wakke. Kong wawiny lapor meno.

Lapor-ri obedo i kom Laparicayo ki lajog mucoro. Luparicayo onongo gitye lupwonye dini ma pol kare ginene kengi ni kitgi atir nyo gileng i yo me cwiny loyo jo mukene. Laparicayo man ma tye i lapor pa Yecu-ni onongo ocito i Jerucalem ka lega i ot pa Lubanga.

Pingo cwiny Lubanga obedo yom i kom lajog mucoro-ni ento pe Laparicayo-ni?

Yecu owacci lajog mucoro bene onongo ocito i Jerucalem ka lega i ot pa Lubanga. Pol pa dano onongo pe gimaro lujog mucoro. Gin onongo gitamo ni lujog mucoro gubedo luaram. Dok obedo lok ada ni lujog mucoro mapol onongo pe gigene.

Ki i ot pa Lubanga, Laparicayo-ni ocako lega bot Lubanga kuman:  ‘Ai Lubanga, apwoyi ni an pe atye labalo calo jo mukene-ni. An pe akwalo dano nyo atimo jami mogo maraco. An pe abedo calo lajog mucoro ca-ni. An dano ma kite atir. Ari kec kiryo i cabit acel wek abed ki kare muromo me tamo lok i komi. Kun bene dul me apar pa jami ducu ma anongo amiyo i ot meri.’ Laparicayo-ni ada otamo ni kite atir loyo jo mukene-ni, pe kumeno?— Dok bene owaco lok man bot Lubanga.

Ento lajog-mucoro ni olego dok mapat. En bene okwero wa ilo wange malo i polo i kare ma tye ka lega. En ocung ka mabor kun okulo wiye piny. Lajog mucoro ni onongo cwinye tye ka cwer pi balle kun dongo kore ma cwinye pe yom. En pe otemme me waco bot Lubanga kit ma en kite ber kwede. Ma ka meno, en olego ni: ‘Ai Lubanga, kica omaki i koma an labalo.’

I kin jo aryo-ni, itamo ni anga ma oyomo cwiny Lubanga? Itamo ni obedo Laparicayo ca ma onongo tamo ni kite atir-ri? Nyo lajog mucoro ma cwinye obedo ka cwer pi balle-ni?—

Yecu owaco ni lajog mucoro-ni aye oyomo cwiny Lubanga. Pingo? Yecu otito ni: ‘Pien dano mo keken ma temme me ile malo kene ni myero enen calo kite atir loyo jo mukene kibidwoko rwomme piny. Ento ngat ma mwolle kene gibimiye doko dit.’Luka 18:9-14.

Pwony ango ma onongo Yecu tye ka pwonyone i  lapor man?— En onongo tye ka pwonyo ni pe myero watam ni wan dok watimo jami maber loyo luwotwa. Pe watwero wacone ni waloyo jo mukene ento jami ma watimo twero nyutu ni watamo ni waloyogi. Tika ma naka yam dong itimo kumeno?— Kong wanen labol pa Petero.

I kare ma Yecu owaco bot lukwenane ni gin gibingwec giweke woko ka kimake, Petero oloko ki awaka ni: ‘Kadi bed jo mukene ducu guweki an pe abiweki matwal!’ Ento lok pa Petero ni onongo pe tye kakare. En onongo tye ki gen mukato kare woko i kome kene. En bene oweko Yecu. Ento i ngeye en odwogo kit ma wabineno kwede i Dul me 30 i buk man.Matayo 26:31-33.

Kong dok wanen labol ma kwako karewa-ni. Gwok nyo in ki latin kwan lawoti kitye ka penyowu i cukul. Ngo ma ibitimo ka ce itwero miyo lagamme cutcut ento lawoti-ni pe twero? Ada cwinyi bedo yom ka ce ingeyo lagamme. Ento itamo ni nyutu cwiny me kica ka ce ipore ki ngat ma pe twero miyo lagam oyot-ti?— Tika opore me temo nyutune ni in dok iryek kun imiyo ngat mukene-ni nen calo pe twero porre kwedi?—

Meno aye obedo gin ma Laparicayo ca otimo. En owakke ni kite tye atir loyo pa lajog mucoro ca. Ento Lapwony Madit owacci Laparicayo-ni otimo gin marac. Tye lok ada ni ngat mo twero timo gin maber loyo ngat mukene. Ento meno pe tyen lokke ni ngat meno dok ber loyo ngat mukene ca.

Tika nongo iber loyo ngat moni ka ce ingeyo jami madwong loye?

Dong ka ngecwa loyo pa ngat mukene, meno mono obedo tyen lok maber me wakke?— Tam kong lok meno. Wan mono aye wayubo adamwa?— Pe kumeno, Lubanga aye omiyo adam botwa ki acel acel. Dok bene pol jami ducu ma wangeyogi-ni wapwonyo ki bot ngat mukene. Gwok nyo wakwano ki i buk mo. Nyo twero bedo ni ngat mo aye otitiwa lok komgi. Kadi bed  ni wanongo yo me cobo peko moni wan kikomwa, ento nongo obino nining?— Nongo watiyo ki adam ma Lubanga aye ominiwa.

Ka ngat mo temme ki tekke ducu, gin maber ma itwero timone aye me pwoye ki waco lok ma cuko cwinye. Wac bote ni imaro gin ma en otimo-ni. Itwero konyo en wek otim maber. Meno aye gin ma imito ni dano gutim boti, pe kumeno?—

Pingo pe opore me wakke ka ce watek loyo ngat mukene?

Jo mukene gitek loyo luwotgi. Ka ce itek iloyo omeru nyo lameru kono? Meno mono myero owek iwakke?— Pe, pe tye kakare. Cam ma wacamo aye konyowa miyo wadongo wabedo matek. Dok Lubanga aye miyo ceng ki kot kacel ki jami ducu ma weko cam dongo, pe kumeno?— Pi meno, omyero wapwo Lubanga ka ce wadongo wabedo matek.Tic pa Lukwena 14:16, 17.

Pe tye ngat mo ma cwinye bedo yom ka winyo ngat mukene ka wakke, pe kumeno?— Omyero wiwa opo i lok pa Yecu ma owacci: ‘Kit ma wamito ni jo mukene gutim botwa, wan bene myero watim botgi kumeno.’ Ka  watimo kumeno, ci pe wabibedo calo Laparicayo ma lawakke i lapor ma Lapwony Madit otito-ni.Luka 6:31.

I kare mo acel ngat mo owacci Yecu ber. Tika Lapwony Madit owaco ni, ‘Kakare, an aber’?— Pe owaco kumeno, en pe oye. Ma ka meno, en owacci: “Pe tye dano mo maber, Lubanga kene aye ber.” (Marako 10:18) Kadi bed Lapwony Madit-ti onongo pe ki roc, en pe owakke. Ma ka meno, en omiyo pak ducu bot Wonne, Jehovah.

Dong, tika tye ngat mo ma watwero wakke pire?— Tye do. Watwero wakke pi Lacwecwa, Lubanga Jehovah. Ka waneno poto pa ceng ma neno mit nyo cwec mukene ma miyo wabedo ki ur, watwero waco bot ngat mo ni, ‘Lubangawa mamwonya tutwal, Jehovah, aye ocweyogi!’ Omyero wabed atera me lok i kom tic madongo ma Jehovah otimo ki mukene ma obitimo i anyim.

Awobi man tye ka wakke pi gin ango?

Kwan Ginacoya ma loko i kom wakke ci pwony kit ma myero wajuk kwede wakke: Carolok 16:5, 18; Jeremia 9:23, 24; 1 Jo Korint 4:7; ki 13:4.