Cit atir i jami ma tye

Cit atir ka ma nyuto lok ma tye iye

 DUL ME 17

Kit me Nongo Yomcwiny

Kit me Nongo Yomcwiny

Pingo Jehovah obedo “Lubanga ma Layomcwiny”?

WAN ducu wamito nongo yomcwiny, pe kumeno?— Ento pol pa dano cwinygi pe yom. In ingeyo pingo?— Pien gin pe gingeyo mung me nongo yomcwiny. Gitamo ni bedo ki jami mapol aye kelo yomcwiny. Ka gunongo jami magi ducu, yomcwinygi-ni pe rii.

Mung ma pire tek tye ene. Lapwony Madit owacci: “Miyo mic kelo yomcwiny makato gamo agama.” (Tic pa Lukwena 20:35, NW) Ci dong, ngo ma myero watim me nongo yomcwiny?— Meno twere ka ce wamiyo jami bot jo mukene kun watiyo pigi. In tika onongo ingeyo meno?—

Kong dok watamu i kom lok man matut. Yecu mono owacci ngat ma gamo mic pe bedo ki yomcwiny?— En pe owaco kumeno. Imaro ka kimini mic, pe kumeno?— Dano ducu maro ka kiminigi  mic. Cwinywa bedo yom ka kiminiwa jami mabeco.

Ento Yecu owacci yomcwiny maditte bino ka wamiyo mic. Pi meno, anga ma iromo wacci pud dong omiyo jami mapol bot dano loyo ngat mo keken?— Lubanga Jehovah.

Baibul waco ni Lubanga aye “miyo kwo ki dano ducu wa ki yweyo ki jami ducu.” En miniwa kot macwer ki i polo ki ceng ma ryeny bene, wek cam ocek ka karegi oromo ma miyo wayeng ki cam. (Tic pa Lukwena 14:17; 17:25) Man aye gin mumiyo Baibul lwongo Jehovah ni “Lubanga ma layomcwiny”! (1 Temceo 1:11, NW) Miyo mic bot jo mukene obedo gin acel ma kelo yomcwiny bot Lubanga. Dong, ka wan bene wamiyo mic, ci wabedo ki yomcwiny.

Ngo ma romo keli yomcwiny ma loyo camo lagalagani ducu keni?

Ngo mono ma watwero miyone bot jo mukene? Itwero gamo lapeny man nining?— I kine mukene mic ma kimiyo kiwilo ki cente. Ka mic ma kiwilo ki i dukan, ci myero icul pire. Pi meno, ka imito miyo mic macalo meno, omyero kong igwok cente ma romo wilone.

Ento pe te lokke ni mic ducu myero kiwil ki i dukan. Me laporre, i nino ma piny lyet, pii amata mangic twero miyo iwinyo agonya. Ka imiyo mic man bot ngat ma orwo pii neko, ibedo ki yomcwiny ma bino pi miyo mic.

I nino mo acel gwok wun ki mamani wuromo tedo lagalagala. Meno romo kelo yomcwiny. Ento ngo ma iromo timone ki lagalagala mukene wek inong yomcwiny madit ma loyo camone ducu keni?— Iromo miyo mogo macalo mic bot laremi mo. Tika imito timone kumeno i kare mukene?—

 Lapwony Madit ki lukwenane onongo gingeyo yomcwiny ma bino pi miyo mic. Ingeyo ngo ma gin gumiyo bot jo mukene?— Obedo gin maber loyo ducu i lobo-ni! Onongo gingeyo lok ada i kom Lubanga, dok gunywako ki yomcwiny kwena man maber-ri ki jo mukene. Gin gutimo man labongo mito ni kiculgi cente mo keken.

Inino mo acel lakwena Paulo ki lareme Luka gurwatte ki dako mo ma bene onongo mito nongo yomcwiny ma bino pi miyo mic. Joni gurwatte kwede i dog kulu. Paulo ki Luka gucito kunnu pien guwinyo ni kabedo meno obedo ka ma kilego iye. Dong ada kit ma gin onongo guwinyo kwede-ni, guo kunnu gunongo mon mogo gitye ka lega.

Paulo ocako tito lok me kwena maber i kom Lubanga Jehovah ki Ker-re bot mon magi. Ngat acel i kingi ma obedo ka winyo lokgi aye dako ma nyinge Ludia. Lacen, Ludia onongo mito timo gin mo me nyutune ni ada emaro lok me kwena maber ma ewinyo-ni. Pi meno en obako doge bot Paulo ki Luka ni: “Ka wuneno ni an lagen bot Rwot [Jehovah], ci wubin wubed i oda.” En oterogi i pacone ci gudoko welone.Tic pa Lukwena 16:13-15.

Ngo ma Ludia tye ka wacone bot Paulo ki Luka?

Cwiny Ludia obedo yom me jolo lutic pa Lubanga magi i pacone. En omarogi mada pien gukonyo en me niang lok i kom Jehovah kacel ki Yecu ki dong kit ma dano romo kwo kwede pi naka. En obedo ki yomcwiny me miyo cam ki kabedo me yweyo bot Paulo ki Luka. Pi meno, miyo jami magi oweko Ludia onongo yomcwiny pien man ada onongo oa ki i cwinye. Meno aye gin ma wiwa myero obed ka po iye. Ngat mo romo wacciwa ni myero wami mic. Ento ka ada pe wamito miyone, ci micce pe bikelo botwa yomcwiny.

Pingo cwiny Ludia yom me gwoko Paulo ki Luka?

Me laporre, ka onongo itye ki cwit mogo ma imito camogi kono? Ka ce awacci ni omyero imi mogo ki latin mukene, tika ibimiyo ki yomcwiny?— Ento ka irwatte ki laremi mo ma cwinyi maro adada kono? Ka obino i wi pire kene me miyo mogo ki laremi, ci itamo ni pe miyo boti yomcwiny?—

 I kare mukene waromo maro ngat moni adada ma wamito ni myero wamine jamiwa ducu kun pe wakano gin mo keken piwa. Ka wadongo marwa pi Lubanga, meno aye kit ma omyero wawiny kwede ki i cwinywa pi En.

Pingo dako ma lacan-ni cwinye yom me miyo gin ducu ma en tye kwede?

Lapwony Madit onongo ngeyo dako mo ma lacan ma owinyo kit meno ki i cwinye. En oneno dako man i ot pa Lubanga i Jerucalem. Dako man onongo tye ki ciling aryo keken, meno aye cente ducu ma en onongo tye kwede. Ento en obolo ciling man woko ducu i ka bolo mot ma tye i ot pa Lubanga. Ngat mo pe owacce ni otim meno. Pol pa jo ma gitye kenyo ducu pe gungeyo gin ma en otimo. En otimo man pien ni onongo oa ki i cwinye dok en i ada onongo maro Jehovah. Bolo ciling man omine yomcwiny.Luka 21:1-4.

Tye yo mapat pat me miyo mic. Tika wi twero po i komgi?— Ka oa ki i cwinywa ni myero wami mic, ci wabibedo ki yomcwiny. Meno aye gin mumiyo Lapwony Madit wacciwa ni: “Wumi, gibimiyowu.” (Luka 6:38) Ka watimo meno, ci wabiyomo cwiny jo mukene. Dok wan aye wabinongo yomcwiny madit loyo ducu!

Kong dok wakwan kit ma miyo mot kelo yomcwiny kwede i Matayo 6:1-4; Luka 14:12-14; ki 2 Jo Korint 9:7.