Cit atir i jami ma tye

Cit atir ka ma nyuto lok ma tye iye

Lok me cakone

Lok me cakone

“Wulub kit pa jo ma pi niyegi, ki pi diyo cwinygi, gitye ka nongo gin ma yam Lubanga ociko pire.”JO IBRU 6:12.

1, 2. Laneno mo acel ma woto awota onongo neno jo ma gukwo i kare me Baibul nining, dok pingo jo magi gitwero bedo lurem mabeco?

I NGE winyo pwony pa laneno mo acel ma woto awota lamego mo ma Lakricitayo owacci: “En loko i kom jo ma gukwo i kare me Baibul calo lureme ma en ongeyogi con.” Lok pa lamego-ni opore pien omego-ni onongo dong okwano Baibul pi mwaki mapol mumiyo ka en loko i kom ngat ma okwo i kare me Baibul, bedo calo tye ka lok i kom lareme kikome.

2 Bibedo ber ka watwero weko jo ma gukwo i kare me Baibul gibedo luremwa. In mono inenogi calo jo ma gukwo ada? Go kong kit ma onongo twero bedo kwede me wot, boko lok, ki cwalo kare me ngeyo co ki mon calo Nua, Abraim, Ruth, Elia, ki Esta. Tam kong kit ma onongo gitwero gudo kwede kwoni—pwony mabeco ki cuko cwiny ma gitwero miyo boti!Kwan Carolok 13:20.

3. (a) Watwero nongo adwogi maber ango ki i pwonyo lok i kom co ki mon ma lugen ma gukwo i kare me Baibul? (b) Wabinyamo lapeny mene?

3 Ngene kene ni i kare me cer pa “jo ma kitgi atir,” wabibedo ki lurem ma kit meno. (Tic 24:15) Ento, kadi bed i kareni pud watwero nongo adwogi maber ki i pwonyo lok i kom co ki mon ma lugen ma gukwo i kare me Baibul. I yo ma nining? Lakwena Paulo omiyo lagam man: “Wulub kit pa jo ma pi niyegi, ki pi diyo cwinygi, gitye ka nongo gin ma yam Lubanga ociko pire.” (Ibru 6:12) Ka wacako kwano pwony i kom co ki mon ma gubedo ki niye, myero kong wanyamu lapeny ma lok pa Paulo kelo i tamwa: Niye obedo gin ango, dong pingo wamito niye? Watwero lubo niye pa jo ma gukwo i kare me Baibul nining?

Niye Obedo Gin Ango dok Pingo Mitte Botwa?

4. Jo mapol gitamo ni niye obedo ngo, dok pingo tamgi-ni pe tye atir?

4 Niye obedo kit mamwonya, ma co ki mon ma wabikwano lok i komgi i buk man gutero calo gin ma pire tek. I kareni, jo mapol pe gingeyo gin ma niye obedo, gitamo ni obedo ye lok ata labongo lanyut mo me mokone. Ento, pe gitye ki ngec matir. Niye pe obedo ye gin moni ata; pe obedo gin ma wawinyo awinya i cwinywa. Ye jami ata rac adada. Gin ma wawinyo awinya i  cwinywa twero rweny woko, dok ye ayea ni Lubanga tye pe romo, pien “kadi cen-gu bene giye kit meno, dok komgi myel.”Yak. 2:19.

5, 6. (a) Niyewa kwako jami aryo mene ma pe nen? (b) Niyewa myero obed matek marom mene? Mi labol.

5 Niye me ada dit kato ye jami ata. Wi opo kit ma Baibul oloko kwede i kom niye. (Kwan Jo Ibru 11:1.) Paulo owacci niye kwako jami aryo ma pe nen. Me acel, kwako jami ma tye ento “pe gineno komgi.” Wangwa pe twero neno jami ma tye i polo—calo Lubanga Jehovah, Wode, nyo Ker ma dong tye ka loc i polo. Me aryo, niye kwako “gin ma dano geno”—jami ma peya otimme. Pe watwero neno lobo manyen ma Ker pa Lubanga cok kelone. Meno mono te lokke ni pe tye lanyut mo ma moko niyewa i kom jami ma tye ki gin ma wageno?

6 Pe kumeno! Paulo otito ni niye me ada cung i kom guti matek. I kare ma en owacci niye “aye ma moko” en otiyo ki nyig lok ma kitwero gonyo ni “waraga me ngom.” Go kong ni ngat moni omiyo boti ot. En twero mini waraga me ngom meno ci wacci, “Paconi manyen en.” Ngene kene ni pe ibibedo i waraga me ngom meno; ento te lokke ni waraga man moko jami ducu ma mitte i te cik, dok rom ki ot kikome. I yo acel-lu, niye matek ma watye kwede weko wageno ni jami ducu ma Lubanga ociko i Lokke wang ma ocobbe.

7. Niye me ada kwako ngo?

7 Pi meno, niye me ada kwako gen ma jenge i kom jami mutimme con ma lubbe ki ngec ma watye kwede i kom Jehovah. Niye miyo waneno en macalo Wonwa me amara dok wageno ni cikkene ducu bicobbe. Ento niye me ada pe gik macek kit meno. Calo gin makwo, omyero wabed ka pitone wek obed kwo. Omyero waket i tic, ka pe, ci to woko.Yak. 2:26.

8. Pingo niye pire tek tutwal?

8 Pingo niye pire tek tutwal? Paulo omiyowa lagam mucwiny. (Kwan Jo Ibru 11:6.) Pe watwero nyiko cok bot Lubanga nyo yomo cwinye ka wape ki niye. Pi meno, niye mitte mada ka wamito cobo miti ma pire tek loyo ma dano ducu gitye kwede: me nyiko cok bot Wonwa me polo, Jehovah ki miyo pak bote.

9. I yo ma nining ma Jehovah onyuto ni engeyo ni wamito niye?

9 Jehovah ngeyo kit ma wamito kwede niye, pi meno en omiyo botwa lanen mogo ma romo pwonyowa kit me dongo kacel ki nyuto niye. En goyo laa i kom kacokke pa Lukricitayo ki miyowa co ma lugen ma gitelowa. Lokke wacci: “Wulub niyegi.” (Ibru  13:7) En dok omiyowa mic mukene. Paulo ocoyo lok i kom “lwak caden mapol,” co ki mon ma gukwo i kare macon dok guweko lanen maber me niye me aluba. (Ibru 12:1) Lutic pa Jehovah ma gin lugen gitye mapol makato ma Paulo oloko i komgi i Jo Ibru cura 11. Baibul opong ki lok ma kicoyo i kom co ki mon, jo matino ki jo mutii, ma gia ki i yo me kwo mapatpat, ma gubedo ki niye dok gitwero pwonyowa jami mapol i kare man ma niye pe-ni.

Watwero Lubo Lanen me Niye pa Jo Mukene Nining?

10. I yo ma nining ma kwan piwa kenwa bikonyowa me lubo lanen pa co ki mon ma lugen ma gukwo i kare me Baibul?

10 Pe itwero lubo lanen pa ngat moni labongo neno en maber. Ka itye ka kwano buk man, ibinongo ni kicwalo cawa malac i kwedo lok wek okonyi me neno co ki mon mogo ma gubedo ki niye matek. Pingo in bene pe ikwany kare muromo me kwedo lok i kom co ki mon magi? Ka itye ka kwan piri keni, tem niang lok ma i Baibul kun itiyo ki jami me kwedo lok ma itye kwede. Ka itye ka lwodo lok i kom jami ma ikwano, tem goyo cal kabedo ki kit me kwo i kare me Baibul. Go ni itye ka neno kabedone, winyo gin ma tye ka timme kunnu ki ngweyo ngwec piny. Ma pire tek loyo, tem niang kit ma jo ma tye kunnu giwinyo kwede. Ka itimo kit meno, ci gibidoko calo dano ma ingeyogi maber, dok mukene giromo doko calo luremi ma ingeyogi con.

11, 12. (a) Itwero winyo ni itye cok ki Abraim ki Cara nining? (b) Itwero nongo adwogi maber ango ki i lanen pa Anna, Elia, ki Camuel?

11 Ka gudoko calo dano ma ingeyogi maber, ci ibimito lubo lanengi. Me labolle, go kong ni kimini tic manyen. Dul pa Jehovah openyi me medo ticci i yo mo. Oromo bedo ni kipenyi ni ikob i wang tic ma can lutit kwena tye iye, nyo ni inywak i yo mo me tito kwena ma pud peya itemo nyo ilworo timone. Ka itye ka lwodo tic manyen man kun iketo i lega, bedo ber ka ilwodo lanen pa Abraim. En ki dakone Cara onongo gitye atera me jalo kwo mayot i boma me Ur dok gunongo mot mapol pi jallegi. Ka itye ka lubo lanengi, ibinongo ni dong ingeyogi maber makato wiati.

12 Ka ngat ma tye cok kwedi oteri i yo marac ma oturo cwinyi, mumiyo iwinyo calo myero igik cito i cokke woko kono? Ka ilwodo lanen pa Anna ki kit ma en pe oweko yet pa Penina ogenge ki cito ka woro Jehovah, ci bikonyi me moko tam matir, dok biweko Anna doko calo laremi me amara. Kit meno bene, ka cwinyi otur kun itamo ni konyi pe, iromo winyo ni itye cok  ki Elia ka ikwano peko ma en owoto ki iye ki kit ma Jehovah ocuko kwede cwinye. Bulu ma gitye i lyeto magwar me donyo i tim tarwang pi dic pa lutino kwan luwotgi, gitwero winyo ni gitye cok ki Camuel ka gukwano kit ma en olwenyo kwede ki tim maraco pa awobe pa Eli i kema me woro.

13. Lubo lanen me niye pa jo ma gukwo i kare me Baibul mono weko niyeni pire pe bedo tek bot Jehovah? Tit kong.

13 Lubo lanen me niye pa jo ma gukwo i kare me Baibul mono weko niyeni pire pe bedo tek bot Jehovah? Pe matwal! Wi opo ni, Lok pa Jehovah cuko cwinywa me lubo lanen pa jo ma ginyutu niye matek. (1 Kor. 4:16; 11:1; 2 Tec. 3:7, 9) Medo i kom meno, jo mogo ma wabipwonyo lok i komgi i buk man, gin bene gulubo lanen me niye pa jo ma gukwongo kwo igi. Me labolle, wabineno i Dul me 17 me buk man ni i lok pa Maliam, en nen calo otiyo ki lok pa Anna, ma obedo lanen bote. Meno tika oweko niye pa Maliam pe obedo matek? Pe kumeno! Me ka meno, lanen pa Anna okonyo Maliam me dongo niyene wek oyub nying maber ki Jehovah.

14, 15. Jami ango ma tye i buk man, dok watwero tic kwede i yo maber nining?

14 Kiyubo buk man i yo ma twero konyo me jingo niyeni. Dul ma i buk man gijenge i kom pwony ma okati i Wi Lubele cakke i mwaka 2008 nio i mwaka 2013 * ma wiye tye ni “Lub Lanengi me Niye.” Ento, dok kimedo lok manyen iye. Dul acel acel tye ki lapeny ma twero konyowa me nyamo ki keto lokke i tic. Kiketo cal mamwonya mapol i buk man, dok cal ma onongo tye con kimedo caji ki kala ma iye. Jami mukene ma twero bedo me kony calo lain ma nyuto kare ma jami otimme iye (timeline) ki mep, bene kimedo. “Lub Lanengi me Niye” obedo gin tic ma kiyubo me kwan piwa kenwa, macalo jo me ot, ki i kacokke. Jo me odi mapol gibinongo ni kwano buk man kacel mit mada.

15 Dong walego ni buk man okonyi me lubo lanen me niye pa lutic pa Jehovah ma lugen ma gukwo con. Walego bene ni okonyi me dongo niyeni ka iwoto ki nyikke cok ki Wonwa me polo, Jehovah!

^ para. 14 Pe kigonyo pwony magi ducu i leb Acholi.