Cit atir i jami ma tye

Cit atir ka ma nyuto lok ma tye iye

 DUL ME PYERARYO

“Dong Aye”

“Dong Aye”

1. Tit arem me cola ma Marita obedo kwede ki pingone.

MARITA onongo twero goyo cal ka ma kikano iye kom omine, i goro ma kicego doge ki got. Arem me cola onongo tye ma oketo kome mapek calo got meno. En onongo pe twero ye ni omine me amara Lajaro dong pe. Nino angwen nicakke ma kwone otum kwede-ni onongo opong ki koko, bino pa welle, ki lok me temo kweyo cwinygi.

2, 3. (a) Neno Yecu romo bedo ni ogudo Marita nining? (b) Lok ma pire tek ma Marita oloko onyuto ngo i kome?

2 Ento man, ngat ma ocung i nyim Marita, obedo larem Lajaro matek adada. Neno Yecu nen calo omedo arem cwinye ameda, pien Yecu kene ki i lobo-ni aye onongo obedo ngat ma twero laro omine. Kadi bed kit meno, en onongo kwe cwiny mo olo i bino pa Yecu botgi i latin taun me Betania ma tye i bad cere. I dakika manok ma gitye kacel kwede, en owinyo maber doki pi neno kica ma onongo nen i wange, ki par ma en nyuto ma cuko cwiny kare ducu. Yecu openye lapeny ma okonye me keto tamme i kom niyene ki nicer. Lok i kingi omiyo Marita owaco lok mo ma pire tek loyo lok mo keken ma en oloko: “Aye ni in i Kricito ma Lubanga oyero, Wod pa Lubanga, ma bino i lobo.”Jon 11:27.

3 Kit ma lok man nyuto kwede, Marita onongo obedo dako ma niyene tek. Lok manok ma Baibul loko i kome miyowa pwony madit ma twero konyowa me jingo niyewa. Me neno kit ma man twere kwede, kong wanenu lok mukwongo i kom Marita i Baibul.

‘Cwinye Ongabbe’

4. I yo ango ma Marita ki omine ki laminne gubedo pat kwede macalo jo me ot, dok watgi ki Yecu onongo tye nining?

4 Dwe mogo angec Lajaro onongo pud tye ma kwo dok maber. Welo mo ma pire tek Yecu Kricito, onongo cok limo ganggi  ma tye i Betania. Lajaro, Marita, ki Maliam onongo gubedo omego ki lumego ma dong gidito ento gin adek-ki ducu pud gibedo i gang acel. Lukwed lok mukene gitamo ni twero bedo ni Marita aye obedo ladit loyo ki i kin gin adek-ki, kit ma en aye nen calo obedo ngat ma welo onongo bino i cinge dok kine mogo kilwongo nyinge mukwongo. (Jon 11:5) Pe tye yo mo me ngeyo ka ngat acel ki i kingi kong onyomme con. Meno dong pe pire tek, gin ma tye aye ni gin gubedo lurem Yecu macok mada. I kare me ticce me pwony i lobo Judaya, ka ma en orwatte iye ki aunauna ki gero matek, Yecu obedo i gang pa jo magi. Labongo akalakala mo, en obedo ki pwoc pi kuc ki kony ma gin gumiye.

5, 6. (a) Pingo tic omako kom Marita tutwal i kare ma Yecu obino ka lim? (b) Ngo ma Maliam otimo i kare ma Yecu obino ka limogi?

5 Marita onongo tamo pi gwoko welle ki ber bedogi i pacogi. En onongo obedo dano ma latic matek ma kare ducu nongo tye ka tic. Kadi wa i limo pa Yecu i ganggi, en obedo ka tic. Manok keken, en ocako yub magwar me tedo wit cam mapat pat pi welone me awora ki gwoko jo mukene ma en owoto kwedgi. I kare ca, gwoko welle onongo pire tek mada. Ka welo oo, onongo kijolo ki noto lemme, kikwanyo war tyene, ci kilwoko tyene, ka dong kiwiro wiye ki moo makur. (Kwan Luka 7:44-47.) Madok i kom lok me kabuto ki cam, yubbe ducu onongo kicobo maber.

6 Tic me yubbe pi bino pa Yecu onongo omako kom Marita ki Maliam mada. Maliam, ma kine mukene kitamo ni maro nongo pwonye tutwal-li myero obed ni kong okonyo laminne i acakki. Ento i kare ma Yecu obino, jami olokke woko. Yecu oneno kare meno calo kare me miyo pwony. En otiyo ki kare meno maber me miyo pwony bot jo ma tye! Yecu pe obedo calo ludito dini me kare ca, en obedo ki woro i kom mon dok opwonyogi i kom Ker pa Lubanga, ma meno aye obedo cwiny lokke madit. Maliam oneno ni kare man myero pe okate, en obedo ka nget Yecu kun winyo lok ducu.

7, 8. Pingo cwiny Marita ocako wang, dok en oloko doge nining?

7 Watwero goyo kit ma cwiny Marita ocako wang kwede. Kit ma wit cam me ateda kacel ki jami mukene me atima pi welo onongo pol-li, paro pi lok man okwanyo tamme woko ki i lok mukene. I kare ma tye ka witte kany ki kuca, en oneno laminne obedo mot ma pe tye ka konye. Man kono omiyo en ocako nyuto wang cwinye? Pe twero bedo me ur ka onyuto cwer cwiny. En onongo pe twero timo jami magi kene labongo kony!

 8 Motmot, Marita onongo dong pe twero diyo cwinye. En ongolo lok pa Yecu, kun waco ni: “Ladit, pe iparo ni lamera oweka atye ka tic kena? Wac bote wek okonya.” (Luka 10:40) Man obedo lok madit mada. Lugony leb mapol gigonyo lapeny meno ni: “Rwot, in pe iparo . . . ?” Ci olego Yecu ni opwony wi Maliam, ni olok bote ki twero wek odok cen ka tic.

9, 10. (a) Yecu ogamo lok pa Marita nining? (b) Wangeyo nining ni Yecu pe onongo tye ka cayo tic matek pa Marita?

9 Lagam pa Yecu twero bedo ni ocungo wi Marita mada, kit ma ocungo wi jo mapol ma gubedo ka kwano Baibul cakke con. En owaco ni: “Marita, Marita, ibedo ki tam mapol, cwinyi ongabbe pi jami mapol, ento tye gin acel keken ma mitte. Maliam oyero dul maber ma pe gibikwanyo woko ki bote.” (Luka 10:41, 42) Ngo ma Yecu onongo tye ka wacone? En onongo mono tye ka wacci Marita maro jami me kom ma loyo maro Jehovah? En mono onongo tye ka cayo ticce matek me yubo cam mamit?

Kadi bed Marita ‘obedo ki tam mapol, ma cwinye ongabbe pi jami mapol,’ en ojolo tira ki mwolo

10 Pe. Yecu oneno ka maleng ni tam pa Marita onongo pe rac. Medo i kom meno, en pe otamo bene ni cam mapol apola onongo rac. En obedo tye i “karama madit” ma Matayo otedo pire. (Luka 5:29) Cam ma Marita tye ka tedone aye onongo pe obedo lok madit i cawa meno; ento, ngo ma en tero calo gin ma pire tek aye. En onongo olungo tamme woko ducu i tedo wit cam mapol ma oweko tamme pe obedo i gin ma pire tek loyo. Gin ma pire tek ango?

Yecu obedo ki pwoc pi cwiny me gwoko welo ma Marita obedo kwede, dok en ongeyo ni Marita onongo pe tye ki tam marac

11, 12. Yecu otiro tam pa Marita i yo me mar nining?

11 Yecu, Wod pa Lubanga Jehovah ma en ocweyo en kikome, onongo tye i paco pa Maritagi pi pwonyo lok me ada. Pe tye gin mo ma onongo pire tek loyo, kadi wa cam mamit kacel ki yubbe-ni ducu. Cwiny Yecu onongo pe yom ni Marita tye ka weko kare maber me jingo niyene tye ka kato, ento oweko ni en aye omok tamme. * Meno gire onongo kwako en, ento pe onongo ber bot Marita me lego Yecu ni odi Maliam wek en bene okeng winyo pwony.

12 Pi meno, Yecu otiro tam pa Marita, onwoyo lwongo nyinge  ki dwan me mar wek cwinye opye, kun tito bote ni pe owek ‘cwinye ongabbe pi jami mapol.’ Cam mo manok, cam acel nyo aryo mo keken romo, tutwalle ka karama me lok pa Lubanga bene tye. Yecu onongo pe twero kwanyo “dul maber” ma Maliam oyero ma obedo nongo pwony ki bot Yecu!

13. Pwony ango ma watwero nongone ki i yo ma Yecu otiro kwede tam pa Marita?

13 Lok ma otimme i kin lumego aryo-ni tye ki pwony madit bot jo ma lubo kor Kricito i kare-ni. Pe omyero wawek gin mo okwany tamwa woko ki i “lok me cwiny.” (Mat. 5:3) Ber gire me bedo ki cwiny me tic matek, nyo me gwoko wele calo Marita, ento omyero pe wawek ‘cwinywa ongabbe’ pi jami ma pigi pe  tek calo lok kom gwoko welle, ma weko wakeng jami ma pigi tego. Wan waribbe ki luworo luwotwa, pe pi camo cam keken ento pi cuko cwinywa kekenwa ki poko mot mogo me cwiny. (Kwan Jo Roma 1:11, 12.) Kadi wa cam manok twero miyo nino ma kit meno bedo me cuko cwiny.

Omego ma Oto ci Okwo

14. Pingo watwero bedo labongo akalakala mo ni Marita oweko lanen maber i jolo tira?

14 Marita tika oye tira pa Yecu ci onongo pwony ki iye? Wangeyo ni onongo. Lakwena Jon, i kare ma tye ka lok i kom omin Marita, owaco ni: “Yecu yam maro Marita ki laminne ki Lajaro.” (Jon 11:5) Dwe mapol onongo okato i nge limo pa Yecu i Betania ma kitito malo-ni. Ngene kene ni, Marita pe obedo ka ling alinga ki dano; pe okudo akemo i iye i kom Yecu pi tira ma en omiye. En ojolo tira ma kimiye. I lok meno bene, en omiyo lanen maber me niye botwa, pien nga ki i kinwa ma pe kimiye tira manok i kine mukene?

15, 16. (a) Gin ango Marita nen calo otimo i kare ma kom omine odoko lit? (b) Pingo gen pa Marita ki pa Maliam pe ocobbe?

15 I kare ma kom omine odoko lit, tic me gwoko omine omako Marita matek. En otimo jami ducu ma en twero wek latwo owiny maber ber ki me konye wek ocang. Kadi bed kit meno, two pa Lajaro omedde ameda. I kare me twone ducu, lumegine gubedo ka ngete pi miye kony. Kare ki kare, myero obed ni Marita obedo ka neno wang omine ma arem oketo woko, kun po pi mwaki mapol me kwogi kacel ki dong yomcwiny ki kumo ma gunywako kwede kacel!

16 I kare ma Lajaro onongo nen calo obito woko, Marita ki Maliam gucwalo kwena bot Yecu. En onongo tye ka pwony i kabedo mo ma tero nino aryo me wot. Gucwalo lok macek ni: “Rwot ngat ma yam imaro kome lit.” (Jon 11:1, 3) Gin onongo gingeyo ni Yecu maro omingi, dok onongo gitye ki niye ni en obitimo gin mo keken me konyo lareme. Tika gumoko i gengi ni Yecu twero o ma gin mo peya otimme? Ka kumeno, ci gengi–ni pe ocobbe. Lajaro oto woko.

17. Ngo ma omiyo wi Marita ocung, dok en otimo ngo i kare ma owinyo ni Yecu cok o i bomagi?

17 Marita ki Maliam gukoko omingi kun giyubo yub me yik kacel ki jolo welle mapol ma gibino ki i Betania ki kabedo ma orumo ngete. Ento, lok ma kiwinyo i kom bino pa Yecu obedo pe. Wi Marita oromo bedo ni ocung woko ma kare woto ki kato.  Motmot, nino angwen okato i nge to pa Lajaro, Marita owinyo ni Yecu dong pe tye mabor ki bomagi. Kit ma en pe bedo mot-ti, kadi wa i cawa me kumo, Marita ogware malo labongo waco ki Maliam, orune me rwatte ki Yecu.Kwan Jon 11:18-20.

18, 19. Marita onyuto gen ango, dok ngo ma omiyo niyene obedo matek?

18 I kare ma Marita oneno Yecu, en owaco lok ma onongo tye ka tono cwinye ki cwiny Maliam pi nino mapol: “Rwot, kono nene itye kany, kono omera pe oto.” Ento gen ki niye pa Marita pe orweny. En omedo ni: “Dok koni angeyo ni gin ducu ma ilego ki bot Lubanga, Lubanga bimiyi.” Cutcut Yecu owaco lok me jingo niyene: “Omeru bicer.”Jon 11:21-23.

19 Marita otamo ni Yecu onongo tye ka lok i kom nicer ma bibino i anyim, pi meno en ogamo ni: “Angeyo ni en bicer i cer me nino me agik[-ki].” (Jon 11:24) Niyene i kom pwony meno onongo tek mada. Lutela dini pa Lujudaya ma kilwongogi ni Lucadukayo onongo pe giye ni nicer tye, kadi bed meno obedo  pwony ma tye ka maleng i ginacoya. (Dan. 12:13; Mar. 12:18) Marita onongo ngeyo gire ni Yecu opwonyo i kom nicer dok ocero wa dano kadi bed ni ngat mo ki i kingi onongo pe orii i lyel calo Lajaro. En onongo pe ngeyo gin ma obitimme i cawa meno.

20. Tit tyen lok ma pire tek ma Yecu oloko ma kicoyo i Jon 11:25-27, ki tyen lok pa lagam pa Marita.

20 Yecu oloko lok mo ma pire tek mada: “An nicer ki kwo.” Ada, Lubanga Jehovah omiyo ki Wode teko me cero dano i wi lobo ducu i kare me anyim. Yecu openyo Marita ni: “In iye man?” Ci en omiyo lagam ma kiloko iye i acakki me dul man. En onongo tye ki niye ni Yecu obedo Kricito, nyo Meciya, ni en obedo Wod pa Lubanga Jehovah, dok ni en aye obedo ngat ma lunebi guloko pire con ni obibino i lobo.Jon 5:28, 29; kwan Jon 11:25-27.

21, 22. (a) Yecu onyuto ton cwinye pi lukumo nining? (b) Tit kong kit ma cer pa Lajaro obedo kwede.

21 Lubanga Jehovah ki Wode, Yecu Kricito, tika gitero niye calo pa Marita-ni calo gin ma pire tek? Gin ma otimme i nge lokgi miyo lagam-me ka maleng. Marita ongweco me lwongo laminne. I ngeye, en oneno ni cwiny Yecu oton matek mada i kare ma tye ka lok ki Maliam ki lukumo mukene mapol ma gitye kwede. En oneno ka pig wange oton i kare ma tye ka nyuto arem cwinye pi lit pa to. En owinyo ka Yecu waco ni omyero kingil kidi woko ki dog boro ka ma kikano iye kom omine.Jon 11:28-39.

22 Wi Marita tiko ngwec cawa ducu, pi meno en okwero woko kun waco ni kome myero obed ni tye ma ngwe pien dong orii nino angwen kulu. Yecu opoyo wiye ni: “Nakanen pe awacci ni, ka iye, ci ibineno deyo pa Lubanga?” En oye, omiyo en oneno deyo pa Lubanga Jehovah. I cawa meno cut, Jehovah omiyo teko bot Wode me cero Lajaro! Tam kong kit ma gin ma otimme-ni omoko kwede i wi Marita pi kare me kwone ducu: I kare ma Yecu olwongo Lajaro ni, “Lajaro, katti woko!”; gin gucako winyo gin mo ka tye ka yelle i boro ka ma kikano iye kom Lajaro i kare ma en tye ka a malo, ci guneno ka en bino mot mot i dog boro, ma kome kiboyo woko ki bongo; Yecu owaco ni “wugonye, wuweke ociti.” Ngene kene ni yomcwiny omiyo Marita ki Maliam gungweco gupoto i kor omingi. (Kwan Jon 11:40-44.) Arem cwiny ma onongo tye i cwiny Marita-ni orweny woko!

Marita onongo mot pi niyene i kom Yecu i kare ma en kacel ki Maliam guneno ka kicero omingi

23. Ngo ma Jehovah ki Yecu gimito timone piri, dok ngo ma omyero itim?

23 Gin ma otimme man nyuto ni cer pa jo muto pe obedo lek mo ata; Nicer obedo pwony me kwe cwiny ma tye i Baibul  dok lok me tekwaro bene moko. (Yubu 14:14, 15) Jehovah ki Wode gimaro miyo mot pi niye, kit ma gutimo kwede i kom Marita, Maliam, ki Lajaro. Mot ma kit man bibedo piri ka idongo niye matek.

“Marita Obedo ka Poko Cam”

24. Baibul miyowa lok me agikki ango i kom Marita?

24 Baibul oloko i kom Marita dong kicel keken. Man obedo i cabit me agikki me kwo pa Yecu i lobo. Yecu onongo ngeyo peko madit ma tye ka kure i anyim, pi meno en dok oyero me bedo i gang pa lareme i Betania. Ki kunu, en onongo biwoto wot pi mairo aryo me cito i Jerucalem. Yecu ki Lajaro onongo gitye ka cam i gang pa Cimon ma ladobo, kany aye wanongo iye lok me agikki i kom Marita ni: “Marita obedo ka poko cam.”Jon 12:2.

25. Pingo kacokke pa Lukricitayo me kare-ni gitye ki mot me bedo ki mon macalo Marita?

25 Dako ma latic matek man kite enu! I kare ma Baibul okwongo lok i kome, en onongo tye ka tic, i kare ma Baibul giko lok i kome en onongo pud tye ka tic, ma tye ka yelle ki tekke ducu me cobo jami ma mitte pi jo ma tye. Kacokke pa Lukricitayo i kare-ni bene gitye ki mot madit me bedo ki mon macalo Marita, ma cwinygi ber dok giparo pi dano, ma kare ducu giketo niyegi i tic ki jalle pi konyo jo mukene. Marita kono omedde ki bedo kit meno? Nen calo omedde kumeno. Ka obedo kumeno, ci niyene myero obed ni okonye me kanyo peko ma tye anyim.

26. Ngo ma niye pa Marita okonye me timone?

26 I nge nino manok keken, Marita okanyo cola me to pa Yecu. Medo i kom meno, Luparicayo ma guneko Yecu onongo gumoko tamgi me neko Lajaro bene, kit ma cerre onongo tye ka jingo niye pa jo mapol. (Kwan Jon 12:9-11.) Ngene kene ni, motmot to opoko kin Marita ki omine ki laminne me amara. Pe wangeyo awene ma meno otimme kwede, ento gin acel ma waromo bedo iye labongo akalakala aye ni: Niye pa Marita okonye me ciro can wa i agikki. Meno aye omiyo ber bot Lukricitayo me kare-ni me lubo lanen me niye pa Marita.

^ para. 11 I kare pa Lujudaya me cencwari me acel, mon onongo pe gibedo i lok madok i kom kwan. Pwonygi onongo polle dok i kom tic me paco. En aye oromo bedo ni omiyo Marita oneno ni pat mada pi dako me bedo ka nget lapwony mo pi nongo pwony.